by Webmaster | 20/12/2023 | IT, Apps & Social Media
Alphabet, e kompania propietario di Google, ta bai paga un suma di mas di 700 mion dòler pa asina evitá un kaso entamá pa vários estado Merikano i gruponan di konsumidor.
Google ta akusá di abusu di poder riba su webstore Google Play. E kompania tabata obligá otro kompanianan pa usa su sistema di pago kobrando un komishon di entre 15% i 30% di nan bentanan. Esei ta hasi sierto app mas karo ku ta nesesario. Esei tin konsekuenshanan direkto pa konsumidornan ku tin ku paga finalmente tambe.
Ku e suma aki Google ke resolvé e asuntu sin ku mester bai korte. Esei ta na interes di e demandantenan tambe, mirando ku e kasonan aki por dura hopi largu promé ku nan yega un konklushon. Di otro banda e ta nifiká tambe ku Google no mester rekonosé e akusashonnan i ku e no por keda demandá pa e mesun akusashon den futuro.
Mayor parti di e suma di 700 mion lo sirbi komo kompensashon na konsumidornan.
by Webmaster | 20/12/2023 | Internashonal
Un wes na Merka a disidí ku mester publiká nòmber di 180 persona ku tabatin lasonan ku Jeffrey Epstein. E korant Miami Herald a pidi wes pa publiká e nòmbernan. Epstein ta e finansiadó Merikano ku a buta un fin na su bida den 2019 despues ku a deten’é pa un kaso grandi di abusu seksual di menornan.
Ta trata di nòmbernan di víktimanan, kolaboradónan i otro posibel sospechosonan di aktonan inmoral. E nòmbernan di e víktimanan menor di edat si mester keda konfidensial. Ya tin algun sospechoso konosí, manera Alan Dershowitz, dosente na Harvard.
E nòmbernan ya ta den e dokumentonan ku korte ta disponé di dje relashoná ku un otro kaso sivil ku ya a finalisá. Den e kaso ei a resultá ku e èks di Epstein Ghislaine Maxwell lo a yuda fasilitá e abusu di Virginia Giuffre. Epstein i Maxwell tabatin un relashon den añanan 90 i a sigui kolaborá 30 aña ku otro despues.
Maxwell a bai será den 2021 pa 20 aña pa su ròl. Epstein su kaso a yega na un fin dor di su morto den 2019.
by Webmaster | 20/12/2023 | Naturalesa
E kapital di Islandia Reykjavik ta riba e ruta di un nubia di polushon siguiendo e erupshon volkániko di djaluna. E polushon ta konsistí di gasnan ku a skapa for di tera despues di erupshon. Asina outoridatnan den e pais a informá.
Reykjavik ta keda na mas o ménos 30 kilometer for di e península Reykjanes, kaminda e erupshon a tuma lugá bou di tera. E temblornan a okashoná aperturanan kaminda e lava ta spùit sali.
Dor ku habitantenan di e region tabata tene kuenta ku e erupshon nan a evakuá algun siman pasá kaba. Afortunadamente no ta parse ku e lava ta kore den direkshon di nan kasnan. E mal kalidat di airu por lo pronto lo keda un problema i pa e motibu ei nan no por bai bèk nan kas ainda.
No ta konosí ainda kon largu e situashon lo persistí. E situashon por vária di algun dia te na algun luna. Outoridatnan te ainda no ta premirá problemanan grandi pa pasahe di avion ya ku e kantidat di shinishi te asina leu ta hopi abou.
