Stichting KuraZorg tin komo meta pa yuda ku korekshon / desaroyo di un kliente riba entre otro independisá pa bíba, traha i den e parti di finansas.
Den kuadro di e meta di KuraZorg pa yuda tur hende ku ta den nesesidat, a organisá un kolekta. E no ta simplemente un kolekta, den e kaso aki KuraZorg ta kolektá paña, artikulónan di uzo pa hendenan ku desabilidat, hende grandi ku mester di metódonan di uzo, mamanan yòn (teenermoeders), artikuló / produktonan i paña pa baby i mucha. Tambe KuraZorg ta kolektá muebles. E organisashon ta aksentuá pa esakinan ta den bon estado!
Por bisa ku e akshon pa kolektá a kuminsa kaba for di dia nos a lansa e proyekto… KuraZorg a kuminsá ofisialmente ku un “pre-launch” dia 20 di mei 2023, pa 10or di mainta na Sentro Sùr Lumena, den kurá / patras di misa / parokia di Montagne.
KuraZorg lo ta kolektando durante sierto oranan di dia te ku dia 1é di jüni 2023, dia 2 di jüni lo hasi repartishon na fundashonnan di bario ku tin kontakto direkto ku pèrsonanan den nesesidat. Lo konsentrá riba 3 area di pariba.
Pa kontribuyentenan ku no por alkansa na e oranan stipulá, por traha un sita ku nos pa bin hasi entrega. Por tuma kontakto òf app na number telefòn:
Sherwin Margaritha (pres) : +599 9 515-1262
Maisela Leuteria (sekretaria) : +599 9 696 2736
Noraima Dorothea : +599 9 672 5062
Singrid Groman : +599 9 515 7146
Un fenómeno pekuliar ta tumando lugá pegá ku kosta di Spaña. Di akuerdo ku agensia di prensa Reuters e luna aki só tabatin por lo ménos 20 atake di orka riba botonan ku ta nabegá den e Estrecho di Gibraltar. Aña pasá a registrá sigur 200 insidente komparabel. Den mayoria kaso e orkanan ta ataká e timon di botonan di bela.
Den último tres aña tabatin sigur 3 okashon kaminda e orkanan (pues animalnan ku por alkansá un largura di 8 meter) a logra hundi e boto ku nan a ataká. Sientífikonan no por konkluí kiko ta okashonando e komportashon di e animalnan. Ta tene kuenta si ku e komportashon por ta relashoná ku un aksidente den mei 2020 kaminda un boto tabatin un choke fatal ku un orka na barika den e region aki.
Ta konosí ku orka tin bon memoria i ku por ta asosiando e botonan ku menasa pa nan populashon. Otro splikashon ta ku e animalnan lo ta kopiando e komportashon aki di otro. Por lo pronto e motibu ta keda un misterio i un i tur ku ke bai biaha den boto dilanti kosta di Spaña mester tene koutela ku e orkanan agresivo aki.
Un avion di Asiana Airlines a hera di aksidentá dor di un pasahero ku a habri un porta promé ku aterisahe. E avion, un Airbus A321 ku 194 persona na bordo, tabata na kaminda pa e siudat Daegu i a logra aterisá sin ku tabatin herido. Opviamente hopi pasahero a drenta den pániko òf pèrdè rosea dor di e preshon di altura.
Despues di aterisahe outoridatnan na e sitio a detené e hòmber ku ta sospechá di a habri e porta. No tin klaridat ainda kon bin e hòmber a logra habri e porta. Ora ku un avion ta bulando e portanan ta lòk dor di e preshon di airu kontrolá na bordo.
E kantante Canades Céline Dion a definitivamente anulá tur show ku tabata sea planiá òf posponé pa otro fecha. Esaki relashoná ku un malesa neurológiko. Den un mensahe riba su website Dion ta splika ku na e momentu aki e no ta kapas di prepará pa e konsiertonan, laga para presentá.
Den desèmber kaba Céline Dion a partisipá via su account di Instagram ku e ta sufri di stiff person syndrome, un malesa ku ta afektá e sistema nervioso sentral i ku ta afektá kanamentu i kanta.
