by Webmaster | 24/10/2023 | Naturalesa
Bobi, e kachó mas bieu na mundu, a fayesé. Bobi tabata di e rasa Portugues Rafeiro do Alentejo. El a nase riba 11 di mei 1992 i a biba na total 11.478 dia, o sea Bobi a alkansá 31 aña.
No tabata difísil verifiká edat di Bobi pasobra e kachó tabata registrá den e database di animal di gobièrnu Portugues for di su nasementu.
E sekreto tras di e bida largu di Bobi segun e doñonan ta debí na un kombinashon di faktor: bon kuminda, hopi kontakto ku naturalesa, nunka e tabata mará, bishita regular na veterinario i, mas importante ku tur otro kos, e amor ku e tabata haña na kas.
Awor ta bai buska rònt mundu kua ta e kachó mas bieu na e momentu aki.
by Webmaster | 24/10/2023 | Siensia
Nos luna aparentemente ta 40 mion aña mas bièu ku anteriormente tabata asumí pa siensia. E estudio ta publiká den e revista sientífiko Geochemical Perspectives Letters.
Te ku aworakí tabata kalkulá ku mas di 4 mil mion aña pasá un opheto enorme tabatin un choke ku nos planeta loke despues a resultá den formashon di nos luna. E momentu eksakto sinembargo no tabata konosí.
Pa e kálkulo nobo aki a studia kristalnan ku astronouta a trese for di luna den 1972. Pero despues di un estudio amplio di e kristalnan investigadónan a konkluí ku e luna mester tin alrededor di 4460 mil aña.
Kristal ta forma dor di un proseso ku ta tuma masha hopi aña. Una bes ku a determiná e edat di e kristalnan a resultá ku esakinan tabata mas bieu ku e edat original di nos luna.
Hopi hende ta puntra kiko ta e balor di tur e estudionan aki. E kontesta ta simpel: ta generalmente konosí ku presensia di luna tin un influensha riba bida riba nos planeta i riba e nivel di laman. Tambe luna ta stabilisá e rotashon di nos planeta, pero mas importante ainda, luna i solo a yuda humanidat kalkulá orario. Simplemente bisá, luna ta forma parti di bida.
by Webmaster | 24/10/2023 | Business & Economy
Preis di oro a alkansá un rèkòrt nobo den wikènt tras di lomba ora e preis a alkansá 60.050 euro pa kilo riba merkado Oropeo. Den e kálkulo na dòler tambe e subida ta notabel. Invershonista Merikano ta enfoká riba e preis sikológiko di 2 mil dòler pa kada troy ounce (31,1 gram). Djaluna e preis na dòler tabata kalkulá dado momento na 1.980,40 dòler pa kada troy ounce.
E preis di oro a subi fuerte den último 10 aña dor di maneho di Bankonan Sentral. Konfliktonan na Ost Oropa i resien den Medio Oriente a duna un impulso èkstra na e subida di preis. Den mei kaba e preis a alkansá un rèkòrt, pero dor di e konflikto resien den Medio Oriente e preis a haña un impulso nobo.
Oro ta un metal presioso ku ta gana popularidat den temporada di kontratempu ekonómiko. Den tempu di insiguridat invershonista ta preferá parker nan kapital kaminda nan tin sigur ku no tin kambionan drástiko, manera riba e merkado di oro.
by Webmaster | 23/10/2023 | Siensia
Investigadónan posiblemente a deskubrí un tratamentu ku por prolongá bida di hòmbernan ku kanser di prostat ku ta bin bèk. Sientífikonan Merikano ta papia di un terapia hopi prometedor. Danki na e tratamentu pashèntnan lo por biba mas largu sin ku e malesa ta empeorá.
E resultadonan di e estudio korespondiente ta publiká den e revista sientífiko New England Journal of Medicine.
Hòmber ku kanser di prostat agresivo ta tratá ku un operashon òf terapia di radiashon. Pero, pa den mas o ménos un di kada tres kaso e kanser ta bin bèk den un plaso di 10 aña.
Pa e forma di kanser ku ta bin bèk ya ta èksistí e sina yamá terapia di deprivashon di androgen (abreviá ADT). Ta un terapia ku hormon pa redusí produkshon di testosteron pa evitá ku e prostat ta krese i plama e malesa. Den e estudio nobo aki, a kombiná ADT ku enzalutamide, un substansia ku ta blòkia e efektonan di testosteron. E tratamentu nobo yama por lo pronto ADT+.
Mas di mil pashènt for di 17 pais a partisipá na e investigashon. A separá e pashèntnan den tres grupo kru tres diferente tratamentu. Den e grupo ku a sigui e terapia nobo ADT+ e riezgo ku e malesa lo a bin bèk a baha ku 58%.
Ta bon pa menshoná ku e tratamentu nobo mester haña aprobashon ainda di Food and Drug Administration na Merka. 5W Press ke rekomendá en todo kaso pa semper konsultá un spesialista riba tratamentunan nobo.
by Webmaster | 23/10/2023 | Cinema News
Por tuma hopi tempu promé ku nos mira un pelíkula nobo di James Bond den salanan di sine. Produktor Barbara Broccoli a bisa The Guardian ku e personahe mester pasa un proseso di modernisashon promé.
Broccoli ta splika ku kada biaha ku skohe un aktor nobo mester hasi un eskoho bon deliberá. Meskos ku a hasi ku Daniel Craig ku a kaba ta hunga e ròl di 2006 te 2021. “No Time To Die” tabata su último pelíkula di Bond.
Segun Broccoli e siguiente pelíkula mester reflehá kon mundo a kambia den e 20 aña ku Craig a hunga e famoso agente 007. Ku Craig den e papel prinsipal, e kreadónan tabata kere den un “héroe di siglo 21 ku a laga nos mira e bida emoshonal di e personahe.”
Ainda no ta kla pues ken lo sigui despues di Craig den e papel di James Bond. Por lo pronto Broccoli mes ta okupá ku produkshon di e serie riba Prime Video “007: Road to a Million”. Den e programa ei parehanan ta biaha rònt mundu i biba aventuranan inspirá pa e pelíkulanan di Bond.
by Webmaster | 23/10/2023 | Internashonal
E atake sibernétiko riba e Korte Internashonal di Hustisia (ICC) na Den Haag den sèptèmber ta relashoná ku spionage. E atake tabatin komo meta saboteá e trabou di ICC. Asina a resultá for di investigashon di ICC basá riba e pruebanan disponibel.
ICC ainda no por bisa ken tabata tras di e atake. Outoridatnan Hulandés ta investigando e kaso.
Entre tantu ICC a tuma medida inmediatamente despues di e atake. Ekspertonan eksterno di siguridat sibernetiko i Hulanda a yuda ku esaki i tambe e korte a tuma medidanan pa evitá un atake nobo. Pero e problemanan pa ICC no ta kaba einan.
Asina Rusia a kuminsá su propio kasonan kriminal kontra e fiskal i wesnan di e Korte Internashonal di Hustisia. Esaki komo reakshon riba òrdu di e korte pa arestá presidente di Rusia Vladimir Putin. E korte ta tene Putin responsabel pa deportashon di mucha for di e partinan na Ukrania okupá pa Rusia.
by Webmaster | 18/10/2023 | Konflikto Israèl - Gaza 2023
Na Den Haag tabatin algun ora pasá un protesta pa sostené Palestina kaminda tabatin basta tenshon. Na Turfmarkt, pegá ku Centraal Station, tabatin bentamentu di vürwèrk rond di 20.00 orario Hulandes. Polis mester a mobilisá kachó i kabai pa mantené òrdu. Na kuminsamentu tur kos tabata parse trankil na e Korte Internashonal di Hustisia, pero despues algun partisipante a move den direkshon di sentro di siudat kaminda e ambiente a kambia. Tin algun detenshon a tuma lugá.
Merka a disidí sera su konsulado na Turkia te próksimo aviso dor ku ta spera protestanan di kua no por antisipá si esakinan lo kana trankil. E pais ke evitá ku esaki ta kondusí na violensha kontra siudadano Merikano den e pais. Den e pais mes, esta Merka, e organisashon hudiu Jewish Voice for Peace a tene un protesta na Washington kaminda a okupá un edifisio pegá ku Capitol. E grupo ta pidi pa un bahamentu di arma i ta sostené e kousa Palestino.
Tambe a surgi basta hopi duda riba e informashon ku a sali djamars kaminda a indiká ku 500 persona lo a pèrdè nan bida den un atake riba e hospital Al Ahli Arab na Gaza. Eskpertonan ta duda ku e kantidat aki ta kuadra despues ku imágennan di drone di e sitio a sali den publisidat i riba retnan sosial. Ta asina ku djamars Hamas a papia di mas di 500 morto pa un dia siguiente nan papia di 471 morto. Pero asta riba e kantidat aki tin duda. Segun un investigashon ku e organisashon periodístiko Bellingcat a hasi a base di tur imágen disponibel ta parse mas ku por ta trata di no sentenares pero desenan di víktima, kisas 100.
Tambe presidente di Merka Joe Biden a deklará ku el a hiba palabrashon ku Egipto pa duna akseso na yudansa humanitario pa Gaza. Esaki pa aliviá e falta di kuminda, awa, koriente i kombustibel. E yudansa mester yega via e lugá Rafah, kaminda tin vários trùk ku yudansa ya stashoná. Pero ainda Egipto no a konfirmá na ki momentu lo laga e yudansa yega Gaza. Israèl en todo kaso a indiká ku lo no stroba Egipto den dunamentu di akseso di e yudansa.
by Webmaster | 17/10/2023 | Konflikto Israèl - Gaza 2023
A lanta basta konfushon rondó di e kantidat di víktima siguiendo loke ta parse un atake ku rakèt riba un hospital na Gaza. Segun Al Jazeera, por lo menos 500 persona a pèrdè nan bida. Asina e Ministerio di Salubridat di e gobièrnu di Hamas a bisa e agensia di prensa.
E korant Haaretz a skirbi sinembargo ku outoridatnan Palestino a raportá por lo menos 200 morto. Agensia di prensa Reuters ta hasi menshon di por lo ménos 300 víktima.
No tin klaridat pues riba e kantidat eksakto di víktima i tampoko no tin klaridat riba verasidat di e imágennan di e atake ku ta sirkulá riba internet aworakí.
E hospital en kuestion Al Ahli Arab ta situá den parti nort di Gaza. Den e hospital lo tabatin hende heridá i hende ku a buska refugio.
Te ku djamars atardi 3or – orario na Kòrsou – ainda Israèl no a reakshoná riba e informe. E pais a bisa ku ainda no por duna detaye riba e atake aki. Na momentu di e informe aki ainda e edifisio tabata na kandela.
Na Wèst Bank a lanta vários protesta públiko despues di e notisia riba e atake riba e hospital. Presidente Palestino Mahmoud Abbas a proklamá tres dia di luto.
E Forsanan Militar di Israèl a bisa den un reakshon ku ainda nan no tin detaye tokante e atake. Anteriormente un fuente di e servisio di seguridat na Israèl a bisa Reuters ku kada atake riba Gaza mester haña aprobashon na e nivel mas haltu.
Israèl a lansa míles di misil riba Gaza despues ku miembronan di Hamas a invadí Israèl fin di siman pasá. E pais a hasi un yamada anteriormente na tur hende den nort pa move direkshon sùit.
Djamars a resultá ku ainda tin hopi hende den e region nort di Gaza. Lo ta trata di mas o ménos 600 mil sivil. Asina un bosero miltar di Israèl a konfirmá. E yamada na habitantenan di Gaza pa bandoná e region ta pa e tropanan di Israèl por ataká instalashonnan militar di Hamas den un posibel invashon riba tera.
Ta bon pa suprayá ‘posibel’ pasó no tin klaridat si ta trata di un bombardeo agresivo tampoko. Ta asina ku for di 7 di òktober ku Israèl a lansa míles di rakèt riba loke e pais ta konsiderá blankunan militar.
Israèl a yama mas ku 300.000 reservista pa partisipá den e lucha kontra Hamas. Aparte di militar, tambe a manda tanki i otro material militar pa e frontera ku Gaza. Habitantenan di Gaza a risibí varios deadline pa bandoná sierto área ku Israèl ke ataká.
Te asina leu sifranan ta indiká ku tin mas di 3000 morto na banda di Palestinonan i mas di 1300 na banda di Israèl.
Pa loke ta un posibel habrimentu di frontera pa tuma refugiado Palestino te ku djamars atardi mitar di 4 – orario di Kòrsou – ainda Egipto no a duna klaridat si lo habri frontera.
by Webmaster | 16/10/2023 | Konflikto Israèl - Gaza 2023
Fuentenan den gobièrnu di Egipto a bisa agensia di prensa Reuters djaluna ku e frontera entre Egipto i Gaza na e lugá Rafah ta bai habri pa yudansa humanitario. Djadumingu ya tabatin indikashon di esei despues ku e minister di Relashonnan di Eksterior di Merka, Antony Blinken, a menshoná esaki den un deklarashon.
Dor di falta di detaye no ta batain masha klaridat, un situashon ku a pèdurá djaluna tambe. A resultá ku ehérsito di Israèl a blòkia e frontera na parti sùit di Gaza, segun e minister di Relashonnan Eksterior di Egipto, Sameh Shoukry. Esei miéntras rumornan ta kana ku Merka, Egipto i Israèl lo ta hasiendo intento pa yega na un bahamentu di arma temporal. Algu ku tantu Israèl komo Hamas ta ninga.
Pues na Egipto tin hopi yudansa humanitario kla pa drenta Gaza, pero esaki no a tuma lugá ainda. Tur esnan ku a reuní banda di frontera sùit na Gaza pa krusa esaki a hasi nan esfuerso en bano.
For di Reino Hulandes mester bisa ku Ministerio di Relashonnan ku Eksterior entretantu tin kontakto ku 22 hende na Gaza ku ke sali for di e área. E kantidat aki ta mas grandi ku loke nan tabata kere promé. Aparte di e 22 personanan aki tin 126 Bèlgikano tambe pegá den e region. Entretantu mas i mas stranhero ta bandonando Israèl. Djaluna atrobe tabatin un buelo ku a sali direkshon pa Hulanda ku ya a saka 600 persona for di e pais. Un barku yen di Merikano a sali Israèl djaluna pa bai direkshon di Sipro.
Pa loke ta e kantidat di Israelínan sekuestrá a resultá segun un konteo nobo ku ta trata di 199 rehen. Den mardugá di djadumingu pa djaluna Israèl a lansa vários rakèt riba Gaza atrobe. Den e atakenan aereo a bombardeá vários kas i edifisio. Fuentenan Palestiniano ta papia di e anochi mas violento for di komienso di e situashon aktual. Israel tambe a haña atake djaluna for di Libanon kaminda Hezbollah ta operá na fabor di Hamas. Hezbollah a raportá 5 atake riba blankunan militar di Israèl. No tin informashon disponibel ainda riba e kantidat di víktimanan ku a kai djaluna.
For di Gaza e situashon ta manera konosí unu di hopi preokupashon. Djaluna a sali na kla ku ainda no ta suministrá awa na Gaza. E situashon humanitario na Gaza ta kada biaha pió. E ramo humanitario di Nasionnan Uni, a raportá djaluna ku e generatornan a sobra mas o menos 24 na diesel. Si yudansa no yega, dòkternan mester kuminsá prepará akto di fayesimentu di hopi pashènt.
by Webmaster | 13/10/2023 | Konflikto Israèl - Gaza 2023
E tropanan di Israèl ya a drenta e region di Gaza den último 24 ora i hasi vários entrada. Asina ehérsito di e pais a bisa djabièrnè. Nan ta buskando e Israelínan sekuestrá pa Hamas. Esei ta nifiká ku un invashon di Gaza ta eminente.
E tropanan ta kompañá pa tanki di guera. E tropanan no solamente tei pa liberá nan siudadanonan, pero tambe pa eliminá instalashon di rakèt di e Palestinonan.
Israèl a bombardiá Gaza sigur 7 dia largu siguiendo e atake di militantenan Palestino riba djasabra 7 di òktober. Lo ta trata di sigur mil bòm pa dia. Segun e departamentu aéreo di Israèl nan lo a dal 3600 blanku militar di Hamas.
Human Rights Watch (HRW) a opservá por sierto ku grabashonnan ta demostrá ku ehérsito di Israèl lo a usa fòsfòr blanku durante operashonnan di 10 i 11 di òktober. Fòsfòr blanku por sirbi tantu komo kòrtina di defensa i komo arma si bo konsiderá ku e tipo di huma ku esaki ta okashoná por afektá salú humano.
Mas aleu a bin sali na kla ku tin sigur 9 persona di Nashonalidat Hulandes na Gaza ku ta forma parti di dos famia. E ministerio di Asuntunan di Eksterior di Hulanda ta hasiendo trámite pa nan por bandoná e lugá.
Na banda di e Palestinonan ya lo tin 1.500 morto a kai i mas di 6 mil herido. Na banda di Israèl lo ta trata di 1300 morto i 3200 persona heridá. Djabièrnè ehérsito di Israèl a anunsiá ku Hamas tin mas o ménos 120 persona rehen den Gaza.
Te asina leu a identifiká 97 persona sekuestrá, pues no ta konosí si tur esnan sekuestrá ta Israelí. E echo ku ta trata di prisionero ta hasi nan operashon basta deliká.
by Webmaster | 12/10/2023 | Konflikto Israèl - Gaza 2023
Djabièrnè Hulanda lo manda sigur dos buelo pa repatriá siudadano kedando na Israèl. E buelonan di djaweps tabata yen yen di akuerdo ku e embahada Hulandes. Tur hende ku un pasport di Reino ku mèldu na e embahada lo risibí un yamada mas pronto posibel ku informashon kon bandoná e pais.
Gobièrnu hUlandes no a duna detaye riba kuantu persona ya a hasi uso di e buelonan di repatriashon. E sifra ei lo ta kambiando konstantemente. Además a resultá ku hopi hende tin miedu di bula nèt awor.
E ministerio di Asuntunan di Eksterior Hulandes a indiká ku esnan ku por bandoná Israèl di otro forma mester purba hasi esaki lo mas pronto posibel. E situashon na Israèl por sigui empeorá hopi lihé.
Djarason e promé buelo a yega for di Israèl ku 199 persona na bordo. Den oranan di awe nochi un buelo mas mester yega e aeropuerto na Eindhoven. Gobièrnu Hulandes ta hasiendo uso di buelonan militar. Anteriormente KLM tabata enkargá ku e operashon di repatriashon, pero finalmente e kompania a disidí pa no hasi esaki pasobra no por garantisá seguridat di pasahero.
Turesten esnan embolbé den e konflikto a anunsiá nan kondishonnan pa baha arma òf laga rehen bai. Israël a duna di konosé ku lo no rekonektá awa i koriente òf pèrmití kombustibel i alimento miéntras Hamas no laga rehennan den libertat. Asina entre otro The Jerusalem Post ta informá. Hamas no ke negoshá di otro banda tampoko si bombardeonan for di Israèl kontinuá.
Di akuerdo ku Krus Kòrá e situashon na Gaza ta sigui empeorá. 3 di e 5 instalashonnan pa distribushon di awa a sufri hopi daño i no ta sirbi mas. Otro organisashonnan i pais anteriormente a indiká na Israèl kaba ku esaki ta bai kontra derechinan humano.
by Webmaster | 11/10/2023 | Konflikto Israèl - Gaza 2023
Promé Minister di Israèl Benjamin Netanyahu i oposishon a logra yega na un akuerdo pa un gobièrnu di unidat nashonal. Asina e promé minister i èks minister di defensa a deklará den transkurso di djarason.
Un gabinete di unidat nashonal ta algu basta komun den situashonnan di krísis nashonal, pa asina por tuma desishon mas lihé. For di djasabra siguiendo e atake di Hamas riba Israèl tabatin yamada pa forma un gobièrnu asina, pero mester a negoshá kondishonnan promé.
E gobièrnu aktual mes a transformá den un gabinete di guera ku lo atendé solamente ku asuntunan relashoná ku e konflikto militar aktual i ku ta konsistí di Netanyahu, èks minister di defensa i rival polítiko Benny Gantz i e aktual minister di defensa Yoav Gallant. Aparte di nan tres a apuntá dos opservador.
Anteriormente a pidi e lider di oposishon Yair Lapid pa forma parti di e gabinete di guera. Pero segun The Times of Israel e no ke forma parti di un gabinete ku ta inkluí partidonan ekstremo derechista.
Di banda di Gaza mester bisa ku e situashon ta empeorando.
Einan entretantu tin falta di kombustibel, loke a bin resultá den baimentu di koriente práktikamente tur kaminda despues ku a sera e úniko planta di energia operashonal. Habitantenan ta dependé pues di uso di generator pareu ku un falta di kombustibel. Asta den e kompartimentunan di prison kaminda tin Palestino será a kita koriente.
Di momentu hospitalnan ta drai riba generator di emergensha, pero esaki ta yega pa apénas algun dia mas. Ta bin aserka ku for di djaluna tin blokeo kompleto tambe di parti di Israèl. Esei ta nifiká ku alimento i remedi no por yega e region.
Na Al Jazeera e direktor médiko di e hospital Al Wafa a deklará ku tin mas o ménos 100 baby resien nasé i pashènt di nir ku ta dependé di ekipamentu di e hospital.
Riba nivel internashonal tin un krítika kompartí ku seramentu di koriente i blokeo di alimento i yudansa ta medidanan ku no ta den liña ku tratadonan i lei internashonal. Asina Union Oropeo a indiká ku Israèl tin derechi di defendé su mes, pero esaki mester tuma lugá konforme tratadonan internashonal. Den Nashonnan Uní tin sonidonan komparabel.
E leinan aki ta èksistí pa un bon motibu. Kitamentu di koriente ta nifiká lógikamente ku dado momentu kontakto den i ku Gaza lo bira difísil ora no por rekargá ekipamentu di komunikashon mas. Siudadanonan lo no por risibí update di outoridatnan Palestino mas i for di eksterior un dado momentu no ta bai tin masha kontakto ku esnan den e region.
Tambe lo bira difísil pa kore skonde den shèlter durante bombardeonan den oranan di mardugá si no tin koriente.
by Webmaster | 09/10/2023 | Konflikto Israèl - Gaza 2023
Djasabra 7 di òktober miembronan militante di Hamas a hiba un atake inesperá riba Israèl. Tin hopi informashon ta bai rònt i diskushonnan ta fuerte. Aki ta sigui e echonan prinsipal:
Segun detayenan ta drenta nos lo sigui informá pero tene kuenta ku e kantidat di informenan for di e region ta enorme i ta un reto pa konta tur kos pareu.
by Webmaster | 09/10/2023 | Siensia
E Premio Nobel di Ekonomia a bai e aña aki pa Claudia Goldin pa su investigashon rondó di desigualdat entre hòmber i muhé riba merkado laboral. E ta di tres muhé den historia ku ta risibí e premio aki.
Claudia Goldin a investigá e tema di diferensha di salario entre géneronan pa mas di trinta aña. Asina el a investigá kon avanse médiko, manera e pildora antikonseptivo, a duna muhénan mas kòntròl riba nan bida i e impakto positivo ku esaki tabatin riba nan posishon laboral.
Goldin su trabou ta kubri un periodo di kasi 2 siglo splikando kon bini ainda nos ta mira diferensha den salario i e influensia di ser mama riba e fenómeno aki.
Meskos ku otro ganadó den otro kategoria Goldin ta risibí un suma di 950 mil euro ku lo wordu entrega riba 10 di desèmber na Stòkhòlm huntu ku un medaya i un diploma di e komishon di nominashon.
by Webmaster | 08/10/2023 | Newsletters
Resúmen di tur item di 2 di òktober te ku 8 di òktober 2023. Usuario di smartphone por scroll horizontal di item pa item.
