by Webmaster | 16/05/2023 | IT, Apps & Social Media
Manera nos a informá anteriormente, pronto tur hende ku ta hasi uso di WhatsApp ta bai haña un update ku un funshon pa sigurá sierto chat. Di e forma aki terseronan ku haña akseso na bo chatnan den WhatsApp no tin akseso na e chatnan selekshoná sin fingerprint, password òf rekonosementu di kara.
Den un blog post e ekipo tras di WhatsApp ta splika ku e doño di e account por opta pa duna por ehèmpel un famia tambe akseso na sierto chat, pero alabes por evitá ku otro hende por mira kiko ta drenta den un chat protehá tambe.
Den e update nobo doñonan di account por pasa chat protehá pa un map separá pa evitá ku e ta aktivá e sonido i mensahe di notifikashon di un mensahe nobo den e chat protehá. Ta bai tin mas update den futuro serkano, manera password separá pa chats protehá.
by Webmaster | 16/05/2023 | Fact Checks & Factsheets
E kantidat di kondena di morto aña pasá ta hopi mas haltu ku den 2021 i alabes e sifra mas haltu den último 5 aña. Na total a ehekutá 883 persona den sigur 20 pais, loke ta un oumento di 53% kompará ku 2021. Segun Amnesty International mayoria ehekushon a tuma lugá den Medio Oriente i Nort Áfrika kaminda kondena di morto ta un medida hurídiko apliká regularmente.
Den 2021 a registrá 520 ehekushon den e regionnan menshoná, aña pasá paisnan den Medio Oriente i Nort Áfrika a duna òrdu pa 825 di e total di 883. Kasi 90% di e ehekushonnan rònt mundu (esta, si laga China afó) a tuma lugá na Egipto (ku 24 ehekushon), Iran (ku 576 ehekushon) i Saudi Arabia (ku 196 ehekushon ku ta alabes e kantidat mas haltu den 30 aña). E sifranan aki ta proveniente for di ehekushonnan ku ta registrá i dokumentá dor di e respektivo paisnan.
Amnesty no a inkluí ehekushonnan ku ta tumando lugá na China, Nort Korea i Vietnam. Di e paisnan aki ta sospechá ku lo ta trata di kantidatnan mas haltu ku e paisnan ta rekonosé. Aparte di e oumento di ehekushonnan tambe tabatin mas pais ku a reintrodusí kondena di morto, esta Afganistan, Kuwait, Myanmar, e teritorionan Palestino i asta Singapore.
Tambe tin paisnan ku kontrariamente a abolí kondena di morto. Ta trata di Kazachstan, Papua-Nova Guinea, Sierra Leone i Repúblika Sentral Afrikano. E paisnan aki a abolí kondena di morto pa tur krímen. Ekuatorial-Guinea i Zambia a abolí kondena di morto pa krímennan ku no ta kai bou di krímen den temporada di guera.
E rapòrt ta disponibel aki:
