Google ta anunsiá implementashon di inteligensha artifisial den su servisionan
Awe ta un dia importante pa e kompania Google. E kompania a kompartí por fin kiko ta su plannan relashoná ku inteligensha artifisial (AI). Asina e search engine ku hopi di nos ta usa tur dia ta bai kambia. Tambe Google ta bai haña un sekshon èkstra ku e chatbot Bard. Gmail i Maps tambe ta bai haña funshonnan adishonal di AI.
Un di e mayor kambionan ku nos ta bai nota lo ta den e mashin di búskeda (esta e search engine) di Google. Falta poko pa esaki kuminsá mustra un sekshon separá riba e resultadonan kaminda por haña mesora kontesta riba pregunta komparabel ku otro usuario a hasi, kompañá pa imágen i informashon adishonal.
E informashon ta bin for di otro website, pero Google ta enfatisá ku un búskeda lo keda e prinsipio pa hende hasi uso di internèt. Pues te ainda lo referí na otro página aparte di esun ku Google mes ta selekshoná. E proseso di búskeda ta bai haña un modo di kòmbersashon aserka tambe pa hasi pregunta adishonal. E chatbot por yuda tambe ku preguntanan kreativo i produkshon di mensahe pa social media. Tur kos ta den fase di tèst kaba, pero e ta aksesibel solamente na Merka ainda.
Un di e programanan di AI ku mas nos ta bai mira i hasi uso di dje ta e chatbot Bard. E tabata disponibel na Merka kaba den un vershon di tèst, pero pronto e lo ta disponibel pa tur hende rònt mundu na Ingles. Tradukshonnan lo sigui pronto despues di e implementashon. Último tempu tabatin hopi krítika riba Bard, pasó lo e no ta funshoná mesun bon ku ChatGPT. Pero Bard ta drai riba PaLM 2, un modelo lingwístiko di Google ku mkester generá mihó resultado di búskeda. Falta poko pa e programa integrá imágen i konekshon ku otro servisio. Asina bo por pasa un tabèl traha den Bard pa Google Sheets.
Manera indiká Gmail tambe ta bai haña integrashon di inteligensha artifisial. Usuarionan por duna e programa un òrdu pa determiná kiko tin ku bai den e mensahe di e-mail pa despues e programa kaba di komponé e mensahe. Google Photos tambe ta bai haña funshonnan èkstra di AI.
Usuarionan di e servisionan di Google ta bai nota e kambionan den tempu benidero paso a paso.
