E konosido kantante Celine Dion a kanselá tur su konsiertonan pa kuminsamentu di próksimo aña. E artista a anunsiá riba su kuenta di Instagram ku e ta sufri di stiff-person-syndroom, un malesa ku no ta paresé dje frekuente ei. Segun estimashonnan 1 den kada mion persona ta haña e malesa neurológiko aki ku ta afektá e sistema di imunidat tambe.
E malesa lo a afektá Celine su kapasidat pa kana i kanta. E artista a bisa den un mensahe konmovedor na su fanátikonan ku e ta sinti nan falta i ku e ta spera di por kontinuá su konsiertonan pronto atrobe. Celine Dion no a hasi konsierto mas for di kuminsamentu di e pandemia di Covid-19.
Google mester eliminá, o sea ‘delete’, resultadonan di búskeda si usuarionan por proba ku informashon klaramente no ta kuadra. Asina e Korte di Hustisia di Union Oropeo a disidí. Den e desishon e korte a bisa ku e derechi pa wòrdu lubidá ta pisa mas ku libertat di ekspreshon i informashon.
E desishon a bin dilanti den un kaso entamá dor di 2 direktor di un kompania di invershon ku a hasi un petishon pa kita sierto search result. Sierto website tabata kritiká nan modelo di invershon di nan kompania. Nan petishon tabata inkluí tambe pa delete sierto potrèt. Inisialmente Google no kier a otorgá e petishon indikando ku e no ta obligá pa verifiká si e informashon tabata korekto òf nò.
En prinsipio e desishon di e korte ta no ta nifiká ku awor tur hende mester bai korte. Básikamente esun ku kier entregá un petishon pa kita informashon ku no ta kuadra mester entregá prueba na Google ku ta trata di informashon falsu. E derechi di wòrdu lubidá ta ankrá den lei Oropeo for di 2014. For di e momentu ei bon mirá ya kaba por a hasi petishon pa kita informashon ku no ta kuadra si tin prueba di esei.
Den práktika e desishon ta nifiká ku Google lo kita e resultadonan, pero no tin influensha riba e website original di e informashon.
A partir di próksimo aña Sur Koreanonan por selebrá nan kumplimentu di aña segun e kalènder ku nos ta usa den nos parti di mundu. Ta asina ku parlamentu di e pais ta bai abolí e forma tradishonal di kalkulá dianan di kalènder i adoptá e kalènder oksidental. Esei ta nifiká ku nan edat lo keda kalkulá meskos ku nos, esta den dia, luna i aña a partir di e fecha di nasementu.
Den e sistema aktual Sur Koreanonan tin un aña kaba a partir di e fecha di nasementu. Riba promé di yanüari tur hende ta hasi aña pareu. Ku otro palabra, un baby nasé riba 31 di desèmber ya por tin 2 aña di edat despues di tiru den e sistema aktual. E kambio lo drenta na vigor a partir di yüni próksimo aña.
