Na Alemania outoridatnan enkargá ku protekshon di mucha a reskatá un mucha muhé di 8 aña ku tabata será den kas di su abuelonan kasi hinter su bida. E deskubrimentu a tuma lugá na e pueblo Aleman Attendorn. Outoridatnan a mobilisá despues di a haña un tep anónimo.
Segun agensia WDR na Alemania e mucha lo a sali bai pafó pa último biaha ora e tabatin un aña i mei. E mucha por lesa i skirbi, pero su mama lo no tabata ke pa e tin kontakto ku otro mucha. Mas aleu e mucha no tabata mustrá señal di maltrato físiko òf falta di nutrishon.
No ta konosí ta kiko a motivá e mama. E último aki i e abuelonan a keda ketu for di moment ku outoridatnan a aparesé. Nan tur tres ta sospechá di robo di libertat di e kriatura. E mama a logra tene e situashon sekreto tur e añanan aki dor di informá outoridatnan ku el a muda pa Italia. Ora e pais a desmentí ku e dama i e yu ta biba einan, outoridatnan a start un investigashon. Lo ta trata di un kaso kaminda e mayornan tabata den korte pa supervishon di e mucha.
