Resúmen di tur item di 01 – 07 yanüari 2023
Tene bo aparato horizontal pa un mihó eksperensha!
January 2, 2023
January 5, 2023
5W Press Newsletter #01 2023
TechTime ku Arthur Tholel
TechTime ku Arthur Tholel ta un programa kaminda nos ta informá i eduká tur persona riba e teknologianan moderno, alabes kiko bo por hasi ku nan of por nifiká pa bo.
Den e sekshon aki nos ta bai tin e siguientenan:
- Büsnan di skol ta kambiando pa koriente
- Historia di Blackberry
- Unboxing di Boolchand’s (Headphone)
Djaweps ta dera Papa Emeritus Benedictus XVI
E basíliko di San Pedro na Vatikano ta habrí den próksimo 2 dia pa públiko por tuma despedida di Papa Emérito Benedictus XVI kende a fayesé djasabra último na 95 aña di edat. Riba imágennan ku ta sirkulá riba internet por mira reinan largu na plasa San Pedro pa rindi un último homenage na Benedictus, e promé Papa den 600 aña ku a tuma retiru boluntariamente.
Joseph Aloisius Ratzinger, manera e yama originalmente, tabata haña basta krítika pa su posishon konservador, pero di otro banda e tabatin hopi simpatisante tambe ku ta konsider’e un protektor di e balornan tradishonal di Iglesia Katóliko. Djaweps awor lo hiba su kurpa pa su último lugá di sosiegu den e basíliko di San Pedro. E Papa aktual Francisco lo guia e sakrifisio di misa i entiero. Na Vatikano ta teniendo kuenta ku yegada di hopi deboto. E entiero di Papa Juan Pablo den 2005 a hala alrededor di 1 mion persona.
Pronóstiko IMF: 1 den kada 3 pais ta bai pasa den reseshon den 2023
Den 2023, un den kada tres pais ta bai pasa dor di un reseshon. Esaki pa motibu di kontratempu ekonómiko ku e Fondo Monetario Internashonal (IMF) ta pronóstika pa Merka, Union Oropeo i China. Asina direktor di IMF Kristalina Georgieva a bisa e kanal di notisia Merikano CBS. Merka i Union Oropeo tin basta difikultat ku maneho di inflashon. Konsekuentemente Bankonan Sentral ta subi interes pa asina evitá ku konsumidor i kompanianan ta gasta muchu sèn.
Di e forma ei bo por limit’a inflashon, pero segun Georgieva e mesun medida aki ta stroba kresementu ekonómiko. Pa loke ta trata China mester konsiderá e ola di Covid-19 ku ta afektando e pais severamente, loke tin su influensha riba ekonomia di e pais. IMF ta pronostiká ku e aña aki lo ta pa promé biaha den 40 aña ku ekonomia di China ta bou di e promedio mundial. Segun e direktor di IMF e sifranan ofisial no ta disponibel ainda. Den transkurso di yanüari IMF lo publiká mas detaye.
Bo por wak e entrevista kompleto aki’bou.
WhatsApp ta stòp di funshoná pa sierto aparato i tur hende mester paga awor pa Netflix
2023 ta habri ku algun kambio importante den mundu digital. Pues tuma bon nota!
WhatsApp ta bai para support pa sierto smartphone
E kambio aki a drenta na vigor riba 1 di yanüari pa vários tipo di iPhone i Android, na total 47 tipo. Propietárionan di iPhone 5 i iPhone 5c no por usa WhatsApp mas. Tene kuenta tambe ku WhatsApp ta bai stòp di traha tambe riba smartphones di entre otro Huawei, LG, Samsung i Sony. Esakinan ta e modèlnan ku ta bai stòp di funshoná:
- Apple: iPhone 5, iPhone 5c
- Huawei: Ascend D, Ascend D1, Ascend D2, Ascend G740, Ascend Mate, Ascend P1
- Samsung: Galaxy Ace 2, Galaxy Core, Galaxy S2, Galaxy S3 mini, Galaxy Trend II, Galaxy Trend Lite, Galaxy Xcover 2
- LG: LG Enact, Lucid 2, Optimus 4X HD, Optimus F3, Optimus F3Q, Optimus F5, Optimus F6, Optimus F7, Optimus L2 II, Optimus L3 II, Optimus L3 II Dual, Optimus L4 II, Optimus L4 II Dual, Optimus L5, Optimus L5 Dual, Optimus L5 II, Optimus L7, Optimus L7 II, Optimus L7 II Dual, Optimus Nitro HD
- Sony: Xperia Arc S, Xperia miro, Xperia Neo L
- Archos 53 Platinum
- Grand S Flex ZTE
- Grand X Quad V987 ZTE
- HTC Desire 500
- Lenovo A820
- Memo ZTE V956
- Wiko Cink Five
- Wiko Darknight ZT
- Quad XL
Tur hende ku ta wak Netflix mester paga pa wak
A partir di e aña aki no ta posibel wak Netflix grátis mas via account di otro hende, a no ser ku e doño di account ta dispuesto na paga pa bo. Netflix a splika resien ku den 2022 kasi mitar di su 220 mion usuarionan tabata kompartí account ku otro hende. Esaki tabata nifiká un pèrdida enorme di mas di 500 mion dòler pa luna. E kompania ta bai introdusí e kambio paso a paso.
Yunan di Kòrsou bibando na Hulanda mester tene kuenta ku otro kambionan importante!
Microsoft lo warda informashon di kompania- i gobièrnunan Oropeo riba servers Oropeo
A partir di 1 di yanüari Microsoft ta ofresé kompanianan i gobièrnunan Oropeo pa warda nan informashon eksklusivamente riba servers Oropeo. Esaki ya ta tumando lugá na Merka, ounke mester bisa ku na Merka no tin un lei general pa protekshon di datonan personal. Na Oropa si esaki ta e kaso. Microsoft a tuma e paso aki pasobra tantu kompanianan komo gobièrnunan Oropeo a keha ku nan no tabata sa unda nan informashon ta keda wardá òf si esaki ta kumpli ku leinan Oropeo. E medida aki ta konta por sierto pa e servisionan Microsoft 365, Dynamics 365, Power Platform i Azure.
Ta bin un outoridat di supervishon di algorithms na Hulanda
Na Hulanda Autoriteit Persoonsgegevens (AP) ta bai supervisá algorithms. Esakinan ta kálkulonan di computer basta kompliká ku gobièrnunan i kompanianan ta usa pa motivá desishonnan importante. E outoridat aki ta bai vigilá si e funshonamentu di e algorithms aki ta sufisiente transparente. Mal uso pa finnan di diskriminashon no ta pèrmití i tampoko no ta pèrmití arbitrismo.
Oropa ta implementá leinan pa limitá poder di “Big Tech”
A partir di zomer benidero na Oropa un lei ta drenta na vigor ku ta bai limitá e poder di kompanianan teknológiko muchu grandi. Ta trata di e asina yamá Digital Markets Act. E reglanan nobo mester entre otro protegé privasidat di usuarionan. E lei ta konta en partikular pa plataformanan ku mas di 45 mion usuario pa luna, manera Google, Amazon, Facebook, Apple i Microsoft. Kompanianan ku no kumpli por konta ku butnan astronómiko.
Avatar: The Way of Water ta generá mil mion dòler pero ainda no ta lukrativo
E pelíkula Avatar: The Way of Water, e di dos parti den e serie Avatar di direktor James Cameron, a generá mil mion dòler for di momentu ku el a estrená riba 16 di desèmber 2022. Asina e revista Variety a publiká resien. Esaki ta e di tres pelíkula ku ta alkansá e suma aki e aña aki. Anteriormente Top Gun: Maverick i Jurassic World: Dominion tambe a generá mil mion dòler òf mas, pero a tuma e pelíkulanan ei mas tempu. A tuma Top Gun: Maverick un luna i Jurassic World: Dominion 4 luna. Den tur tres kaso ta trata di un kontinuashon di pelíkulanan anterior.
Direktor James Cameron ta rekonosé ku Avatar: The Way of Water a habri bon, pero tin un kaminda pa kana ainda pa ta mesun eksitoso ku su antesesor Avatar di 2009. E pelíkula ei a generá 3 mil mion: e pelíkula mas lukrativo den hisotira di sinematografia. Avatar 2 a kosta 350 pa 450 mion dòler pa traha. Esei ta ekskluyendo e budget pa promové e pelíkula. Pues Avatar: The Way of Water tin ku generá sigur mil mion mas pa break even i kuminsá generá ganashi.
Kunuku Man ta reflekshoná riba limpiesa den 2022
Kunuku Man a rekohé alrededor di 13.500 kilo di sushi den 2022. Bon motibu pa un entrevista 🙂
Suesia a inisiá temporada pa yag riba wòlf
Suesia a inisiá e temporada pa yag riba wòlf. Di e 460 ehemplarnan ku ta biba den naturalesa den e pais, yagdónan ta pèrmití mata 75. Ta trata aki di e kampaña di yagmentu mas grandi for di 2010 ora ku a introdusí pèrmit pa yag riba wòlf atrobe. Sigur si konsiderá ku for di 2010 a mata na total 203 ehemplar. Alrededor di 200 yagdó lo ta partisipá e aña aki, kua ta kasi tres biaha e kantidat di animal ku nan tin mag di mata.
Segun outoridatnan e yagmentu ta pèrmití pa tene e populashon di wòlf bou di kòntròl, pero organisashonnan pa protekshon di animal naturalmente a protestá kontra e medida, mustrando riba e sobrebibensia di e espesie. Segun e ambientalistanan e animalnan ta hunga un ròl importante den e kadena natural i biodiversidat di Suesia.
Análisis: 2022 tabata un aña desastroso pa “Big Tech”
2022 tabata un aña desastroso pa kompanianan teknológiko. Tantu Amazon, Meta, Alphabet komo Twitter a sufri gòlpinan duru den e aña tras di lomba. E aña ta karakterisá pa akshonnan ku a pèrdè balor rápidamente, retirunan masivo na algun kompania i vários proyekto ku simplemente no ta kana manera nan inisiadónan a pronostiká.
Pandemia
Mester tene kuenta ku 2 aña pasá mundu tabata den pandemia i konsekuentemente e kompanianan a probechá bon ku hende tabata hasi hopi uso di servisionan digital. Social media i servisionan manera Netflix tabata generá ganashinan haltu dor ku tur hende mester a keda paden.
Kontratempu ekonómiko
E kompanianan mes a rekonosé e desaster ku 2022 a nifiká pa nan i ku nan lo mester bai ekonomisá pa rekuperá di, manera nan mes ta yam’e, kontratempu ekonómiko. Esaki ta reflehá tambe den e balor di nan akshonnan riba merkado di bolsa. En partikular Meta i Amazon a mira nan balor baha ku respektivamente 65 i 51 porshento!
Apple i Microsoft a mira nan balornan baha ku respektivamente 28 1 29 porshento. Segun analistanan esaki ta pasobra e demanda pa produktonan di Apple ta basta haltu ainda. Además e kompania no ta dependé di entrada for di avisonan komersial. E daño pa Microsoft a keda limitá dor ku e kompania ta gana bon sèn ku cloud services.
Vários kousa
Tin vários kousa pa e preshon riba “Big Tech”. Analistanan di Wall Street a kalkulá e inflashon mas haltu den último 40 aña, interes ku ta keda subi i e balor haltu di dòler Merikano. Esaki ta nifiká ku ganashinan den eksterior outomátikamente ta pèrdè balor ora ku bo kalkulá e ganashinan ei den dòler Merikano.
Retiru obligatorio masivo
E kontratempu ekonómiko den e sektor teknológiko a kondusí kaba na retiru obligatorio masivo na entre otro Microsoft, Netflix i Meta, ku pa promé biaha den su eksistensha a mira su entradanan baha. Asina den novèmber direktor di Meta Mark Zuckerberg a anunsiá retiru di 11 mil trahadó dor ku sierto invershon no a generá loke tabata pronostiká. Segun Zuckerberg esei ta okashoná pa “kontrakshon ekonómiko, mas kompetensha i ménos entrada for di avisonan komersial”.
Meta
Meta a invertí mas di 15 mil mion dòler den desaroyo di Metaverse. Metaverse mester bira un lugá virtual kaminda hende por topa i konosé otro pa trabou òf pa hunga video games. Pero te asina leu e proyekto a resultá un pos sin fondo ku no a hala masha usuario. De echo Meta a atraé hopi kritiká riba e kalidat visual di e Metaverse. Kon ku bai bin Zuckerberg ta keda kere den su Metaverse i ku esaki ta e futuro di social media. Pero por dura algun aña promé ku kos ta asina leu.
Twitter tambe a konosé un aña turbulento. Pa algun luna tabatin basta spekulashon si direktor di Tesla Elon Musk tabata bai kumpra e kompania, esaki apesar di un ofèrta basta agresivo di 44 mil mion dòler. Finalmente e deal a tuma lugá i Twitter a bandoná e merkado di bolsa.
Musk a kuminsá inmediatamente ku kambionan drástiko. Mas o ménos mitar di e personal na Twitter a haña òntslag. A kòrta pisá den e kantidat di moderadornan ku mester a vigilá mensahenan dudoso riba e plataforma. Despues Musk a pèrmití vários account atrobe ku tabata será, manera di Donald Trump i Ye.
Vários kompania a hala atras relashoná ku Musk su maneho. E turbulensia na Twitter a resultá den inisio di Mastodon, ku mester bira un alternativa pa Twitter i ku a atraé míles di usuario disgustá ku Twitter bou di Elon Musk.
Medidanan Oropeo
E pronóstikonan pa e kompanianan no ta mihó pa 2023. Union Oropeo a tuma vários medida legislativo pa limitá e poder i influensha di “Big Tech”. E asina yamá Digital Markets Act (DMA) mester krea un atmósfera mas kompetitivo pa kompanianan komparabel pero mas chikitu. Tambe “Big Tech” mester tene kuenta ku e Digital Services Act (DSA) ku ta vigilá e infrastruktura di plataformanan digital.
Ta reglanan ku ta bai basta leu. E DSA ta stipulá ku kompanianan no por rekohé datonan personal di usuario pa avisonan komersial dirigí. Aparte di esei ta reglá tambe ku mester fasilitá usuarionan di por ehèmpel WhatsApp mester por hiba un chat ku un usuario di Signal.
Ekonomisashon
Alphabet, Amazon, Meta i Microsoft a tuma medida pa ekonomisá den 2023 pa asina limitá futuro daño. No solamente nan a kòrta den personal, pero tambe a kòrta skèrpi den proyektonan ménos òf no rendabel. Asina Google a para e gaming platform Stadia.
Netflix, ku tambe a kore ku míles di trahadó, a kuminsá ku account mas barata pa atraé usuario nobo. Tambe e kompania no ta pèrmití kompartímentu di account mas ku amigu òf famia.
“Big Tech” tin un aña ku basta reto su dilanti.
Share2Uplift su lista di 250 ‘influencer’ entretantu ta inkluí 210 persona
E programa Share2Uplift entretantu ta inkluí 210 asina yamá ‘influencer‘. Asina e organisashon ta informá riba su website. Ku e logro aki Share2Uplift ta un paso mas serka di su meta di krea un grupo di 250 persona ku di un òf otro forma ta influenshá Kòrsou. E lista ta inkluí persona for di tur gremio den komunidat i a yega na 210 persona ku e entrevista ku Share2Uplift a tene ku Morgain Parris.
Tambe Share2Uplift ta wak bèk ku satisfakshon riba organisashon di 12 Master Your Mind-platform sessions den 2022 i su partisipashon na Global Enterprise Week kaminda a papia riba e buki “The surrender experiment”. Den 2023 e organisashon lo kontinuá ku vários otro workshop dirigí riba dominio personal di emoshon i abilidatnan práktiko den bida.
Den ougùstùs Share2Uplift a kuminsá kolaborá tambe (via life coach Ivan Kuster) ku Haydee Hermans (Soul Garden Curaçao) i O’dennis Daal (Master Your Mind- Consultancy and Training) den ‘Personal Journey, Emoshon kiko e ta?’ di Curemotions (www.curemotion.cw). E kolaborashon ta kontinuá. Den 2023 Share2Uplift lo sigui ku Partner of Vision Curaçao2030, inisiá pa Miguel Goede.
Den 2023 Share2Uplift ke logra identifiká tur e 250 lidernan étiko pa asina kompletá e lista di ‘influencer’ ku por aportá konhuntamente na kambio di mindset na Kòrsou. Una bes ku logra esaki Share2Uplift lo inisiá proyektonan di enkuentro i kolaborashon i asina kuminsá tuma pasonan konkreto pa e kambio di mindset.
Otro plannan pa 2023 ta inkluí:
- entrevista ku mas potential Influencers;
- presentashon di bukinan durante e enkuentro mensual Master Your Mind platform (kada di tres djamars di luna);
- workshops dediká na desaroyo personal pa esnan interesá den “Emoshon kiko e ta? Ki efekto e tin?” di Curemotions;
- “train-the-trainers”-programs riba “Emotional Mastery”;
- kontinuá ku Curaçao Vision 2030 i promové inisiativanan manera Kolektivo i Plataforma Otrobanda.
Pa mas informashon, bishitá e website di Share2Uplift.
Ken ta Share2Uplift?
Share2Uplift ta un programa pa stimulá liderasgo kontínuo den tur gremio di sosiedat. E programa su mishon ta pa desaroyá liderasgo sostenibel pa stimulá berdadero ‘mindset shifts’. Meta di e programa ta pa empoderá i reuní lidernan étiko (Influencers) for di tur gremio di komunidat ku un mindset ku ta pas mas den siglo 21. Share2Uplift ke realisá esaki den kolaborashon ku tur hende ku ke ‘connect dots’ i hasi un esfuerso konhunto pa kambia mindset na Kòrsou.
2022 tabata bon aña pa sobrebibensha di rinoseronte di India
2022 tabata un bon aña pa sobrebibensha di e rinoseronte di India. Pa promé biaha den 45 aña no a registrá yagmentu ilegal riba e animalnan den e estado nortost Assam, konosí pa su parkenan natural enorme. E rinoseronte di India ta un animal protegé internashonalmente pa evitá su ekstinshon. E parkenan nashonal Kaziranga i Manas na Assam, kaminda e animalnan ta biba, ta riba e lista di patrimonio mundial di UNESCO.
Den último 20 aña a mata sigur 200 ehemplar den e region aki, kulminando den 2013 ku 27 animal matá ilegalmente i den 2014 atrobe e mesun kantidat. Den 2021 a registrá dos kaso ilegal so. For di e aña ei e region Assam ta hiba un maneho mas aktivo pa protegé e animalnan kontra yagdó ilegal. Organisashonnan ambientalista ta kolaborando mas tantu i tambe a instalá vários kámara pa vigilá e region kontra kontrabandista.
Violadónan di e reglanan ta haña un prohibishon di akseso na e region. Aña pasá outoridatnan a logra detené 58 persona ku a hasi un intento pa mata e animalnan. 4 otro yagdó a pèrdè nan bida den nan intento pa hui for di bewakernan.
Meta ta haña but di 390 mion euro pa violashon di privacy
Djarason e outoridat di privacy Irlandes DPC a imponé dos multa na un balor total di 390 mion euro riba Meta, propietario di Facebook i Instagram. Segun e outoridat e kompania a violá e derechinan di privacy di su usuarionan. Asina Meta a faya garafalmente pa informá su usuarionan debidamente kiko eksaktamente ta pasa ku nan datonan personal. Esaki ta bai kontra reglanan di privacy den Union Oropeo.
Pa e motibu ei Instagram a haña un multa di 180 mion euro i Facebook un multa di 210 mion euro. E kaso a lanta kabes 4 aña pasá ora ku 2 usuario a entregá un keho kontra e kompania propietario Meta. Usuarionan di Facebook i Instagram tabata obligá aseptá e kondishonnan di servisio nobo, sino nan no por a usa e plataformanan aki mas.
E demandantenan no a haña rason, pero di otro banda DPC a huzga ku no tin transparensha den e maneho di datonan personal di usuarionan. Por sierto ku e dolor di kabes pa direktor Mark Zuckerberg no ta kaba akinan. Ainda tin un di tres kaso andando kontra WhatsApp.
WHO: No tin variante nobo di corona na China
No tin variante nobo di e vírus di corona ku ta okashoná Covid-19 na China. Asina World Health Organisation (WHO) ta informá a base di informashon di outoridatnan Chines. Segun e datonan aki e sifra haltu di kontagio di último simannan ta okashoná pa e mesun variantenan registrá rònt mundu. Tin preokupashon bou di ekspertonan ku e sifra haltu di kontagio na China na e momentunan aki por kondusí na un variante nobo.
WHO ta opservá ku e sifranan ku China ta raportá pa loke ta trata atmishon den hospital i salanan di emergensha i e kantidat di mortonan ta parse hopi abou. Pa e motibu ei e organisashon a pidi China pa duna un poko mas klaridat riba e situashon aktual den e pais. Vários pais a limitá buelonan for di China den último dianan.
Fundadó Sam Bankman-Fried ta desmentí kulpabilidat di kaida FTX
Fundadó di FTX Sam Bankman-Fried ta desmentí kulpabilidat. Bankman-Fried a aparesé den korte na New York kaminda e mester duna kuenta i rason pa su ròl den e kaida di e bolsa pa kriptomoneda FTX. E èks bionario ta akusá di a desinformá invershonista i klientenan i uso personal di kapital di terseronan. Bankman-Fried lo a pasa sèn di kliente pa e fondo Alameda Research, ku tabata invertí e kapital den vários otro kompania.
Bankman-Fried a keda detené na Bahamas despues ku FTX a pidi bankarota, despues a ekstradit’e pa Merka. Na Bahamas entretanu a buta beslag riba propiedatnan di FTX ku tabata suma na total 3.500 mion dòler na momentu di e bankarota. E pais a komprometé su mes na debolbé e propiedatnan aki na kliente i otro debedornan.
Na Merka Bankman-Fried a paga un bòrg di 250 mion pa e no tin mester di sinta warda tratamentu di su kaso den prison. E ta bou di huisarrest na kas di su mayornan na California.
Lula da Silva ta reaktivá Fondo Amazonia
Presidente di Brasil Luis Inacio Lula da Silva a reaktivá e asina yamá Fondo Amazonia, un fondo pa sostené proyektonan pa para kapmentu di palu. Ta trata di un fondo na un balor total di 1200 mion dòler ku e paisnan Norwega i Alemania a reservá pa finansiá mas di 100 inisiativa pa protegé e region Amazona. Entretantu lo tin ya 594 mion dòler otorgá.
Bou di e presidente anterior, Jair Bolsonaro, e kapital reservá aki tabata konhelá. Segun Bolsonaro lo tabatin hopi iregularidat ku e proyektonan ku tabata risibí sèn for di e fondo. Bou di Bolsonaro e industria di kapmentu di palu tabata kap kasi 13.000 kilometer kuadrá pa aña.
Lula da Silva, kende a kaba di asumí presidensia di e pais, a primintí den pasado ku e ke para kapmentu masivo di palu definitivamente pa mas tardá 2030.
Taliban ta sera dil pa suminsitro di petroli na kompania Chines
Taliban, e régimen ku ta na mando na Afganistan, a sera un dil pa suminsitro di petroli na e kompania Chines CNPC. CNPC a haña pèrmit pa pòmp petroli den parti nort di Afganistan pega ku e riu Amu Darya. Lo ta trata di un invershon di 150 mion dòler pa aña. E embahador Chines na Afganistan Wang Yu a konfirmá e akuerdo durante un konferensha di prensa.
Siguiendo un otro akuerdo anterior ku gobièrnu di Rusia esaki ta e promé akuerdo ku e régimen a sera ku un kompania internashonal for di momentu ku Taliban a rekobrá poder den e pais aña pasá. E akuerdo ta kumbiní Taliban konsiderando ku Afganistan ta blanku di sanshonnan di Nashonnan Uní.
Remarkabel ta ku ofisialmente China no ta rekonosé Taliban komo gobièrnu di Afganistan. De echo e lokalidat di Afganistan ta kumbiní China ku tin demanda haltu di metalnan presioso manera lithium, koper, oro i petroli.
Protagonistanan di Romeo i Juliet di 1968 ta demandá Paramount pa 500 mion dòler
E aktornan Olivia Hussey i Leonard Whiting, ámbos konosí pa nan ròl komo Romeo i Juliet den e legendario interpretashon sinematográfiko di 1968, a entamá un kaso kontra e kompania Paramount Pictures relashoná ku esena kaminda nan ta sali sin paña. E aktornan tabatin 15 i 16 aña tempu ku nan a graba e pelíkula.
Komo kompensashon e aktornan ta pidi Paramount 500 mion dòler pa engaño i daño emoshonal i daño na nan karera komo aktor. Direktor di e pelíkula Franco Zeffirelli, kende a fayesé 2 aña pasá, lo a garantisá nan ku lo no tabatin esena kaminda nan lo a sali sin paña. Na último momento e direktor lo a bisa nan ku e esena tabata nesesario pa e pelíkula bira un éksito.
E kaso a lanta basta diskushon den sírkulonan den Hollywood. Ta asina ku 2 aña pasá e aktris Olivia Hussey, ku di momentu tin 71 aña di edat, a glorifiká su ròl komo Juliet den e revista Variety bisando ku e esena no tabata mustra nada vulgar.
Por fin Sony por kumpli ku demanda haltu pa Playstation 5
Sony a produsí mas PlayStation 5 console pa asina por kumpli ku e demanda haltu rònt mundu. Asina presidente di Sony Jim Ryan a bisa djaweps durante un bùrs pa aparatonan eléktriko.
For di su lansamentu den novèmber 2020 e demanda pa PlayStation 5 tabata surpasá e ofèrta. Produkshon di e console tabata limitá dor di eskases kontinuo di computer chips. Tambe tabatin problemanan logístiko rondó di sierto parti esensial di e console.
Na total Sony a bende mas di 30 mion Playstation 5, kua ta 5 mion dòler mas haltu ku e kompania a raportá den e sifranan di e último kuartal di 2022. Partikularmente desèmber tabata un bon luna pa benta di Playstation 5.
Ola di violensha na Sinaloa (Mexico) despues di detenshon yu EL Chapo
Por lo ménos tres agente di siguridat a pèrdè nan bida den un ola di violensha ku a lanta na e siudat Mehikano Culiacán. E disturbionan a lanta kabes despues ku a detené Ovidio Guzmán, yu hòmber di El Chapo. 18 persona a keda heridá dor di e violensha. Te asta un avion di pasahero di e kompania Aeromexico ku tabata biahando pa Mexico City a haña impakto di bala.
Den 2019 tambe a detené e yu di El Chapo, pero despues e presidente aktual Manuel Lopez Obrador a laga Guzmán den libertat atrobe pa evitá un konfrontashon violento. Na e momentu ei polis no tabata sufisiente ekipá pa para e kartel di Sinaloa, kaminda Guzmán ta operá. Outoridatnan a yama estado di emergensha i sera vários servisio públiko te próksimo aviso.
200 mion adrès di email di Twitter users den man di hackers
Usuarionan di Twitter mester paga bon tinu. Sigur 200 mion adrès di email ta den man di hackers despues ku esakinan a logra penetrá den e sistema di e plataforma. E adrèsnan a keda publiká riba un foro di hackers. Asina un investigadó Israelí a deskubrí. E hack a sali den publisidat for di 24 di desèmber, pero e embergadura di e atake no tabata konosí.
Twitter te asina leu no a reakshoná ofisialmente riba e hack i tampoko ta konosí kiko a hasi pa evitá daño adishonal. Ta asina ku e hack aki ya lo a tuma lugá den 2021, pero te ainda no ta konosí ken ta responsabel. E notisia a buta outoridatnan di supervishon na Oropa i Merka den estado di alerta. E notisia ta nifiká ku e propietario nobo Elon Musk ya ta den violashon di sierto lei ku ta protegé privasidat.
Te ainda Kas di Representantenan no tin presidente
Te ainda e Kas di Representantenan, e órgano parlamentario Merikano, no tin un presidente. Den último 3 dia e kandidato republikano Kevin McCarthy a hasi hop esfuerso pa yega na un mayoria pa presedé e Kas, pero despues di 11 buèlta di voto te ainda e no a logra atkirí un mayoria.
McCarthy tabatin mester di 218 voto, pero no tabata haña mas di 200. Esaki pa motibu di un grupo di mas o ménos 20 republikano ultra konservativo ku no ta konfia si McCarthy lo ke koperá ku demókratanan den e Kas di Representante.
Djabièrnè anochi nos lo sa si nan a logra skohe un presidente den un dia ku por tuma largu atrobe.
TechTime ku Arthur Tholel
Bo ke sa kon a para ku DART?
Bo sa kon nan a traha un Stadion ku Container pa Fifa 2022?
Unboxing ku Boolchand’s, e biaha aki nos ta bai tin un party speaker.
