Hulanda i Hapon ta sigui Merka i ta adaptá eksportashon di chips na China

Hulanda i Hapon ta sigui Merka i ta adaptá eksportashon di chips na China

Hulanda i Hapon ta bai adaptá eksportashon di mashin pa traha chips pa computer na China. Ku e paso aki e dos paisnan a adoptá e reglanan Merikano imponé riba China. Asina e revista Bloomberg a informá djaluna. Merka, Hulanda i Hapon ta e eksportadónan mas grandi di mashin pa traha chip na mundu. Di e forma aki en partikular Merka ke influenshá e desaroyo di chips avansá na China. Segun Merka por usa esakinan pa finnan militar tambe.

Hulanda partikularmente a disidí ku e kompania na Veldhoven, esta ASML, lo no entregá su mashinnan mas avansá mas na China, esaki apesar di Merka su deseo pa para tur eksportashon di tur mashin pa traha chips. ASML ta e mayor produktor di chips na mundu, siguí pa Canon, Nikon i Tokio Electron. ASML no ta antisipá pèrdida ya ku e trend den nos parti di mundu ta mustra un subida den e demanda pa computer chips.

Komishon Oropeo ta bai vigilá instanshannan Oropeo riba korupshon

Komishon Oropeo ta bai vigilá instanshannan Oropeo riba korupshon

Presidente di komishon Oropeo Ursula von der Leyen a lanta un komishon étiko ku tin ku vigilá instanshannan Oropeo riba korupshon. E desishon ta sigui despues ku djaluna a lanta basta pregunta relashoná ku detenshon di vários miembro di Parlamentu Oropeo den wikènt. Ya lo tin 20 entrada hudisial ehekutá.

E konfiansa den Union Oropeo ta bou di basta preshon. Asina tin detenshonnan a tuma lugá relashoná ku pagonan risibí di Qatar pa influenshá e parlamentu. Te asina leu Qatar ta kontradesí e aksusashonnan.

Asina tin vários otro miembro di e parlamentu ku ta embolbí den kasonan di entre otro labamentu di plaka. Te asta visepresidente di parlamentu Oropeo, e sosial demókrata Griego Eva Kaili, lo ta embolbé den e práktikanan aki. Lo ta trata segun BBC di un di e mayor eskándalonan den historia di Union Oropeo.

Presidente nobo di Perú ta aselerá elekshonnan presidensial ku 2 aña

Presidente nobo di Perú ta aselerá elekshonnan presidensial ku 2 aña

E presidente nobo di Perú Dina Boluarte ta bai aselerá elekshonnan presidensial ku dos aña. Asina e presidente a anunsiá na televishon. Di e forma aki Boluarte ke baha tenshon den e pais despues di a retirá èks presidente Pedro Castillo den un votashon parlamentario. Parlamentu a retirá Castillo i laga deten’e pa “inkapasidat moral” i “rebeldia” despues ku el a purba disolvé parlamentu pa para un votashon kontra su posishon.

E desishon a lanta konsternashon bou di e siguidónan di Castillo ku a bai manifestá den kaya pa èksigí su libertat. Esaki a bin resultá den bastante konfrontashon físiko ku polis, kondusiendo entre otro den wikènt den morto di sigur dos manifestante na e siudat Andahuaylas. Einan manifestantenan a pega un airport na kandela i tene agente polisial i kolaboradó di aeropuerto rehen.