WHO a para investigashon pa deskubrí orígen vírus di corona

by Webmaster | 14/02/2023 | Internashonal

World Health Organisation a para e investigashon pa e orígen di e vírus di corona den silensio. Asina e revista sientífiko Nature a publiká. Segun investigadónan ku a papia ku e revista e investigashon a keda pegá despues ku tantu e gobièrnu Merikano komo China a kuminsá kulpa otro. Mas aleu nan a bisa e revista ku rònt mundu polítika a stroba e investigashon dor di buta preshon riba e investigadónan pa saka sierto konklushon.

Te asina leu a investigá 4 senario di kua, asina nan a konkluí, esun mas probabel pa nan ta ku e vírus tin su orígen serka vlermùis ku a pas’é pa hende, kisas via otro animal. Klek akinan pa e rapòrt.

Esei tabata e promé fase. E problemanan a kuminsá dos aña despues na kuminsamentu di e di dos fase di e investigashon. E investigadónan ta splika ku ta bèrdat ku China no tabata transparente riba kiko tabata pasando na kuminsamentu di e pandemia den e pais. Pero World Health Organisation mes no a hasi sufisiente pa mitigá intervenshon polítiko.

Básikamente fase dos di e investigashon nunka a tuma lugá. Durante e fase ei mester a investigá kon e vírus lo a plama, pero China no ke koperá ku akseso pa e investigadónan. E pais ke hiba su propio investigashon.

Kantidat di mortonan dor di temblornan na Turkia i Siria a pasa 40 mil

by Webmaster | 14/02/2023 | Internashonal

E kantidat di mortonan siguiendo e temblornan na Turkia i Siria ta sigui oumentá. Entretantu a konfirmá mas di 40 mil morto, di kua mas ku 35 mil a kai na Turkia. Einan tin mas di 13 mil persona hospitalisá. Ku e kantidatnan por papia di e pió temblor den último 100 aña pa Turkia. Na Siria a raportá mas di 6 mil morto.

De bes en kuando ta logra reskatá hende ku a keda protehá bou di e ruinanan, pero e kasonan aki a bira skars. E trabounan di reskate entretantu a drenta fase di perkurá pa kuminda, refugio i kuido. Na total 26 mion hende ta den nesesidat agúdo aworakí. E temporada friu, falta di material sanitario i higiéniko i e riesgo di plamamentu di malesa ta hasi e trabounan mas difísil ainda.

Merka i China ta kulpa otro di spionage

by Webmaster | 14/02/2023 | Internashonal

Djaluna anochi Merka a indiká ku nan no tin indikashon ku e ophetonan ku nan a basha abou tin un orígen ekstraterestre, esta di pafó di nos planeta. Tur esaki despues ku e Merikanonan a basha un balòn di orígen Chines abou. Pero awor China ta kulpando Merka di a laga balòn Merikano drenta nan teritorio aereo sigur 10 biaha aña pasá. Algu ku e Merikanonan manera ta di spera ta desmentí. Pero te ainda no tin klaridat ta kiko e Merikanonan a basha abou.