E aktornan Will Smith i Martin Lawrence a konfirmá djamars riba Instagram ku tin un di kuater pelíkula Bad Boys na kaminda. E pelíkula ya ta den pre-produkshon na Sony Pictures i lo keda dirigí pa e direktornan Adil El Arbi i Bilall Fallah.
E saga di Bad Boys a kuminsá den 1995 ku Bad Boys, siguí den 2003 pa Bad Boys II. 17 aña despues e direktornan a lansa e di tres pelíkula Bad Boys for Life. E di 4 pelíkula a keda anulá vários biaha i a kambia vários biaha di direktor tambe. No tin klaridat ainda kiko lo ta e título i fecha di lansamentu di e di 4 Bad Boys.
Sony ta bai produsí ménos brel pa virtual reality pa PlayStation 5. Esaki debí na un kantidat desepshonante di pre-order. Asina agensia di prensa Bloomberg a publiká djamars. Anteriormente e kompania tabata bai produsí alrededor di 2 mion unidat pa e lansamentu próksimo aña, pero awor e kantidat ta fihá na 1,5 mion unidat. Fuentenan na Sony a duna di konosé si ku si e demanda di pre-order subi ku e kantidat lo adaptá.
E fábrika ku ta trahando e pantayanan pa e brel virtual pa Playstation 5 mester tene kuenta ku Sony ta bai adaptá nan pedido. E lansamentu di e brel virtual pa Playstation 5 ta planiá pa próksimo aña mart / aprel. E preis ta kalkulá te asina leu na mas o ménos 650 dòler pa kada brel.
E app Spotify a mira e kantidat di abonadonan ku ta paga pa e servisio oumentá te na 205 mion den e último kuartal di 2022. Asina e kompania a anunsiá djamars. Na total Spotify tin di momentu 489 mion usuario ku ta paga òf usa e vershon grátis di Spotify. Esaki ta nifiká ku mas o ménos 6,5 porshento di tur hende na mundu ta usa e app.
No opstante esaki, e kompania ta drai pèrdida. Esaki dor ku e kompania ta saka hopi sèn pa atraé usuarionan ku podcasts i audio books. Aparte di esei Spotify tin ku paga kasi 70% di su resultado na kompanianan diskográfiko pa kompensá derechinan di outor di e musik riba e plataforma. Apesar di un resultado impreshonante pues di kasi 3500 mion dòler, asina mes e pèrdida ta kalkulá na mas di 250 mion dòler.
Na Alemania tin entretantu 55 persona detené pa preparashon di un gòlpi di estado. For di fin di aña pasá e divishon di kombatimentu di terorismo na Alemania a señalá un organisashon ekstremoderechista yamá Reichsbürger. E miembronan di e organisashon no ta rekonosé e repúblika di Alemania den su forma aktual i ke restourá e imperio Aleman ku segun nan a èksistí entre 1871 i 1945 i te ainda lo ta èksistí klandestinamente.
Den desèmber outoridatnan a detené sigur 25 persona ku tabatin plan pa kometé un serie di atake terorista riba parlamentu pa asina tuma poder na Alemania. For di e momentu ei regularmente polis a haña pista pa detené otro miembronan di e grupo. Di e 55 sospechosonan detené 54 ta di Alemania i unu ta kedando na Italia. 24 di esnan na Alemania ta será te ora ku nan kaso keda tratá.
Direktor di e app TikTok Shou Zi Chew ta bai hasi un bishita na Kongreso Merikano den mart. Meta di e bishita ta pa e paresé dilanti un komishon di Kongreso Merikano ku ta preokupá ku privacy di usuarionan di TikTok, e siguridat di e datonan wardá i si gobièrnu di China ta disponé di e datonan aki. Mas aleu tin preokupashon ku hóbennan lo ta mira muchu imágen ku ta malu pa nan riba e app i ku nan lo por bira víktima di abusu seksual via e app.
Merka tin alrededor di 100 mion usuario di TikTok, práktikamente un tersera parti di e pais ta riba TikTok, en partikular hóben i adultonan yòn. Di momento tin gruponan den e Kongreso Merikano ku ke un prohibishon total riba TikTok na Merka pa salbaguardiá siguridat nashonal. Algun luna pasá a lanta basta konsternashon despues ku a resultá ku lo a warda datonan di un periodista di e revista Forbes pa pasa esakinan despues pa gobièrnu di China.
Jaafar Jackson, yu di Jermaine Jackson, ta bai protagonisá den un pelíkula riba su tio Michael Jackson. Asina direktor Antoine Fuqua a anunsiá riba su kuenta di Instagram. Jaafar, ku di momentu tin 26 aña, lo tin e ròl prinsipal di su tio Michael Jackson den e pelíkula titulá Michael. Ta por sierto e promé ròl den un pelíkula pa Jafaar.
E pelíkula Michael lo kubri e trayektoria di Michael Jackson di for di tempu ku el a kuminsá te ku e momentu ku el a konkistá mundu ku su musik. E pelíkula lo keda produsí den konsulta ku e famia di Michael Jackson. Segun e kompania produktor Lionsgate e pelíkula ta bai kubri kasi hinter Michael su bida. No tin klaridat ainda si e aspektonan mas kontroversial di Michael Jackson lo haña atenshon den e pelíkula.
Unda Kòrsou lo ta den 2030? Kon siudadanonan individual por yuda duna forma na e Kòrsou di futuro? 5W Press a kòmbersá ku Miguel Goede, inisiadó di Vishon Kòrsou 2030.
Mondialisashon, òf globalisashon si bo ta preferá, not ta un prioridat mas. Asina prensa internashonal ta wak bèk riba e di 53 World Economic Forum na e lugá Davos na Suisa siman pasá. E World Economic Forum ta kaminda lidernan di pais, e kompanianan mas grandi i bankeronan ta topa ku otro pa reuní, lobby i drenta den kontakto personal ku otro.
E aña aki a papia entre otro riba e asina yamá Inflation Reduction Act (IRA), un pakete di supsidio di kasi 370 mil mion dòler ku presidente di Merka Joe Biden a reservá pa produkshon di energia limpi riba nivel lokal. Tin basta pregunta si e medida ei no ta un indikashon ku paisnan poderoso a kuminsá enfoká mas riba nan propio interesnan dor di e tenshonnan geopolítiko di momentu ku ta stroba sierto ruta di suministro di komèrsio. Esaki riba su turno por afektá otro paisnan mas chikitu ku ta dependé pa gran parti di e rutanan mas efisiente di akuerdo ku representantenan for di India i Áfrika. E partikular e paisnan ei no tin e mesun reservanan pa por otorgá supsidionan lokal si ayudo for di paisnan mas grandi.
Al final medionan internashonal no ta masha positivo riba e World Economic Forum mas resien. Hopi lider di taya manera Joe Biden i Vladimir Putin i Xi Jinping di China no tabata presente. Loke si por a nota durante e World Economic Forum tabata e presensia di selebridatnan di farándula mundial.
E preis di kambio mundial di euro a pasa 1.09 dòler riba djaluna. Esaki ta e nivel di preis mas haltu registrá for di aprel 2022. Esaki pa motibu di un pronóstiko di interes mas haltu den e asina yamá eurozone. Aña pasá euro su balor tabata ménos pa un temporada.
Segun analistanan no ta straño ku e balor di euro a subi atrobe. E miedu pa un reseshon mundial ta ménos fuerte ku antisipá despues ku preis di gas natural a baha. Ademas Banko Sentral di Oropa lo subi e ínteres den lunanan benidero pa asina kontené inflashon mas tantu posibel. Pa basta tempu e balor di euro tabata mas ku esun di dòler. Den 2008 por ehèmpel 1 euro tabata bal 1.58 dòler.
A partir di e momentu ei ta baha so e balor di euro a keda baha. E bahada ei a aselerá e aña aki dado ku Merka a subi su interes hopi mas lihé ku Union Oropeo pa kontené e inflashon haltu den e pais i hasi dòler mas atraktivo. Esei a buta ku na ougùstùs último pa promé biaha den 20 aña ku euro tabata mas barata ku dòler Merikano i awor numa ta bal mas tantu atrobe ku e preis di dòler den aprel 2022.
E núkleo interior di nos planeta no ta drai mas den e mesun direkshon ku nos planeta. Asina seismólogonan Chines a publiká den e revista Nature Geoscience. Un dado momento e núkleo aki a te asta kuminsa drai den sentido kontrali. E núkleo interior di nos planeta tin forma di un bola di metal un poko mas chikitu ku nos luna i ku ta konsistí mas aleu di heru i nikel. E bola aki ta lokalisá parti paden di e núkleo eksterior di lava.
E bola lo a stòp di drai den mesun direkshon den 2009 pa despues kuminsá bira den sentido kontrali. Segun e estudio e fenómeno ta repetitivo kada 35 aña i pues no ta trata di un insidente nobo. E konklushon ta a base di vários insidente di temblor den historia. Segun e sientífikonan sernan humano no ta ripará nada di e fenómeno aki aparte di temblornan regular.
E deskubrimentu ta keda sinembargo un teoria por lo pronto. Pa yega na e núkleo di nos planeta lo mester bora kasi 6 mil kilometer i e ekipamentu pa por hasi esei simplemente no ta èksistí.
Facebook ta bai amplia un tèst ku mensahenan enkriptá, esta mensahenan protegé kontra akseso di terseronan. Asina propietario di Facebook Meta a anunsiá. Miónes di usuario ta bai haña èkstra protekshon.
Pa un tempu kaba Facebook ta hasiendo un tèst bou di un grupo chikitu di usuario di e app Messenger. E mensahenan den e grupo ei ta mandá den kódigo ku end-to-end encryption pa protegé nan privasidat. Ta esun ku ta manda e mensahe i esun ku ta risibí esaki so tin akseso na e kòmbersashon e ora ei. E usuario no tin mester hasi nada èkstra pa esei.
Rònt mundu mas di mil mion usuario di Facebook ta hasi uso di Messenger. No ta konosí kon grandi e siguiente grupo ku Meta ta bai hasi e tèst ku n’e ta. E kompania mes ta papia di miónes. Pero e meta di e tèst ta pa implementá esaki paso a paso pa tur usuario. Una bes ku e encryption ta implementá nos lo ripará esaki ku un mensahe komparabel ku esun riba WhatsApp.
E asina yamá Doomsday Clock ta pará na 11or, 58 minüt i 30 sekònde, kua ta nifiká ku e orario simbóliko aki ta pará 10 sekònde mas serka di 12or kompará ku e biaha anterior ku a kambia e orario. Nos ta pará pues 90 sekònde apartá for di 12or, kua ta nifiká ku nunka ántes nos tabata asina serka di fin di humanidat manera nos konos’é aworakí.
E Doomsday Clock ta un sistema simbóliko desaroyá 76 aña pasá pa sientífikonan i polítikonan ku ta manehá esaki via e organisashon Bulletin of Atomic Scientists na Chicago.
E mayor motibu pa e kambio di orario aki, e di 26 okashon, ta e situashon na Ukrania. Segun e organisashon e invashon di parti di Rusia ta bai kontra vários akuerdo ku a hasi siguiendo e di dos guera mundial. E ta lanta e pregunta profundo kon paisnan lo atendé ku otro den futuro di akuerdo ku e organisashon. Ta bin aserka ku e deklarashonnan ku Rusia a hasi relashoná ku krítika for di eksterior ta buta kòrda riba e mesun lenguage ku a hera di resultá den un konflikto nuklear den pasado den tempu di e asina yamá krísis di Cuba na 1962.
Mas aleu e sientífikonan ta opservá ku humanidat ta menasá tambe pa kambio di klima, e pandemia ku nos a kaba di pasa dor di dje, teknologia divisivo i plamamentu di informashon falsu. Tur e aspektonan aki ta kontribuí na deterioro di humanidat.
E Doomsday Clock a originá den 1947 i tabata pará e tempu ei na 7 minüt pa 12, ora ku un guera nuklear mundial tabata menasá nos planeta. Delaster biaha ku e orario a kambia tabata na 2019 ora ku el a bai 11or, 58 minüt i 20 sekònde. Delaster biaha ku e Doomsday Clock tabata mas alehá for di 12or tabata den 1991, na final di guera friu, ora ku e oloshi a bai para na 17 minüt pa 12or.
E nominadonan pa e di 95 edishon di Oscars riba 12 di mart próksimo ta konosí! E pelíkula ku ta nominá den mayoria kategoria ta e pelíkula Everything Everywhere All at Once, ku a keda nominá pa por lo ménos 11 kategoria. Esakinan ta e nominashonnan prinsipal:
Mihó pelíkula
All Quiet on the Western Front
Avatar: The Way Of Water
The Banshees of Inisherin
Elvis
Everything Everywhere All at Once
The Fabelmans
Tár
Top Gun: Maverick
Triangle Of Sadness
Women Talking
Mihó direktor
Todd Field (Tár)
Ruben Östlund (Triangle Of Sadness)
Steven Spielberg (The Fabelmans)
Martin McDonagh (The Banshees of Inisherin)
Daniel Kwan & Daniel Scheinert (Everything Everywhere All at Once)
Mihó protagonista femenino
Ana de Armas (Blonde)
Cate Blanchett (Tár)
Andrea Riseborough (To Leslie)
Michelle Williams (The Fabelmans)
Michelle Yeoh (Everything Everywhere All at Once)
Mihó protagonista maskulino
Austin Butler (Elvis)
Colin Farrell (The Banshees of Inisherin)
Brendan Fraser (The Whale)
Paul Mescal (Aftersun)
Bill Nighy (Living)
Mihó ròl sekundario femenino
Angela Bassett (Black Panther: Wakanda Forever)
Hong Chau (The Whale)
Kerry Condon (The Banshees of Inisherin)
Jamie Lee Curtis (Everything Everywhere All at Once)
Stephanie Hsu (Everything Everywhere All at Once)
Mihó ròl sekundario maskulino
Brendan Gleeson (The Banshees of Inisherin)
Brian Tyree Henry (Causeway)
Judd Hirsch (The Fabelmans)
Barry Keoghan (The Banshees of Inisherin)
Ke Huy Quan (Everything Everywhere All at Once)
Mihó pelíkula internashonal
Close (België)
Im Westen Nichts Neues (Duitsland)
Argentina: 1985 (Argentinië)
EO (Polen)
The Quiet Girl (Ierland)
Mihó soundtrack original
Lady Gaga – Hold My Hand (Top Gun: Maverick)
Rihanna – Lift Me Up (Black Panther: Wakanda Forever)
Sofia Carson – Applause (Tell It Like A Woman)
Rahul Sipligunj, Kala Bhairava, M. M. Keeravani – Naatu Naatu (RRR)
Son Lux, Mitski & David Byrne – This Is A Life (Everything Everywhere All at Once)
Natasja en Ivo gaven een van hun honden ter adoptie op bij de Dierenbescherming, maar kregen er een dag later spijt van. Toen ze haar gingen terug halen, kregen ze vreselijk nieuws te horen.
Manera ta konosí e kompania Microsoft a traha ménos ganashi ku antisipá den último tres luna di 2022. Tòg e kompania a hasi bon negoshi danki na su aktividatnan rondó di cloud services. Apesar di e kontratempu ekonómiko e resultado di e cloud platform Azure a subi ku 38% kompará ku un aña anterior.
E resultado total di Microsoft a subi pues ku 52.7 mil mion dòler, apesar ku e ganashi mes a baha ku 12% te na 16.4 mil mion dòler. Entre otro tambe dor ku dòler su balor a subi aña pasá. E pèrdida na Microsoft ta en partikular den e departamentu di konsumidó. Esaki ta inkluí pues produktonan manera Xbox i lisensianan pa Windows. E demanda pa e produktonan aki a baha konsiderablemente.
Si bo a nota algu straño na e servisionan di Microsoft entre djamars i djarason, manera Outlook i Teams, esaki tabata debí na un fayo tékniko ku a afektá usuarionan rònt mundu. Den transkurso di djarason e kompania a logra resolvé e problema. Hopi usuario no por a manda mensahenan via e programa Teams òf join reunion. Teams tin alrededor di 280 mion usuario rònt mundu den entre otro kompania i skolnan.
Usuarionan di Outlook tabata eksperenshá problema ku mandamentu di email ku no tabata sali pa nan destino. Servisionan manera Microsoft Exchange Online, SharePoint Online i Xbox Live tambe tabatin molèster di e fayo tékniko. E fayo ta kousá pa un update ku a bai robes.
E pelíkula Avatar: The Way of Water a generá mundialmente mas di 2 mil mion dòler, butando e pelíkula den ménos ku dos luna na di 6 lugá den historia di pelíkulanan mas eksitoso. Asina e website Variety ta informá.
Otro pelíkulanan ku ketu bai a hasi mas ganashi ku Avatar: The Way of Water ta e su antesesor original Avatar, Avengers: Endgame, Titanic, Star Wars: The Force Awakens en Avengers: Infinity War. Die e lista di 6 pelíkula mas eksitoso den historia tres ta riba nòmber di direktor James Cameron kende a krea e mundu di Avatar i tambe e konosido Titanic.
E fabrikante di outo limpi Lightyear a pèrdè su supsidiario Atlas Technologies, kua tabata produsí e modelo Lightyear 0. Asina a keda konfirmá djaweps. E bankarota di Atlas Technologies ta nifiká ku sentenáres di trahadó mester buska trabou nobo. Poko prome ku pidi bankarota ya e kompania propietario Lightyear a disidí para produkshon di e modelo Lightyear 0 permanentemente.
Lightyear ta bai konsentrá riba e modelo Lightyear 2, kua ta mas barata ku e modelo 0. Atlas Technologies ta keda na Helmond na Hulanda. Alrededor di 620 di e 650 trahadónan a pèrdè nan trabou. Un curator ta investigando si ta posibel reaktivá e kompania. Tin hopi interes pa outonan eléktriko, pero te asina leu e preis ta un opstákulo pa hopi konsumidor.
Egipto ketu bai ta skonde hopi sekreto. Djaweps arkeólogonan a deskubrí mas di un desena di tesoro nobo, inkluyendo un momia di 4300 aña. E deskubrimentu a tuma lugá na un siudat pa mortonan nèt pafó di e kapital di Egipto Cairo i pegá ku e pirámide di trapi Sakkara. E momia en partikular ta posiblemente esun mas bieu i alabes mas kompleto hañá na Egipto. Tambe por a determiná ku ta trata di un hende hòmber i ku su nòmber tabata Hekashepes.
Banda di su tumba a haña algun otro graf di e di 5 i di 6 dinastia di fáraonan. Mas aleu e arkeólogonan a deskubrí algun estatua i amuleto. E trabounan di kobamentu pa yega na e tesoronan aki a tuma kasi un aña.
Lloyd Morrisett, un di e kreadornan original di e programa Plasa Semamo, òf Sesamstraat manera esaki yama na Hulandes, a fayesé den siman aki na 93 aña di edat. Asina e organisashon sede Sesame Workshop a partisipá.
Morrisett a kuminsá den 1968 huntu ku su amiga Joan Ganz Cooney e kompania di produkshon Sesame Workshop, ku e tempu ei ainda tabata yama Children’s Television Workshop. Un aña despues e duo a kuminsá e programa infantil Sesame Street, un programa edukativo ku tabatin e meta di prepará muchanan pre-eskolar pa skol ku sekshonnan edukativo.
Morrisett tabata presidente di e kompania i a keda miembro di direktiva te na su morto. Su bon amiga i ko-fundadó Joan Ganz Cooney a bisa den un deklarashon kòrtiku ku Lloyd Morrisett a laga algu grandi atras ku a kontribuí na desaroyo di miónes di mucha rònt mundu. Vários pais a adoptá e nòmber i formato di e programa. Dje grandi e influensha di Plasa Sesamo tabata for di un prinsipio.
Kon nos ta hèndel emoshon na Kòrsou? Curemotions ke buta e tema emoshon riba agènda nashonal. 5W Press a kòmbersá ku Ivan Kuster, un di e inisiadónan di Curemotions.
Benta di smartphone a baha rònt mundu ku kasi 20% den último kuartal di 2022. Asina International Data Corporation a kalkulá a base di sifranan preliminario di benta. Segun nan análisis esaki ta debí na miedu pa un reseshon, loke ta buta ku konsumidónan no ta saka sèn dje lihé ei mas. Den último tres luna di 2022 a bende alrededor di 300 mion unidat. Esei ta 18 porshento ménos ku den e mesun periodo den 2021.
E bahada aki ta esun mas fuerte midí te asina leu. E periodo di fin di aña ta hopi indikativo pa estado di ekonomia: ta e temporada ku hende ta kumpra artíkulonan pa regalá nan sernan kerí. Finalmente bendedónan mester a duna deskuentonan hopi fuerte pa asina tòg por stimulá benta. E kompanianan en kuestion dimes ta sinti e klap. Tantu Samsung komo Apple a mira nan benta baha hopi fuerte den e último tres luna di 2022.
Siguiendo Twitter, Facebook i Instagram tambe a duna èks presidente di Merka Donald Trump akseso bèk na su kuentanan despues di tabata di blòk dos aña. Den simannan benidero Trump por aksedé su kuentanan atrobe. Segun e kompanianan, públiko tin derechi di tende kiko polítikonan tin di bisa. Pero den kaso di Trump en partikular nan lo keda vigilá. Si e bolbe publilká mensahenan divisivo, esaki lo resultá den un ban atrobe.
E organisashon internashonal pa individuonan superdotá Mensa a inskribí nan miembro mas yòn den historia. Ta trata di Teddy, un hobensito di 4 aña ku a haña su miembresia ya ku tres aña. Pero ta awor numa e organisashon a publiká riba esaki. Teddy por konta te shen den 6 idioma, entre nan Chines Mandarin, i por lesa kaba. Pa bo por bira miembro di Mensa bo mester ta pèrtenesé na e 2% mas sabí bou di hende.
Segun e mama Teddy a kuminsá lesa ku 26 luna dor di simplemente wak televishon i kopia sonido di lèter. Poko despues el a nota ku e por a lesa karta via pòst sin problema. Úniko problema ku nan tin ku Teddy ta ku e ta siña solamente loke ta interes’é. Tambe nan a ripará kaba ku e mucha ta realisá ku e ta diferente, pero tòg nan ke dun’é un bida mas normal posibel.
