Trump Organization kulpabel di froude fiskal

Trump Organization kulpabel di froude fiskal

The Trump Organization ta kulpabel di froude fiskal. Asina un hurado a disidí den un kaso entamá na New York. For di un investigashon ku a dura sigur tres aña a resultá ku e kompania di èks presidente Donald Trump a yuda funshonarionan haltu evadí impuesto.

Trump Organization kua ta manehá vários hotels, kampo di gòlf i otro imobilarionan rònt mundu mester tene kuenta ku un multa di 1.6 mion dòler. En prinsipio e montante ei no ta masha haltu pa un kompania manera Trump organisation, pero di otro banda e daño finansiero por akumulá na momentu ku invershonistanan disidí hala atras for di un kompania ku tin un kondena registrá.

Hopi prueba a bin dilati dor di konfeshonnan di e direktor di e kompania Allen Weisselberg, kende a duna informashon balioso a kambio di redukshon di kastigu. Weisselberg ta bai será pa 5 luna. Trump Organization a bisa den un reakshon di lo apelá e kaso.

Frakshon demokrátiko ta logra reforsá mayoria den Senado Merikano

Frakshon demokrátiko ta logra reforsá mayoria den Senado Merikano

E frakshon demokrátiko na Merka a logra reforsá su mayoria den Senado Merikano ku un viktoria den di dos buèlta na estado Georgia. Akinan e demókrata Raphael Warnock a gana di e republikano Herschel Walker. Durante e elekshon luna pasá ningun di nan a logra un mayoria apsoluto, i p’esei mester a tene un di dos buèlta.

E demókratanan no tabatin mester di e asiento aki por sierto ya ku nan tabatin un mínimo di 50 asiento kaba, plùs e asiento desisivo di visepresidente Kamala Harris. E viktoria di Warnock sigur ta kumbiní e demókratanan akaso un miembro disidí vota diferente. aparte di esei un mayoria den senado ta garantisá influensha riba posibel kandidatonan pa Korte Supremo. Tambe Senado por para un eventual proseso di impeachment di un presidente.

Cristina Fernández de Kirchner sentensiá na 6 aña di prison pa malversashon

Cristina Fernández de Kirchner sentensiá na 6 aña di prison pa malversashon

Korte na Argentina a sentensiá visepresidente Cristina Fernández de Kirchner na 6 aña di prison pa malversashon di alrededor di 1000 mion dòler. Tambe el a haña un prohibishon pa okupá funshonnan públiko pa restu di su bida. Pero mirando ku Kirchner ta miembro tambe di Senado di Argentina e no por keda detené. Ademas apelashon di e desishon por resultá den un retraso ku por dura algun aña.

Kirchner ta sospechá di a favoresé e magnate di konstrukshon Lázaro Báez ku 51 proyekto di obra públiko pa un balor total di 1000 mion dòler. Despues a resultá ku gobièrnu a paga dimas pa e proyektonan òf ku nan no a keda finalisá. Aparte di esei Báez ta un konosido aliado polítiko di Kirchner i su kasá defuntu Nestor ku tabata presidente di 2003 pa 2007. Su susesor tabata Kirchner mes kende a okupá e posishon di 2007 te 2015.

Kirchner, kende ta visepresidente for di 2019, ta sospechá mas aleu di labamentu di plaka den otro kaso ku ta embolbé tambe su dos yunan.