by Webmaster | 25/01/2024 | Business & Economy
E kantidat di persona aboná riba Netflix a subi aña pasá ku 13% te 260 mion. E subida aki a sigui despues ku Netflix a para e opshon pa kompartí account grátis ku otro hende ku no ta aboná. Outomátikamente hopi hende mester a aboná pa por hasi uso di e servisio.
Asina den e último kuartal di 2023 Netflix a haña 13,1 mion abonado aserka. Pa hasi un komparashon: den hinter 2022 e servisio a haña 9 mion abonado.
E subida fuerte aki ta nifiká outomátikamente hopi entrada tambe. Den último kuartal di 2023 Netflix a generá 8.8 mil mion dòler, esta 12,5% mas ku e mesun periodo un aña promé.
E resultado aki ta buta Netflix na kabes den e kompetensha entre servisionan di streaming. Pa e promé kuartal aki Netflix ta premirá un subida ménos fuerte, pero tòg mas haltu ku aña pasá den e mesun periodo aki.
Por sierto ku e kompania ta hasiendo invershonnan kuantioso pa introdusí videogames i transmishonnan live di wrestling den futuro.
by Webmaster | 24/01/2024 | Business & Economy
E balor di bitcoin a baha djamars te na su punto mas abou for di 4 di desèmber. Pa promé biaha den último 7 siman e balor di e kriptomoneda tabata bal ménos di 40 mil dòler. E balor a baha ku 4% te na 39.061 dòler mainta pa sera na kabamentu di dia na mas o ménos 38.900 dòler. E preis di ethereum (e di 2 kriptomoneda mas popular na mundu) a baha asta ku 6%.
Analistanan ku a papia ku agensia di prensa Reuters ta menshoná vários kousa. Asina akshonnan tradishonal ta bai basta bon riba merkado di bolsa na Merka. Konsekuentemente ménos hende ta opta pa kriptomoneda.
Anteriormente tabatin optimismo pa ku e desaroyo di balor di bitcoin. Partikularmente ora e outoridatnan konserní a aprobá medidanan pa invershonistanan benefisiá for di subida di kriptomoneda sin kumpra esakinan. Apesar di invershonnan kuantioso den komienso e interes di akshonistanan a kambia lihé atrobe pa otro formanan di traha sèn riba merkado di bolsa.
No opstante e kontratempu pa bitcoin, mester bisa ku e situashon ta mihó ku aña pasá ora ku e balor pa basta tempu tabata bou di 30 mil dòler.
by Webmaster | 22/01/2024 | Business & Economy
China ta e importadó mas grandi di krudo for di Rusia. Esei ta nifiká ku Rusia ta eksportá mas petroli pa e pais ku Saudi Arabia. Asina agensia di prensa Reuters ta informá a base di sifranan di duana na China.
Aña pasá Rusia lo a entregá 107 mion tòn di krudo na China, un ekivalente di 2,14 mion barí pa dia. Saudi Arabia den komparashon a entregá 86 mion tòn. Di momentu por bisa ku China ta e mayor importadó di krudo na mundu. E pais ta benefisiá di e preis abou di krudo for di Rusia ku ta bende esaki ku China na un preis redusí.
Di e forma ei Rusia ta evadí sanshonnan imponé dor di paisnan den wèst siguiendo e guera ku Ukrania. Hopi pais a stòp di importá for di Rusia. Pa kontinuá e produkshon i entrada Rusia ta bende esaki na un preis redusí ku paisnan ku no a imponé sanshon. No solamente China, pero India tambe ta benefisiá di esaki.
Rusia por sierto no ta e úniko pais for di kaminda China ta importá krudo. E pais ta importá tambe for di Irak, Malasia, Oman, Emiratonan Árabe, Angola, Kuweit, Iran i Brasil.
by Webmaster | 17/01/2024 | Business & Economy
Analistanan di e kompania di investigashon Canalys a konkluí ku Apple definitivamente a gana e kareda di marka di telefòn mas grandi na mundu. Den 2023 Apple a logra bende nèt un poko mas unidat ku su konkurente Samsung.
Segun Canalys Apple ta sigui bende telefòn danki na un demanda kontinuo den e segmento mas karo. Mester opservá si ku na China e iPhone di Apple tin hopi konkurensha di Huawei. Na Áfrika a opservá ku partikularmente e marka Chines Transsion ta bende hopi bon tambe.
Generalmente e industria di smartphone ta drai basta bon. Esaki danki na entre otro un demanda mas haltu for di Áfrika i Medio Oriente. Aña pasá a bende rònt mundu 1100 mion unidat di smartphone. Esei ta 4% ménos ku 2022. Pero entrante e último kuartal di 2023 por nota un demanda mas haltu ku den e 7 temporadanan ku a presedé. Tambe mester tene kuenta ku e impakto di e pandemia di Covid-19 riba produkshon i benta di smartphones rònt mundu.
by Webmaster | 17/01/2024 | Business & Economy
E kompania petrolero Shell a bende mayor parti di su aktividatnan na Nigeria pa un suma di mas o ménos 2400 mion dòler. Asina entre otro agensia di prensa Reuters ta informá.
Ta trata di partinan enkargá ku produkshon di petroli ku ta trese basta molèster ku n’e p’e kompania. Ta trata di entre otro sabotage, lèkmentu for di pipa di transporte i kasonan hurídiko. E propietario nobo ta un konsorsio di sinku kompania Nigeriano.
Shell tabata buskando un kumpradó for di 2021. Nigeria, kaminda Shell ta aktivo for di añanan 30 di siglo pasá, ta e produktor mas grandi di petroli na Áfrika. E kompania su aktividatnan ta riba tera, pero ta regularmente tin problema ku lèkmentu for di pipanan pa transportá petroli i sabotage di e infrastruktura.
E insidentenan aki a resultá den bastante polushon, loke a kosta e kompania bastante kapital tambe na kasonan relashoná ku daño na medioambiente i violashon di derechinan humano.
Ku e benta aki Shell ta kontinuá solamente ku un fábrika di lng riba e kontinente pa konsentrá mas riba produkshon for di laman.
by Webmaster | 15/01/2024 | Business & Economy
Venezuela ta bai para ku su kriptomoneda Petro, un medida introdusí 6 aña pasá pa presidente Nicolas Maduro pa eskivá sanshonnan Merikano. Sinembargo den práktika e moneda no tabatin e efekto ku e gobièrnu di Venezuela tabata deseá.
Nicolas Maduro a lansa e moneda den febrüari 2018 despues di un kampaña basta intensivo pa promové e moneda digital. Pero pa mayoria Venezolano Petro tabata un misterio. Aparte di esei instanshanan ku ta analisá kredibilidat di kriptomonedanan no tabata masha positivo riba e moneda.
Den 2020 gobièrnu di Venezuela a purba duna un estímulo na Petro dor di ordená kompanianan di aviashon pa kumpra kombustibel usando e kriptomoneda komo forma di pago. Finalmente tabata usa e moneda solamente pa paga servisionan di gobièrnu.
Butnan pa infrakshon di tráfiko tabata kalkulá den Petro, pero den práktika no tabata ni posibel pa kobra esakinan.
E gòlpi fatal pa e moneda tabata un kaso di korupshon aña pasá embolbiendo èks minister di Petroli Tareck El Aissami i vários otro persona ku a usa e kriptomoneda pa transakshonnan skondí.
Djaluna ta sera tur pòtmoni virtual riba e plataforma Patria, e úniko website kaminda por a hasi transakshon ku Petro. Kualke suma ku a sobra lo keda kalkulá bèk na bolivar.
by Webmaster | 15/01/2024 | Business & Economy
E subida di inteligensha artifisial lo no solamente redusí e kantidat di kuponan di trabou, pero lo krea kuponan nobo tambe. Asina direktor di Adecco, e uitzendbureau mas grandi na mundu, ta premirá den un entrevista ku agensia di prensa AFP.
Segun Denis Machuel e desaroyo teknológiko ku a kondusí na chatbots manera ChatGPT tin nan kompleksidat i retonan. Asina ta ópvio ku e teknologianan aki tempran òf lat lo remplasá hende. E direktor ta premirá ku ta partikularmente e kuponan ku ta regardá servisio lo disparsé promé ku esnan den produkshon.
Pero di otro banda mester di hende tambe pa monitoriá e output di e sistemanan aki. Asina e direktor ta enfatisá. Ademas ta trata di tareanan repetitivo ku hopi hende no gusta kon ku bai bini. Si por outomatisá esakinan, ta sobra tempu pa tareanan mas agradabel.
by Webmaster | 12/01/2024 | Business & Economy
Microsoft tabata djaweps pa un momentu asina e kompania mas balioso na mundu, pasando Apple ku for di siman pasá a pèrdè hopi balor riba merkado di bolsa. Invershonistanan ta sképtiko relashoná ku sifranan di benta di iPhone 15.
Akshonnan di Microsoft a subi ku 1.6% loke a buta e kompania temporalmente na un balor di 2.875 bion dòler. Na e momentu ei, Apple tabata na un balor 0.9% mas abou, esta 2.871 bion dòler.
Poko despues e balor di Microsoft a baha atrobe, butando Apple bèk na number 1. Tabata pa promé biaha for di 2021 ku e balor di Apple a baha te bou di esun di Microsoft. E preokupashon ku ta biba bou di invershonistanan a lanta despues ku sifranan di benta di iPhone 15 na China a resultá mas abou ku antisipá.
Tambe invershonistanan ta antisipando riba pèrdida relashoná ku un kaso di violashon di reglanan di konkurensha ku ta andando den korte na Merka. A resultá ku den práktika e konosido Apple Watch no ta kompatibel ku otro marka di smartphone kaminda Apple ta obligá na fasilitá esaki.
by Webmaster | 11/01/2024 | Business & Economy
E kompania Franses La Poste ta bai kuminsá ku un eksperimento ku un kamber pa pas paña. La Poste ta, manera e nòmber ta sugerí, un kadena di pòstkantor ku ke duna konsumidornan ku kumpra paña online oportunidat pa pas esakinan mesora despues di risibí esaki. Si nan no ta pas, por manda nan retour mesora.
E kompania a nota ku hopi hende ku bin buska pakete ta bin bèk poko ratu despues pa manda e pakete retour. Den práktikamente tur kaso ta pañanan ku no ta pas bon.
Ku e eksperimento aki La Poste ke atraé mas hende tambe pa bishitá pòstkantor, despues ku e kantidat di pòst a kuminsá baha den último par di dékada. Mayoria pòstkantor rònt mundu ta sirbi awendia mas komo sentronan pa manda i risibí pakete.
E representantenan di pakusnan na Paris, kaminda e eksperimento ta tuma lugá, no ta masha kontentu ku esaki. Nan ta teme ku esaki ta bai stímulá mas hende pa bestèl paña online na lugá di bishitá pakus den sentro di siudat.
by Webmaster | 10/01/2024 | Business & Economy
Ekonomia mundial ta bai krese ménos fuerte den 2024. Asina World Bank ta premirá den su pronóstiko pa e aña aktual. Esei ta nifiká ku ya pa tres aña ekonomia mundial ta kresiendo ménos fuerte.
Segun e pronóstiko ekonomia mundial lo krese e aña aki ku 2.4% kompará ku 2.6% den 2023, 3% den 2022 i 6.2% den 2021. World Bank ta atribuí e bahada na interes haltu, inflashon kontinuo i kontratempu den ekonomia di China. Konfliktonan den Ost Oropa i Medio Oriente tambe ta influenshá ekonomia.
E parti positivo ta ku e pronóstiko di 2.6% pa 2023 a resultá mitar porshento mas haltu ku World Bank a antisipá. Esaki dor di resultadonan positivo na Merka. Pa e aña aki ta premirá ku Oropa lo hasi mihó ku aña pasá, esta un kresementu di 0.7% kompará ku 0.4% den 2023.
E kontratempu na China si por nifiká problema pa sierto pais di akuerdo ku World Bank, mirando nan dependensha di e komèrsio ku e pais. Pa China ta premirá un kresementu ekonómiko di 4.5% e aña aki kompará ku 5.2% den 2023. Pa próksimo aña ta premirá mas problema ku ekonomia na China. E pais ta pasando dor di un crisis den e sektor di imobilario, ansianidat i e desempleo bou di hóben.
by Webmaster | 09/01/2024 | Business & Economy
E kompanianan di transporte Maersk i Hapag-Lloyd no a sera a kuerdo ku rebeldenan Houthi pa evitá atake riba nan barkunan den Mar Kòrá. Asina e kompanianan a bisa den reakshon riba informenan ku ta sirkulá riba retnan sosial i den sierto medio di komunikashon.
E website di notisia ShippingWatch ku orígen na Dinamarka a informá anteriormente ku fuentenan den Medio Oriente a konfirmá ku tabatain akuerdo entre e rebeldenan i e kompanianan. Maersk i Hapag-Lloyd sinembargo ta desmentí e informashon aki.
Por lo pronto nan lo sigui evitá e ruta via Mar Kòrá relashoná ku e atakenan di Houthi for di sùit di Yemen. Nan ta nabegando via Suráfrika for di desèmber. Rebeldenan Houthi aktivo den parti sùit di Yemen ta atakando barkunan ku nan ta sospechá di ta transportá karga pa Israèl.
by Webmaster | 07/01/2024 | Business & Economy
E kompania Apple a pèrdè balor kuater dia konsekutivo riba merkado di bolsa. Asina a resultá na kabamentu di siman pasá. E balor di Apple lo ta bou di preshon relashoná ku un kaso pendiente den Korte na Merka di akuerdo ku The New York Times.
Segun e korant lo tin un investigashon hudisial andando ku entretantu a drenta un fase final. Aparte di esei tin un otro kaso pendiente relashoná ku Apple Watch. E oloshi ta funshoná perfektamente ku iPhone miéntras ku otro marka di telefòn no ta parse di funshoná meskos. Esei a lanta sospecho ku Apple lo no ta kumpliendo ku reglanan di konkurensha.
Analistanan lo a konsehá tambe kontra invershonnan den Apple relashoná ku e benta abou di iPhone 15. E próksimo edishon, iPhone 16, lo no ta masha prometedor pa 2024.
Si Apple no rekuperá e siman aki di e trènt negativo di siman pasá e kompania por pèrdè su posishon di number 1 na mundu komo kompania mas balioso riba merkado di bolsa. Di momentu Apple tin un balor di di 2.800 bion dòler, un suma di 13 sifra. Na di 2 lugá ta bin Microsoft, ku tin un balor di 100 mil mion dòler ménos, esta 2.700 bion dòler.
by Webmaster | 21/12/2023 | Business & Economy
Desempleo na Hulanda a sigui baha den novèmber. Den e luna ei 3,5% di e forsa laboral no tabatin trabou pagá di akuerdo ku CBS di Hulanda. Esei ta igual na 357 mil persona sin trabou. Un bahada kompará ku òktober ora a registrá 361 mil persona sin trabou.
E kantidat di hende den ònderstant na Hulanda alabes a subi ku 3% te 160 mil persona kompará ku òktober. Mayoria hende ku a pèrdè trabou ta aktivo den agrikultura, provishonnan públiko i e sektor di peska.
E grupo di hendenan mas yòn ku 15 aña i esnan mas bieu ku 75 aña den novèmber tabata igual na 3.6 mion persona. E grupo aki sinembargo no ta inkluí den e sifranan di CBS.
by Webmaster | 19/12/2023 | Business & Economy
No tin bista ainda riba e efekto riba preisnan di merkado mundial, pero en todo kaso ta sigur ku e atakenan riba barkunan di karga ku ta pasa Mar Kòrá pegá ku e kosta di Jemen tin konsekuensha. E barkunan ta blanku di atakenan di Houthi aktivo na Jemen ku ta ataká e barkunan di forma dirigí ku rakèt.
Vários kompania i transportadó grandi manera BP, Maersk, MSC i CMA CGM a disidí pa stòp di nabegá e ruta aktual i buska otro. Mar Kòrá ta un ruta importante pa tránsito entre Asia i Oropa. E ruta ta hiba entre otro pa e kanal di Suez.
by Webmaster | 14/12/2023 | Business & Economy
E gobièrnu di e presidente nobo di Argentina Javier Milei ta bai baha balor di peso ku 54%. Ku e devaluashon di e peso Argentino e gobièrnu resien instalá ke duna un estímulo na ekonomia. E plan ta pa hasi e preis di produktonan di eksportashon mas interesante den eksterior.
Aparte di e plan pa devaluá peso tambe e gobièrnu ta bai ekonomisá riba supsidionan pa energia, transporte i obranan públiko. E kantidat di ministerionan tambe lo baha ku 50%.
E pais ta pasando dor di un inflashon hopi haltu. Konsekuentemente mester adaptá preisnan kasi tur siman. Gobièrnunan anterior a purba baha importashon di produktonan, pero esaki no a duna resultadonan satisfaktorio. Tambe ta kalkulá ku 40% di Argentinonan ta biba den pobresa. E programanan di ayudo sosial eksistente lo no kambia.
Segun e korant The Telegraph IMF ta satisfecho ku e pasonan ku e gobièrnu entrante ta tumando. Di momentu Argentina debe IMF mas o ménos 40 mil mion dòler.
