Pareha Van Wilgen satisfecho ku rekonosementu di Imani van Wilgen

Pareha Van Wilgen satisfecho ku rekonosementu di Imani van Wilgen

by | 25/05/2023 | Notisia Lokal

Ku un sentimentu di satisfakshon enorme pareha Van Wilgen ta informá ku Korte, awe a dikta den nan fabor, pa loke ta trata rekonosementu di nan yu Imani.

4 aña pasa, na 2019, e pareha a inisiá e trayekto pa duna nan yu, ku a nase sin bida un nòmber i fam. Na promé instante korte a dikta ku lo por registrá solamente e nòmber di yu, pa motibu ku tata no a rekonosé e ‘vrucht’. Esaki a pone ku e pareha dia 9 di mart último a bolbe bai korte pa pidi ku e yu haña e fam di e tata.

Awe den un veredikto korte a rekonosé e importansia di ‘ Family life’, esta e balor innato di famia. I nan a rekonosé ku apesar ku Imani a nase sin bida, e ta forma parti di e famia Van Wilgen. I Korte a duna derecho na Dominic van Wilgen, pa rekonosé su yu i traha un akta nobo kaminda ta registrá ku e baby ku a nase sin bida lo yama: Imani van Wilgen.

Esaki ta habri kaminda pa tur tata, ku no tabata kasa nan momento di nasementu sin bida di e yu i tampoko no a rekonosé e ‘vrucht’, awor por rekonosé nan yu a base di e tratado di derecho humano, artíkulo 8 ‘ Family life’.

Pareha van Wilgen kier gradisí un i tur ku a forma parti di e proseso aki, famia i amigunan ku a duna sosten i tambe parlamentario sra. Ana Maria Pauletta pa su apoyo. I ta invitá komunidat kompleto pa buska boso derecho na momento ku ta trata rekonosementu di un yu ku a nase sin bida.

Google ta lansa software pa hunga videogames pa Android riba Microsoft Windows

Google ta lansa software pa hunga videogames pa Android riba Microsoft Windows

by | 25/05/2023 | IT, Apps & Social Media

Google ta bai lansa un software spesial pa hunga videogames pa Android riba Microsoft Windows. Den vários parti di mundu tin test ta tumando lugá pa un roll out mundialmente e aña aki. Djaweps Google a roll out e software den 40 pais Oropeo mas i na Nova Zelandia.

E software lo ta kompatibel ku Windows 10 i 11 i ta rekerí un quad-core processor, 8 GB di memoria i por lo ménos 10 GB na espasio riba bo computer òf laptop. Ya lo tin mas di 100 videogame pa Android disponibel pa Windows tambe.

E bentaha ku esaki ta trese ku n’e ta ku e gamer por disfrutá di su game ku un imágen mas grandi ku e pantaya di telefòn. Segun Google tur luna lo lansa un sèt nobo di Android games ku ta adekuá pa Windows tambe.