5W Press Newsletter #05 2023

5W Press Newsletter #05 2023

Resúmen di tur item di 05 – 11 febrüari 2023

Si bo ta lesando riba bo smartphone, ten’é horizontal pa un mihó eksperensha di e newsletter!

Temblor na Turkia: Kiko ta okashoná temblor?

Un poko mas trankilidat na Twitter despues di temporada di káos

IEA: eksportadónan di petroli mester subi produkshon

Think To DO Institute ta tene enkuesta riba libertat di prensa lokal

Sientífikonan a logra transplantá sesu humano pa djaka i krea interakshon

BP i Shell a drai bon den 2022

Update temblor na Turkia / Siria

Ménos eis riba laman na Antártika den yanüari

Microsoft ta bai inkorporá ChatGPT den Bing

Famianan di víktimanan MH17 desapuntá ku resultado di investigashon

Fact-check: Tailandia ke terminá su kontrakt ku Pfizer?

Solo a saka un vlam solar potente ku a afektá onda korto den Pasífiko

Marsrover Curiosity ta deskubrí patronchi di ola di awa riba Mars

Yahoo tambe obligá na kita personal

Temblor na Turkia: Kiko ta okashoná temblor?

Temblor na Turkia: Kiko ta okashoná temblor?

Un temblor fuerte di 7.9 riba skala di Richter na Turkia i parti di Siria a okashoná bastante daño, sentenáres di morto i míles di persona heridá. Djaluna e temblor tabata tópiko di e sekshonnan internashonal rònt mundu.

En partikular Turkia sa haña temblor frekuentemente, debí na e lokalidat di e pais. Na Siria tin hopi ménos temblor ta tuma lugá. For di aña 1900 a midi un total di 16 temblor di kua esun di djaluna ta esun di dos mas fuerte midí. Na Siria a midi un magnitut di 5.6 riba skala di Richter.

Turkia sinembargo ta lokalisá riba un parti kaminda plachinan ku ta forma e superfísie di nos planeta ta topa i krusa otro, e asina yamá plachinan tektóniko.

 



E plachinan ta move algun sèntimeter pa aña i ta okashoná frikshon ku nos ta eksperensiá komo temblor. Dependiendo di e direkshon ku e plachinan ta move, nan ta sea dal den otro òf skùif riba otro. Un par di sèntimeter ta sufisiente pa okashoná bastante destrukshon. E temblornan mas fuerte ta tuma lugá pues na e rant di e plachinan aki.


 

Un poko mas trankilidat na Twitter despues di temporada di káos

Un poko mas trankilidat na Twitter despues di temporada di káos

Twitter no ta kore peliger mas pa bai bankarota. Asina propietario Elon Musk a publiká riba su account. Bou di su guia mas o ménos mitar di e trahadónan na e kompania a haña òntslag. Tambe a ekonomisá riba vários departamentu. Segun Musk e kompania su entradanan ta entretantu den balansa ku e gastunan i tambe por nota ku e durashon di uso di e plataforma a stabilisá.

Elon Musk tin un par di luna basta pisá tras di lomba. Despues ku el a atkirí Twitter den òktober 2022 e situashon den i rondó di e kompania tabata basta kaótiko ora ku usuario i spònser a kuminsá bandoná e plataforma. Entretantu Musk lo a kaba di paga e interes riba un fiansa di 12,5 mil mion dòler pa atkisishon di e plataforma.

IEA: eksportadónan di petroli mester subi produkshon

IEA: eksportadónan di petroli mester subi produkshon

Paisnan ku ta eksportá petroli probablemente mester subi nan produkshon. Esaki debí na un demanda mas haltu for di China. Asina e Agensia Internashonal di Energia a publiká den vários medio di komunikashon. En partikular e demanda pa Jet Fuel na China a oumentá. Resien e pais a laga hopi medida pa kombatí Covid bai i p’esei hopi Chines por biaha atrobe.

E organisashon OPEP i Rusia a disidí konhuntamente na kuminsamentu di e luna aki pa mantene e nivel aktual di produkshon. De echo lo produsí diáriamente 2 mion barí ménos pa dia i stabilisá e ofèrta aki te fin di aña. Tin basta preshon sinembargo riba OPEP pa subi e produkshon pa e preis por baha.

Think To DO Institute ta tene enkuesta riba libertat di prensa lokal

Think To DO Institute ta tene enkuesta riba libertat di prensa lokal

Think To DO Institute ta bai investigá kumplimentu ku Press Freedom Index na Kòrsou. E asina yamá Press Freedom Index ta un evaluashon kompilá i publiká tur aña pa Reporters Without Borders for di 2002. E índise ta basá riba e datonan di kada aña tras di lomba ku e organisashon ta inventarisá den e paisnan partisipante.

E índise ta duna un indikashon di e grado di libertat ku periodistanan, medionan di komunikashon i siudadanonan tin den kada pais i kiko ta e esfuersonan di outoridatnan pa salbaguardiá e libertat aki. E Press Freedom Index, manera e nòmber ta sugerí, ta midi solamente e grado di libertat i no e kalidat di periodismo di e pais en kuestion i tampoko no ta trata violashon di derechinan humano.

Think To DO Institute, un instituto di investigashon independiente na Kòrsou, ta enfoká riba resiliensia di poblashon di Kòrsou. Otro investigashonnan di e organisashon a demostrá ku e resiliensia di un komunidat tin un impakto direkto riba e forsa di su demokrasia. Un demokrasia sano ta mihó sibrí ku un poblashon bon informá i mas versá posibel.

E informashon aki mester yega serka e siudadano via un prensa ku por funshoná libremente. Pa e motibu aki Think To DO Institute, komo organisashon ku ta traha a base di datonan verifikabel, ke sa di miembronan di prensa kon nan mes ta eksperensiá libertat pa hasi nan trabou den demokrasia di Kòrsou.

E Press Freedom Index ta un enkuesta a base di 5 punto di enfoke: e aspekto polítiko, e aspekto hurídiko, e aspekto ekonómiko, e aspekto sosial kultural i siguridat. E índise ta konsistí di dos parti: unu pa e sektor di medionan i unu pa públiko en general.

E resultadonan di e enkuesta aki lo keda publiká den aprel.

Sientífikonan a logra transplantá sesu humano pa djaka i krea interakshon

Sientífikonan a logra transplantá sesu humano pa djaka i krea interakshon

Sientífikonan a logra transplantá pida sesu humano den djaka i a logra krea interakshon. E deskubrimentu aki ta nifiká un posibel paso dilanti den e búskeda pa un tratamentu efisiente pa daño na selebro.

E eksperimentonan a tuma lugá den un laboratorio di e Universidat di Pennsylvania, kaminda sientífikonan a ekstraé sélula serebral humano, kria esakinan te na tamaño di un pida zjozjoli i pasa esakinan pa e kráneo di un djaka adulto ku tabatin problema di bista. Tres luna siguiendo e transplante e pida selebro humano a bira unu ku esun di e animal. E selebro a konektá ku e sistema kardiovaskular i neurológiko di e djaka. Pa gran sorpresa di e investigadónan e djaka su bista a parse di ta registrá lus, pero nan no por a determiná te na kua grado su bista a mehorá. Esei lo rekerí mas investigashon.

E resultadonan di e estudio ta publiká den e revista sientífiko Cell Stem Cell.

BP i Shell a drai bon den 2022

BP i Shell a drai bon den 2022

Kompanianan petrolífiko a hasi bon negoshi den 2022. Asina e produktor Britániko di petroli i gas British Petroleum, konosí pa su abreviashon BP, a registrá un ganashi rèkòrt aña pasá. Esaki relashoná ku e preisnan haltu di kombustibel. E kompania a registrá un ganashi di 28 mil mion dòler. Esei ta mas ku dòbel di e resultado den 2021.

E oumento di preis di kombustibel rònt mundu a benefisiá kompanianan di energia konsiderablemente. Asina Shell a registrá un ganashi di kasi 40 mil mion dòler den 2022. Einan tambe ta trata di un oumento di 100% kompará ku un aña promé. Analistanan ta atribuí e oumento di preis di kombustibel na e konflikto entre Rusia i Ukrania.

Update temblor na Turkia / Siria

Update temblor na Turkia / Siria

E kantidat total di mortonan siguiendo e temblor fuerte na Turkia i Siria ya lo a alkansá 7500. Djamars atardi e saldo di víktima na Turkia tabata fihá na mas di 5400, miéntras na Siria a registrá por lo ménos 2000. Te ainda no a rekuperá tur persona pèrdí pues e kantidat total lo sigui oumentá. Na Turkia tin estado di emergensha den por lo ménos 10 provinsia. Segun último informenan lo tin mas di 6000 edifisio destruí. Outoridatnan a mobilisá mas di 30 mil personal di reskate. MAs informe lo sigui miéntras e trabounan ta kontinuá.

Ménos eis riba laman na Antártika den yanüari

Ménos eis riba laman na Antártika den yanüari

Nunka ántes den luna di yanüari tabatin asina tiki eis di laman den e zona di polo sùit. Den promedio a registrá 31% ménos eis den yanüari tras di lomba na Antártika kompará ku añanan anterior. Delaster biaha ku a midi e kantidat di eis mas abou tabata den yanüari 2017. Asina e organisashon Copernicus a konkluí a base di imágen di satélite. Espektativa ta ku e kantidat lo sigui baha dado ku na e hemisferio sùit di nos planeta aworakí ta zomer.

Den febrüari e nivel di eis ta na su punto mas abou. Entre 1991 i 2020 a midi den promedio 5.5 mion kilometer kuadrá na eis. Di momentu tin 3.8 kilometer kuadrá. Copernicus ta midi tambe e nivel di eis den e zona di polo nort. Einan a nota 4% ménos eis ku normal den yanüari, e di tres nivel mas abou den historia.

Microsoft ta bai inkorporá ChatGPT den Bing

Microsoft ta bai inkorporá ChatGPT den Bing

Microsoft ta bai inkorporá un vershon mas amplio di ChatGPT den su servisio di búskeda Bing. Di e forma ei usuarionan por hasi pregunta mas dirigí riba Bing. Segun Microsoft e servisio ta programá pa evitá ku hende por buska informashon riba, por ehèmpel, kon traha eksplosivo.

Básikamente Bing lo bai ta un vershon primitivo di inteligensha artifisial. Esaki mester duna Bing un bentaha riba merkado riba e servisio di búskeda di Google, ku tambe ta desaroyando nan vershon di inteligensha artifisial pa nan servisio di búskeda riba internet.

OpenAI, e inventor di ChatGPT, a lanta un revolushon den mundu di internet ku e chatbot ChatGPT. E teknologia aki ta basta avansá den e sintí ku hende por hiba kòmbersashon kompleto ku un programa di computer.

Famianan di víktimanan MH17 desapuntá ku resultado di investigashon

Famianan di víktimanan MH17 desapuntá ku resultado di investigashon

E investigashon tras di loke a pasa ku buelo MH17 den 2014 a para temporalmente. Famianan di e víktimanan ta desapuntá ku no tin mas a sali for di e investigashon. Mayor problema den e investigashon a resultá ku tabata difísil yega na pruebanan direkto di ken tabata operá e sistema di rakèt ku a basha e avion abou. Te ainda no a indetifiká e personanan ku tabata operá e sistema.

E Joint Investigation Team (JIT), ku ta guia e investigashon, nunka no a logra konfirmá e punto importante aki i pa e motibu ei no ta konosí ken mester pèrsiguí. Úniko indikashon te asina leu ta ku presidente di Rusia Vladimir Putin a duna un òrdu e tempu ei pa usa sistemanan di defensa pisá, inkluyendo pues e sistema BUK for di kaminda a lansa e rakètnan. Aparte di esei, komo hefe di estado Putin por konta ku imunidat.

Tin otro kasonan individual andando den korte internashonal, pero pa loke ta trata e investigashon di e Joint Investigation Team, esaki por lo pronto a para. Promé minister di Hulanda Mark Rutte ta desapuntá i ta spera ku e kulpabelnan responsabel pa e tragedia keda pèrsiguí lo mas pronto posibel.

Fact-check: Tailandia ke terminá su kontrakt ku Pfizer?

Fact-check: Tailandia ke terminá su kontrakt ku Pfizer?

Segun un informe ku ta sirkulá riba retnan sosial Tailandia lo ke terminá su kontrakt ku e kompania Pfizer ku a produsí un di e vários bakuna ku a keda atministrá pa kombatí e pandemia di Covid-19. Motibu pa esaki lo ta pasobra e prinsesa di e famia real di e pais lo a sufri un atake despues di a risibí un boostershot di e bakuna di Pfizer i kai despues den koma.

E informe aki a i ketu bai ta plamando via en partikular WhatsApp, pero simplemente no ta kuadra ku realidat. Kiko SI tin di bèrdat den e informe aki?

Eksepto e echo ku e prinsesa berdaderamente a sufri un atake, e pais en todo kaso no a terminá su kontrakt ku Pfizer. Mas aleu e departamentu di salubridat di Tailandia mes a deskartá e informashon aki komo fake news for di 3 di febrüari riba nan página ofisial di Facebook.

Kiko ta e echonan ku ta konosí den hinter e asuntu aki?

  1. E claim ta basá riba videonan ku ta opviamente editá pa kita konteksto si bo kompará nan ku e grabashonnan original.
  2. Mayoria informashon ta bin di un entrevista entre e bankero Suiso Pascal Najadi i e sientífiko retirá Sucharit Bhakdi. Te asina leu no tin evidensia ku lo e tabatin kontakto ku outoridatnan na Tailandia. E mes tampoko no a pretendé esaki si repasá e entrevista original.
  3. Te ainda gobièrnu di Tailandia no a publiká ningun komunikado konfirmando ku a terminá kontrakt ku Pfizer. Tampoko no tin evidensia di plannan pa hasi esaki.
  4. Tailandia no a implementá Pfizer masalmente. E pais a usa mas tantu Sinovac i AstraZeneca, ku ta fabriká pa Siam Bioscience (ku de fakto ta propiedat di e rei di Tailandia Vajiralongkorn). Pfizer a keda suministrá serka apénas 5.7% di esnan ku a bakuná kontra Covid-19 na Tailandia.
  5. No tin ningun evidensia ku e prinsesa di Tailandia a risibí un bakuna 23 dia promé ku el a kolapsá. De echo no ta konosí mes si e famia real di Tailandia ta bakuná òf nò. E informashon aki no ta probá ku ningun dokumento ofisial.
  6. E kousa di e kolaps di e prinsesa no ta konosí. Interesante ta ku profesor Bhakdi a menshoná esei den e grabashon original di su entrevista, pero ku no ta inkluí den e grabashon ku ta bai rònt riba WhatsApp. E bèrdat ta esaki. For di 19 di desèmber 2022 e kas real a publiká un komunikado ku ta bisa eksplisitamente ku no a deskubrí ningun defekto na su kurason.

Nos konklushon preliminario ta ku e informashon den mihó kaso no ta kompleto i den pió kaso editá. No ta èksistí dokumentashon ofisial ku ta suprayá e ponensianan den e video ku ta bai rònt.

Otro fuentenan ku a chèk e echonan tambe a konkluí ku e informashon no ta kuadra ku realidat.

Solo a saka un vlam solar potente ku a afektá onda korto den Pasífiko

Solo a saka un vlam solar potente ku a afektá onda korto den Pasífiko

Nos solo ta birando mas aktivo den su siklo regular di 11 aña. Resien e strea aki a haña un mancha solar grandi kua ta forma e fundeshi pa saka vlam solar grandi i otro aktividat. Asina space.com ta informá.

Update: Segun solo ta bira un di dos mancha solar instabil pronto lo ta dirigí den nos direkshon. Esaki lo ta mas aktivo.

Tuma nota: e potrètnan den e artíkulo aki no ta e vlam solar di 7 di febrüari, sino imágen di archivo.

Riba djamars 7 di febrüari (7:07 pm, orario Kòrsou) un vlam solar (na Ingles “solar flare”) tamaño mediano a kibra komunikashon riba onda korto den área di Oseano Pasífiko. Solo a manda diferente salvo den delaster dianan, pero ta esun di dia 7 so a kausa e blackout di komunikashon riba e area menshoná. Generalmente nos no ta ripará mashá di vlamnan solar, pero tin momentunan ku e vlamnan aki ta di tal tamaño ku nan ta afektá òf asta permanentemente daña nos sistemanan.

E origen di e último vlam aki ta e mancha solar AR3213, ku aworaki riba solo ta midi mas ku 100 mil km. E mancha ta konsistí di liñanan magnétiko, ku ora nan brua, por manda partíkulonan solar kargá den nos direkshon e dianan aki. Solo ta bai yega su pik di mancha solar segun kálkulonan na 2025.

Nos solo tin un siklo di aktividat di 11 aña. Tin sufisiente potrèt di solo sakando vlam solar den sirkulashon danki na diferente satelit ku ta opservá solo pa entre otro NASA su Solar Dynamics Observatory.

E siensia ku ta studia e fenómeno ta sigui desaroyá pa nos siña mas di e orígen di e aktividat solar aki. Asina tantu e Parker Solar Probe di NASA komo e Solar Orbiter di ESA ku ta pasa solo di serka pa tuma “muestra” di e bientu di partikulo solar ku ta bula rondó di solo. Tambe nan ta sirbi pa investigá e strukturanan i atmósfera di solo di serka.

Marsrover Curiosity ta deskubrí patronchi di ola di awa riba Mars

Marsrover Curiosity ta deskubrí patronchi di ola di awa riba Mars

E asina yamá Marsrover Curiosity a haña mas prueba ku den pasado tabatin awa riba planeta Mars. E vehíkulo outomatisá a kapta algun potrèt ku patronchi di ola di awa riba un seru. Asina e instituto NASA ta informá. Pa imágennan original, sigui e link.

E patronchinan aki segun NASA a keda formá dor di awa. Aña pasá e Marsrover a yega un seru konosí komo Mount Sharp. Tabatin sospecho kaba ku e Marsrover lo a deskubrí mas spor di awa riba e planeta kòrá, pero no awa mes òf prueba ku tabatin sufisiente awa pa forma ola. Mount Sharp na un momentu den pasado tabata bou di awa. Curiosity a deskubrí e patronchi na un altura di 800 meter kontando for di e pia di e seru. Lamentablemente e superfísie ta di piedra duru i pa e motibu ei ta difísil rekohé muestra, pues mester sigui eksplorá e region aki un poko mas.

E Marsrover tin mas o ménos 10 aña kaba eksplorando e planeta i kada tantu tempu ta manda deskubrimentunan inesperá bèk pa nos analisá. E mayor motibu pa sigui ku e eksplorashonnan aki ta pa deskubrí si na un dado momentu tabatin bida riba e planeta.

Yahoo tambe obligá na kita personal

Yahoo tambe obligá na kita personal

E kontratempu den e sektor mundial di teknologia di internet ta pèrsistí. Siguiendo gigantenan manera Google, Facebook, Amazon, Microsoft i Spofity awe e konosido plataforma Yahoo tambe a anunsiá retiru masivo di personal. Lo ta trata di 20% di e total di trahadónan, mas o ménos 1600 persona di e 8000 trahadónan.

Na Yahoo tambe ta trata di ekonomisashon di e departamentu di benta. Gigantenan teknológiko ta pasando dor di un temporada severo di kontratempu. E kompanianan ta afektá primariamente pa e ekonomia mundial ku di momentu ta basta frágil, inflashon i subida di interes.