by Webmaster | 24/03/2023 | Business & Economy
E inkietut riba merkadonan finansiero ku resien a lanta kabes ketu bai ta afektando e preis di akshonnan. Bankonan Oropeo a haña algun klap basta fuerte: djabièrnè mèrdia balor di akshonnan di Deutsche Bank tabata 11% mas abou, loke a kontagiá akshonnan di otro bankonan Oropeo tambe. E balor di akshonnan di ING tabata 4% mas abou i esnan di ABN Amro na mas o ménos 2% mas abou.
E inkietut riba merkadonan finansiero a kuminsá ku kaida di Silicon Valley Bank kasi 2 siman pasá siguí siman pasá pa problemanan na Credit Suisse. E banko ku a adoptá Credit Suisse a mira su balor di akshonnan baha ku 5% riba djabièrnè. Analistanan ta atribuí e problemanan den e sektor na miedu bou di invershonistanan.
Bankonan Sentral a subi interes pa asina frena e inflashon ku por nota rònt mundu aworakí. Di un banda e oumento di interes ta afektá e produktonan finansiero di bankonan, pero di otro banda e ta generando entrada. Analistanan ta konta ku e bankonan lo presentá sifranan positivo di e promé kuartal di e aña aki. Posiblemente esei por restourá konfiansa atrobe riba merkado finansiero.
by Webmaster | 20/03/2023 | Business & Economy
Banko Sentral di Oropa, Federal Reserve na Merka i por lo ménos 4 otro banko sentral ta ofresé bankonan den tempu benidero espasio pa fia sèn. Aparte di Banko Sentral Oropeo i Federal Reserve, Suisa, Reino Uní, Canada i Hapon tambe a tuma pasonan komparabel. Di e forma ey konsumidornan i kompanianan por sigui lanta sèn den tempunan di insiguridat ekonómiko.
E medida a drenta na vigor djadumingu ora ku UBS na Suisa a tuma Credit Suisse over. Meta di e medida ta pa krea konfiansa bou di invershonistanan atrobe. Segun e bankonan sentral e medidanan aki ta nesesario pa garantisá likides. Silicon Valley Bank ta un bon ehèmpel di un banko ku a bati bankarota dor di falta di likides dor ku e sèn di e banko ta pegá na sierto produkto finansiero.
Te ainda no tin un bista klaro riba e magnitut di e daño. E bankonan ku a haña problema den último par di siman a pèrdè hopi kapital dor di invershonnan den produktonan finansiero ku a pèrdè hopi balor.
by Webmaster | 20/03/2023 | Business & Economy
Balor di bitcoin a subi djaluna mainta te na 28500 dòler. Esaki ta e balor mas haltu registrá for di yüni aña pasá. Segun analistanan kriptomoneda ta benefisiando di e inkietut ku ta reina den merkadonan finansiero, dor ku invershonista ta invertí nan sèn den otro aktividat.
Siman pasá tabata un siman dramátiko pa mundu bankario. Na Merka tres banko a bati bankarota i na Suisa e banko Credit Suisse tambe a hañ’e den problema. Credit Suisse a bin kaba den man di otro banko Suiso, esta e banko UBS. Na Merka gobièrnu a invertí kapital ku yudansa di krédito di bankonan konkurente. Esei ta baha e konfiansa pa invertí den banko.
Entretantu hende ta buskando rekurso riba e merkado di kriptomoneda. For di kuminsamentu di e aña aki bitcoin su balor a subi ku mas o ménos 70%. Otro kriptomonedanan tambe ta probechando di e situashon. Den 1 siman di tempu Solana su balor a oumentá ku 19%, balor di Ethereum i BNB a subi ku 12% i Dogecoin a subi ku 7%.
by Webmaster | 17/03/2023 | Business & Economy
Na kabamentu di un siman basta kaótiko pa merkadonan di akshon te ainda invershonistanan no ta kombensé ku kosnan ta bai kaba bon. Djabièrnè ainda akshonnan di bankonan tabata bou di preshon apesar di medidanan na tantu Merka komo Oropa pa trese trankilidat bèk.
Ayera nochi un banko Merikano mas, esta First Republic Bank (FRB), mester a haña un inyekshon di kapital di kasi 30 mil mion dòler. E sèn usá pa e inyekshon aki ta bin di 11 otro banko na Merka den kolaborashon ku gobièrnu. E konstrukshon aki, kaminda kompetensha ta yuda tene un otro riba pia, mester trese konfiansa bèk den e merkadonan.
Den e promé momentunan despues di e medida ey kos tabata parse di bai bon i e balor di First Republic a subi bèk i sera den sifra positivo. Pero djabièrnè e balor a baha ku un kuart atrobe. Meskos ta konta pa Credit Suisse na Suisa. E banko a parse di ta rekuperá despues di medida di gobièrnu, pero djabièrnè su balor a bolbe baha ku 10%.
Al fin al kabo tur kos ta para òf kai ku emoshon i konfiansa di invershonista i kliente. Na momentu ku esakinan invertí nan sèn otro kaminda òf lanta nan sèn masalmente bankonan lo sigui kai.
by Webmaster | 16/03/2023 | Business & Economy
Preis di petroli a baha den último dianan i a yega na e preis mas abou di último 15 luna. Djarason i djaweps e preis di petroli di North Sea tabata kalkulá na 73 dòler pa barí. E preis di petroli Merikano tambe a baha te ménos di 66 dòler pa barí.
Aparentemente e situashon riba merkadonan finansiero ta pushando e preis di petroli pa’bou. Dor di e inkietut riba e merkadonan finansiero ta antisipá riba ménos aktividat industrial i pa e motibu ey ménos demanda di petroli. Na mes momentu e inkietut ta oumentando e preis di dòler, loke no ta hasi petroli dje atraktivo ey pa komersiantenan ku ta operá ku otro moneda.
Si e preis di petroli keda asin’akí normalmente lo bo nota esaki den e preis ku bo ta paga na pòmp despues di un par di luna òf siman.
by Webmaster | 15/03/2023 | Business & Economy
Inflashon na Argentina luna pasá ta kalkulá na 102.5%, loke ta nifiká ku tur kos a bira dòbel e preis di loke nan tabata un aña promé. Ta pa promé biaha for di 1991 ku e pais ta bolbe registrá un inflashon asina haltu. Den añanan 90 Argentina a pasa dor di un temporada di hyperinflashon i historia ta parse di ta ripitiendo.
E aña aki so inflashon ta kalkulá na un oumento di 13.1%, kompará ku kabamentu di 2022. Awor ku inflashon ta asina haltu e preisnan ta wòrdu adaptá tur siman atrobe i e konsumidor ta sinti’é den su pòtmòni.
Ku e sifra di inflashon di 102.5% Argentina tin un di e sifranan di inflashon mas haltu na mundu. E viktoria di kampionato mundial di futbòl no a kontribuí na ekonomia di e pais manera hende tabata kere ku lo a pasa.
by Webmaster | 14/03/2023 | Business & Economy
Despues di un kaida fuerte djabièrnè, riba djamars e balor di bitcoin a subi te na 26 mil dòler. Aparentemente e medidanan ku gobièrnu di Merka a tuma pa mitigá e konsekuenshanan di e bankarota di Silicon Valley Bank tin benefisio pa e moneda virtual.
Otro kripotmoneda tambe a mira nan balor subi. Asina e preis di ethereum a subi te kasi 1.750 dòler. Meskos ta konta pa e otro kriptomonedanan manera XRP, Cardano i Dogecoin.
E merkado tabatin mester di e impulso aki. Aña pasá tabata un hopi mal aña pa kriptomoneda, partikularmente despues di e kaida di e bolsa di kriptomoneda FTX. For di kuminsamentu di e aña aki poko poko e merkado ta rekuperando.
by Webmaster | 14/03/2023 | Business & Economy
Akshonistanan di Silicon Valley Bank (SVB) ku a bai fayit djabièrnè último a entamá un kaso kontra e banko. Na ta kulpa gerensha di e banko di no tabata sufisiente transparente riba riesgonan ku e kompania tabata eksponé na dje.
Partikularmente e interes haltu di momentu tabatin konsekuensha pa likides di e banko. SVB a sera debe na momentu ku interes tabata abou, pero ora ku esaki a oumentá fuerte atrobe e debenan di e banko a bira difísil pa kumpi ku n’e. Un dado momentu e banko tabata bende obligashonnan ku pèrdida haltu.
Pa mitigá e pèrdida SVB a emití akshonnan nobo. Esei a lanta sospecho serka esnan ku un kuenta na e banko ku algu no tabata kana bon, resultando den un bankrun. Akshonistanan opviamente ta rabiá i a bai korte den estado California kaminda e outoridat finansiero a tuma maneho over di e banko.
Te asina leu e impakto negativo riba e merkado finansiero ta limitá na algun porshento, eksepto pa Signature Bank ku a bai fayit poko despues di SVB i e balor di akshonnan di First Republic Bank ku a baha ku 70%. Por papia di un trankilidat relativo despues ku gobièrnu di Merka a intervení. Invershonistanan ta alerta.
by Webmaster | 13/03/2023 | Business & Economy
Outoridatnan na California a sera Silicon Valley Bank (SVB), lantando asina un ola di preokupashon den e mundu di merkadonan finansiero ku tin un otro “domino effect” na kaminda. SVB ta un banko relativamente yòn i a finansiá vários start-up. Esei probablemente no ta bai ta sin konsekuensha.
Kiko ta pasando na SVB?
Djabièrnè último outoridatnan na California a sera e banko. Nan no a logra rekohé sèn ku emishon di akshonnan nobo. Pa e motibu ey e banko no por a kumpli ku su debernan i a bai fayit. E outoridat federal FDIC a keda apuntá komo bewindvoerder. Na kabamentu di aña pasá SVB tabata manehá alrededor di 175 mil mion dòler, butando e banko na di 16 lugá na Merka.
Kiko a bai robes?
SVB a sera hopi fiansa ora ku interes tabata abou, pero despues di e oumentonan fuerte di interes, SVB tabatin mas i mas problema pa kumpli ku pago i refinasiamentu di nan fiansanan. Ora ku klientenan a lanta nan plaka masivamente, e outoridat supervisor FDIC na California a disidí sera e banko. FDIC a habri algun kantor djaluna pa klientenan haña akseso na te ku 250 mil dòler di nan plaka.
Ken tur tin kuenta habrí na SVB?
Silicon Valley Bank tabatin hopi kompania di teknologia komo kliente, entre nan en partikular hopi start-ups. E kompania a haña vários gòlpi finansiero den último simannan dor ku e mester a bende obligashonnan ku hopi pèrdida.
Klientenan tin akseso na nan kuenta awor ku SVB ta fayit?
Gobièrnu a tuma enkargo di e banko, pues klientenan tin akseso na nan kuenta.
Kiko ta e konsekuenshanan pa esnan ku a spar na SVB?
Esei no ta konosí ainda. Esei ta dependé si e kaida di SVB ta kontagiá otro instansha finansiero i kompania. En todo kaso no ta un un banko di spar.
E problemanan na SVB ta komparabel ku e krísis bankario di 2007 / 2008?
Nò, esei lo ta un poko eksagerá. E krísis bankario di 2007 / 2008 tabatin rais den e merkado di vastgoed, ku tin basta peso den e sistemanan finansiero i ekonómiko den mayoria pais. E problemanan na SVB ta mas e konsekuensha di mal maneho di balansa na un filial spesífiko.
Pues finalmente: tin un krísis bankario na kaminda atrobe?
Lo mester sali afó den dianan benidero si e kaida di SVB ta “kontagiá” otro instansha finansiero i kompania. E ta dependé tambe di e impakto sikológiko riba esnan ku ta spar i / òf invertí, manera a pasa durante e krísis okashoná pa e kaida di Lehman Brothers. A base di e eksperensha ey ta parse ku gobièrnu di Merka ta antisipá riba mas problema. Pero bankonan ta traha ku buffernan finansiero hopi mas amplio kompará ku ántes ku por akapará un eventual klap.
by Webmaster | 10/03/2023 | Business & Economy
Balor di bitcoin a baha djabièrnè ku 3% te na mas o ménos 19.900 dòler. Ta pa promé biaha for di yanüari ku e kriptomoneda mas grandi su balor a baha bou di 20.000 dòler atrobe. Posibel oumento di interes den futuro, reglanan mas stringente i problemanan na e banko virtual Silvergate a hasi basta daño.
Riba djaweps ya kaba invershonistanan a mira e balor baha ku 8%. E bahada ta konta tambe pa otro kriptomoneda manera ethereum i cardano. E desaroyonan aki ta pa un gran parti konsekuensha di e kaida di e bolsa FTX. Vários organisashon ku a invertí a hañan den problemanan serio dor di e kaida di e bolsa. Ademas tin mas i mas supervishon riba e merkado di kriptomoneda.
Tin mas i mas bos ta lanta pa kriptomoneda bira un sistema di akshon, efekto i obligashon. Asina un supervisor na New York a indiká kaba ku e merkado di ethereum tin mas karakterístika di efekto.
by Webmaster | 07/03/2023 | Business & Economy
Durante i despues di e pandemia di Covid-19 e kompania produktor di kos di hunga LEGO a traha un ganashi di 65 mil mion korona Danes (o sea 8.7 mil mion euro) den 2022. Esei ta un oumento di 17% kompará ku 2021 ora ku e pandemia ainda tabata motibu pa vários lockdown rònt mundu. Den e tempu ei konsumidornan a kumpra un kantidat enorme di LEGO pa rekreashon na kas.
En partikular e sètnan dediká na Harry Potter i Star Wars a yuda pusha benta di LEGO den 2022, ku tabata un bon aña apesar di e preisnan haltu di energia. Tambe e serie tékniko di LEGO a kontribuí na e bon resultado den 2022.
Na kuminsamentu di siglo 21 tabata parse ku LEGO lo a bai fayit, pero ora ku e kompania a introdusí paketenan pa adulto e benta a “skyrocket”, manera nan ta bisa. Danki na e kolaborashon ku Disney i programanan manera LEGO Masters LEGO tin un posishon konfortabel atrobe riba merkado.
by Webmaster | 02/03/2023 | Business & Economy
Inflashon den eurozone a baha den febrüari di akuerdo ku sifranan nobo di e ofisina di estadístika Eurostat. Inflashon na Oropa den febrüari ta kalkulá aworakí na 8.5% kompará ku 8.6% den yanüari. Básikamente esaki ta nifiká ku preisnan a subi un poko ménos fuerte ku den lunanan anterior. Den òktober e inflashon tabata kalkulá te asta na 10.6%.
E inflashon a baha un poko dor di bahada di preis di gasolin, diesel, gas i elektrisidat. Esaki sinembargo no ta konta pa e preis di aliment0o, bebida i tabak. Esakinan a sigui oumentá. Na Hulanda inflashon ta kalkulá na 8% na e momentu aki. Lo ke si a baha den eurozone ta desempleo.
by Webmaster | 17/02/2023 | Business & Economy
E balor di kambio di bitcoin a temporalmente surpasá 25 mil dòler djaweps anochi, e balor di kambio mas haltu den 8 luna. For di yanüari e moneda virtual a mira su balor subi ku 50%. Esaki relashoná ku pronóstikonan positivo pa ekonomia. 25 mil naturalmente no ta komparabel ku e nivel rèkòrt di 68.992 dollar den novèmber 2021, pero invershonistanan ta positivo ku e pió temporada ya ta tras di lomba.
E sektor a pasa den un temporada difísil despues di kaida di e bolsa pa kriptomoneda FTX. For di e tempu ei instanshanan di supervishon ta vigilá e sektor mas intensivamente i tin algun kompania bou di investigashon. Despues di a pik riba 25 mil dòler e balor di kambio pa bitcoin a baha bèk te 23.700 dòler.
by Webmaster | 15/02/2023 | Business & Economy
E benta di sapatu, tas i paña di luho di e marka Gucci a baha ku 14% den último tres luna. Esaki debí na propagashon di Covid-19 na China despues ku e pais a aliviá tur medida. Esaki a buta ku hopi pakus Chines popular a keda será.
Meskos ta konta pa e kompania propietario Kering ku a registrá 7% ménos benta di akuerdo ku Financial Times. E marka Balenciaga, ku tabata tópiko di diskushon relashoná ku un kampaña kaminda ta mustra mucha den paña provokativo, tambe a konosé un kontrakshon den vários pais di akuerdo ku presidente di Kering Jean-Marc Duplaix.
Pa loke ta e resultado final pa Kering mester bisa ku preisnan mas haltu a yuda mitigá e pèrdida finansiero. Kering a registrá un resultado di kasi 22 mil mion dòler den hinter 2022, di kua 3,8 mil mion por konsiderá komo un ganashi den e aña tras di lomba.
by Webmaster | 07/02/2023 | Business & Economy
Kompanianan petrolífiko a hasi bon negoshi den 2022. Asina e produktor Britániko di petroli i gas British Petroleum, konosí pa su abreviashon BP, a registrá un ganashi rèkòrt aña pasá. Esaki relashoná ku e preisnan haltu di kombustibel. E kompania a registrá un ganashi di 28 mil mion dòler. Esei ta mas ku dòbel di e resultado den 2021.
E oumento di preis di kombustibel rònt mundu a benefisiá kompanianan di energia konsiderablemente. Asina Shell a registrá un ganashi di kasi 40 mil mion dòler den 2022. Einan tambe ta trata di un oumento di 100% kompará ku un aña promé. Analistanan ta atribuí e oumento di preis di kombustibel na e konflikto entre Rusia i Ukrania.
