by Webmaster | 24/05/2023 | IT, Apps & Social Media
Klientenan di Netflix na Hulanda definitivamente mester paga 4 euro èkstra pa luna pa kada usuario aparte di e doño di e account. Tur usuario na Hulanda ku ta kompartí nan account ku terseronan a risibí un e-mail e siman aki.
E kambio ta sigui despues ku Netflix a ripará ku e ta pèrdiendo hopi entrada dor ku usuarionan ta kompartí nan account. Pa kompensá e pèrdida aki Netflix ta kobra awor 3,99 euro pa kada usuario èkstra. Aña pasá Netflix a publiká ku di e miónes di usuario ku e servisio tin, mitar ta usuarionan ku no ta paga. Netflix ta pèrdè miónes di dòler asin’akí.
Tur usuario ku ta usando un account, pero ku no ta paga pa esaki, lo ripará ku nan lo haña un pantaya ku un mensahe ku opshonnan di pago pa sigui wak. Netflix ta registrá tambe a base di IP si doñonan di account ta kompartí password, pues kualke kambio den esaki ta keda registrá dor di e sistema di Netflix.
by Webmaster | 24/05/2023 | Naturalesa
Segun World Wildlife Fund, e fondo internashonal pa flora i founa, a deskubrí sigur 380 espesie nobo di mata i animal den parti sùit ost di Asia entre 2021 i 2022. Entre nan un piská ku ta kambia di koló, un tipo di raton di anochi i un kolbera venenoso te ku resien ainda tabata deskonosí. E animalnan ta biba den e region di riu Mekong. Ta trata di 290 espesie di mata i flor deskonosí, 19 sorto di piská, 24 amfibio (o sea, ainmalnan ku ta biba den awa i tera), 46 reptil i 1 mamífero.
E deskubrimentu ta resultado di un trabou konhunto di sientífikonan di vários universidat, organisashon di protekshon di naturalesa i institutonan di investigashon rònt mundu. E region rondó di riu Mekong ta kubri Tailandia, Myanmar, Vietnam, Cambodja i Laos.
Algun animal tabata konosí kaba na nivel lokal, pero no na nivel mundial. E hayasgo ta remarkabel. E animalnan i matanan a sobrebibí vários evento manera kapmentu di palu, konstrukshon di kaya, desaparishon di riunan i asta komèrsio ku animal eksótiko di e region aki.
World Wildlife Fund ta operá pa algun tempu kaba den e region rondó di e riu Mekong pa protehá otro espesienan mas grandi konosí manera olefante Asiátiko, dolfein Irrawaddy i tambe tiger. E árianan aki ta kontribuí nan rikesa natural na e vários proyektonan pa protehá e region.
Download e rapòrt original.
by Webmaster | 24/05/2023 | Internashonal
E konosido kantante Tina Turner a fayesé na 83 aña di edat. The Queen of Rock ‘n’ Roll, manera nan ta yam’é, a fayesé djarason despues di tabata kebrante di salú pa algun tempu kaba na su kas na Küssnacht, na Suisa.
Den e partisipashon di morto famianan ta elogiá Turner su forma energétiko di presentá i kanta ku su konosidó stèm heis pero semper bou di kòntròl. Turner ta drenta historia komo un dama ku tabata sa di perseverá den atversidat. Den último añanan el a sufri di tantu kanser, komo fayo di nir i atake selebral. El a rekuperá kada bes, pero e gòlpinan aki a èksigí nan preis pa su salú.
Na komienso di su karera e tabata forma un duo ku su kasá di “aquel entonces” Ike Turner. Huntu nan a skor vários hit den añanan 60 i 70 manera Nutbush City Limits, Proud Mary i River Deep – Mountain High.
Despues di nan divorsio den 1978 Tina a kontinuá ku un karera solo impreshonante ku hitnan inolvidabel manera Private Dancer, What’s Love Got to Do With It i (Simply) The Best. Durante su karera Tina Turner a risibí 8 premio Grammy i den 2021 a inkluí e leyenda aki den The Rock ‘n’ Roll Hall of Fame, esaki despues di a keda inkluí kaba den 1991 pa su trabou ku Ike.
Tina Turner a nase komo Anna Mae Bullock den 1939 na Tennessee. El a kuminsá su karera komo miembro di koro den e agrupashon The Kings of Rhythm di su èks kasá Ike. Poko despues nan a forma nan legendario duo Ike & Tina.
Tina Turner a yega di un forma pekuliar na su nòmber di artista. Su kasá Ike a registrá e nòmber Tina Turner sin informá su kasá di esaki pa asina den futuro e tabata disponé di derechinan riba e nòmber. Di e forma ey lo e por a remplasá Tina na kualkier momento i mantené e nòmber. Aparte di e abusu físiko esey tabata un di e vários forma ku Ike tabatin kòntròl riba Tina. Pero durante e proseso di divorsio wes a otorgá e kantante e derechi riba e nòmber Tina Turner.
Aparte di su karera komo kantante tambe na vários okashon nos por a disfrutá di su talento komo aktris den Mad Max Beyond Thunderdome, We Don’t Need Another Hero i e rock opera Tommy di un di e pioneronan di hard rock The Who.
Pas na su alma…
