About 5W Press

5W Press ta un plataforma di profeshonalnan independiente ku ta aktivo den vários sektor na Kòrsou. Nos forma di publiká i trese notisia ta adaptá na e époka digital ku nos ta biba aden. Pa e motibu ei tambe nos a opta pa e formato Online Magazine pa distinguí nos mes komo multimedia platform. Pues, nos no ta televishon, ni radio, ni korant, i sigur no un social medium.

Nos meta ta pa komplementá otro medionan di komunikashon na Kòrsou no solamente ku fast read news di e susesonan ku mas ta hala atenshon, pero tambe ku artíkulonan mas profundisá, den un formato organisá i kompañá pa datonan verifikabel. Nos ta kombensí ku notisia i publikashonnan (oudiovisual) ku un enfoke riba echonan básiko, ta kondusí na un debate públiko mas sano.

5W Press su nòmber ta derivá for di e prinsipio di “5 W’s”. E kontestanan riba e 5 preguntanan aki ta forma e base di kolekshon responsabel di informashon i e búskeda di solushon pa problema. Ta un método apliká den vários disiplina manera periodismo, siensia i investigashon.

Segun e prinsipio di 5W’s un relato òf rapòrt ta konsiderá konfiabel ora e siguiente preguntanan keda kontestá korektamente:

Pero e método yama ofisialmente 5W+H (di “How?”), tòg?

Korekto! De fakto e método ta inkluí for di su konsepshon un di shete pregunta, esta “With what (means / resources)?”. E kontesta riba e preguntanan spesífiko ei – “How” i “With what (means / resources)” – sinembargo ta arbitrario. No tin 1 kontesta korekto só pa rospondé e 2 preguntanan ei. P’esei mes 5W Press ta opta pa konsentrá riba e 5 W’s, pasobra e kontestanan ei si ta fiho i ta fasilitá e echonan básiko di kada suseso pa asina por rospondé “How” i “With what (means / resources)” adekuadamente.

Aktualmente e debate públiko na Kòrsou ta konsentrá primariamente riba e “How” i “With what (means / resources)” sin òf promé ku e echonan básiko keda registrá i konfirmá. Esaki bou di influensha di (medionan alternativo riba) retnan sosial i plataformanan sensashonal. Konsekuentemente debate públiko ta tumando lugá mas riba base di emoshon ku riba base di facts. 5W Press kier kontribuí na un debate mas sano publikando artíkulonan ku ta kumpli ku e rekerimentunan básiko di un bon relato (e 5W’s) i sirbi komo punto di referensha konfiabel.

Pa e motibu ei 5W Press ta selekshoná kontribuyente i outor a base di ekspertisio i eksperensha ku por splika e temanan den aktualidat den bon Papiamentu i, de paso, eduká públiko di un forma responsabel. Pa motibunan práktiko nos no por fasilitá un plataforma 100% na Papiamentu. Vários link riba 5WPress.com i 5WPress.News lo hiba bo pa fuentenan na Ingles, Spañó i/òf Hulandes.

Tòg nos ta purba di stimulá presensia di Papiamentu riba internèt produsiendo artíkulonan na Papiamentu di kalidat haltu i liber di teoria pseudosientífiko. Artíkulonan ku por sirbi den enseñansa i/òf inspirá produkshon di material na Papiamentu pa enseñansa. Dor di fasilitá akseso na kontenido serio 5W Press ke kontribuí na desaroyo i promoshon di un Smart Nation ku konosementu produsí den nos idioma.