E káos riba Twitter for di momentu ku Elon Musk a atkirí e plataforma dos luna pasá ta kousando daño na su otro kompanianan. Esaki a kulminá e siman aki den un anunsio ku Musk ta retirá komo CEO di Twitter asina ku e haña un kandidato adekuá pa manehá e plataforma.
Twitter mester a bira un plataforma pa libertat di ekspreshon, pero poko despues di e atkisishon di e kompania Muska a lanta un diskushon riba kobramentu pa “blue ticks”. Tambe el a reaktivá e kuentanan di vários usuario kontroversial manera Donald Trump i e artista Ye. Asina a sigui vários insidente mas manera su intentonan pa para e account @elonjet. Tur e insidentenan aki a kulminá pues den anunsio di su retiro komo CEO despues di un enkuesta ku e mes a tene bou di su 122 mion siguidónan. Einan kasi 58% di su siguidónan a indiká ku ta mihó kos ku e por hasi.
E káos rondó di Twitter no tabata sin konsekuensha pa su otro kompanianan.
Elon Musk tabatin un éksito komersial nunka bisto ku su kompanianan SpaceX i Tesla pa kua el a hala hopi invershonista. Despues di su aventura ku Twitter kos a kambia. Kuminsando ku kaida di advertisement riba Twitter di kompanianan grandi. Mas aleu ta kalkulá ku Musk a bende alrededor di 23 mil mion dòler (un suma di 11 sifra) na akshonnan di Tesla pa tapa pèrdidanan di Twitter.
Entretantu e kompania a pasa den sentido komersial dor di un di su pió añanan. E balor di akshonnan di Tesla a baha e aña aki ku mas di 60%. Hopi akshonista di Tesla no a keda kontentu ku nan invershonnan tabata disparsé den Twitter i a hala atras. Esnan ku tin sèn den Tesla ainda a èksigí di Musk pa e konsentrá riba su otro kompanianan atrobe.
Su otro kompania SpaceX tambe ta kore peliger dor di e eskapada ku Twitter. E konsekuenshana finansiero te asina leu ta parse limitá si tene kuenta ku SpaceX no ta un kompania ku ta bende stocks. Tòg direktor di NASA Bill Nelson a aserká CEO di SpaceX Gwynne Shotwell pa ta na altura di Musk su prioridatanan.
Ta asina ku Lockheed Martin, ku tambe ta traha ku i pa NASA, a pèrdè hopi kapital dor di un mensahe riba Twitter proveniente di un fake account. Via e account ei, LockheedMartini, a kompartí un mensahe anunsiando un paro di benta di arma na paisnan manera Merka i Israèl.
I asina vários otro kompania a keda perhudiká pa e káos riba Twitter. Ta keda e pregunta ta ken ta esun ku lo mester bin para e kaida di Twitter a korto plaso pa Musk por atendé ku e káos den su otro kompanianan.
ByteDance, e kompania Chines propietario di e ret sosial TikTok, ta rekonosé ku el a atkirí datonan di usuario di un forma ilísito. Ta trata aki di informashon di un periodista di e korant Merikano Financial Times. TikTok lo a purba lokalisá su lokalidat relashoná ku un kaso di lèkmentu di informashon. Asina e korant mes a skirbi basá riba un email interseptá di e direktor di ByteDance. TikTok a bisa den un reakshon riba e relato di Financial Times ku e ta bai investigá e kaso ekstesivamente promé ku e kompania bin ku un reakshon ofisial.
Na Merka pa algun tempu kaba tin preokupashon ku e seguridat di e app TikTok. E app lo ta registrá informashon di Merikanonan ku despues ta pasa pa gobièrnu di China, un ponensia ku e gobièrnu Chines ta desmentí rotundamente. Siman pasá kaba Senado Merikano a pasa un lei ku ta prohibí funshonarionan públiko instalá TikTok riba nan telefòn di trabou.
Di otro banda tin palabrashonnan tumando lugá pa datonan di usuarionan Merikano keda wardá riba servers na Merka mes. E plan ta pa usa servers di e kompania Oracle.
Arkeólogonan rònt mundu ta den shòk. Na Oustralia deskonosínan den un akto di vandalismo a destruí pinturanan Aboriginal di mas di 30 mil aña. Te ku e momentu trágiko aki no tabata parse ku tabatin mester di vigilansha na e kueba kaminda e tesoronan arkeológiko aki tabata pintá.
E daño ta ireparabel. E kulpabelnan a kras graffiti riba arte ku tin míles di aña. E destrukshon tabata algun luna konosí kaba serka un grupo ku a bai investigá na e kueba, pero ta awor numa e suseso ta konosí via un artíkulo den korant na Oustralia.
E pèrdida ta sigur lamentabel konsiderando ku ta trata di un sitio ku un status internashonalmente protehá. E komunidat Aboriginal ku ta biba den e region ainda, a èksigí di gobièrnu pa regla mihó protekshon pa nan herensha ansestral.
Merka ta bai duna Ukrania un pakete di sosten di alrededor di 40 mil mion dòler, kompañá pa material militar manera sistemanan anti rakèt avansá di e tipo Patriot. Asina presidente Joe Biden a anunsiá despues di un enkuentro personal ku presidente di Ukrania Volodymyr Zelensky kende ta di bishita na Merka.
Durante e bishita el a duna un diskurso na parlamentu Merikano kaminda el a gradisí pa e yudansa pa su pais. Ta pa promé biaha for di kuminsamentu di e konflikto ku Rusia ku Zelenski a bandoná su pais. Rusia a duna di konosé den un reakshon di no ta spera nada bon di e bishita i ku esaki probablemente lo resultá den mas tenshon.
E kantidat di Hulandes sin religion ta sigui oumentá. Kasi 6 den kada 10 Hulandes di 15 aña òf mas no tin religion. Asina por konkluí for di sifranan di Centraal Bureau voor de Statistiek (CBS) na Hulanda. E aña aki e porsenthae ta na 58%, miéntras ku aña pasá 55% di Hulandesnan no tabata bai misa mas.
Si nos wak bèk riba aña 2010, 45% di Hulandesnan a bisa den enkuesta ku nan no tin religion òf no ta bai misa. Ounke ketu bai nan ta forma e grupo religioso mas grandi na Hulanda, en partikular e kantidat di katólikonan ta parse di ta bahando. Aña pasá 18% di Hulandesnan a indiká di ta katóliko. Esaki ta igual na dos tersera parti di e 27% ku a indiká den 2010 di ta katóliko. Protestantismo ta e di dos koriente religioso mas grandi na Hulanda.
Na último momentu èks promé minister Benjamin Netanyahu a partisipá ku Israèl tin un gobièrnu nobo. Ta trata aki di e gobièrnu mas derechista den historia di e pais. Den su koalishon nobo Netanyahu tin sosten di por lo ménos 1 partido ultra derechitsa i 2 otro partido ultra òrtodòks. Netanyahu mes a bisa den un mensahe riba Twitter ku ta trata di un gobièrnu ku por konta ku hopi sosten di elektorado.
E formashon di e gobièrnu lo mester finalisá otro siman. Analistanan ta antisipá riba un periodo tumultoso. E partidonan ku Netanyahu ta bai traha ku n’e tin eksigenshanan basta kontroversial ku por resultá den basta polarisashon. Netanyahu a kambio por konta ku nan sosten pa yuda para algun investigashon di korupshon kontra su persona via parlamentu.
Na Canada un wes a habri kaminda pa mayornan por demandá e fabrikante Epic Games kolektivamente. Epic Games ta kreador di e, tambe na Kòrsou, konosido computer game Fortnite. Segun e mayornan nan yunan lo a neglishá nan mes dor di adikshon na e wega.
Den nan demanda e mayornan ta argumentá mas aleu ku Fortnite ta diseñá pa ta adiktivo, butando ku mucha ta malkomportá i lubidá kome i drumi. E wes ku a aprobá pa e kaso tuma lugá a hasi un komparashon ku algun dékada pasá ora ku a deskubrí e efektonan adiktivo di sigaria.
Fortnite ta un wega grátis i basta popular serka hopi hóben lokal i den eksterior ku ta konektá ku otro via internet. For di un prinsipio Epic Games tabatin hopi éksito komersial ku e wega. Fortnite ta konta alrededor di 350 mion gamer rònt mundu, inkluso esnan na Kòrsou.
A pasa algun aña, pero finalmente èks presidente di Merka Donald Trump mester publiká su devolushonnan di impuesto entre 2015 i 2020. Asina un komishon den parlamentu Merikano a disidí. E komishon ta bai raportá su deskubrimentunan huntu ku e respektivo dokumentonan na parlamentu Merikano.
Trump tabata e promé presidente den 40 aña ku a ninga di publiká kiko e ta haña bèk di e servisio di impuesto Merikano. Segun su kontrinkantenan ta un señal ku Trump tin algu di skonde. Asina tin rumornan ku Trump tabata raportá pèrdidanan grandi den su kompanianan pa asina paga masha tiki impuesto. Awor parlamentu Merikano ke investigá si e papelnan a wòrdu yená korektamente.
Peruanonan ta bai urna den 2024 i no den 2026. Asina e parlementu di e pais a disidí ku 2/3 parti pa adaptá e konstitushon di tal forma ku e elekshon por tuma lugá mas promé. Próksimo aña e lei lo keda adoptá pa konsolidá e desishon. E intenshon ta pa aliviá e krísis polítiko na Perú despues ku parlamentu a manda èks presidente Pedro Castillo kas pa entre otro korupshon. Korte Supremo a disidí ku Castillo mester keda detené pa sigur 18 luna.
Hende muhé no ta pèrmití mas na universidatnan di Afganistan. Asina e ministerio di enseñansa di e régimen di Taliban a disidí te próksimo aviso. E prohibishon ta konta pa tantu universidatnan públiko komo esnan privá. E paso aki ta sigui otro medidanan ku e gobièrnu nobo di Afganistan a tuma relashoná ku posishon di hende muhé den e pais, ku a mira mayoria di nan libertatnan bai atras bou di e régimen Islámiko di Taliban.
Tambe resien e régimen a duna òrdu na wesnan pa reintrodusí e sekshonnan mas severo di sharia, e lei Islámiko ku ta pèrmití ehekushonnan públiko i kastigu di morto ku piedra. Taliban a yega bèk na poder aña pasá despues di dos dékada di okupashon Merikano.
E edishon mas resien di Curaçao Data Days na Marriott Beach Resort tabata un éksito rotundo. E evento ta forma parti di un serie di konferensha riba digitalisashon i ta organisá pa Smart Nation Curaçao.
Durante e Data Days vários lider den tantu sektor públiko komo sektor privá ta elaborá i hasi presentashon riba e maneranan pa yega na e meta pa transformá Kòrsou den un “digital economy and socially balanced society”.
5W Press a kòmbersá ku bosero di e evento Leonardo de Abreu Ladeira riba e propósito di e serie di konferensha aki.
Despues di 25 aña i temporada e serie popular Pokémon ta bai kontinuá sin su protagonistanan Ash Ketchum i su Pokémon favorito Pikachu. Asina The Pokémon Company a partisipá riba Pokémon.com. Próksimo aña e serie lo tin un otro historia i lo kontinuá ku e trainers Liko i Roy. Tambe lo tin partisipashon di kriaturanan konosí di e game nobo Pokémon Scarlet & Violet.
Den e serie benidero lo tin momentu ku lo para ketu riba e aventuranan di Ash i Pikachu. E promé serie di Pokémon a estrená den 1997 na Hapon. Durante e serie fanátikonan por a sigui kon Ash Ketchum ta realisá su soño di bira e mihó Pokémon trainer den historia. De e último temporada, por fin el a bira kampion mundial.
E plataforma Twitter ta bai restourá tur e kuentanan di periodista ku a haña un blokeo siman pasá. Elon Musk, propietario di e plataforma, a duna di konosé ku el a tuma e desishon aki despues di un enkuesta kaminda el a puntra si mester a eliminá e blokeo.
Siman pasá Musk a blòkia e kuenta di vários periodista ku, manera el a indiká, tabata skirbi riba i kompartí su lokalidat dor di sigui e kuenta @elonjet, un account ku tabata sigui tur movementu di e jet privá di Elon Musk. Vários periodista di agensianan prominente manera CNN i The New York Times a haña un blokeo siman pasá pa motibu ku, manera Muska a argumentá, tantu e komo su famia tabata kore peliger dor di publikashonnan di e periodistanan.
E desishon a resultá sinembargo den basta krítika entre otro for di Nashonnan Uní i Reporters Without Borders, un organisashon ku ta vigilá libertat di prensa rònt mundu.
Awe djaluna ta eksaktamente 50 aña pasá ku e último mishon Apollo pa luna a tuma lugá, ku otro palabra e último biaha ku astronoutanan a bishitá luna. Mayoria hende ta konosí ku e promé mishon ku entre otro Neil Armstrong den 1969, pero de echo Eugene Cernan i Harrison Schmitt ta e último dos sernan humano ku a buta pia riba e ruman chikitu di nos planeta durante e mishon Apollo-17.
Tin sigur 5 mishon a tuma lugá i na total tin sigur 12 persona ku a buta pia riba luna entre 1969 i 1972. No ta sin motibu ku awe ta para ketu riba e dia históriko aki. Pa 2025 NASA a plania otro biahe pa luna ku e programa Artemis, pero ta trata di un proseso mas largu ku tin ku resultá den un biahe pa planeta Mars, pero esaki lo tuma lugá ku tur probabilidat despues di 2030.
E kantidat di mortonan dor di kontagio ku Covid-19 na China ta oumentando rápidamente. E subida di repente aki ta sigui despues ku gobièrnu a disidí suavisá medidanan pa kombatí plamamentu di e malesa. E mayor kantidat di kontagio ta registrá na Shanghai i Beijing.
Outoridatnan a mira nan obligá di suavisá medida despues di un kantidat grandi di protesta den vários parti di e pais den simannan tras di lomba. Segun koresponsalnan di vários agensia di prensa internashonal trahando na China e krematorionan di e pais ta drai konstantemente pa prosesá e kantidat di mortonan. No por otro pasobra frizernan di mortuarionan ta kompletamente yen, miéntras normalmente ta tuma 5 dia promé ku un kremashon òf entiero.
Segun estudionan riba e situashon na China, e medidanan ekstremo di gobièrnu a buta ku hopi Chines no a yega di haña e malesa i pa e motibu ei te ku aworakí masha poko Chines tin resistensha natural kontra Covid.
