E kompania Apple mester para benta di un liña nobo di smartwatch na Merka entrante djaweps. Asina un korte Merikano a dikta den apelashon djarason.
E oloshinan ta ekipá ku un teknologia ku por midi e nivel di oksígeno den sanger di e usuario, un teknologia di kua e patènt ta kai bou di e kompania Masimo i ku Apple lo a usa sin pèrmit. E kompania Masimo ta argumentá ku Apple lo a atkirí konosementu di e teknologia atraves di un èks trahadó.
Segun e komishon di arbitrahe International Trade Commission (ITC) Masimo tin rason den e kaso aki i pa e motibu ei ya a prohibí benta di e tiponan Series 9 i Ultra 2 di Apple for di desèmber. Algun dia despues un otro korte a anulá e desishon temporalmente, pero awor Apple no tin otro alternativa sino di para benta di e tipo ekipá ku e sistema pa midi oksígeno.
Poko despues di e desishon Apple a anunsiá ku e oloshinan lo sali na benta sin e funshon pa midi oksígeno. Esakinan lo ta disponibel via e website di Apple mes.
