Resúmen di tur item di 08 – 14 yanüari 2023

Tene bo aparato horizontal pa un mihó eksperensha!

Situashon di tráfiko peligroso na Mahaai

McCarthy por fin elegí presidente di Kas di Representantenan

Outoridatnan na Saudi Arabia ta prepará pa yegada di peregrino

Tropanan federal na Brasil a rekobrá tur edifisio di gobièrnu

Radulphus College ta kuminsá di 75 aniversario ku tremendo mode show

Desasternan natural a kosta 268 mil mion dòler den 2022

Aki 40 aña kapa di ozòn ta rekuperá nivel promé ku 1980

Apple ke introdusí 3-in-1 chip pa antène, wifi i bluetooth

Preis mundial di koper ta pasa 9 mil dòler pa tòn

Uganda ta anunsiá fin di brote di ebola

Social Media a hunga ròl grandi den invashon edifisionan di gobièrnu na Brasil

Ganadónan Golden Globes 2023

Guinness World Records: Elon Musk a registrá pèrdida mas grandi den historia

Teleskop James Webb ta registrá otro planeta visualmente pa promé biaha

Último 9 aña esnan mas kalor den historia

Kòrsou ta skor malu segun Fragile States Index 2022

Rusia ta probechá bon di komèrsio ku China den 2022

Ministerio di Hustisia Merikano ta bai investigá presidente Joe Biden

Direktor di Apple ta pidi redukshon di 40% riba su salario

Na Mahaai tin un situashon peligroso na e konekshon Angloweg, Mahaaiweg, Rozenweg i Lelieweg. Vehíkulonan por slep dor di presensha di lima riba e kayanan.


 

Despues di sigur 15 buèlta di votashon e miembro republikano di parlamentu Kevin McCarthy a gana e posishon komo presidente di e Kas di Representantenan, e parlamentu Merikano. Den mardugá di djabièrnè pa djasabra por fin McCarthy a logra haña sosten di 216 miembro di su frakshon. E di 15 i último buèlta tabata nesesario despues di e penúltimo buèlta kaminda McCarthy a falta nèt 1 voto.

E instalashon di McCarthy a dura mas di 4 dia, loke no ta kustumber. E kandidato no tabatin sosten di un grupo di mas o ménos 20 republikano ultra konservativo. Mester a hasi purá pasobra sin presidente no por huramentá e miembronan di e parlamentu. A kambio di sosten McCarthy mester a bai di akuerdo ku un moshon pa nan por vota mas fásil pa su retiru i tambe hasi e proseso di votashon den Kas di Representantenan mas transparente i ménos tras di porta será.

Outoridatnan na Saudi Arabia ta antisipá riba yegada di un par di mion di fielnan musulman ku lo hasi e peregrinashon islámiko. Esaki ta bai ta e promé despues di e pandemia di Covid-19 kaminda tur hende ta pèrmití atrobe. Aña pasá a pèrmití mas o ménos 1 mion persona partisipá na e peregrinashon, mihó konosí komo hadj. Den e dos aña anterior a pèrmití ménos hende ainda.

Tur mòslem ku a reservá nan biahe di peregrinashon via kompanianan di biahe spesial por hasi nan biahe ainda. Hadj ta un obligashon religioso pa tur mòslem ku finansieramente por hasi’e. E aña aki hadj ta tuma lugá di 26 di yüni te 1 di yüli. Delaster biaha ku tur hende tabata pèrmití hasi e biahe e peregrinashon a hala 2.5 mion mòslem.

Tropanan federal na Brasil a logra rekobrá tur edifisio di gobièrnu. Djadumingu simpatisantenan di èks presidente Jair Bolsonaro a invadí i okupá edifisionan manera parlamentu, korte supremo i e palasio presidensial. Segun outoridatnan no tin niun hende mas den e edifisionan i a detené kasi 400 persona.

E invashon i okupashon parse e invashon di Capitol na Merka den 2021 ora ku simpatisantenan di èks presidente Trump a invadí i okupá Capitol. Den kaso di Brasil e siguidónan di Bolsonaro no ta di akuerdo ku e resultado di elekshon ku a sali na fabor di Lula da Silva.

Radulphus College ta kumpli 75 aña den 2023! E skol a selebrá komienso di su di 75 aniversario ku un tremendo mode show organisá pa alumno i dosentenan. Aki’bou nos relato di e festividat.


 

E daño okashoná pa desasternan natural manera inundashon, orkan i otro wer ekstremo den aña tras di lomba tin un balor total di 268 mil mion dòler. Asina Munich Re, un di e kompanianan di seguro mas grandi na mundu, a kalkulá. Ta un kantidat normal si bo wak e promedio di último 5 aña i en todo kaso un suma mas abou ku e 322 mil mion dòler den 2021.

Un di e motibunan prinsipal pa e suma di 268 mil mion ei ta orkan Ian kua a okashoná daño na un balor total di kasi 100 mil mion dòler den e region di Florida. Pakistan tambe a sufri basta daño dor di e kantidat enorme di áwaseru i glècher ku ta dirti. E pais ei so a registrá 15 mil mion dòler na daño. Oustralia tambe a sufri daño dor di kaida di awa pisá, miéntras Oropa tabatin problema ku sekura ekstremo den zomer.

Segun Munich Re, ku ta fungi komo seguro pa otro kompanianan di seguro rònt mundu, e daño ta influenshá pa kambio di klima.

Aki 40 aña e kapa di ozòn lo a rekuperá su nivel di promé ku aña 1980, esta promé ku ozòn a lanta kabes pa promé biaha. Esaki ta nifiká ku e rekuperashon di ozòn ta kana segun plan di akuerdo ku un panel di American Meteorological Society. Si e kapa di ozòn rekuperá esaki por nifiká un diferensha di 0,3 pa 0,5 grado Cèlsius.

Den 1987 a akordá e asina yamá protokòl di Montreal pa asina frena gasnan ku ta afektá e kapa di ozòn. E pronóstiko di awor ta basá riba resultadonan di aplikashon di e protokòl ei. E kapa di ozòn, manera ta konosí, ta protehá hende kontra radiashon ultraviolèt di solo. Te asina leu e ekspertonan ta satisfecho ku e resultadonan.

Den 2025 e kompania Apple ke ta e promé kompania pa introdusí un chip ku ta kombiná antène, wifi i bluetooth den un. Asina agensia di prensa Bloomberg ta informá. Di momentu Apple su aparatonan ta usa diferente chip, pero esei ta hasi e kompania dependiente di otro kompania ku ta produsí e chipnan pa nan.

Pa algun tempu tabata konosí kaba ku Apple ke stòp su kolaborashon ku e kompania Qualcomm. Si integrá wifi i bluetooth den e mesun chip, Apple por para su kolaborashon ku Broadcom tambe. Pa ámbos kompania Apple ta nifiká 20% di nan entrada.

E produktor di iPhone ke mas kòntròl riba su liña di produkshon, pero e plan ta parse prinsipalmente un forma di baha gastu i tampoko no ta konosí kiko esaki por nifiká pa e kalidat di e produktonan di Apple.

E preis mundial di koper a pasa 9 mil dòler pa kada tòn. Djarason tabata pa promé biaha for di yüni 2022 ku e preis a alkansá e balor ei riba e merkado di metal na Lònden. E subida di preis ta relashoná ku e pronóstikonan pa ekonomia di China ku a eliminá su medidanan pa kombatí Covid-19. E pais tin e demanda pa koper mas haltu na mundu.

Otro motibu pa e oumento di e preis ta e speransa ku Banko Sentral di Merka lo bai mas trankil ku subida di interes pa frena inflashon. Aña pasá e preis di koper a pèrdè 14% di su balor, despues ku den mart ainda tabata registrá preisnan di alrededor di 11 mil dòler pa tòn, ora ku e guera na Ukrania tabata menasá suministro di koper for di Rusia.

E preis di otro metalnan manera heru, aluminio, zenk i ten tambe ta den subida. E sektor di mineria entretantu ta preokupá ku posibel skarsedat di metal pasobra e minanan aktual ta agotando. E preokupashon ta real: pa un futuro mas duradero mundu ta bai tin mester di koper. Esaki ta bai tin posibel efekto tambe riba kriminalnan ku ta hòrta koper.

Djarason Uganda a anunsiá fin di e brote di ebola ku a lanta kabes pegá ku su kapital Kampala. Segun e ministerio di salubridat e propagashon ta bou di kòntròl, despues di a lanta kabes den sèptèmber último. Ta trata aki di un variante pa kua no ta èksistí un bakuna ainda. Den novèmber e pais a imponé un lockdown pa frena kontagio.

Entretantu den último 42 dia no a registrá mas kaso nobo. Na total e malesa a afektá 143 persona di kua 55 a fayesé, entre nan 6 trahadó den kuido ku a pega ku e malesa. World Health Organisation a elogiá e maneho di outoridatnan Ugandes pa frena e malesa.

E último brote aki ya ta e di 8 despues di aña 2000. Ebola ta lanta kabes regularmente riba e kontinente Afrikano.

Social Media i desinformashon a hunga un ròl hopi grandi promé ku e invashon di edifisionan di gobièrnu na Brasil. Asina investigadónan di e suseso a konkluí. Dor di hunga ku palabra e simpatisantenan di èks presidente Bolsonaro a keda pafó di bista di outoridatnan basta largu.

Influencers ku ta simpatisá ku Bolsonaro lo tabata usa palabranan manera “Festa da Selma” pa yama nan siguidónan pa invadí edifisionan di gobièrnu. E palabra “Selma” tabata usá pa bisa e gritu di kombate “Selva”. Ku trikinan komparabel e manifestantenan por a komuniká ku otro sin ku outoridatnan tabata ripará.

E manifestantenan tabata hasi hopi uso tambe di e app Telegram, riba kua básikamente no tin supervishon. Riba e app ei nan tabata papia di fiesta na sierto plenchi pegá ku e edifisionan.

Segun e korant Merikano The Washington Post e insidente aki tin hopi similaridat ku e invashon di Capitol na Merka den yanüari 2021.

E ganadónan di e 80 edishon di Golden Globes ta konosí. E premio ta otorgá pa Hollywood Foreign Press Association for di yanüari 1944 pa rekonosé ekselensha den sine i televishon internashonal. Aki’bou e lista prinsipal di ganadónan.

Pelíkula

Mihó drama
Avatar: The Way of Water
Elvis
The Fabelmans
Tár
Top Gun: Maverick

Mihó musical / comedy
Babylon
The Banshees of Inisherin
Everything Everywhere All at Once
Glass Onion: A Knives Out Mystery
Triangle of Sadness

Mihó aktor den un drama
Austin Butler (Elvis)
Brendan Fraser (The Whale)
Hugh Jackman (The Son)
Bill Nighy (Living)
Jeremy Pope (The Inspection)

Mihó aktris den un drama
Cate Blanchett (Tár)
Olivia Colman (Empire of Light)
Viola Davis (The Woman King)
Ana de Armas (Blonde)
Michelle Williams (The Fabelmans)

Mihó aktor den un musical / comedy
Diego Calva (Babylon)
Daniel Craig (Glass Onion: A Knives Out Mystery)
Adam Driver (White Noise)
Colin Farrell (The Banshees of Inisherin)
Ralph Fiennes (The Menu)

Mihó aktris den un musical / comedy
Lesley Manville (Mrs. Harris Goes to Paris)
Margot Robbie (Babylon)
Anya Taylor-Joy (The Menu)
Emma Thompson (Good Luck to You, Leo Grande)
Michelle Yeoh (Everything Everywhere All at Once)

Mihó aktor sekundario den un pelíkula
Brendan Gleeson (The Banshees of Inisherin)
Barry Keoghan (The Banshees of Inisherin)
Brad Pitt (Babylon)
Ke Huy Quan (Everthing Everywhere All at Once)
Eddie Redmayne (The Good Nurse)

Mihó aktris sekundario den un pelíkula
Angela Bassett (Black Panther: Wakanda Forever)
Kerry Condon (The Banshees of Inisherin)
Jamie Lee Curtis (Everything Everywhere All at Once)
Dolly de Leon (Triangle of Sadness)
Carey Mulligan (She Said)

Mihó direktor
James Cameron (Avatar: The Way of Water)
Daniel Kwan, Daniel Scheinert (Everything Everywhere All at Once)
Baz Luhrmann (Elvis)
Martin McDonagh (The Banshees of Inisherin)
Steven Spielberg (The Fabelmans)

Serie

Mihó miniserie òf pelíkula na televishon
Black Bird
Dahmer – Monster: The Jeffrey Dahmer Story
The Dropout
Pam & Tommy
The White Lotus

Mihó serie di drama na televishon
Better Call Saul
The Crown
House of the Dragon
Ozark
Severance

Mihó serie di comedy na televishon
Abbott Elementary
The Bear
Hacks
Only Murders in the Building
Wednesday

Mihó aktris den un miniserie òf pelíkula na televishon
Jessica Chastain (George & Tammy)
Julia Garner (Inventing Anna)
Lily James (Pam & Tommy)
Julia Roberts (Gaslit)
Amanda Seyfried (The Dropout)

Mihó aktor den un miniserie òf pelíkula na televishon
Taron Egerton (Black Bird)
Colin Firth (The Staircase)
Andrew Garfield (Under the Banner of Heaven)
Evan Peters (Dahmer – Monster: The Jeffrey Dahmer Story)
Sebastian Stan (Pam & Tommy)

Mihó aktor den un serie di drama na televishon
Jeff Bridges (The Old Man)
Kevin Costner (Yellowstone)
Diego Luna (Andor)
Bob Odenkirk (Better Call Saul)
Adam Scott (Severance)

Mihó aktris den un serie di drama na televishon
Emma d’Arcy (House of the Dragon)
Laura Linney (Ozark)
Imelda Staunton (The Crown)
Hilary Swank (Alaska Daily)
Zendaya (Euphoria)

Mihó aktor den un serie di comedy na televishon
Donald Glover (Atlanta)
Bill Hader (Barry)
Steve Martin (Only Murders in the Building)
Martin Short (Only Murders in the Building)
Jeremy Allen White (The Bear)

Mihó aktris den un serie di comedy na televishon
Quinta Brunson (Abbott Elementary)
Kaley Cuoco (The Flight Attendant)
Selena Gomez (Only Murders in the Building)
Jenna Ortega (Wednesday)
Jean Smart (Hacks)

Propietario di Tesla i Twitter Elon Musk a pèrdè alrededor di 187 mil mion dòler den 2022. Ku e pèrdida aki Elon Musk a registrá un rèkòrt den pèrdida históriko di akuerdo ku Guinness World Records. E akshonnan di Tesla a pèrdè alrededor di 65% di su balor riba merkado di bolsa. E kompania ya tabata registrando pèrdida, pero esaki a subi despues ku Musk a atkirí e plataforma Twitter. Hopi invershonista ta sinti ku Musk tabata pèrdè muchu tempu ku e plataforma.

E rèkòrt di pèrdida anterior tabata riba nòmber di e komersiante Hapones Masayoshi Son di e kompania teknológiko Softbank ku a yega di registrá un pèrdida di kasi 60 mil mion dòler ora ku e asina yamá “internet bubble” a rementá. Al fin al kabo e pèrdida aki no ta nifiká ku Musk a pèrdè tur su plaka. Te ainda e ta disponé di kasi 140 mil mion dòler.

Pa promé biaha e konosido teleskop James Webb a detektá un planeta ku ta drai rònt di un otro strea for di nos solo. E teleskop a logra saka un potrèt tambe. Ya tabatin indikashon kaba di eksistensha di e planeta aki, pero awor por fin tin imágen tambe. Ta trata di e planeta LHS 475 b ku ta keda den e sistema solar Octant, na un distansha di 41 aña di lus for di nos propio planeta.

NASA a kalkulá kaba ku e planeta mester ta lokalisá den e sistema ei, i danki na e James Webb Telescope por fin por wak algu. E planeta tin mas o ménos e mesun tamaño ku esun di nos i ta konsistí prinsipalmente di piedra. LHS 475 b ta drai rònt di un asina yamá “enano kòrá”, un tipo di strea ku nos no por detektá ku wowo for di nos planeta. Probablemente no tin bida riba e planeta aki, mirando ku su solo ya no tin e mesun radiashon ku esun di nos.

Den e último 9 añanan a midi e añanan mas kaloroso den historia i kada dékada ta resultá mas kaloroso ku esun anterior. Asina NASA a duna di konosé djaweps. E investigadónan ta tene kuenta ku e aña aki ta bai registrá un otro rèkòrt mundial. E aña tras di lomba ta pará na posishon 6 komo aña mas kaloroso den historia, pero e posishon aki ta kompartí ku 2015, ora ku tambe a registrá e mesun temperatura.

E oumento di temperatura ta limitá dor di e fenómeno La Niña di akuerdo ku e sientífikonan. La Niña ta okashoná un bahamentu di temperatura. Segun e sientífikonan si no tabata pa e fenómeno aki 2022 lo tabata na di 2 lugá komo aña mas kaloroso den historia.


Kòrsou ta skor hopi abou segun e asina yamá Fragile States Index (FSI). E FSI ta un rapòrt publiká tur aña dor di e think tank Merikano Fund for Peace. E meta ta pa evaluá e vulnerabilidat di paisnan miembro di Nashonnan Uní pa konflikto òf frakaso. E eksaktitut di e evaluashon di un pais ta dependé di e disponibilidat di sufisiente informashon riba e pais en kuestion.

E evaluashon ta tuma lugá a base di 4 kategoria prinsipal:

  1. Koheshon
  2. Polítika
  3. Ekonomia
  4. Sosial

No ta tur kriterio di e FSI ofisial ta aplikabel pa Kòrsou, pues mester a formulá e indikadornan pa Kòrsou di e siguiente forma:

  1. Koheshon Sosial
  2. Polítika
  3. Ekonomia
  4. Demografia
  5. Kapasidat di Estado

Konhuntamente e indikadornan aki ta inklui 12 otro indikador sekundario:

  1. Seguridat
  2. Fakshonnan elitario
  3. Sensibilidatnan den komunidat
  4. Desaroyo ekonómiko i pobresa
  5. Inigualdat ekonómiko
  6. Movementu di persona i Brain Drain
  7. Legitimidat di estado
  8. Akseso na servisionan públiko
  9. Derechinan humano i derechi di estado
  10. Preshonnan demográfiko
  11. Refugiadonan i personanan deslokalisá
  12. Intervenshon eksterno

Kada un di e 12 indikadornan aki ta haña un skor entre 0 i 10, kaminda 0 ta e nivel di tenshon mas abou i 10 ta representá e nivel di tenshon mas haltu òf grado di instabilidat. Esaki despues ta reflehá den un skor entre 0 (sustenibel) i 120 (instabil):

Kòrsou no ta inkluí riba e lista di paisnan ku ta evaluá den e FSI mundial, pues mester apliká e método a base di datonan atkirí dor di profeshonalnan lokal di e “think tank” lokal Think To Do Institute. A base di e datonan suministrá dor di e grupo di ekspertonan Kòrsou lo a skor 92 riba e eskala di 120. Den e mapa aki riba Kòrsou lo tabata un zona kòrá.

Si nos wak e posishon di Kòrsou den e skor hierárkiko di resiliensha (ku 179 mihó skor i 1 e pió skor), Kòrsou ta skor 24:

Kòrsou ta na e mesun posishon ku e Repúblika Demokrátiko di Congo ku un skor di 24. Kòrsou ta skor 11 punto riba Haiti, pero 4 punto mas abou ku Venezuela ku a haña un skor di 28.


Aki e rapòrt kompleto:

China i Rusia a intensivá nan komèrsio ku otro despues ku e konflikto entre Rusia i Ukrania a lanta kabes. E kolaborashon ta asina intensivo ku e transakshonnan ta kalkulá na un balor komersial rèkòrt di 190 mil mion dòler. Pa e motibu ei vários sanshon imponé riba Rusia no tabatin un efekto dje severo ei. E sanshonnan tabata limitá eksportashon for di Rusia pa Oropa, pero komèrsio ku Turkia, India i pues China a limitá e impakto riba Rusia. En partikular kompanianan Chines a importá mas gas natural i petroli for di Rusia.

E benefisionan ta konta tambe pa e eksportashon for di China. Mester opservá si ku for di desèmber e kolaborashon ta ménos intensivo i ku China a importá ménos for di Rusia. E pais mes ta konfrontá ku un bahada di importashonnan for di otro partinan di mundu. Segun ekspertonan si ekonomia Chines ta hañando klap duru, nos lo sinti esei den otro partinan di mundu tambe. Te asina leu pronóstikonan ekonómiko pa e aña aki ta mustra ku ekonomia mundial ta debilitando.

Ministerio di Hustisia na Merka ta bai investigá e hayasgo di dokumentonan konfidensial na un ofisina i kas di presidente Joe Biden. Kolaboradónan di e presidente a haña vários dokumento sekreto. E dokumentonan tabata entre otro dokumentonan personal i polítiko di akuerdo ku e abogado di e presidente.

E hayasgo ta konosí for di novèmber. Investigadónan a bin haña sa ku e tabatin dokumento konfidensial tantu na kas komo na un ofisina privá na un think tank na Washington. E dokumentonan ta inkluí tambe informashon di tempu ku e tabata vise presidente. Pa evitá un konflikto di interes e minister di hustisia, ku tambe ta un demókrata, a apuntá un abogado ku tabata traha na e ministerio bou di presidente Donald Trump.

E hayasgo ta un tema deliká na Merka. Èks presidente Trump tambe ta bou di investigashon aworakí pa e echo ku el a bai kas ku mas o ménos 300 dokumento konfidensial. Pa loke ta trata un hayasgo komparabel serka presidente Biden, esaki su abogado a indiká ku ta aksidentalmente e dokumentonan konfidensial a bin kaba na e lugá robes.

Direktor di e kompania Apple Tim Cook a pidi e kompania pa redusí su rekompensa ku 40%, despues di basta krítika di invershonista. E redukashon ta supstansial, pero al fin al kabo Cook lo kobra 49 mion dòler pa aña. E rekompensa ta den forma di paketenan di akshon. Komo akshonista Cook lo keda risibí un repartishon di ganashi konsiderabel, si nos tene kuenta ku Apple a buk un resultado di 100 mil mion dòler aña pasá. E krítika riba e kompensashon di Tim Cook ta relashoná ku un bonus ku no ta mará na e resultadonan di e kompania. Invershonistanan tabata haña ku e bonus ei por baha.