E hóben Yu Di Kòrsou Lennard (Lenny) Pietersz resien a biaha pa Hapon for di Merka kaminda el a bai forma parti di e ekipo Hapones The Blades. Ken e hóben talentoso aki ta? Kiko ta su trayektoria? Unda el a kuminsá i kuantu tempu e ta praktiká beisbòl? Kiko ta motiv’é?
Who – Ken ta Lennard Pietersz?
Famia
Lennard Pietersz (23), Lenny manera e hungadónan nan Merka a kuminsa yam’é, a bai Merka ku 15 aña komo prospekto di beisbòl kombiná ku estudio. Lennard a lanta na kas huntu ku su mama Graciela Guda, su ruman Mennard (13) i su tata Eugène Pietersz. Hopi di Lennard su famianan parti di tata tabata hunga beisbòl: Lennard su tata, su primu i tambe su tionan.
Edukashon
Despues di Marnix School Lennard a bai SKAIH VSBO. Despues ela a kambia bai Marnix VSBO (TKL+).
When – Kuantu tempu Lennard ta praktikando beisbòl?
Deporte
For di chikí, na edat di mas o menos 6 aña, Lennard a kuminsa praktiká e deporte. Lennard su tata (Eugène) tabata picher i shòrtstòp i su tio (Aiky) tabata kècher. Nan a hunga kasi semper den e tim Charo i Alpha Zelbo i ora nan a bira mas grandi nan a hunga den Real Athletics klase A.
Where – Na unda Lennard a kuminsá?
Na Kòrsou Lennard a hunga for di un prinsipio pa Marchena. Su promé trainer tabata mener Simmons, tata di Andrelton Simmons. Mayoria biaha Lennard a tuma parti den e Selekshon di Pabou. Nunka nan no tabatin e suerte di a gana Liga Pariba, pa asina Lennard por a representá su pais.
What – Kiko Lennard a logra?
Viaje pa Merka
Ku 15 aña, tempu ku Lennard tabata den 3e klas na Marnix VSBO, su tio Robert ku ta biba na Merka a ofresé Lennard pa bai biba serka dje. Pa asina e por bai skol i sigui praktiká beisbòl.
Lennard mes a kuminsá buska skol na Naples (Florida), kaminda su tio tabata biba. Pa su suerte riba un dia ku Lennard i su mayornan tabata di bishita serka famia, e la risibi un yamada di un high school na Naples. First Baptist Academy a yama pa hasi un entrevista ku n’e. E entrevista dimes a bai kompletamente na Ingles i Lennard a hasi’é ku éksito. Depues ku e skol a entrevistá Lennard, nan a papia ku su mayornan i a informá nan ku nan a aseptá Lennard na First Baptist Academy High School.
Lennard a bai biba Merka i a sigui e promé dos añanan na First Baptist Academy High School. Su lastu aña di high school Lennard a sigui su studio na Secrest High School, un skol privá ku tabata interesá pa Lennard hunga beisbòl pa nan. E aña ei Secrest High School a logra bai final pa promé biaha. Tabata un logro importante pa Lennard. E tabata e úniko Yu di Kòrsou hungando den e team. Nan a hunga kontra un otro high school den un stadion di Grandes Ligas na Florida. Un bon wega: e tim di Secrest tabata ganá pero a bin pèrdè e wega den ultimo inning. Un lástima ya ku si nan tim lo a gana, Lennard lo a hunga kontra diferente otro amigu Yu di Kòrsou ku tabata hunga den e tim di Trinity High School, ku a logra bira kampion e aña ei.
Scholarship & showcase
Na final di Lennard su aña eskolar na Secrest High School el a logra haña scholarship pa Oklahoma State College. Esaki ta e skol ku Andrelton Simmons tambe a frekuentá i a wòrdu di draft. Akinan Lennard a hunga bou di coach Russel, na kua e ta hopi gradesido pa su formashon komo pelotero. Coach Russel tabata ke Lennard hopi bon.
Despues di su promé aña di college Lennard a opta pa kambia di skol i a bai biba na Texas. Akinan Lennard a bai e skol i hunga pa e tim di Clarendon College. Ela hunga dos aña pa e skol aki. Durante di Lennard su añanan na college su tio (Robert) ku ta biba na Naples a dun’é e oportunidat di bai diferente showcase i tryout.
Desepshon
Net promé ku Covid, durante un tryout, Lennard a haña un oferta di e organisashon Philadelpia. Lennard a opta e tempu ei pa sigui ku su skol, pues di no aseptá e oferta pa hunga pa Philadelphia. E aña ei mester a bira su lastu aña di skol. Lennard a muda i bai biba na Lake Wales (Florida) i a kontinuá su estudio na Warner University.
Pa su sorpresa Covid a dal aden. Despues di algun luna ku Covid a sigui, Lennard a bula bin Kòrsou i a trata di hasi su lèsnan online. Lennard a keda kasi un aña na Kòrsou, despues regresá Merka i a trata di sigui ku su skol. Akinan ela kai chikí; su GPA no tabata sufisiente pa bai skol i hunga beisbòl na mes momento. Lennard tabatin mag di bai skol so.
Debí na esaki Lennard a aseptá un oferta pa bai hunga pa un tim di beisbòl te na Austria. Tabata nèt den e temporada ku e guera entre Rusia i Ukrania a kuminsá. Lennard tabata teme un tiki, pero a tuma e desishon pa bai Austria. Al final esaki tabata un eksperensha hopi grandi pa Lennard. Ela konosé otro parti di mundu i otro kultura. Na Austria e hendenan a tratele hopi bon mes. Einan Lennard a keda kasi 8 luna. Despues di Austria Lennard a regresá Merka i a sigui ku su estudio na Warner University. Aktualmente Lennard ta den su último aña di Sports Management.
Viaje pa Japon
Durante Lennard su último aña, na désèmber 2022, ela bin haña sa di un Winter League ku ta tuma lugá na Hapon, kaminda mayornan di su partner ta biba. Asina Lennard i su partner a bai Hapon. Lennard a bai hunga pa e tim Zenhoren, na Okinawa. Ku yudansa di su tio Lennard a logra yega Okinawa.
Prestashon na Hapon
Durante e Winter League na Okinawa Lennard a hasi su utmost i asina a logra di sali MVP. For di akinan otro timnan a kuminsá mustra nan interes den Lennard komo hungadó pa nan tim.
Firma ku The Blades na Hokkaido
Den yanüari 2023 Lennard a regresá Lake Wales i a kontinuá su estudio na Warner University. Einan, den un temporada kòrtiku, Lennard a logra konektá 4 homerun pa e tim di su skol.
Na aprel último Lennard a haña i mester a disidi si e ta aspetá un oferta The Blades, un tim na e suidad Hokkaido. Despues di a evaluá su situashon i konsultá ku su mayornan Lennard a tuma e desishon di firma ku The Blades di Hokkaido, Hapon. Tanten Lennard lo sigui ku su estudio pa e por finalisá esaki e aña aki.
Why – Kiko ta motivá Lennard
Den Lennard su propio palabranan
“Mi ta hopi kontentu i ta yama Tata Jehova danki pa tabata ku mi den mi tempunan difisil tambe; danki pa a guiá mi i protehá mi. Un danki tambe na mi mama, mi tata i mi ruman hòmber Menard, mi tanta Suzy, i tio Aiky. Tambe na mi opi i omi i tur sobrá famia i amigunan ku a sostené mi den bon i malu. Bendishon di Dios pa nan tur.
Mi konsho na hóbennan:
- Ta kreyente
- Ta positivo
- Tin un vishon
- Keda di focus
- Buska bon amistat
I nunka no entregá: kòrda ku ora un porta sera, otro portanan ta habri pa bo.”
