E konosido kompania Nike a mira su sifranan di benta baha den último tres luna i ta prepará pa mas kontratempu. Artíkulonan di lifestyle i kèts manera Air Force 1 a bende ménos bon kompará ku den pasado. E resultado dje kompania den último tres luna ta fihá na 12.6 mil mion dòler. Esei ta 200 mion dòler ménos kompará ku aña pasá.
Manera indiká e benta di artíkulonan di lifestyle i modelonan klásiko di kèts a baha. E marka sukursal Converse tambe a mira su benta baha ku 18%. E benta di paña pa basketball i kèts pa kore si tabata bon, pero no sufisiente pa kompensá e pèrdidanan. Den kasi tur parti di mundu Nike a mira su sifranan di benta baha mas ku tabata antisipá. Partikularmente den Nort Amérika i China e ultimo kuartal tabata hopi malu.
Segun analistanan Nike no ta inová su modelonan sufisiente i esei ta krea espasio pa otro markanan manera Hoka, New Balance i On. Nike ta spera en todo kaso ku e próksimo Olimpiada lo sòru pa un boost den promoshon dje marka.
Mal wer por okashoná problema ekonómiko. E konklushon ei ta konta sigur pa e bendedó di paña Oropeo Hennes & Mauritz (H&M) ku mester tene kuenta ku sifranan i benta hopi malu. Dor di mal wer e benta di paña pa e temporada di zomer ta hopi mas abou ku antisipá.
E kompania ya abata premirá esaki den su sifranan di benta den mei. Ku fin di yüni yegando ta ferwagt un bahada di 6% na benta. Den hopi pais kaminda H&M tin sukursal yüni tabata un luna ku nhopi áwaseru kompañá pa inundashon. Ta ora ku wer a kuminsá habri ku e benta a normalisá un poko.
E resultado operashonal di e kompania Sueko ta kalkulá na un pko mas di 628 mion euro. Segun agensia di prensa Bloomberg esei a mas abou ku loke analistanan ferwagt.
Korte supremo na Merka a rechasá un areglo ku e kompania Purdue Pharma relashoná ku un ola di sorbedosis ku a hasi daño na hopi usuario di e remedi OxyContin. Asina agensia di prensa Reuters ta informá.
Purdue Pharma tabata propiedat di e famia Sackler. E kompania a hasi hopi Merikano adikto ku promoshon i benta masal dje produkto OxyContin.
Un mayoria di e Korte Supremo a disidí awor ku e 6 mil mion dòler ku e famia a paga pa un areglo ku esnan perhudiká no ta korespondé ku e bedadero daño. E korte mas haltu na Merka a pasa pa e motibu ei un strepi dor di un desishon anterior di un korte mas abou.
Purdue Pharma a bagatelisá e riezgo di adikshon na OxyContin i a desmentí semper e atvertenshanan ku tabata bin dilanti. E remedi tin un efekto adiktivo komparabel ku heroina ku a kondusí na un epidemia di adikshon den ultimo 25 aña. Sigur 500 mil persona lo a fayesé dor di uso di e remedi. Den 2019 Purdue Pharma a bai bankarota dor di tur e kompensashonnan ku e kompania mester a paga.
E kaso den korte tabata drai rondó dje pregunta si e famia propietario Sackler tin e mesun derechinan hurídiko ku Purdue Pharma. Segun Korte Supremo pues nan no ta protegé pa lei, pasobra nan mes komo persona no a keda deklará bankarota.
Resien a bolbe deskubrí un kaso di partenogenesis. Esaki ta un fenómeno natural pero hopi skars kaminda un ser bibiente ta reprodusí sin kontakto seksual ku otro ehemplar. Ta trata aki di un boa na un instituto ku a haña 14 bebi sin ku e animal tabatin kontakto ku otro boa den ultimo 9 aña.
Pa kolmo semper tabata asumí ku e animal ta un machu i p’esei e yama Ronaldo. E parto a lanta dimes hopi pregunta di akuerdo ku City of Portsmouth College ku a investigá e kaso.
E skol a indiká ku partenogenesis no ta algu deskonosí i ku ta un forma natural di reprodusí pa sierto espesie riba nos planeta. Ta un fenómeno opservá den vários mata i animal. Ta di tres biaha tambe ku a opservá e fenómeno aki serka boanan di e mesun sorto den terarium pa algun aña kaba.
Dos asteroide, o sea dos baranka, basta grandi lo pasa pegá ku nos planeta e siman aki. E dos pasahenan lo tuma lugá denter di 42 ora separá for di otro. Apesar ku nan lo no dal den nos planeta tin sufisiente motibu pa preokupashon. Ta asina ku NO a nota un di e barankanan aki te ku siman pasá. Segun e organisashon Oropeo pa eksplorashon espasial ESA ta kos ku mester preokupá nos.
E promé baranka tin un diameter di 2.3 kilometer i lo pasa djaweps, pero no masha serka. Su distansha mas pegá lo no ta ménos ku 6.6 mion kilometer. Esei ta 16 biaha e distansha entre nos i luna. Invisibel sin un teleskop fuerte.
E di dos pida baranka tin un superfisie di 120 pa 260 meter i lo pasa den mardugá di djasabra pa djadumingu, pero na un distansha di 290 mil kilometer ku ta 3/4 di e distansha entre nos planeta i luna. Esnan ku un teleskop òf verrekijker fuerte lo por mira e pida aki pasa.
Ta nèt e di dos pida aki pues sientífikonan no a tuma nota di dje te ku siman pasá. E di dos pida aki no ta zona mesun grandi pero e tamaño ta sufisiente pa okashoná hopi daño si e dal den nos planeta. Esei ta nifiká ku mester kuminsá paga mas tinu riba loke ta sosodé rondo di nos, di akuerdo ku ESA.
Pa kasualidat e di dos baranka aki lo pasa den mardugá di 29 pa 30 di yüni ku ta eksaktamente 116 aña despues di e ultimo biaha ku un planetoide a berdaderamente dal den nos planeta. Riba e dia ei un baranka a eksplotá na un altura di 10 kilometer riba Siberia despues ku el a drenta nos atmósfera. E eksploshon ei ta kalkulá na 50 biaha e forsa di e bòm ku a kai riba Hiroshima. Eksploradónan a mira despues ku kasi 80 mion palu den e region a basha abou dor di e impakto.
Mester deshasí di smartphones na skolnan. Asina ta sugerí den e buki resien publiká The Anxious Generation di e sikólogo sosial Jonathan Haidt. Segun un di e investigadónan den e buki, Zach Rausch, mester buska un manera pronto pa redusí e impaktonan negativo di social media riba hóbennan.
Pa The Anxious Generation a konsultá vários estudio hasí riba e forma ku social media a drenta nos bida despues di 2010 i riba e impakto negativo di esakinan riba hóben. Partikularmente e ansiedat i depreshon ku social media por tin riba hende. Despues di 2010 por nota ku e kantidat di hóbennan ku ansiedat ta hopi mas haltu.
Pa e konklushonnan a wak por ehèmpel e medidanan tumá na Hulanda pa kombatí e problema. Ta asina ku na Hulanda ya smartphones no ta pèrmití mas na skol i e reakshonnan te asina leu ta basta positivo. E ambiente durante pausanan lo ta mihó, alumnonan ta papia ku otro atrobe i tambe lo tin ménos bullying tumando lugá.
Pero ta mas prudente pa evaluá e adelanto den prestashon i komportashon despues di 1 òf 2 aña pa sa si e efekto ta duradero. Mester kòrda ku pronto alumnonan lo tin fakansi i akseso konstante atrobe na nan telefòn.
The Anxious Generation ta duna hopi ehèmpel i prueba di e efektonan di social media i smartphones riba ser humano. E pió efekto riba hende ta e echo ku sernan humano ta haña ménos eksperensha ku situashonnan sin un pantaya nan dilanti i laga nèt eseinan ta e eksperenshanan ku nos mester pa por krese komo ser humano.
The Anxious Generation di Jonathan Haidt ta disponible riba tur webstore ku ta bende buki online.
E adrèsnan di e-mail di kasi 60 mil persona ku un debe na DUO a bin kaba riba kaya dor di un eror di software. Un eror ku por resultá den abusu dor di kriminalnan. Asina e emisora BNR a informá.
Dienst Uitvoering Onderwijs a manda un enkuesta pa 60 mil persona ku ta pagando nan debe di estudio. Ta danki na un hacker étiko, ku a deskubrí e fayo, ku DUO a haña sa. A resultá ku DUO a usa software di análisis di e kompania Suiso Survalyzer ku no ta perfektamente sigurá.
E hacker por a mira pues ken tur a haña un invitashon pa yena e enkuesta i a informá DUO inmediatamente. Despues a resolvé e lèk den e sistema. Tantu DUO komo Survalyzer ta investigando e insidente. Te asina leu ku nan por a nota niun hende aparte di e hacker no a deskubrí e eror.
Si e informashon a kai den man di criminal esakinan por usa e datonan pa aktonan manera phishing. Esaki ta trikinan pa hala ussuarionan pa bishitá website falsu.
Fabrikantenan di outo na China a haña supsidio di estado na un balor total di 231 mil mion dòler ($231.000.000.000) den ultimo 15 aña. Esaki di akuerdo ku e denktank Merikano Center for Strategic and International Studies (CSIS).
Esaki ta algu ku partikularmente Union Oropeo tabata konta ku n’e pa asina por imponé impuesto riba outonan elektróniko for di China. Modelonan di entre otro BYD i Lynk & Co ta basta popular bou di amantenan di outo, pero e supsidionan ta okashoná kompetensha inhustu tantu na Merka komo Oropa kaminda estado no ta otrogá supsidio na fabrikantenan.
Segun CSIS, ku a hasi e kálkulo aki, ta trata di un estimashon reservá. No a investigá solamente supsidionan, pero tambe deskuento, eksonerashonnan i incvershonnan di gobièrnu den puntonan pa rekargá. Konhuntamente e invershonnan aki ta suma na total pues 230,8 mil mion dòler, di akuerdo ku agensia di prensa Bloomberg. I esei no ta inkluí ni tur invershon adishonal for di gobièrnu Chines. Ainda tin e supsidionan lokal.
E kalkulo di CSIS no ta koinsidensia i ta kai den kuadro di tenshonnan komersial entre Union Oropeo i Merka di un banda i China di otro banda. For di siman pasá kaba Komishon Oropeo a bisa ku mester imponé impuesto riba outonan Chines. Di momentu tin un impuesto di 10%, pero ku e medidanan adishonal e impuesto lo subi ku sigur 38% èkstra, butando e impuesto total riba outonan Chines na 48%.
Por sierto ku e medida no a definitivo. Union Oropeo i China lo reuní riba e punto aki, pero si e palabrashonnan no ta produktivo entrante 4 i yüli lo imponé e impuesto èkstra. Na China dimes nan no ta masha ‘amused’ ku e paso ku Oropa a tuma i a menasá di imponé impuesto tambe riba iportashonnan Oropeo.
Aktor Donald Sutherland a fayesé na 88 aña di edat despues di tabata kebrante di salú pa basta luna. Su yu, aktor Kiefer Sutherland, a konfirmá e notisia riba X, ántes Twitter. Sutherland a hunga ròl den un kantidat enorme di pelíkula durante su karera, entre nan Animal House, e serie di pelíkula The Hunger Games i Pride & Prejudice (di 2005).
Sutherland a nase riba 17 di yüli 1935 na Canada. Na komienso di añanan 60 di siglo pasá el a kuminsá aktua den pelíkula di horror i vários thriller. Pero el a bira berdaderamente konosí ku The Dirty Dozen, M*A*S*H, Kelly’s Heroes i Klute.
Sutherland ta un aktor ku bo ta rekonosé for di míles. 50 aña largu públiko a mir’é den vários título eksitoso. El a gana tantu un Emmy komo un Golden Globe pa su ròl komo funshonario soviétiko den e serie Citizen X. Tambe el a risibí un golden globe pa su ròl den Path to War den 2003.
Donald Sutherland a kasa na total tres biaha. Su yu Kiefer Sutherland, ku tambe ta konosí di vários pelíkula di Hollywood, a nase di su di dos matrimonio. Mayoria hende lo ta kòrda Kiefer di e serie 24 i Designated Survivor.
Den e ultimo 30 dianan preis di oro tabata basta haltu. Ta asina ku for di komienso di e aña aki preis di oro a subi konsiderablemente. Si nos bai bèk eksaktamente un luna pasá riba 20 di mei, preis di oro a alkansá un preis rèkòrt di 2450 dòler per troy ounce.
E morto di presidente di Iran Ebrahim Raisi a duna e subida un boost temporal te na e 2450 dòler menshoná. Su morto a trese preokupashon bou di invershonistanan pa ku stabilidat den Medio Oriente. E preokupashon ei a lanta pues mas interes ainda pa invertí den oro.
Un luna despues (20 di yüni 2024) e ta na 2360 dòler per troy ounce, mas abou pero tòg mas haltu ku aña pasá ora e preis no tabata pasa 2000 dòler. Manera indiká e preis ta mustra un subida fuerte pa algun luna kaba.
Mas aleu invershonistanan a spera ku Federal Reserve na Merka lo a baha e porsentahe di interes, pero te ku un siman pasá esaki tabata fihá ainda na mas di 5%. Ta bin aserka e konflikto entre Israèl i Hamas (pegá ku paisnan den region ku ta eksportá petroli) i e echo ku Banko Sentral di China a agregá un kantidat supstansial di oro na su reservanan.
Aparte di e preis di oro, tambe a nota un subida di e preis di koper ku dado momentu a alkansá 11 mil dòler pa kada tòn. Esaki dor ku e demanda pa e tipo di metal aki ta bai subi mirando e kantidat di invershonnan den proyektonan di energia, esta koriente. E ofèrta sinembargo no ta sufisiente pa e demanda actual, loke ta pusha e preis pariba.
Koper ta hopi usá aworakí den infrastrukturanan pa outo elektróniko, mulina i panel di solo. Dor di e uso haltu den industria ta bon semper tambe pa opservá kiko ta pasanfdo ku e preis aki.
Sientífikonan a bin topa e biña mas largu wardá den historia. E bebida lo tin mas o ménos 2000 aña i a keda tur e tempu ei den un tumba Romano na Spaña. Ta trata di un tumba ku un famia a haña 5 aña pasá pa kasualidat i ku nan a trese na atenshon di e servisio arkeológiko lokal.
Den e tumba tabatin 8 kompartimentu ku 6 pòchi kaminda a haña wesu humano. Dos pòchi tin ainda e nòmber di e defuntu skirbí riba dje. Pero den un urna pues a bin deskubrí biña.
Ekspertonan di universidat di Córdoba a analisá e biña i a indiká ku esaki tin un koló maron, pero ku originalmente tabata trata di biña blanku. Den trankurso di siglonan e koló a kambia, pero ainda por bebe esaki sin problema. E wesunan den e pòchi lo no a okashoná venenamentu dje bebida.
Te ku aworakí e biña mas bieu na mundu a keda enkontrá na Alemania. Einan a deskubrí un biña wardá for di aña 325 di nos kalènder. Esei tambe tabata bin di un graf Romano.
Di momentu Microsoft ya no ta e kompania mas grandi na mundu. E título ei ta bai pa e kompania NVIDIA ku a pasa tantu Microsoft komo Apple riba merkado di bolsa. E aña aki so e kompania su balor a subi ku 160%. Djamars atardi e kompania su balor a alkansá un 3,3 bion dòler. Anteriormente e luna aki ya e kompania a pasa Apple temporalmente, pero sin pasa Microsoft.
Entre febrüari i fin di aprel di e aña aki e kompania su resultado tabata 262% mas haltu kompará ku un aña anterior. Esei so tabata bon pa un resultado di 14.9 mil mion dòler, kua ta 7 biaha e resultado di un aña promé.
Ta asina ku NVIDIA ta probechá mas tantu aworakí di e kompetensha entre kompanianan teknológiko pa introdusí aplikashonnan a base di AI. NVIDIA ta diseña i produsí e chips pa datacenters ku ta sostené e modelonan di AI. De echo e departamentu di AI ta esun mas grandi den NVIDIA aworakí. Promé ku esei NVIDIA tabata produsí chips partikularmente pa e sektor di videogames, ku ta rekerí pues un forsa di kálkulo hopi haltu ta produsí imagen di bon kalidat i efektonan digital realístiko.
E asistente virtual di Apple Siri tambe ta programá awor ku inteligensha artifisial. Asina e kompania ta partisipá.
Mayoria hende mester a ripará ku den ultimo 2 aña AI a hasi un entrada notabel den mundu di teknologia. Partikularmente ChatGPT di OpenAI a lanta hopi interes bou di invershonistanan manera Google i Microsoft. Apple sinembargo no ke papia di Artificial Intelligence, sino “Apple Intelligence”.
E kompania te asina leu no tabata promové su funshonalidatnan asina intensivo manera Google i Microsoft. Poko poko pero sigur Apple tambe ta introdusiendo su funshonalidatnan di Inteligensha Artifisial. E mayor kambionan lo ta notabel den e kompania su asistente virtual Siri ku ta riba merkado for di 2011.
Segun direktor di Apple Tim Cook e asistente virtual ta bai haña un aspekto mas humano i ta bai konektá tur app i funshonalidat di Apple di un forma mas efisiente. Siri pronto ta bai por traha resúmen den e-mail, yuda skirbi teksto i genera imágen artifisial. E ta bai forma parti tambe di Apple su browser di internet Safari.
E kompania ta enfatisá ku privacy di usuarionan lo keda garantisá. Asina e diseño nobo ta limitá kualke pregunta den promé instansha na funshonalidatnan den bo device privá. Ta ora ku esaki no por generá un kontesta, ku e ta konektá ku servers di Apple.
Apple no ta rekonosé lo siguiente na bos haltu, pero de echo e kompania ta usa e mesun teknologia ChatGPT di OpenAI ku Microsoft tambe ta usando den su aplikashonnan. E diferensha ta den e kondishonnan di servisio i garantia di privacy. Riba aparatonan di Apple e usuario mes mester duna aprobashon na e funshonalidat di AI.
No ta straño ku awor numa Apple ta introdusí AI den su servisionan. Den pasado tambe e kompania semper a sigui desaroyonan serka otro kompania promé pa despues introdusí su propio vershon. Ta di e forma aki e kompania a keda distinguí su mes for di su konkurentenan.
No ta kasualidat ku Apple lo kier a opservá e merkado promé. Asina anteriormente e aña aki Google a lanta hopi kontroversia ku su sistema di AI ku tabata produsí imágennan ku histórikamente no ta kuadra.
Por lo pronto e sistema nobo di Apple lo ta disponibel solamente na Ingles.
E kompania Aleman Adidas ta investigando un kaso di soborno na China. Esaki di akuerdo ku The Financial Times. Ainda mester determiná kon grandi e daño ta i kiko ta bai ta e impakto berdadero.
Managernan Chines lo a tuma miónes di euro na pago. E asuntu a bin sali na kla dor di un karta ku trahadónan a manda anónimamente pa gerensha di Adidas. Lo ta trata di trahadónan ku ta hopi bon na altura di kuestionnan interno i konfidensial dje kompania.
Un di e funshonarionan haltu den e departamentu di marketing pa Adidas na China lo ta embolbé. Di un otro departamentu ta konosí ku e manager lo a tuma sèn cash i otro donashonnan ku no ta pèrmití. Adidas a konfirmá e informashon na The Financial Times ku ta investigando e kaso. Te asina leu esaki no a kondusí na retiru di trahadó Chines na Adidas.
China ta un merkado importante pa e kompania, ku ta por sierto e di 2 marka deportivo mas grandi na mundu. Adidas tabatin bastante problema kaba na China siguiendo e lock-downs stringente ku tabata vigente den durante e pandemia di Covid-19. Na e okashon ei e kompania a pèrdè hopi entrada dor ku mester a para operashonnan den fábrika.
5W Press ta komprometé na informá su oudiensia a base di datonan i echonan verifikabel. Komo parti di e kompromiso aki nos ke aportá na kombatimentu di Fake News mas tantu posibel ku fact-checks.
Tambe nos ta publiká regularmente Fact Sheets den kuadro di temanan ku ta den aktualidat. Fact Sheets ta instrumentonan indispensabel pa periodista, studiante, alumno i/òf interesadonan haña un bista mas realístiko i kompleto posibel di kualke tema den aktualidat.
Nos no ta solamente fact-check i debunk fake news ku ta plama via scoial media. Nos por siña bo tambe kon identifiká Fake News rápidamente. Sigui e siguiente “tips” i abo tambe por siña detektá fake news fásilmente:
Tip 1 – Chèk e fuente mesora
E tip aki por spar bo basta tempu. E página Hoaxwijzer (orígen: Bèlgika) tin un lista ekstenso di tur fuente notorio pa nan reportahe sensashonal i/òf fake news. Ku un konsulta kòrtiku riba e página aki bo no ta pèrdè bo tempu lesando kos ku no ta kuadra.
Tip 2 – Rekonosé e señalnan
Ora bo ta sinti ku un título di un artíkulo òf un app ku bo a risibí ta trigger sensashon fuerte di miedu, tristesa, rabia i/òf (esun mas engañoso di tur!) plaser/satisfakshon, tin un posibilidat ku bo ta konsumiendo fake news. E rekomendashonnan aki ta yuda determiná si bo tin posibel fake news bo dilanti:
No lesa e título so
Kontrolá e fuente
Kontrolá e fecha di e publikashon
Ken ta e outor?
Kontrolá e fuentenan menshoná den e notisia
Kontrolá sitashonnan i fotonan usá
Tene kuenta ku bo opinion personal
Kontrolá si tin otro fuente ofisial ku tambe ta raportá riba e issue
Pensa, promé ku bo kompartí e informashon
Tip 3 – Tin fact-check kaba?
Nos a ripará ku mayoria fake news internashonal ku yega Kòrsou ya tin vários siman den sirkulashon promé ku nan alkansá social media na Kòrsou. Afortunadamente tin vários organisashon internashonal ku den mayoria kaso ya a investigá i verifiká e verasidat di e informenan aki:
