Aktor Donald Sutherland a fayesé na 88 aña di edat

Aktor Donald Sutherland a fayesé na 88 aña di edat

Aktor Donald Sutherland a fayesé na 88 aña di edat despues di tabata kebrante di salú pa basta luna. Su yu, aktor Kiefer Sutherland, a konfirmá e notisia riba X, ántes Twitter. Sutherland a hunga ròl den un kantidat enorme di pelíkula durante su karera, entre nan Animal House, e serie di pelíkula The Hunger Games i Pride & Prejudice (di 2005).

Sutherland a nase riba 17 di yüli 1935 na Canada. Na komienso di añanan 60 di siglo pasá el a kuminsá aktua den pelíkula di horror i vários thriller. Pero el a bira berdaderamente konosí ku The Dirty Dozen, M*A*S*H, Kelly’s Heroes i Klute.

Sutherland ta un aktor ku bo ta rekonosé for di míles. 50 aña largu públiko a mir’é den vários título eksitoso. El a gana tantu un Emmy komo un Golden Globe pa su ròl komo funshonario soviétiko den e serie Citizen X. Tambe el a risibí un golden globe pa su ròl den Path to War den 2003.

Donald Sutherland a kasa na total tres biaha. Su yu Kiefer Sutherland, ku tambe ta konosí di vários pelíkula di Hollywood, a nase di su di dos matrimonio. Mayoria hende lo ta kòrda Kiefer di e serie 24 i Designated Survivor.

Movie Review: The First Omen

Movie Review: The First Omen

Laga mi bisa e kos mesora: The First Omen ta BON ku lèter grandi. No perfekto, pero BON MES!

Nos ta biba den un tempu kaminda Hollywood ta produsí remake tras di remake i e kalidat no ta yega na e originalnan. Hopi sequel i prequel tampoko no por tep na e kalidat di e kuentanan original ku nan ta suppose di profundisá. Mi kier mèn… wak kiko a pasa ku Star Wars!

Esnan ku tin miedu di e trènt ei por ta trankil ku e produkshon aki. No trankil so, kontentu mes!

The First Omen ta en bèrdat un prequel riba e konosido klásiko The Omen di 1976 i ta tuma lugá nèt promé ku e susesonan den e film ei.

Si bo no konosé The Omen (i e 3 otro partinan ku a sigui despues) ainda bo por enjoy e movie aki. Sin wak e otro nan ainda e ta make sense.

Un kos si! Pa bo beraderamente ‘feel’ e film aki bo mester ta sea katòliko, èks katóliko òf un konosedó di e religion. E dogma, referenshanan, simbolismo, tradishon, ritualnan, mistisismo i misterio di Iglesia Katóliko ta dominá meskos ku den The Omen den 1976. Den e sintí ey The First Omen ta un fiesta di rekonosementu ku no ta desapuntá.

Si bo tambe gusta e aspektonan misterioso di Iglesia Katóliko i (mihó ainda) a profundisá bo mes den e pasado kompleto di e iglesia e film aki por ta un dushi pida entertainment ku aki aya aspektonan edukativo basta interesante. Esta, si bo ta interesá di sa mas over di Katolisismo.

Loke ta trese mi por último na esnan ku ya konosé i gusta The Omen I, II, III (i IV, sè tin un di 4 parti): The First Omen ta kaba ku nasementu di…..

Damien!

Tur pregunta ku The Omen di 1976 por a laga bo ku n’e ta haña un kontesta den The First Omen.

Si ainda bo gusta e atmósfera di partikularmente The Omen I i II, esaki SIGUR lo satisfasé bo i hiba bo bèk den tempu. E produktornan a usa teknologia moderno ku ta kapta e mesun atmósfera eskalofriante di ‘aquel entonces’ perfektamente.

Mi úniko punto di krítika ta e soundtrack. E musik di fondo ta bon sigur i ta pas bon den e imágennan, pero mi a sinti falta di mas di e kornan Gregoriano di The Omen di 1976.

Esei i un otro detaye ku mi a konta ku n’e (i ku mi no ta revelá tampoko pasobra e detaye ey no ta ‘daña’ e film) ta e úniko kosnan ku ta afektá mi skor pa e The First Omen…

Ta un classic? Nò, esei nò… Pero den e konteksto di The Omen e pelíkula aki no por tabata mas perfekto, dùs mi ke dun’e

8,5 out of 10

Skirbí pa Maurilhio Nobrega

…i si bo tin gana di wak The Omen di 1976 atrobe for old times sake promé ku bo wak The First Omen, klek aki.

Jonathan Majors mester sigui programa kontra abusu doméstiko

Jonathan Majors mester sigui programa kontra abusu doméstiko

Un korte na New York a sentensiá aktor Jonathan Majors djaluna na un aña di partisipashon obligatorio na un programa kontra abusu doméstiko. Si Mayor no pasa e trayektoria kompleto e ta risga un kastigu di prison di 6 luna.

E sentensia mester a tuma lugá den febrüari, pero wes a posponé esaki riba petishon di Majors su abogadonan. Nan lo tabatin prueba nobo di Majors su inosensia, pero esaki no tabata sufisiente pa kambia desishon di wes. Den desèmber wes a dikta ku Mayors ta kulpabel di maltrato di su èks pareha Grace Jabbari.

Jabbari no ta e úniko persona ku ta akusá Majors di violensha i maltrato. Den febrüari e damanan Emma Duncan i Maura Hooper, ámbos èks pareha den e añanan 2015 i 2019, tambe a entamá kaso kontra e aktor. Nan tambe ta akusá Majors di maltrato físiko i emoshonal.

Majors a bira hopi popular pa su ròlnan den Creed III i e asina yamá Marvel Cinematic Universe. Siguiendo e veredikto den desèmber Marvel a para e kolaborashon ku e aktor.

Kevin Spacey a haña ròl komo Diabel mes den film italiano

Kevin Spacey a haña ròl komo Diabel mes den film italiano

Aktor Kevin Spacey ta bèk riba sèt despues di a optené un ròl den un pelíkula Italiano. Spacey tabata den publisidat den último añanan partikularmente pa kasonan relashoná ku vários akusashon di malkomportashon seksual.

E ròl den e pelíkula ta pa e motibu ei remarkabel. Ta asina ku Spacey lo hunga e ròl di Diabel mes den e pelíkula The Contract. E film ta dirigí pa Massimiliano Caroletti i produsí pa Cinecittà Studios. E fase di grabashon a finalisá resien na Roma, pero e fecha di lansamentu no ta konosí ainda.

E pelíkula ta un variante riba Faust, e kuenta di un hòmber ku ta bende su alma ku diabel. Aparte di Spacey tambe tin un ròl pa aktor Eric Roberts.

Ta promé biaha den 7 aña ku Spacey ta aktivo atrobe despues ku vários kabayero a bin dilanti i akus’é di abusu seksual. Aña pasá den yüli un korte na Londen a deklará Spacey inosente den un kaso entamá dor di kuater hòmber ku a akus’é di e abusu.

Tur e tempu ei e aktor, konosí tambe pa su ròl inolvidabel den House of Cards, no a sali den públiko. Ningun studio kier a rizga traha ku n’e.

Siguiendo e sentensia Spacey a kuminsá haña trabou atrobe. Asina el a fia su stèm den e thriller Control i tambe resien el a finalisá e grabashonnan pa e film independiente Peter Five Eight.

Oppenheimer, Barbie i Poor Things nominá pa Oscar pa mihó film

Oppenheimer, Barbie i Poor Things nominá pa Oscar pa mihó film

Oppenheimer, Barbie i Poor Things ta nominá pa e Oscar pa mihó pelíkula. Ku 13 nominashon partikularmente Oppenheimer di direktor Christopher Nolan tin potensial di saka mas premio. Resien e pelíkula a bai kas ku mayoria premio na otorgashon di Golden Globes.

E títulonan American Fiction, Anatomy of a Fall, The Holdovers, Killers of the Flower Moon, Maestro, Past Lives i The Zone of Interest tambe ta den kontienda pa mihó pelíkula.

Oppenheimer ta menshoná den mayoria kategoria, entre otro mihó aktor, mihó direktor, mihó ko-protagonista maskulino i femenino i mihó trabou di kámara. E pelíkula Barbie ta e di tres pelíkula ku mas nominashon, 8 na total. E comedy Poor Things ta den kontienda pa 10 kategoria, butando e film na e di dos lugá pa risibí posiblemente mas premio.

Killers of the Flower Moon di Martin Scorsese, ku por sierto a haña basta atenshon riba retnan sosial na Kòrsou, ta nominá pa e premio pa mihó aktris. E protagonista Lily Gladstone ta e promé Merikano original den historia ku ta nominá pa e premio aki.

E seremonia di otrogashon ta tuma lugá e aña aki riba 10 di mart i lo keda presentá pa Jimmy Kimmel. E lista kompleto di nominadonan ta disponibel aki.

Demanda nobo di homisidio kontra Alec Baldwin

Demanda nobo di homisidio kontra Alec Baldwin

Ta bin tòg un kaso kontra aktor Alec Baldwin relashoná ku un insidente kaminda kamarógrafo Halyna Hutchins a pèrdè su bida. Segun un hurado na New Mexico tin echonan nobo di e kaso a bin na kla den òktober.

E aktor di 65 aña tabata praktikando ku un revolver durante grabashon di e pelíkula Rust den 2021. E revolver no mester tabatin bala aden, pero esaki a resultá tòg e kaso. E bala a alkansá e kamarógrafo fatalmente i tambe direktor Joel Souza a keda heridá. E aktor a bisa te asina leu ku e no a hala e trèker dje arma.

E kaso den aprel aña pasá a keda seponé, pero siguiendo investigashon forénsiko riba e arma lo tin echonan nobo a bin na kla. Segun fiskal ta imposibel ku e arma a dispará su so.

Den e demanda nobo sea Baldwin tabata indiferente òf el a neglishá siguridat di esnan presente. Baldwin lo por keda kondená a base di un di e dos senarionan aki. Den tal kaso lo e mester bai será 1,5 aña pa homisidio.

E aktor ta konfrontá tambe ku vários demanda di e famia di e víktima di e insidente. E partidonan ya tabatin un areglo, pero despues e famianan a lanta otro kaso ku finalmente a keda seponé relashoná ku e echonan nobo.

Aña pasá e kompania di produkshon a finalisá e pelíkula, pero no ta konosí si esaki lo sali den teaternan di sine.

Succession i The Bear gran ganadónan di Emmy Awards

Succession i The Bear gran ganadónan di Emmy Awards

E serienan Succession i The Bear ta e gran ganadónan di Emmy Awards, e premiashon pa mihó produkshonnan na televishon.

E serie di HBO Succession a haña hopi elogio pa su di 4 i último temporada. Na total e produkshon a hala 6 premio aden. The Bear tambe a skor 6 Emmy, entre nan e mihó serie di comedy.

E edishon aki por sierto mester a tuma lugá for di aña pasá sèptèmber, pero a sufri retraso dor di e wèlga di aktor i eskritornan.

Oppenheimer i Barbie ta sigui hala premionan aden

Oppenheimer i Barbie ta sigui hala premionan aden

E pelíkulanan Oppenheimer i Barbie ta halando bastante premio aden. Asina e pelíkulanan tabata bon pa sigur 14 premio durante otorgashon di Critics’ Choice Awards.

Asina Oppenheimer a gana e premio pa mihó direktor (Christopher Nolan), mihó sinematografia, mihó adaptashon i mihó efektonan visual. Aktor Robert Downey jr. a gana asina e premio pa mihó ko-protagonista. Na total e pelíkula a hala 8 premio aden.

Barbie di otro banda a risibí e premionan pa mihó komedia, mihó senario original, mihó diseño di kòstüm, mihó kabei i make-up i mihó kansion ku a bai pa I’m Just Ken. Na total Barbie a hala 6 premio aden.

Anteriormente e pelíkulanan a hala bastante premio aden tambe durante Golden Globe Awards.

Tom Cruise ta trahando riba un di tres Top Gun

Tom Cruise ta trahando riba un di tres Top Gun

Tom Cruise ta trahando riba un di tres parti pa e film Top Gun, siguiendo e di dos parti Top Gun: Maverick di 2022 ku tabata un éksito rotundo. Cruise, kende tin 61 aña aworakí, lo produsí e pelíkula pa Paramount.

E aktor tin un kontrakt aworakí ku Warner Bros., pero e tin su mannan liber pa traha riba otro proyekto ku otro kompanianan di produkshon, entre otro pues pa e di tres parti di Top Gun.

Segun e revista Deadline Cruise lo haña kompaño di algun di su koleganan di Top Gun: Maverick kua a generá mas o ménos 1.400 mion dòler kasi 2 aña pasá.

Jodie Foster no gusta traha ku Generashon Z

Jodie Foster no gusta traha ku Generashon Z

Aktris Jodie Foster no ta gusta traha ku hóbennan di e asina yamá Generashon Z, e grupo di hende ku a nase entre 1995 i 2010. Asina e aktris, konosí pa su ròl den “The Silence of the Lambs” a bisa den un entrevista ku e korant The Guardian.

Segun e aktris nan ta partikularmente ferfelu na pia di trabou. Nan no ta yega i kuminsá na tempu òf ta bisa riba un trankil ku nan no tin smak pa traha.

Tambe nan ta deskuidá nan script i ta skirbi di un forma inkomprendibel òf hopi malu den app group i e-mail di trabou. Si e puntra si nan a lesa nan tekstonan bon tambe nan lo ta kontestá masha fresku mes. Segun Foster Generashon Z ta muchu distraí i mester relahá un poko.

Foster tin 61 aña aworakí i konosé e berdadero preshon di e trabou ya ku e mes a lanta for di mucha den e ambiente di sine. Foster a bira konosí den 1976 pa su ròl den Taxi Driver. Despues mas ròl a sigui i tambe el a dirigí i produsí vários pelíkula.

Aktor Vin Diesel akusá di malkomportashon seksual

Aktor Vin Diesel akusá di malkomportashon seksual

Aktor Vin Diesel, konosí di e serie popular di pelíkula The Fast and the Furious, ta akusá di malkomportashon seksual. Asina e revista Vanity Fair a publiká.

Su víktima lo ta su èks asistente Asta Jonasson, kende tabata traha pa e aktor durante e grabashonnan pa Fast Five na Atlanta. Diesel lo a bai su kamber di hotèl ku e dama den 2010 kaminda lo el a hasi un intento pa abusá di e dama. Algun ora despues di e insidente e dama lo a haña òntslag inhustamente.

Den un reakshon e abogado di e aktor a duna di konosé ku Diesel no ta rekonosé su mes den e akusashonnan. Tambe lo tin prueba ku ta kontradesí e akusashonnan di e dama ku lo a traha no mas ku 9 dia riba e sèt di e pelíkula 13 aña pasá.

Aktor Jonathan Majors kulpabel di maltrato

Aktor Jonathan Majors kulpabel di maltrato

Aktor Jonathan Majors ta kulpabel di maltrato i intimidashon di su èks partner Grace Jabbari. Asina un hurado na New York a disidí den un kaso entamá kontra e aktor.

E hurado ta kombensé ku Majors a maltratá su èks den mart. E dama a kibra un dede, haña un kòrtá patras di su orea i mustra algun parti blou kaminda el a haña gòlpi riba su kurpa.

Durante su testimonio Jabbari a deklará ku Majors a maltrat’é despues ku el a ranka e telefòn di e aktor for di esaki su man. Lo ta trata di un mensahe di un otro dama. Majors despues lo a dobla su brasa patras di su lomba i despues dal e den su kabes.

Tambe e hurado ta kombensé ku e aktor ta intimidá Jabbari i kontrolá su bida. Esei por dedusí for di mensahenan di telefòn tresé dilanti den e kaso.

Den pasado Majors a manipulá Jabbari pidiendo e último pa no bai hospital pa trata un herida ku el a haña durante un otro pleitu sino e aktor lo a buta un fin na su bida.

E abogadonan di Majors a purba kombensé e hurado ku e aktor tambe tabata víktima di abusu na man di e dama. E miembronan sinembargo no a keda kombensé.

Den febrüari wes lo dikta e sentensia.

George Clooney ta konfirmá kontinuashon Ocean series

George Clooney ta konfirmá kontinuashon Ocean series

Aktor George Clooney a konfirmá ku lo bin un pelíkula mas den e serie di film Ocean’s 11 te ku 13. Clooney lo a konfirmá e informashon na e revista NME durante promoshon di su pelíkula nobo The Boys in The Boat.

E pelíkulanan Ocean’s 11, Ocean’s 12 i Ocean’s 13 ta konta e historia di un grupo di ladron ku ta hòrta for di instanshanan finansiero. Aparte di Clooney aktornan konosí manera Matt Damon i Brad Pitt tambe tin ròl den e serie di pelíkula.

Clooney lo a enfatisá mas aleu ku e siguiente título lo no yama Ocean’s 14, pero tòg lo kontinuá kaminda e di tres film, esta Ocean’s 13, a kaba.

Movie Review: Lady Ballers

Movie Review: Lady Ballers

Review skirbí pa Maurilhio Nobrega

Mi a ferwagt di skirbi un review kaminda lo mi a finalisá ku un konseho na The Daily Wire pa bai siña traha comedy promé ku nan purba algu asin’aki atrobe… pero as things turn out… Lady Ballers ta tòg un poko mihó ku mi a ferwagt… Yes, e ta basta bon. Sigui lesa (spoiler free!) dikon…

Pa bo komprondé algun joke bo mester ta siguiendo desaroyonan ku niun hende por ignorá mas. Desaroyonan manera e promoshon di diversidat den tur sintí den Miss Universe, deporte, sine, show bizz i awendia asta polítika… i resien lokal tambe si bo pens’é un ratu 😉

Lady Ballers ta limitá na e tema deporte.

Ta bon pa bo sa ku e kompania tras di e pelíkula aki, The Daily Wire, ta un plataforma konservativo na Merka ku notisia, komentario i media audiovisual. E ta manehá pa e komentaristanan Ben Shapiro i Jeremy Boreing. Esnan ku konosé e kabayeronan aki sa ku nan ta basta krítiko riba e komunidat LGBTQ. P’esei mi a asumí ku Lady Ballers lo ta algu fòrsá ku no ta sirbi ningun otro propósito sino kritiká hende LGBTQ.

Tambe mi a ferwagt un sobrekarga di jokes polítikamente kargá. Pa mi gran sorpresa nan ta hasi esei di un forma hopi respetuoso. Nan krítika ta ópviamente “in your face”, pero realidat amargo di e esenanan kaminda e produktornan ta kritiká “woke culture” ta ku….

…den bida real “woke people” ta komportá nan mes di un forma hopi mas agresivo ku Shapiro i Boreing ta presentá nan den Lady Ballers. Trust me on that one! Mi no por gaña… nan a berdaderamente hasi nan bèst pa no ofendé miembronan di e komunidat LGBTQ. I nan lo por a hasi esaki fásilmente ku ehèmpelnan ku bo por haña masha fásil mes riba social media. Trust me on that one, too!

The Daily Wire en todo kaso no a kue e mesun rumbo ‘kruel’ manera South Park ku nan film mas resien Joining The Panderverse.

Un di e puntonan mas fuerte di Lady Ballers ta e cast. Lo bo no kere, pero e personahenan den e comedy aki no ta aktor at all!

Jeremy Boreing, un di e direktornan di The Daily Wire, mes ta protagonisá en persona. Mi no ta bai revelá na kua momentu, pero komentaristanan konosí riba social media manera Ben Shapiro, Michael Knowles, Brett Cooper i asta Matt Walsh (komentarista i produktor di e dokumental What Is A Woman) ta aparesé na e momentunan mas inesperá ku lo buta bo hari garantisá si bo konosé nan. Nan entrada ta kada bes genial, inesperá i funny AF.

Tambe un kòmplimènt na tur side character den e film aki. Aki tambe ta trata di hende ku no ta aktor at all. E tim di basketball ku ta sentral den e film aki ta un tim amateur di bida real ku a kolaborá di un forma ekselente na Lady Ballers.

Un kòmplimènt èkstra grandi ta bai na e kantidat grandi di deportista femenino ku a yuda hasi e mensahe tras di e film aki posibel. Mi ta kere ku e produktornan a hasi un eskoho deliberá pa buska mas tantu deportista femenino di bida real pa aksentuá e mensahe tras di e film. I bo por mira ku nan tabata físikamente hopi ‘committed’.

Otro ‘move’ genial den Lady Ballers ta e forma kon nan a inkorporá diversidat. Nèt na momentu ku bo ta kere ku nan a traha e pelíkula aki pa un públiko spesífiko i no unu ku tur hende por identifiká ku n’e, sierto esena tin un “impakto emoshonal” èkstra fuerte.

Lady Ballers ta gewoon erg netjes en respectvol gedaan. E focus di e film ta keda vooral “e issue”, no e hende ku un eksperensha humano ku mayoria di nos no ta komprondé. Mi no por papia pa otro hende, pero mi tin sigur ku lo tin hende ku inevitablemente lo sinti nan mes ofendé dor di e film aki. Pero mi ke ripití ku e produktornan a berdaderamente hasi nan bèst pa no hasi esei.

Mi ta tribi bisa ku Lady Ballers ta un comedy basta desente ku asta mucha a partir di 12 aña por wak KOMPAÑÁ PA NAN MAYORNAN. Lady Ballers tin un invalshoek speels i basta edukativo ku ta brinda un bon punto di partida pa mayornan por papia ku nan yunan riba e temanan inkómodo aki. Kisas ta bon pa mayornan wak e promé pa huzga pa nan mes. E film ta basta leerzaam den e sintí ei.

Si bo no ta konfia e kos, laga mi splik’é asin’aki anto: ta entre otro hende ku fé den Dios ta tras di e pelíkula aki i bo ta ripará ku nan sa na unda nan tin ku hala un liña pa tene e kos netjes i aseptabel. Kaminda tin palabra malu mes, esaki ta proporshonal ku loke bo ta mira pasa den pantaya.

Si ta difísil pa kere ku komentarista religioso no por traha comedy… you’re wrong. Lady Ballers ta keda un eksperensha spòrtif kaminda e produktornan no ta tuma nan mes muchu serio tampoko i ta krea espasio pa outokrítika tambe.

Kisas e no ta un film di kua tur hende lo komprondé tur joke. Pa bo por komprondé e konteksto di e setting di Lady Ballers bo mester ta berdaderamente sigui sierto desaroyo ku un mente habrí pero tòg krítiko.

Afortunadamente tin sufisiente apsurdidat pa tur hende por tin su momentunan pa hari. Ta solamente ku algun hende lo hari mas duru ku otro.

I esei ta keda tòg e handicap di e film aki… Esei i algun esena ku ta baha e tempo di e pelíkula. Pero e momentunan ei tin diálogo ku hopi hende lo gusta pa e kontenido moral. Vooral den e esenanan ku mucha aden.

Mi própio handicap ta ku mi gusta comedy un poko mas agresivo ku esaki, pero opyektivamente no tin masha kos robes ku e low budget film aki.

Ta parse manera Sound of Freedom a lanta un trènt nobo e aña aki di pelíkulanan low budget produsí pafó di Hollywood, pero ku ta hala un públiko sufisientemente grandi pa ta lukrativo.

I si no tabata pa e intentonan di Hollywood atrobe pa blòkia e pelíkula aki tambe, lo mi no tabata na altura di su eksistensha mes…

Èniwei…

Lady Ballers ta gewoon un family film ouderwets ku un story positivo ku basta hende lo por rekonosé. I yes, e kos tin un very happy ending ku… sè… mi a haña un tiki stòf den wowo na kabamentu.

E film aki no ta e mihó comedy ku mi a yega di wak. Pero e ta meet e standard di un forma satisfaktorio vooral si bo konsiderá e kalidat ku lo bo no ferwagt di esnan ku a trah’é.

7 out of 10 ta parse mi un score hopi netjes pa e film aki.

Bo ke wak Lady Ballers? Follow mi WhatsApp Channel, kaminda e ta disponibel komo stream. Kòrda sigui e instrukshonnan den WhatsApp disponibel bou di e link pa e stream.

Nicolas Cage ke stòp di aktua den pelíkula

Nicolas Cage ke stòp di aktua den pelíkula

E konosido aktor Nicolas Cage ta pensando pa retirá pronto for di Hollywood. Asina e aktor a bisa den e revista Vanity Fair. Segun e aktor e tin 3 òf 4 pelíkula mas den dje i despues e ta kla ku aktuamentu den pelíkula. Un karera den serie di televishon sinembargo ainda e no ke deskartá.

Den yanüari Cage ta kumpli 60 aña i esei lo a buta e aktor kuminsá pensa riba su futuro. El a pèrdè su tata ku 75 aña, un diferensha di 15 aña for di su edat aktual. Esei a hiba e aktor na e realisashon ku e kier dediká mas tempu na famia.

Cage a bira konosí den añanan 80 ku su ròlnan den Moonstruck (huntu ku e konosido kantante i aktris Cher) i Raising Arizona. Tambe e tabatin éksito grandi ku Leaving Las Vegas, Face/Off i Con Air.