Animal Farm (pelíkula animá di 1954)
21 di yüli 2024 registrá dia mas kalor den historia
Djadumingu 21 di yüli 2024 a drenta historia komo e dia ku a hasi mas kalor. E temperatura promedio riba nivel mundial ta registrá na 17,09 grado, ku ta nèt un poko mas ku e rèkòrt registrá aña pasá den e mesun luna. Pa 13 luna konsekutivo kaba ta registrando rèkòrt tras di rèkòrt.
Asina e instansha Copernicus a bisa agensia di prensa Reuters. E promedio haltu ta relashoná ku olanan di kalor na Merka, Oropa i Rusia. Na Canada por ehèmpel tin hopi kandela di mondi tumando lugá atrobe.
Den parti ost di Rusia tambe a registrá mas kandela di mondi. Den parti nort di India a registrá dos periodo ku a dura mas di tres siman ku temperatura riba 45 grado.
Pa loke ta toka Oropa partikularmente Spaña a registrá temperaturanan haltu hopi mas tempran ku normal pa e temporada di aña. Kondishonnan komparabel por a nota den parti sùit-ost di e kontinente tambe.
Ta pronostiká ku e aña aki lo kibra e rèkòrt di aña pasá komo aña mas kalor den historia.
Atakenan di wòlf ta oumentando
E kantidat di atake di wòlf riba karné na Hulanda ta subiendo duru. Den promé tres luna di e aña aki a registrá tres biaha e kantidat di atake registrá den e mesun periodo di 2023. Den e gran mayoria di kaso ta trata di falta di medida. Den tur kaso ta 100% sigur ku ta trata di atake di wòlf. Atake di kachó tambe ta konosí pero skars.
Den promé tres luna di e aña aki a registrá 267 atake, kompará ku 77 aña pasá di akuerdo ku ANP a base di datonan di BIJ12, un organisashon ku ta registrá insidente ku wòlf pa e provinsianan kaminda e animalnan ta biba.
Mayoria atake a tuma lugá na Ooststellingwerf, un lugá na Friesland pegá ku frontera ku Drenthe. Ei a registrá 39 atake. Generalmente e atakenan a tuma lugá den e konosido region Veluwe. Na Ede a registrá 27 insidente i na Elburg 22.
Na Gelderland a nota un subida konsiderabel den promé tres luna di e aña aki kompará ku hinter 2023. No ta straño ku mayoria atake ta tuma lugá aki pasobra einan mayoria wòlf na Hulanda ta biba.
Ya tin vários famia registrá kaba. Asina na Veluwe tin 7 famia registrá, Drenthe tin 2 i tambe a nota un famia mas na Heuvelrug den e provinsia Utrecht. Einan a sera e ária kaminda e wòlfnan ta move te ku 15 di ougùstùs próksimo despues di algun insidente ku a lanta hopi konsternashon.
E kousa di e subida ta ópviamente dor di e subida di e kantidat di ehemplar. Na total Hulanda tin 51 wòlf bibando den naturalesa. 18 luna pasá ainda tabatin 29 ehemplar só.
E subida di e inisdentenan ta relashoná tambe ku e falta di medida di prekoushon. Den 90% di e atakenan ta trata di kuránan ku no ta protegé kontra wòlf.
Den tur e provinsianan afektá tin supsidio disponibel pa kubri e gastunan. Ku e fondonan por kumpra kuránan special i retnan ku oriente riba dje, pero te asina leu tabatin poko petishon pa e supsidio aki.
Sientífikonan ta deskubrí kokaina den kurpa di tribon
Sientífikonan a deskubrí kokaina den tribonnan ku ta habitá kosta di Brasil. E nivel di e droga den nan spir i higra ta 100 biaha e kantidat hañá den otro espesienan di laman.
E investigashon tabata bou di kargo di Oswaldo Cruz Foundation ku a fangu i studia 13 ehemplar di e rasa “cazón de playa” (scherpsnuithaai), un tipo di tribon ku ta habitá parti west di Atlántiko.
E sientífikonan ta sospechá ku e kokaina a drenta kurpa dje tribonnan via konsumo di residuo di e laboratorionan kaminda ta produsí e droga. Otro posibel kousa ta ku e animalnan a konsumí e droga ku usuario òf trafikantenan a sea dùmp òf pèrdè riba laman.
E kokaina ópviamente no ta bon pa salú dje animalnan i ta daña nan DNA i kapasidat pa prosesá vèt. E efekto riba nan komportashon ainda no ta konosí. Ta asumí a base di kasonan anteriormente konosí ku e efekto lo ta igual na esun riba sernan humano.
E deskubrimentu no ta solamente di atenshon pa e animalnan, pero pa hende tambe. Sòpi di tribon ta un plato popular den vários parti di mundu.
“Kantidat signifikante” di computer ta funshoná atrobe despues di eror Crowdstrike
Un kantidat signifikante di computer ta funshonando atrobe despues di e storing masivo ku tabatin na kabamentu di siman pasá riba sistemanan ku ta drai riba Windows 10. Asina e kompania propietario di e software en kuestion CrowdStrike a partisipá riba X, ántes Twitter. No opstante esaki por dura algun siman promé ku tur problema ta solushoná.
Manera ta konosí, siman pasá un problema den un update di CrowdStrike a buta hopi computer rònt mundu pega i keda sin start. Esaki a okashoná hopi káos na aeropuertonan, vários hospital, banko, kompanianan di telecom i media. CrowdStrike lo a haña un solushon pa korto plaso, pero ainda no a implementá esaki.
Segun kálkulonan di Microsoft mas o ménos 8.5 mion computer a keda afektá dor di e eror den e update. CrowdStrike ta bisa di a solushoná un kantidat signifikante, pero no a duna mas detaye òf un sifra eksakto.
E situashon a hiba por sierto na vários riezgo pa e kompanianan i mashinnan afektá. E software tin akseso amplio na e sistemanan kaminda e ta instalá i ta rekerí asistensha profeshonal pa solushoná e problema.
Direktor di CrowdStrike George Kurtz a atvertí den e revista Bleeping Computer ku terseronan ku mal intenshon ta presentá nan mes komo trahadónan di CrowdStrike i ta ofresé solushonnan falsu pa asina instalá malware i otro tiponan di software maligno. Pa e motibu ei ta konsehá pa tuma kontakto direktamente ku Crowdsrtike si bo computer ta afektá.
Marvel ta trahando riba di 4 pelíkula di Spiderman
E kompania di produkshon Marvel lo ta trahando riba un di 4 pelíkula di Spiderman. Asina produktor Kevin Feige a konfirmá den un entrevista ku e revista Gizmodo. Eskritornan ta trahando riba un script, pero mas detaye Feige no a duna.
E film mas resien Spider-Man – No Way Home a sali den 2021 i tabata un di títulonan mas eksioso den historia di e saga. Fans lo ta ansioso pa un siguiente film i aktor Tom Holland a indiká kaba di ta interesá pa kontinuá ku e ròl.
E siman aki e pelíkula Deadpool & Wolverine lo estrená. Esei ta mesora e ultimo pelíkula di Marvel pa e aña aki.
10 efekto negativo di retnan sosial
Mayoria hende awe ta aktivo di un manera òf otro riba retnan sosial. E plataformanan aki ta sirbi komo un fuente amplio di entertainment, opshonnan pa komuniká ku otro i vários otro funshon.
Pero ku tur nan virtutnan retnan sosial tin nan bisionan tambe. Tras di tur likes, shares i follows tin algun peliger skondé ku usuarionan mester bira konsiente di dje.
Den e relato aki ta splika e 10 riesgonan mas konosí ku hende ta kore ora nan ta hasi uso di retnan sosial, dikon ta importante identifiká e riesgonan aki i kon por evitá nan den futuro.
E banda skur di retnan sosial
Retnan sosial ta ofresé vários benefisio. No solamente nan ta hasi kontakto ku amigu, konosí i famia posibel. Tambe nan ta duna akseso na un variedat grandi di kontenido i ta bini ekipá ku posibilidatnan pa gana entrada komo kreador di kontenido òf pa hasi propaganda pa bo servisio òf produkto. Pero alabes e impakto di retnan sosial riba tantu individuonan komo e kolektivo ta di tal índole ku nan a kompletamente transformá kon nos ta komuniká, network i apsorbé informashon.
Promé ku drenta den detaye ta bon pa opservá ku e riesgonan deskribí den e artíkulo aki no ta garantisá i den mayoria kaso evitabel. E manera mas efektivo pa mitigá e influensha negativo di retnan sosial ta dor di tuma distansha regularmente. Esaki ta inkluí pasa ménos tempu tras di kualke tipo di pantaya i asta deskonektá kompletamente pa konsentrá un poko mas riba otro aspektonan di bida. Tambe bo por skohe pa laga social media para un par di biaha pa dia i warda kada bes mas largu promé ku bo subi atrobe. Ta un bon idea tambe pa paga notifikashon di tur bo social media riba bo aparato.
Ya ku ta semper mihó evitá ku lamentá konsiderá e konsehonan aki pa evitá e siguiente 10 efektonan negativo di Social Media.
1. Cyberbullying
E akseso fásil na e mundu aya’fó via social media a habri porta tambe pa un di e komportashonnan mas desagradabel ku nos konosé, esta tentamentu. Riba retnan sosial esaki ta mihó konosí komo Cyberbullying.
Cyberbullying ta un di e peligernan mas serio di social media dor di e daño emoshonal i sikológiko ku esaki por kousa. E anonimidat di retnan sosial ta krea espasio pa usuarionan tenta otro usuarionan sin ku esaki tin un konsekuensha direkto. Den práktika te ainda ta difísil eradiká Cyberbullying.
2. Outo-estima redusí
Un di e funshonnan mas gustá di retnan sosial ta e opshonnan pa krea perfilnan personal kaminda usuarionan por ‘showcase‘ nan mes. Pero esaki ta lanta alabes e tendensia di ke kompará bo mes ku (perfil di) otro hende.
Esaki por kondusí na komparashonnan irealístiko i e sensashon ku bo mester konta. E konfrontashon konstante ku loke ta parse un lifestyle ideal i imágennan ku ta promové bunitesa por afektá outo-estima i kousa problemanan mental.
3. Salú mental
E puntonan ya menshoná por stimulá segun vários estudio na problemanan mental manera ansiedat i depreshon. Retnan sosial ta konfrontá usuarionan konstantemente ku imágennan di momentunan felis ku amigu i konosínan ta kompartí. Esaki ta krea e impreshon di hopi usuario ku nan tambe mester presentá imágennan komparabel.
4. Adikshon
Smartphones ta aparatonan notoriamente adiktivo i retnan sosial ta yuda reforsá e adikshon. E plataformanan aki ta diseñá pa keda mantené bo atenshon ku un variedat enorme di entertainment i kontenido pa bo ‘scroll’ dor di dje. I si no ta e kontenido ta mantené bo atenshon, ta e vários mensahenan di amigunan i notifikashonnan ku bo ta risibí. Pa e motibu ei ta bon idea pa desaktivá esakinan.
5. Desinformashon
Mayoria agensia di prensa ta aktivo riba retnan sosial pa kompartí (parti di) nan kontenido. Pero e subida di retnan sosial i nan funshonnan pa kompartí a duna un impulso enorme tambe na plamamentu di desinformashon i fake news.
E inkorporashon di teknologia manera inteligensha artifisial a kondusí ademas na un subida di imágennan deep fake. E plamamentu di informashon ku no ta kuadra por kousa konfushon, alimentá teorianan di kòmplòt i mina konfiansa den fuentenan konfiabel. Último por nota un subida tambe di divishon i radikalisashon polítiko i ideológiko.
6. Atenshon deteriorá
Retnan sosial ta ofresé un kantidat inagotabel di kontenido formulá kòrtiku i fásil di digerí. Usuarionan ta ‘switch’ konstantemente di kontenido pa kontenido. Pero e usuario no tin espasio pa prosesá e informashon ku el a kaba di apsorbé ora e siguiente kontenido aparesé den su pantaya. Esaki tin un impakto enorme riba konsentrashon i atenshon di hende.
7. Hende ku mal intenshon
Retnan sosial ta un lugá kaminda hende ku mal intenshon por skonde relativamente fásil. Individuonan ku ke probechá di mucha òf hóben hopi biaha ta usa e anonimidat di retnan sosial pa drenta den kontakto. Hopi biaha nan ta usa perfilnan falsu pa aproksimá nan víktimanan.
8. Privacy
Tur plataforma sosial ta obligá na hasi lo máksimo pa garantisá privacy di su usuarionan. Usuarionan por ahustá e funshonnan aki, pero esei no ta skapa nan semper di peligernan manera hackers. Terseronan ku haña akseso na datonan personal por usa esakinan pa kometé krímennan riba nòmber di hende.
9. Isolashon
Na promé bista retnan sosial ta parse un bon manera pa mantené kontakto, sigui loke amigu i famianan ta hasiendo, bèl nan òf manda mensahe. Loke ta parse di stimulá kontakto por resultá sinembargo den ménos nesesidat di kontakto den bida real. Ménos kontakto den bida real ta stimulá otro fenómenonan manera relashonnan superfisial i ménos konekshon emoshonal.
10. Material inapropiá
Apesar di tur ahuste di edat riba retnan sosial, ainda mayornan no tin un garantia ku nan yunan lo no haña nan eksponé na material ku no ta adekuá pa nan edat.
Un konseho final
No balotá e riezgonan di plataformanan sosial. Ta semper bon pa notifiká outoridatnan den kaso di sospecho serio di abusu òf pa tuma kontakto ku organisashonnan manera FMA si bo tin problema ku adikshon na social media.
Fuentenan
Pa kompilá e item aki a kompará e siguiente fuentenan:
- Security.org – Top 10 Most Dangerous Online Challenges
- Lifehack – 10 Negative Effects of Social Media That Can Harm Your Life
- CareElite – Social media dangers: 10 disadvantages & risks
- McMillan Health – 15 Dangers of Social Media & How to Avoid Them
- TechRound – Top 10 Dangers Of Social Media
Sambuyadónan ta haña 100 bòter di shampaña di 170 aña den fondo di laman
Sambuyadónan a haña 100 bòter di shampaña den ruina di un barku ku a hundi den Mar Báltiko den siglo 19. E shampaña lo ta adekuá pa konsumo ainda despues di mas o ménos 170 aña den fondo di laman. Tambe nan a haña hopi otro artíkulo di luho den e ruina manera bòter di biña, awa mineral i porselana basta balioso.
E deskubrimentu ta di trahadónan di e kompania Baltictech ku ta sambuyá regularmente den e region di Mar Báltiko. Nan a deskubrí e ruina pegá ku e lugá Sueko Öland, un isla den parti sùit di Suesia. E barku lo a hundi entre 1850 i 1867. Posiblemente ta trata di un karga destiná pa e Zar Ruso Nikolas I.
Baltitech a drenta den kontakto ku un grupo di arkeólogo pa sigui investigá e ruina. Gobièrnu di Suesia no a duna pèrmit ainda pa trese e kontenido di e barku pariba. E proseso pa regla esaki lo dura mas o ménos un aña.
Eror den software ta kousa problema ku computer rònt mundu
Miónes di usuario di computer ku Windows 10 no por a start nan laptop djabièrnè. Tur a haña un pantaya blou. For di vários parti di mundu bankonan, kompania i media a mèldu problema ku nan sistemanan ku ta drai riba Windows 10. Asina for di Oustralia tin informe ta bin ku kahanan ku self-scan no ta funshonando.
Partikularmente e sektor di aviashon lo ta eksperensiá hopi molester relashoná ku loke a resultá un storing mundial. Hopi konsumidó ku a eksperensiá e problema a haña un eror ora nan computer a start. E mensahe ta indiká ku mester restart e computer, pero despues esaki ta pega.
E problema tin su orígen den un update di e kompania di cybersecurity Crowdstrike. E kompania a splika ku ta trata di nan asina yamá Falcon sensor ku ta rekohé datonan di siguridat riba computernan pa negoshi. E software ta protegé kontra di atakenan sibernétiko i pa e motibu ei tin konekshonnan intensivo.
Crowdstrike a konfirmá e problema i a revertí e update, pero ainda esei no a resolvé tur problema. Te ainda e solushon ta rekerí un akshon tékniko pa resolve e problema kompletamente.
Manera indiká, partikularmente e sektor di aviashon a haña problema grandi dor di e storing. Asina Schiphol i e aeropuertonan di Berlin, Sydney i Mumbai tambe a konfirmá problema ku nan sistemanan. Vários buelo no por sali i aterisahenan no ta registrá. Biaheronan mester tene kuenta ku hopi retraso òf asta anulashon. Kompanianan manera KLM, Transavia, American Airlines, Delta Airlines i Turkish Airlines ta pidi nan klientenan pa tuma kontakto.
Curaçao International Airport ta monitoriando e situashon i ta pidi biaheronan pa konsultá e aerolineanan ku nan ta bula ku n’e pa mas informashon.
Donald Trump ta haña akseso na Facebook i Instagram atrobe
Meta, propietario di Facebook i Instagram, ta bai duna èks presidente di Merka Donald Trump akseso atrobe na su accounts. E kompania ta bai kita tur restrikshon ku tin di momentu riba su kuentanan di akuerdo ku e Plataforma Axios.
Ku e paso aki Meta kier duna Trump e mesun chèns ku su kontrinkante Joe Biden. Ta asina ku a restringí Donald Trump su kuentanan di Facebook i Instagram den 2021, siguiendo e invashon di Capitol. Na e okashon ei simpatisantenan di Trump a invadí e edifisio gubernamental despues di yamadanan di Trump via su plataformanan di social media pa lanta kontra di e resultado di elekshon ku el a pèrdè di Joe Biden.
X, ántes Twitter, tambe a prohibí Trump usa su kuenta pero a lanta e prohibishon despues ku Elon Musk a kumpra e kompania. Trump sinembargo no a usa su kuenta di X mas.
Na komienso di aña pasá a habri su kuentanan atrobe, pero e kòntròl riba su kuentanan tabata hopi severo. Tambe a tuma medida kontra dje ku ta bai mas leu ku otro suarionan di Facebook i Instagram. Siguiendo e restrikshonnan di Meta i otro plataformanan social Trump a disidí lanta su propio plataforma: Truth Social.
Preis di oro ta bolbe alkansá rèkòrt
Preis di oro a bolbe dal den un balor rèkòrt. Djarason oro a tek temporalmente na 2.460 dollar per troy ounce (31,1 gram). Ku esei e preis a pasa e rèkòrt registrá den mei.
E bahada ta relashoná ku e plannan di Banko Sentral di Merka pa baha interes, loke generalmente ta pusha e preis di oro pariba. Komersiantenan di oro ta tene kuenta ku 1 bahada mas di interes den transkurso di e aña aki.
Si interes subi atrobe, e preis probablemente lo bolbe baha. Aparte di bahada di interes e konfliktonan ku ta pusha preis di kombustibel pariba ta hasi oro un invershon as sigur. Ta bin aseka ku bankonan sentral ta traha ku reservanan di oro. E demanda haltu serka bankonan tambe a kontribuí na e subida di preis.
Sientífikonan ta deskubrí lugá perfekto pa base lunar habitá
Sientífikonan a deskubrí e lugá perfekto riba luna pa traha un base habitá. Ta trata di un kueba bou di tera kaminda astronouta i otro hende ku bishitá luna ta basta bon protegé kontra di e kondishonnan na superfisie.
Bou di tera e astronoutanan lo no tin ku skonde pa e kambionan ekstremo di temperatura riba luna. Tambe nan ta mihó protegé kontra radiashon i pida meteorit. Aparte di esei tin indikashon ku tin eis bou di superfisie, loke ta kondishonnan faborabel pa sobrebibensia.
E kueba ta keda den e krater yamá Mare Tranquillitatis (tradusí: Laman di Trankilidat), pegá ku e lugá kaminda Neil Armstrong a buta pia pa promé biaha riba luna den 1969. E tin un hanchura di mas o ménos 45 meter i un largura di 80 meter. E tera ta firme pa kana i asta pa konstruí riba dje. E ta lokalisá na mas o ménos 150 meter bou di tera i aksesibel via un gang ku ta kuminsá for di riba superfisie.
E sientífikonan a publiká nan deskubrimentu den e revista Nature Astronomy i a indiká finalmente ku mester investigá kon stabil e kueba ta i si tin eventual riezgo di derumbe.
Eksperimento ku prohibishon di smartphones den klas na Hulanda eksitoso
Alumnonan den enseñansa sekundario na Hulanda ta mas sosial ku otro i ta enfoká mihó den klas despues ku a prohibí smartphones na algun skol. Asina NOS ta informá a base di tantu dosentenan komo lidernan den enseñansa na 600 diferente skol.
E ministerio di enseñansa a presentá e resultadonan despues di seis luna ku a prohibí smartphones na algun skol i despues di kòntròl ekstenivo riba kumplimentu ku esaki. E resultadonan ta pa mayor parti hopi positivo. Segun e sekretario di estado di enseñansa Mariëlle Paul e desishon aki tabata un tiru den blanku.
Tantu alumnonan komo dosente a adaptá hopi lihé na e situashon nobo. Alumnonan ta papia mas ku otro, ounke ku na algun skol nèt esei a resultá den algun problema serka alumnonan ku ta ferfelá nan mes hopi mas lihé òf ku no sa kon entretené nan mes sin telefòn. Den algun kaso esei a resultá den konfrontashonnan na skol.
Tur skol ku a partisipá den e studio aki a tuma medida pa prohibí smartphones permanentemente. Ya tabatin algun skol ku tabata prohibí smartphones riba nan tereno, pero pa algun otro skol e eksperimento aki tabata un bon alternativa pa aproksimá mayornan pa koperá.
Ku eksepshon di alumnonan ku mester di appnan pa motibunan médiko, di awor i dilanti telefòn ta pèrmití solamente den e lèsnan kaminda uso di e aparato ta nesesario, por ehèmpel lès di uso adekuá di media (mediawijsheid). Si no tin niun otro motibu e regla ta konta meskos pa tur alumno: ‘telefoon thuis of in de kluis’.
Despues di e periodo aktual di fakansi ta bai sigui un prohibishon di smartphones na skolnan básiko tambe. Na hopi skol básiko ya tin un prohibishon, pero siguiendo resultadonan positivo di e eksperimento den enseñansa sekundario, mas skol ta bai tuma e paso aki.
E ministerio di enseñansa lo sigui opservá e efektonan di e medida aki den futuro pa por saka mas informashon riba e efektonan a plaso largu ya ku e fakansi di zomer ta forma un interupshon riba e eksperimento. Di momentu skolnan por opta pa e medida, pero den próksimo aña lo evaluá si e medida ta bira un prohibishon total den hinter pais den tur skol básiko i sekundario.
