Sientífikonan na Canada: Lechi ta hasi nos mas grandi

Sientífikonan na Canada: Lechi ta hasi nos mas grandi

by | 18/01/2023 | Siensia

Bebementu di lechi ta hasi nos kurpa mas grandi. Asina sientífikonan na Canada a deskubrí despues di kompará skelèt ku skelètnan di personanan ku a muri vários mil aña pasá. E sientífikonan a kompará mas di 3500 skelèt hañá durante trabounan di arkeologia na Oropa. Durante e komparashon aki nan a deskubrí prueba ku konsumo di lechi ta okashoná un oumento di masa físiko, loke ta hasi nos mas largu tambe.

Loke e sientífikonan a deskubrí tambe tabata un diferensha entre skelètnan hañá den paisnan parti nort i esnan hañá den parti sùit. Den e paisnan mas den nort sernan humano a kuminsá mas trempan ku konsumo di lechi puru, pues no usá pa traha keshi òf yògert. Te dia di awe por nota ku e intoleransha pa lechi den paisnan sùit ta mas frekuente ku den paisnan parti nort.

Por mayor parti e investigashon a tuma lugá ku skelètnan Oropeo. Awor e sientífikonan ke hasi e investigashon riba otro kontinentenan tambe.

Dama di mayor edat na mundu ta fayesé na 118 aña di edat

Dama di mayor edat na mundu ta fayesé na 118 aña di edat

by | 18/01/2023 | Internashonal

Lucile Randon, nasé den 1904 i pues e persona mas na edat na mundu, a fayesé na 118 aña di edat. Sùr André, manera nan tabata yam’e, a fayesé den su soño na un kas di kuido na Toulon, den parti sùit di Fransia. Randon tabata siegu i tabata den ròlstul.

El a tuma e nòmber Sùr André ora ku el a bira miembro di e orden katóliko di Fransia. Dos aña pasá e tabata den notisia rònt mundu despues di a sobrebibí un infekshon ku Covid-19.

Sùr André a bira e persona mas na edat na mundu despues ku e Hapones Kane Tanaka a fayesé aña pasá na 119 aña di edat. Ainda investigadónan ta buskando e persona mas na edat na mundu na e momentu aki despues di fayesimentu di Sùr André.