E kompania LEGO ta bai usa material mas duradero pa traha su piedranan di konstrukshon. E material no ta kontené petroli manera tabata e kaso den pasado te ku awor. E kompania ku orígen na Dinamarka ta primintí ku klientenan no ta bai ripará esaki na e preis.
Na lugá di petroli, LEGO ta bai usa e supstansia resin, un meks di piedra mulá i hars sintétiko ku e mesun karakterístika. E problema ta sinembargo ku no tin hopi kompania ku ta produsí esaki. LEGO ke di e forma aki pues stimulá e kompanianan ku ta produsí e material pa traha nan piedranan pa kambia pa produkshon di resin. LEGO lo paga nan 70% èkstra pa hasi esaki.
E kambio aki ópviamente ta hasi e produkshon di e piedranan di LEGO mas karo, pero segun direktor Niels Christiansen no ta nesesario kalkulá e gastunan aki den e preis pa e kliente final, pasó LEGO ta un kompania di famia. Pa e motibu ei no tin akshonistanan ku lo tin opheshon pa subi e gastunan di produkshon. Mas aleu e kompania a duna di konosé ku e plan pa aki 8 aña no usa kombustibelnan fósil mas ta kana manera planiá.
Djarason mesora e kompania a presentá tambe e sifranan di promé semester di e aña aki. E kompania a mira su entradanan subi ku 13% dor di un benta mas haltu na Oropa i na Merka. Entre otro e modelonan di e toren Eiffel i e réplika di Titanic a bende hopi bon. E resultado operashonal a sali asina 26% mas haltu na un suma total di 1.1 mil mion euro.
Mas aleu e kompania ta spera di habri mas o ménos 100 tienda nobo rònt mundu. Esei lo buta e kantidat di LEGO stores rònt mundu na 1100 LEGO stores.
Riba 9 di sèptèmber Apple ta bai presentá e vershon mas nobo di loke probablemente lo yama iPhone 16. Riba e dia ei tambe e kompania lo lansa su modelo nobo di Apple Watch. E evenementu di lansamentu ta titulá “It’s glowtime”, un referensha na e diseño nobo di Siri, e digital assistant di Apple.
E vershonnan mas kostoso di e smartphone ta bini ku pantaya mas grandi, mehorashonnan na e kámara i kolónan nobo. E Apple Watch lo bini ekipá ku un processor nobo i mas potente.
E lansamentu lo bira un espektákulo na Steve Jobs Theater na Apple Park. Lo tin live streams tantu riba e website di Apple komo e plataforma YouTube.
E balor di pound sterling a subi na su nivel mas haltu di ultimo dos aña si nos kompará esaki tantu ku dòler Merikano komo Euro. Un desaroyo ku por nota tambe den kálkulonan di Banko Sentral di Kòrsou i Sint Maarten ku a bende esaki awe na NAFL2.42 pa kada pound sterling. Merikanonan mester a paga awe $1.32 i Oropeonan €1.20.
Segun agensia di prensa Reuters e subida ta relashoná ku e pronóstiko ku Bank of England (BoE) ta bai baha interes ménos fuerte ku Federal Reserve na Merka. Un tarifa di interes redusí ta baha gastunan pa fia plaka, loke por duna ekonomia un ‘boost’ i evitá ku kresementu ekonómiko ta debilitá.
Federal Reserve ya a anunsiá siman pasá ku e ta bai baha interes atrobe, despues di a subi esaki pa kombatí inflashon na Merka. Banko Sentral Oropeo i Bank of England tambe a subi interes den pasado resien. E pronóstikonan aki a buta basta preshon riba balor di dòler.
Ta konosí ku interes ta bai baha na Merka den sèptèmber, pero no ta konosí ku kuantu porshento. Bank of England en todo kaso lo no baha interes meskos ku Federal Reserve na Merka.
Pavel Durov, fundadó i direktor di e konosido app di mensahe Telegram, a keda detené djasabra ultimo na e aeropuerto Franses Le Bourget. Durov lo tabata biahando den su djèt privá i a hasi un aterisahe pa pasa un anochi na Paris kaminda el a keda detené alrededor di 8or di anochi.
Durov su nòmber ta riba un lista di hende buská na Fransia relashoná ku aktividatnan di imoralidat organisá via Telegram. E komersiante Ruso lo no a hasi sufisiente pa para e fenómeno aki. Dor di falta di moderashon, kriminalnan den mundu di droga, trafikashon i abusu di mucha i asta sierto persona ku plannan terorista lo tin sufisiente espasio pa operá sin ku outoridatnan internashonal por detektá nan.
Djaluna ainda e tabata detené i den kustodia di un unidat anti kriminalidat sibernétiko i e departamentu nashonal di froude. Presidente Macron di Fransia a bisa ku e detenshon en todo kaso no tin un motivashon polítiko.
Mester bisa ku tin un poko konfushon rondó di su nashonalidat aktual. Pavel Durov a nase na Rusia, pero tin tambe un pasport Franses i un otro di Emiratonan Árabe Uní kaminda e ta biba na Dubai. E embahada di Rusia a bisa den un deklarashon despues di e detenshon ku Rusia ta kla pa yuda Durov i a tuma vários paso entretantu pa haña klaridat di outoridatnan Franses. Djaluna e embahada a bisa den un deklarashon ku outoridatnan na Fransia lo no ta koperando.
E kompania mes ta bisa ku su direktor no tin nada di skonde. Telegram lo ta kumpli ku leinan Oropeo manera e Digital Services Act. E kompania ta fundá den 2013 pa e rumannan Ruso Nikolai i Pavel Durov. Nan ta e fundadónan tambe di VK, Rusia su vershon di Facebook.
Un banko di alimento na Nova Zelandia a aksidentalmente parti mangel ku ta kontené un dósis haltu di metamfetamina, un ingrediente principal pa produsí crystal meth. Awor e organisashon ta man na kabes pa drenta den kontakto ku esnan ku a risibí e mangelnan i saka nan for di sirkulashon.
Lo ta trata di mangel di e marka Rinda ku tabata forma parti di un donashon. Mirando e riezgo pa salubridat públiko e kaso tin prioridat haltu serka polis. Posiblemente 400 persona lo a haña e mangelnan. 8 famia ya lo a mèldu. E mangelnan lo tabata smak asina malu ku nan a skupi nan afó mesora.
New Zealand Drug Foundation, un instansha ku ta tèst e komposishon di droga konfiská, a indiká ku ta trata di dósis mortal i ku no mester konsumí esakinan bou di ningun sirkunstansha. E mangelnan lo ta kontené mas o ménos 3 gram di metamfetamina kaminda usuarionan no sa usa mas di 10 pa 25 miligram. E mangelnan ku e dósis aki aden kada un lo tin un balor di mas di 550 dòler.
Segun outoridatnan lo ta trata di droga proveniente di un transporte ku bai robes. No tin indikashon ku fabrikante Rinda tin algu di haber ku e insidente aki.
Sigur 5 persona ta demandá den e investigashon rondó di e morto di aktor Matthew Perry, entre nan dos dòkter. Perry, mihó konosí komo Chandler Bing den e serie popular Friends, a fayesé aña pasá òktober na 54 aña di edat despues di un sobredósis di ketamina. E serie Friends tabata transmití den sigur 100 pais rònt mundu.
Na total pues ta demandá 5 persona pa Matthew Perry su morto. Nan ta sospechá di a fasilitá e ketamina i preskripshon di e supstansia pa trata su depreshonnan. For di e dokumentonan por saka afó ku inisialmente e dos dòkternan a preskribí e ketamina. Ora ku esaki a bira muchu kostoso i e pedidonan muchu frekuente Perry lo a akudí na un dama ku ta konosí na Los Angeles bou di e apodo ‘Reina di ketamina’.
Segun prokurador general e 5 sospechosonan no a tene kuenta ku Perry su salú i kier a solamente probechá di dje. E hefe di e asina yamá Drug Enforcement Administration (DEA) a yama e dòkternan hende sin konsenshi i ta tene tur 5 responsabel pa morto dje aktor. Nan mester tene kuenta ku kastigunan ku por vária di 10 aña pa bida largu.
Anteriormente e aña aki ya a bira konosí ku polis ta investigando e aktor su morto repentino. Den medionan Merikano tabata spekulá ku ta trata di un posibel kaso di morto dor di falta òf negligensha i ku detenshon ta bai kai.
Ketamina ta un droga ku un efekto sedante ku okashonalmente sa preskribí kontra depreshon. Perry lo a haña un dósis preskribí mas o ménos 1 siman promé ku su morto. E inyekshon lo tabata forma parti di un terapia kontra depreshon i atakenan di ansiedat.
E konsentrashon ku a bin haña den Perry su kurpa durante outopsia sinembargo no ta proveniente di e tratamentu ei, pasó e efektonan ta disparsé despues di algun ora.
Sientífikonan a deskubrí bou di e superfisie di nos planeta ruman Mars un reserva di awa líkido. Tabata konosí kaba ku tin eis i spor di awa riba e planeta kòrá, pero awa den forma líkido si ta algu nobo. E notisia a sali entre otro na BBC despues di un publikashon di e revista Proceedings of the National Academy of Sciences.
Segun e kálkulonan hasí te asina leu, 3 mil mion aña pasá probablemente tabatin awa ta kore riba superfisie dje planeta, kontrali na e imágennan desertá i seku ku nos konosé awe.
E sientífikonan ku a deskubrí e reserva di awa ta basa nan mes riba datonan di e Marslander InSight, ku ta hasiendo investigashon riba Mars for di 2018. E vehíkulo aki ta ekipá ku un asina yamá seismometer ku ta midi aktividat sísmiko, esta temblor, riba e planeta.
A pasa dor di kasi 1300 registro di temblor ora ku a topa desviashonnan den e datonan ku ta okashoná normalmente dor di presensha di awa den su forma natural. Esnan interesá den e datonan por konsultá e artíkulo original riba website di Proceedings of the National Academy of Sciences.
Manera indiká na komienso, ya tabata konosí ku tin un kapa di eis na e polo nort i sùit dje planeta i ku a registrá humedat den e atmósfera di Mars.
E awa ta keda probablemente na un profundidat di 10 pa 20 kilometer bou di tera na un lugá spesífiko, pues ta trata te asina leu di 1 reserva di awa so. Pues si tin mas lo mester deskubrí esakinan den futuro.
Mester enfatisá tambe ku esaki ainda no ta marka komienso di plannan pa kolonisá e planeta kòrá. E deskubrimentu dimes ta lanta e pregunta eterno aya tambe: tin òf tabatin bida riba nos planeta ruman? Si ta asina, lo mester ta bou di tera anto, pasó ta einan tin indikashon ku tin awa líkido. I pa yega na esaki lo bo tin ku bora mas di 10 kilometer.
Ademas ora ta papia di bida ekstraterestre bo no mester pensa mesora riba espesienan ku teknologia mas avansá ku nos. Por ta trata simplemente di organismonan manera bakteria ku nos no por ni mira ku wowo sin ekipamentu adekuá.
E sospechoso aki ta forma parti di e sírkulo di e hòmber di 19 aña detené djarason. Manera ya informá e hòmber ei a hura su lealtat na e organisashon terorista Estado Islámiko i e plan tabata pa kometé un atentado rba e plenchi dilanti e lugá planiá pa e konsierto pa asina okashoná mas tantu víktima posibel ku arma skèrpi i eksplosivo. Djarason tambe a detené dos otro sospechoso di 17 i 15 aña, pero e último ei outoridatnan a laga bai despues.
Di e sospechoso prinsipal ta entretantu konosí ku ta trata di un hòmber hóben desendiente di parti nort di Masedonia. Su plannan tabata den un fase final kaba. E tabata kier a usa entre otro kuchú i eksplosivo pa mata mas tantu hende posibel. El a siña riba internet mes kon produsí bòm i ya tabatin tur e materialnan prepará. El a te asta kita for di trabou resien ku menshon di algu grandi ku tabata bai pasa. E otro sospechoso di 17 aña detené mesun dia lo a kaba su relashon. No ta konosí ainda kiko ta e ròl di e hòmber for di Irak.
E plannan a bin na kla danki na servisionan di inteligensha. Nan no a gara nan skuchando nan telefòn sino dor di mensahenan interkambiá via e app Telegram.
E organisadó di e konsiertonan a disidí despues di e detenshonnan di djarason pa anulá e konsiertonan di djaweps, djabièrnè i djasabra na Viena. E konsiertonan tabata bai tuma lugá den un sala ku por akapará 55 mil persona. Pa loke ta e gira ku e kantante Taylor Swift ta hasiendo, esaki lo kontinuá normal i finalisá riba 15 di ougùstùs na Londen. Einan no tin indikashon ku algu lo por pasa di akuerdo ku outoridatnan Ingles.
Na momentu di e item aki Swift no a reakshoná riba e anulashon di e shownan.
Tuma nota ku pronto e konosido rookworst di e liña di tienda Hema na Hulanda kisas no ta bai smak meskos mas. Ta asina ku no ta bai kumpra esaki mas for di e fábrika di e alabes konosido marka Unox na e siudat Hulandes Oss. Esaki despues di mas di 80 aña di akuerdo ku Brabants Dagblad.
No ta konosí ainda ken ta bai produsí e konosido Hema-worst manera hopi konsumidor ta yam’e. E kambio tin su orígen den un disputa entre Hema i e propietario di e fábrika. Pero Hema no a splika kiko ta na base di e disputa, eksepto ku ta un asuntu di negoshi entre e dos kompanianan.
Oss ta konosí komo kapital di rookworst na Hulanda, kaminda e fábrika prinsipal di e wòrstnan di Unox ta produsí. Tin mas o ménos 300 persona ta traha na e fábrika produsiendo entre otro 10 mion unidat pa aña pa Hema. Den e mesun fábrika aki ta produsí tambe e bolitanan di karni pa e marka di sòpi Bertolli i vários produkto di karni di Unox i un otro konosido marka, esta Knorr.
HEMA a bisa Brabants Dagblad mas aleu ku e kalidat i smak típiko di e wòrst no ta bai kambia. E preis tambe lo keda meskos.
Nintendo a mira su resultado bai atras den ultimo 3 luna. Ta asina ku hopi konsumidor ta wardando e vershon mas nobo di e console Switch. E resultado a kai duru ku 71%.
Den último lunanan e kompania Hapones no a publiká títulonan nobo ku ta hala atenshon. Aña pasá den e mesun periodo ei si esei tabata e kaso. Na e okashon ei e wega The Legend of Zelda: Tears of the Kingdom a sali pareu ku e eksitoso pelíkula The Super Mario Bros. Movie.
E dos produktonan ei só a genera tres biaha e ganashi di un aña anterior. E mihó weganan ku a sali últimamente ta Paper Mario: The Thousand-Year Door (ku a bende 1,76 mion biaha) i Luigi’s Mansion 2 HD (ku bende 1,19 mion kopia). Pero ta trata di títulonan ku tabata èksistí kaba riba otro console di Nintendo.
Entretantu e Switch original tin 7 aña riba merkado. E demanda a baha i e konkurensha di Sony su PlayStation 5 ta fuerte. Posiblemente Nintendo lo anunsiá e siguiente Switch den mart 2025.
Esei lo por duna e benta un pushá den lomba. Direktor di Nintendo Shuntaro Furukawa mes lo ta kere ku ta bai ta difísil subi benta di e consoles ku nan tin disponibel aworakí.
Te asina leu Nintendo a bende 143,4 mion unidat di Nintendo Switch, un di su éksitonan mas grandi den su katálogo. Klaro ku e no a alkansá e éksito nunka di Nintendo DS ku a registrá un benta di 154 mion unidat. Promé ku e DS e Wii console a bende sigur 101,6 mion biaha.
Un organisadó di konsierto na Oustria a para tres show di e kantante Taylor Swift. Esaki despues ku djarason a detené dos hòmber ku lo tabata plania un atentado durante su konsierto. E organisadó Barracuda Music a konfirmá e notisia via Instagram. Swift lo a duna tres konsierto djaweps, dabièrnè i djasabra. Tur esnan ku a kumpra karchi lo haña nan sèn di ticket bèk denter di 10 dia.
Polis a tene un operashon ekstenso ku a dura basta un par di ora na e lugá Ternitz kaminda a tene vários entrada hudisial. A asta evkuá algun kas di akuerdo ku medionan Oustriako. Durante e entradanan polis a bin topa ku supstansianan kímiko ku por usa pa traha eksplosivo pa un atentado.
Na e lugá menshoná a detené un hòmber di 19 aña di nashonalidat Oustriako. Despues a detené un otro na e kapital Viena. Resien e hòmber di 19 a hura su lealtat na e movementu terorista Estado Islámiko. Lo ta trata di hòmbernan ku a radikalisá via internet.
E duo lo tabatin mas ku un blanku pa nan atentado, pero nan blanku principal tabata un di e konsiertonan di Taylor Swift na Viena. E peliger mas grandi ya ta atendé ku n’e kaba di akuerdo ku polis. Di momentu ta investigando si tin mas persona embolbé den e plannan pa e atentado.
E bolsa Hapones a drecha bastante djamars despues di un dia dramátiko riba djaluna. Na kabamentu di dia tabatin un plus bèrdè di sigur 10% den e sifranan. E bolsanan Oropeo tambe a subi un poko. E índise AEX na Amsterdam a habri 0.7% mas haltu. Meskos por bisa di e bolsanan na Fransia, Alemania i Inglatera.
Djaluna e índise Hapones Nikkei tabatin un di su pió dianan despues di e djaluna pretu di òktober 1987. Meskos ku riba e dia ei djaluna último e bolsanan a kai ku 12%. Ta asina ku invershonistanan Hapones a hala atras den pániko despues ku banko sentral a subi interes pa promé biaha den hopi aña atrobe. Anteriormente fia plaka tabata mas interesante pasobra e interes a keda pa hopi tempu fihá na 0%.
Mester bisa si ku apesar di e rekuperashon aki ketu bai e balor di bolsa ta 10% mas abou ku siman pasá. Haponesnan ketu bai ta konfrontá ku un inflashon haltu.
E merkadonan di bolsa Oropeo i Merikano tambe tabatin un dia difísil riba djaluna. Dow Jones a sera 2.6% mas abou, Nasdaq na 3.4%. Pero manera indiká esakinan ta rekuperando pues poko poko.
Aktor Wesley Snipes su nòmber ta registrá 2 biaha komo rèkòrt den Guinness World Records. El a logra e rèkòrt aki danki na su regreso komo Blade den e pelíkula Deadpool & Wolverine. Snipes tin e rèkòrt aworakí di e aktor ku a karga nòmber di un personage di Marvel mas largu i alabes e rèkòrt di e periodo mas largu entre dos pelíkula di Marvel.
Na su 62 aña Snipes a regresá despues di 19 aña komo Blade den Deadpool & Wolverine. El a hunga e personage aki pa promé biaha den Blade (1998) i pa último biaha den Blade: Trinity (2004). Alfred Molina tabatin e rèkòrt antersiormente ora el a regresá 17 aña despues di Spider-Man 2 (2004) komo Doctor Octopus den Spider-Man: No Way Home di 2021.
Tabata antisipá ku Hugh Jackman, kende a hunga Wolverine den Deadpool & Wolverine, lo a registrá e rèkòrt nobo di nòmber kargá mas largu, pero e título ta bai pues pa Snipes. Jackman a hunga e ròl di Wolverine pa promé biaha den X-Men (2000).
E pelíkula mes, Deadpool & Wolverine, ta un éksito rotundo ku ta yenando salanan rònt mundu. E pelíkula ya a generá mas entrada ku e promé 2 pelíkulanan di Deadpool. Despues di 2 wikènt e resultado ya lo a pasa 824 mion dòler.
Pa esnan ku ke bai wak e pelíkula ainda ku nan yunan, tene kuenta ku e pelíkula ta trata temanan adulto i ku e lenguage ta hopi fuerte.
Si ekonomia di Merka bai atras Fed (e banko sentral di Merka) lo resolvé esaki. Asina direktor Austan Goolsbee di Federal Reserve (Fed) na Chicago a bisa na televishon Merikano. El a rekonosé ku e tarifa di interes di momentu posiblemente ta limitá un ke otro i ku den sèptèmber lo baha esaki.
E trabou mas importante di Fed ta pa fasilitá kupo di trabou, preis stabil i siguridat finansiero, di akuerdo ku Goldsbee den un entrevista ku CNBC. El a garantisá ku Fed lo bin ku un solushon, pero e no a spesifiká si esaki ta enserá un bahada di emergensha di interes tambe.
En todo kaso e krítika riba Federal Reserve ta oumentando. Invershonistanan ta kere ku Fed a warda muchu pa baha interes i probablemente ta lat. Tin un miedu realístiko ku Merka su ekonomia ta bai kai den un reseshon.
Siman pasá Fed a bolbe mantené e tarifa di interes te ku sèptèmber pa despues baha interes pa sostené ekonomia. Interes ta fihá aworakí na 5.5% i probablemente esaki lo no baha mas ku un mitar porshento.
Na kabamentu di siman pasá ya kaba a sali notisia ku tin ménos kupo di trabou disponibel na Merka, loke a alimentá e miedu bou di invershonista. Segun e direktor di Fed esaki no ta nifiká reseshon ainda.
E director di Fed a enfatisá pa no saka konklushon, pasobra e merkadonan di bolsa ta mas erátiko ku e medidanan di Fed. Pero su deklarashonnan ta regardá ekonomia Merikano.
No ta pòr nada Austan Goolsbee a papia ku CNBC. Djaluna merkadonan di bolsa a mustra un kaida. Nikkei na Tokio a sera 12% mas abou, e pèrdida mas grandi registrá for di 1987. Por nota un kaida tambe den kritpomonedanan manera bitcoin i ether, ku djaluna a mustra kaida fuerte.
E kaida di balor di djaluna ta mará pues na e rapòrt di desempleo Merikano ku invershonistanan ta mira komo un indikashon di un reseshon.
Na Hapon mester a para e bolsa un par di biaha pa merkadonan kalma un poko. Dor di un subida di balor di yèn Hapones, hopi kompania ku ta hasi negoshi ku eksterior a mira nan balor baha duru.
Otro merkadonan na Asia tambe a sera ku sifranan kòrá. Na Seul, kaminda tambe mester a para e bolsa, e índise a baha ku 10.5%. E bolsa di Taiwan a pèrdè 8% i esun di Sydney na Oustralia a pèrdè 3.8%. Na Hong Kong i Shanghai e pèrdida tabata 2.6 i 1.3%.
E índisenan AEX i MidKap na Amsterdam tambe a sera ku pèrdida di 3 i 2.6%. E bolsanan di Frankfurt, Londen i Paris a baha ku mas o ménos 3%.
