5W Press Newsletter #38 2023
Resúmen di tur item di 25 di sèptèmber te ku 1 di òktober 2023. Usuario di smartphone por scroll horizontal di item pa item.
Òktober: un momento pa konmemorá pèrdida di embaraso!
Òktober ta un luna dediká pa konmemorá e doló di pèrdida di embaraso i di baby, un doló ku hopi famia á i tá eksperensia. Ta un tópiko sensitivo, ku frekuentemente ta keda skondí.
Pa di dos aña konsekutivo, Fundashon ‘ Our Angels Journey’ ta ekstendé un invitashon na tur kompania i organisashon. Uni ku nos, iluminando bo edifisio na e kolonan ros i blou, un símbolo di sosten pa nos Angelnan ku a bai muchu tempran. Nos ta ekspresá gratitut pa CPA, CUR, TUI, Vida Nova, SOAB i HBN Law pa nan partisipashon konfirmá na e kampaña.
E tema di pèrdida di embaraso ta un eksperensia profundo i doloroso, un tópiko ku sosiedat ta haña difísil pa diskutí di forma habri riba dje. Durante òktober, bo tin un oportunidat mas pa ofresé bo sosten públikamente na famia, amigunan, koleganan, konosínan i tur esnan afektá pa e pèrdida aki.
Nos ta pidi pa tur empresa i instituto ku kier forma parti di nos kampaña di konsientisashon pa iluminá boso edifisio ku e kolonan ros i blou, durante henter òktober, ku énfasis riba 15 di òktober. Stimulá i duna oportunidat na empleadonan pa bisti e kolonan blou i blou komo símbolo di solidaridat. I kompartí boso akshon di sosten riba boso medionan sosial. Por usa e #ourangelsjourney.
Pa mas informashon tokante e kampaña semper por tuma kontakto ku ‘Our Angels Journey’, na telefòn 514- 9422.
Ku e kampaña aki ‘Our Angels Journey’ kier mustra su sosten na tur mayor ku a pasa dor di e proseso di pèrdida di embaraso i lansa un lus riba e tema di pèrdida di embaraso.
Tiroteo na Rotterdam ta resultá den 3 morto
Un atmósfera deprimí. Asina trahadónan di Erasmus MC na Rotterdam ta deskribí e dia despues di e serie di tiroteo fatal ku a tuma lugá djaweps. No tin polis mas presente na e hospital, solamente e kompanianan ku a bin drecha e daño okashoná pa e kandela sendé pa e sospechoso den e kaso aki.
Riba nivel públiko mester bisa ku tin hopi konsternashon a lanta despues ku a resultá ku Ministerio Públiko a manda atvertensha pa Erasmus relashoná ku e hòmber.
Riba djaweps alrededor di 14.30 (orario Hulandes) e promé tiroteo a tuma lugá na Heiman Dullaertplein na Rotterdam. Einan un hòmber di 32 aña a tira un dama di 39 aña mata. Su yu muhé di 14 aña a fayesé algun ora despues na hospital dor di su heridanan. Despues e hòmber a pega su kas na kandela.
Siguiendo e insendio na su kas e hòmber a bai Erasmus MC kaminda el a kuminsá tira, matando un dosente di 43 aña. Einan tambe e hòmber a sende un kandela. Alrededori di 15.30, ora e hòmber a bandoná e hospital polis a deten’é.
E sospechoso ta un studiante ku tabata na punto di risibí un diploma di basisarts. Ministerio Públiko a indiká ku e hòmber a yega di ta den kontakto ku hustisia i ku el asta keda kondená pa aktonan di maltrato di animal. Testigunan lo a yega di mir’é komportá di forma sikótiko. Mas aleu no ta konosí kiko e sospechoso tabatin di haber ku e víktimanan.
E sospechoso ta Fouad L di 32 aña ku tabata studia na Erasmus. Durante su detenshon a bin deskubrí un arma di kandela. Tambe e tabatin un chaleko kontra bala bistí. E ta biba pegá ku e promé víktima. Manera indiká e hòmber tabatin un kondena riba su nòmber pa maltrato di animal. Riba su telefòn a polis a haña imágennan basta violento. Te asina leu ta asumí ku Fouad L a aktua su so.
E kaso ta bou di investigashon.
Apple ta bai konsentrá mas riba videogames ku i kompetí ku PlayStation, Xbox i Nintendo Switch
Apple ta bai konsentrá mas riba videogames i kompetí ku PlayStation, Xbox i Nintendo Switch. Asina direktor di Apple Tim Cook a bisa durante un bishita na produktor di videogames Gamehouse na Hulanda.
Ta asina ku ya tin vershonnan avansá di iPhones adekuá pa games ku a sali anteriormente riba Playstation 5 i Xbox. Benta di iPhones ta generá alrededor di mitar di e entradanan di Apple.
E vershonnan mas kostoso di iPhones, 15 Pro i Pro Max, tin un processor asina potente ku esaki por generá e mesun kalidat ku Playstation 5 i Xbox. E videogames aki ta disponibel riba Apple Arcade.
E direktor di Apple ta di bishita na Gamehouse na Hulanda pa un posibel kolaborashon. Gamehouse ta produsí partikularmente videogames diseñá pa hende muhé.
Getty Images tambe ta bai introdusí inteligensha artifisial
E website pa Stock Photos Getty Images ta bai lansa un programa di inteligensha artifisial ku usuarionan por usa pa traha imágen personalisá i sin copyright. Esaki pa evitá ku e sistema ta viola derechinan di outor. Getty Images a desaroyá e sistema huntu e fabrikante di chip NVIDIA.
E tool nobo aki ta bai usa solamente imágennan den e database di Getty Images. E no ta usa potrèt proveniente for di notisia pa evitá mal uso i aktonan di deepfake, esta susesonan ku no a tuma lugá. Getty Images a tuma e paso aki entre otro pa para uso ilegal di su material den programanan di AI di terseronan.
Meta ta presentá sistema di AI i brelnan nobo
Falta poko pa Meta, propietario di WhatsApp, Instagram i Facebook presentá su sistema di inteligensha artifisial Meta AI, un alternativa riba ChatGPT. Meta AI mester sirbi pa rospondé preguntanan di usuarionan. E chatbot ta bai traha ku un modelo ku por buska kontesta pafó di Facebook riba otro partinan di internet pa informashon aktualisá.
Meta AI ta solamente 1 di e vários servisionan ku direktor Mark Zuckerberg a presentá durante Meta Connect.
Tambe el a presentá e vershon mas resien di Quest 3, un brel pa virtual i augmented reality desaroyá pa e team tékniko di Zuckerberg ku ta duna akseso na un mundu virtual pa trabounan digital. E brel ta sirbi tambe pa sierto videogame. E preis di e brel virtual di Meta ta kuminsá na $500,-
Otro produkto ku a keda presentá tabata e vershon nobo di Ray-Ban Stories, un brel inteligente desaroyá pa Ray-Ban den kolaborashon ku Meta. E brel tin un kámara spesial ku por sirbi pa entre otro live-streams. E vershon aki tin un mihó kalidat di imágen i sonido. E preis ta kalkulá na un preis básiko di $300,-
FTC ta hiba Amazon dilanti pa monopolio
Amazon ta mantené un sorto di monopolio. Asina e supervisor Merikano FTC ta bisa den un demanda huntu ku 17 estado kontra e kompania. Segun FTC Amazon ta obligá bendedónan riba su plataforma pa usa su servisionan logístiko. A kambio nan produkto ta haña un espasio prominente riba nan webshop.
Tambe e kompania lo ta tuma medida kontra bendedónan ku ta bende nan produktonan mas barata ku Amazon mes. Segun FTC Amazon ta gana kasi 1 dòler riba kada 2 dòler ku un bendedó generá.
Amazon a bisa den un reakshon ku e kaso ta den konflikto ku e interesnan ku FTC mester defendé. E kompania tin konfiansa ku e lo gana e kaso.
Direktivanan di sindikato di script writers ta aprobá akuerdo ku studionan
Entrante djarason script writers na Hollywood ta trahando atrobe. Djamars anochi e sindikato di eskritornan a aprobá e akuerdo di CAO resien negoshá ku e studionan grandi.
Durante e negosiashonnan a traha afsprak relashoná ku oumento di salario, e kompensashon pa online streaming i uso limitá di inteligensha artifisial. Asina studionan grandi no ta pèrmití pa èksigí uso di esaki. Eskritornan si ta liber pa usa esaki.
Awor ku negosiadónan i direktivanan di sindikato a aprobá e akuerdo, ta na e miembronan pa adoptá e akuerdo aki definitivamente. Entre 2 i 9 di òktober nan lo tene un votashon.
E promé aktividatnan ku lo reanudá lo ta probablemente talkshows. Serie i pelíkula lo mester warda ainda ya ku aktornan ainda ta den wèlga.
Union Oropeo: retnan sosial mester hasi mas pa para desinformashon for di Rusia
Union Oropeo ke pa retnan sosial tuma mas medida pa evitá influensha di Rusia durante elekshon. Segun visepresidente di Komishon Oropeo Vera Jarouvá Facebook, X i TikTok mester duna mas di nan parti.
Motibu pa e yamada aki ta e kantidat di desinformashon ku ta sirkulá di momentu riba retnan na Slovakia i Polonia kaminda tin kampañanan di elekshon ta kana.
Mirando e insidensia di desinformashon a lanta e miedu ku otro aña Rusia lo hasi meskos durante elekshonnan pa parlamentu Oropeo. Partikularmente e plataforma X (ántes Twitter) mester vigilá e kontenido di sierto account mihó.
Amazon ta sera deal di 1250 mion dòler ku Anthropic pa desaroyá inteligensha artifisial
Amazon ta sigui ehèmpel di Microsoft, Google, Apple i Facebook i ta bai invertí hopi kapital den desaroyo di inteligensha artifisial. E kompania ta bai invertí na total 1250 mion dòler den Anthropic ku ta desaroyando e chatbot Claude. Tin un chèns ku e invershon por subi te 4 mil mion dòler.
Por sierto ku Google tambe tin 300 mion dòler invertí den Anthropic i ku nada lo kambia na e afspraknan ya trahá. Pero ámbos deal ta nada kompará ku e 13 mil mion ku Microsoft a invertí den OpenAI pa un kolaborashon eksklusivo.
No ta konosí kiko Anthropic ta bai hasi eksaktamente pa Amazon. Por ta trata di e maneho di e kapasidat di e datacenters di Amazon.
Servisionan gubernamental na Merka ta menasá di sera porta
Hopi servisio gubernamental na Merka ta menasá di sera nan portanan aki algun dia pa falta di kapital. Pa evitá esaki parlamentu Merikano mester yega na un akuerdo lihé pa aprobá finansiamentu di e servisionan.
Ta asina ku Merka ya ta na su plafònt di debe, e límite finansiero imponé riba gobièrnu pa evitá ku esaki ta fia muchu sèn. Pa subi e plafònt aki mester tin unanimidat den e Kas di Representantenan, e órgano parlamentario Merikano.
Di momentu tin un mayoria Republikano den e parlamentu ku ta èksigí pa e gobièrnu di e Demókrata Joe Biden drecha su maneho finansiero promé ku aprobá un subida di e plafònt di debe.
Pa mas tardá djasabra 30 di sèptèmber mester tin un akuerdo riba mesa, sino gobièrnu mester pasa mesora na kòrta den su gastunan.
LEGO ta anulá plan pa traha piedra di material resiklá
E kompania LEGO a anulá un plan pa traha piedra di bòter di plèstik resiklá. E kompania ta bai investigá si tin otro material mas adekuá pa logra e meta di redusí emishon di kabro-diókseno, un di e gasnan ku ta hasi mas daño na medioambiente.
Dos aña pasá LEGO a presentá un prototipo di piedra di LEGO trahá di bòter di plèstik resiklá. Na e okashon ei bòter di plèstik tabata parse e material mas opvio pa usa den produkshon, pero e kompania a deskubrí entretantu ku e plan lo no resultá den ménos emishon di karbo-diókseno.
E kantidat di mashin pa produsí LEGO di material resiklá no ta rendabel. E kompania no a kambia su ambishon pa emití ménos karbo-diókseno. Pa 2032 e kompania kier emití 37% ménos karbo-diókseno kompará ku aworakí.
Te asina leu e invershonnan den fábrikanan ku ta emití poko polushon ta basta haltu. Den próksimo 2 aña e kompania lo invertí mas o ménos 1200 mion dòler den produkshon mas limpi.
Studionan na Hollywood i sindikato di eskritornan a yega na akuerdo temporal pa CAO
E studionan di sine na Hollywood i e sindikato di eskritornan WGA a yega na un akuerdo temporal pa un CAO. Esaki por marka fin di e wèlga ku ya a dura kasi 150 dia. E CAO nobo aki ta bálido pa un periodo di tres aña. Si un mayoria di e 11.500 miembronan di e sindikato bai di akuerdo nan lo reanudá trabou.
Segun vários medio ta informá trahadónan ta bai haña un oumento di salario i tambe lo paga mas royalty pa serie i pelíkulanan ku ta disponibel riba servisionan di streaming. Tambe a stipulá regla pa uso di inteligensha artifisial (AI).
Manera ta konosí eskritornan di esenario a buta trabou abou den mei despues ku negosiashonnan a frakasá ku Alliance of Motion Picture and Television Producers, e asosiashon di studionan i servisionan di streaming.
Den yüli aktornan a uni e wèlga. Esaki a para práktikamente tur aktividat na Hollywood. E aktornan si lo kontinuá ku nan wèlga por lo pronto.
Box Jellyfish di Karibe no tin selebro pero por keda kòrda
E asina yama Box Jellyfish den region di Karibe no tin selebro pero lo por siña hopi lihé i warda informashon. For di un estudio publiká pa e revista Current Biology tin indikashon ku jellyfish, esta medusa, por pensa sin ku nan tin un selebro.
E konklushon aki ta sigui estudionan di sientífikonan na e Universidat di Kopenhagen (na Dinamarka) i e Universidat di Kiel (na Alemania). Asina e medusanan lo ta konsiente ku nan mester evitá áreanan di palu di mangel.
E sientífikonan a tèst e kapasidat di e animalnan pa siña dor di koloká nan den un akuario ku strepi blanku i shinishi pintá na banda representando taki di palu di mangel.
A resultá ku e animalnan den ménos ku 5 minüt no tabata aproksimá e strepinan mas despues ku nan no por a pasa esakinan, loke ta un indikashon ku nan lo ta kòrda ku nan no por pasa einan.
E komportashon di e animalnan ta notabel, pero no ta konosí ainda kon nan ta keda kòrda ku nan no por pasa e strepinan. Tampoko no a opservá e fenómeno òf ripití e tèst den naturalesa.
Hulanda ta kobra e accijns riba gasolin mas haltu den Oropa
Hulanda ta e pais Oropeo kaminda bo ta paga mas pa gasolin. E preis pa liter di gasolin ta kalkulá aworaki na 2,30 euro, kompará ku Alemania kaminda gasolin ta kalkulá na 1,90 euro i na Bèlgika kaminda bo ta paga nèt un poko ménos ku na Alemania.
Manera ta konosí e kontrapartida di OB, esta BTW, na Hulanda i Bèlgika ta 21% i na Alemania 19%. E BTW ta kobrá riba e preis di gasolin inkluyendo accijns.
Na Hulanda bo ta paga 79 sèn pa kada liter na accijns, kompará ku Bèlgika kaminda bo ta paga 60 sèn i Alemania kaminda bo ta paga 65 sèn na accijns. E accijns promedio Oropeo ta kalkulá na 53 sèn pa liter.
E accijns ta un suma figo pa kada liter di gasolin ku ta subi riba promé di yanüari segun korekshon riba inflashon. Pa kontené e subida Tweede Kamer a disidí pa posponé e próksimo subida entrante promé di yanüari 2024.
