by Webmaster | 08/01/2024 | Cinema News
Aktris Jodie Foster no ta gusta traha ku hóbennan di e asina yamá Generashon Z, e grupo di hende ku a nase entre 1995 i 2010. Asina e aktris, konosí pa su ròl den “The Silence of the Lambs” a bisa den un entrevista ku e korant The Guardian.
Segun e aktris nan ta partikularmente ferfelu na pia di trabou. Nan no ta yega i kuminsá na tempu òf ta bisa riba un trankil ku nan no tin smak pa traha.
Tambe nan ta deskuidá nan script i ta skirbi di un forma inkomprendibel òf hopi malu den app group i e-mail di trabou. Si e puntra si nan a lesa nan tekstonan bon tambe nan lo ta kontestá masha fresku mes. Segun Foster Generashon Z ta muchu distraí i mester relahá un poko.
Foster tin 61 aña aworakí i konosé e berdadero preshon di e trabou ya ku e mes a lanta for di mucha den e ambiente di sine. Foster a bira konosí den 1976 pa su ròl den Taxi Driver. Despues mas ròl a sigui i tambe el a dirigí i produsí vários pelíkula.
by Webmaster | 22/12/2023 | Cinema News
Aktor Vin Diesel, konosí di e serie popular di pelíkula The Fast and the Furious, ta akusá di malkomportashon seksual. Asina e revista Vanity Fair a publiká.
Su víktima lo ta su èks asistente Asta Jonasson, kende tabata traha pa e aktor durante e grabashonnan pa Fast Five na Atlanta. Diesel lo a bai su kamber di hotèl ku e dama den 2010 kaminda lo el a hasi un intento pa abusá di e dama. Algun ora despues di e insidente e dama lo a haña òntslag inhustamente.
Den un reakshon e abogado di e aktor a duna di konosé ku Diesel no ta rekonosé su mes den e akusashonnan. Tambe lo tin prueba ku ta kontradesí e akusashonnan di e dama ku lo a traha no mas ku 9 dia riba e sèt di e pelíkula 13 aña pasá.
by Webmaster | 19/12/2023 | Cinema News
Aktor Jonathan Majors ta kulpabel di maltrato i intimidashon di su èks partner Grace Jabbari. Asina un hurado na New York a disidí den un kaso entamá kontra e aktor.
E hurado ta kombensé ku Majors a maltratá su èks den mart. E dama a kibra un dede, haña un kòrtá patras di su orea i mustra algun parti blou kaminda el a haña gòlpi riba su kurpa.
Durante su testimonio Jabbari a deklará ku Majors a maltrat’é despues ku el a ranka e telefòn di e aktor for di esaki su man. Lo ta trata di un mensahe di un otro dama. Majors despues lo a dobla su brasa patras di su lomba i despues dal e den su kabes.
Tambe e hurado ta kombensé ku e aktor ta intimidá Jabbari i kontrolá su bida. Esei por dedusí for di mensahenan di telefòn tresé dilanti den e kaso.
Den pasado Majors a manipulá Jabbari pidiendo e último pa no bai hospital pa trata un herida ku el a haña durante un otro pleitu sino e aktor lo a buta un fin na su bida.
E abogadonan di Majors a purba kombensé e hurado ku e aktor tambe tabata víktima di abusu na man di e dama. E miembronan sinembargo no a keda kombensé.
Den febrüari wes lo dikta e sentensia.
by Webmaster | 15/12/2023 | Cinema News
Aktor George Clooney a konfirmá ku lo bin un pelíkula mas den e serie di film Ocean’s 11 te ku 13. Clooney lo a konfirmá e informashon na e revista NME durante promoshon di su pelíkula nobo The Boys in The Boat.
E pelíkulanan Ocean’s 11, Ocean’s 12 i Ocean’s 13 ta konta e historia di un grupo di ladron ku ta hòrta for di instanshanan finansiero. Aparte di Clooney aktornan konosí manera Matt Damon i Brad Pitt tambe tin ròl den e serie di pelíkula.
Clooney lo a enfatisá mas aleu ku e siguiente título lo no yama Ocean’s 14, pero tòg lo kontinuá kaminda e di tres film, esta Ocean’s 13, a kaba.
by Webmaster | 07/12/2023 | Cinema News
Review skirbí pa Maurilhio Nobrega
Mi a ferwagt di skirbi un review kaminda lo mi a finalisá ku un konseho na The Daily Wire pa bai siña traha comedy promé ku nan purba algu asin’aki atrobe… pero as things turn out… Lady Ballers ta tòg un poko mihó ku mi a ferwagt… Yes, e ta basta bon. Sigui lesa (spoiler free!) dikon…
Pa bo komprondé algun joke bo mester ta siguiendo desaroyonan ku niun hende por ignorá mas. Desaroyonan manera e promoshon di diversidat den tur sintí den Miss Universe, deporte, sine, show bizz i awendia asta polítika… i resien lokal tambe si bo pens’é un ratu 😉
Lady Ballers ta limitá na e tema deporte.
Ta bon pa bo sa ku e kompania tras di e pelíkula aki, The Daily Wire, ta un plataforma konservativo na Merka ku notisia, komentario i media audiovisual. E ta manehá pa e komentaristanan Ben Shapiro i Jeremy Boreing. Esnan ku konosé e kabayeronan aki sa ku nan ta basta krítiko riba e komunidat LGBTQ. P’esei mi a asumí ku Lady Ballers lo ta algu fòrsá ku no ta sirbi ningun otro propósito sino kritiká hende LGBTQ.
Tambe mi a ferwagt un sobrekarga di jokes polítikamente kargá. Pa mi gran sorpresa nan ta hasi esei di un forma hopi respetuoso. Nan krítika ta ópviamente “in your face”, pero realidat amargo di e esenanan kaminda e produktornan ta kritiká “woke culture” ta ku….
…den bida real “woke people” ta komportá nan mes di un forma hopi mas agresivo ku Shapiro i Boreing ta presentá nan den Lady Ballers. Trust me on that one! Mi no por gaña… nan a berdaderamente hasi nan bèst pa no ofendé miembronan di e komunidat LGBTQ. I nan lo por a hasi esaki fásilmente ku ehèmpelnan ku bo por haña masha fásil mes riba social media. Trust me on that one, too!
The Daily Wire en todo kaso no a kue e mesun rumbo ‘kruel’ manera South Park ku nan film mas resien Joining The Panderverse.
Un di e puntonan mas fuerte di Lady Ballers ta e cast. Lo bo no kere, pero e personahenan den e comedy aki no ta aktor at all!
Jeremy Boreing, un di e direktornan di The Daily Wire, mes ta protagonisá en persona. Mi no ta bai revelá na kua momentu, pero komentaristanan konosí riba social media manera Ben Shapiro, Michael Knowles, Brett Cooper i asta Matt Walsh (komentarista i produktor di e dokumental What Is A Woman) ta aparesé na e momentunan mas inesperá ku lo buta bo hari garantisá si bo konosé nan. Nan entrada ta kada bes genial, inesperá i funny AF.
Tambe un kòmplimènt na tur side character den e film aki. Aki tambe ta trata di hende ku no ta aktor at all. E tim di basketball ku ta sentral den e film aki ta un tim amateur di bida real ku a kolaborá di un forma ekselente na Lady Ballers.
Un kòmplimènt èkstra grandi ta bai na e kantidat grandi di deportista femenino ku a yuda hasi e mensahe tras di e film aki posibel. Mi ta kere ku e produktornan a hasi un eskoho deliberá pa buska mas tantu deportista femenino di bida real pa aksentuá e mensahe tras di e film. I bo por mira ku nan tabata físikamente hopi ‘committed’.
Otro ‘move’ genial den Lady Ballers ta e forma kon nan a inkorporá diversidat. Nèt na momentu ku bo ta kere ku nan a traha e pelíkula aki pa un públiko spesífiko i no unu ku tur hende por identifiká ku n’e, sierto esena tin un “impakto emoshonal” èkstra fuerte.
Lady Ballers ta gewoon erg netjes en respectvol gedaan. E focus di e film ta keda vooral “e issue”, no e hende ku un eksperensha humano ku mayoria di nos no ta komprondé. Mi no por papia pa otro hende, pero mi tin sigur ku lo tin hende ku inevitablemente lo sinti nan mes ofendé dor di e film aki. Pero mi ke ripití ku e produktornan a berdaderamente hasi nan bèst pa no hasi esei.
Mi ta tribi bisa ku Lady Ballers ta un comedy basta desente ku asta mucha a partir di 12 aña por wak KOMPAÑÁ PA NAN MAYORNAN. Lady Ballers tin un invalshoek speels i basta edukativo ku ta brinda un bon punto di partida pa mayornan por papia ku nan yunan riba e temanan inkómodo aki. Kisas ta bon pa mayornan wak e promé pa huzga pa nan mes. E film ta basta leerzaam den e sintí ei.
Si bo no ta konfia e kos, laga mi splik’é asin’aki anto: ta entre otro hende ku fé den Dios ta tras di e pelíkula aki i bo ta ripará ku nan sa na unda nan tin ku hala un liña pa tene e kos netjes i aseptabel. Kaminda tin palabra malu mes, esaki ta proporshonal ku loke bo ta mira pasa den pantaya.
Si ta difísil pa kere ku komentarista religioso no por traha comedy… you’re wrong. Lady Ballers ta keda un eksperensha spòrtif kaminda e produktornan no ta tuma nan mes muchu serio tampoko i ta krea espasio pa outokrítika tambe.
Kisas e no ta un film di kua tur hende lo komprondé tur joke. Pa bo por komprondé e konteksto di e setting di Lady Ballers bo mester ta berdaderamente sigui sierto desaroyo ku un mente habrí pero tòg krítiko.
Afortunadamente tin sufisiente apsurdidat pa tur hende por tin su momentunan pa hari. Ta solamente ku algun hende lo hari mas duru ku otro.
I esei ta keda tòg e handicap di e film aki… Esei i algun esena ku ta baha e tempo di e pelíkula. Pero e momentunan ei tin diálogo ku hopi hende lo gusta pa e kontenido moral. Vooral den e esenanan ku mucha aden.
Mi própio handicap ta ku mi gusta comedy un poko mas agresivo ku esaki, pero opyektivamente no tin masha kos robes ku e low budget film aki.
Ta parse manera Sound of Freedom a lanta un trènt nobo e aña aki di pelíkulanan low budget produsí pafó di Hollywood, pero ku ta hala un públiko sufisientemente grandi pa ta lukrativo.
I si no tabata pa e intentonan di Hollywood atrobe pa blòkia e pelíkula aki tambe, lo mi no tabata na altura di su eksistensha mes…
Èniwei…
Lady Ballers ta gewoon un family film ouderwets ku un story positivo ku basta hende lo por rekonosé. I yes, e kos tin un very happy ending ku… sè… mi a haña un tiki stòf den wowo na kabamentu.
E film aki no ta e mihó comedy ku mi a yega di wak. Pero e ta meet e standard di un forma satisfaktorio vooral si bo konsiderá e kalidat ku lo bo no ferwagt di esnan ku a trah’é.
7 out of 10 ta parse mi un score hopi netjes pa e film aki.
Bo ke wak Lady Ballers? Follow mi WhatsApp Channel, kaminda e ta disponibel komo stream. Kòrda sigui e instrukshonnan den WhatsApp disponibel bou di e link pa e stream.
by Webmaster | 06/12/2023 | Cinema News
E konosido aktor Nicolas Cage ta pensando pa retirá pronto for di Hollywood. Asina e aktor a bisa den e revista Vanity Fair. Segun e aktor e tin 3 òf 4 pelíkula mas den dje i despues e ta kla ku aktuamentu den pelíkula. Un karera den serie di televishon sinembargo ainda e no ke deskartá.
Den yanüari Cage ta kumpli 60 aña i esei lo a buta e aktor kuminsá pensa riba su futuro. El a pèrdè su tata ku 75 aña, un diferensha di 15 aña for di su edat aktual. Esei a hiba e aktor na e realisashon ku e kier dediká mas tempu na famia.
Cage a bira konosí den añanan 80 ku su ròlnan den Moonstruck (huntu ku e konosido kantante i aktris Cher) i Raising Arizona. Tambe e tabatin éksito grandi ku Leaving Las Vegas, Face/Off i Con Air.
by Webmaster | 17/11/2023 | Cinema News
Entrante 11 di yanüari e servisio di streaming Peacock ta bai lansa un serie basá riba e pelíkula popular Ted di e komediante Seth MacFarlane. MacFarlane atrobe lo hasi e stèm di Ted i direkshon di e serie, kua ta bai bèk den pasado.
E serie kómiko lo konsistí di 7 episodio kaminda e tèdiber lo yuda e famia di su amigu John, kende a mira su tèdiber haña biba despues di pidi un deseo. Pero meskos ku den e pelíkula e peluche su komportashon deskontrolá ta hinka John, ku den e serie tin 16 aña, den bastante problema.
Konhuntamente e pelíkulanan original Ted i Ted 2 a generá 750 mion dòler mundialmente. Ámbos pelíkula ta protagonisá pa Mark Wahlberg i Seth McFarlane komo e stèm di Ted.
by Webmaster | 09/11/2023 | Cinema News
Aktornan Merikano probablemente ta bai reanudá trabou. E sindikato SAG-AFTRA a logra un akuerdo ku e studionan grandi i servisionan di streaming. E miembronan tin ku aprobá e akuerdo ofisialmente djabièrnè próksimo. Si tur kos bai bon produkshonnan por kuminsá drai atrobe despues di tabata 4 luna paralisá.
E 160 mil miembronan tabata den wèlga pa subida di salarionan mínimo, un parti di e ganashi di servisionan di streaming i protekshon kontra imágennan produsí ku inteligensha artifisial. Tur esakinan ta reglá den e akuerdo.
E aktornan tin miedu ku inteligensha artifisial por hasi nan remplasabel. Asina e industria di sine ya ta usa e teknologia aki pa produsí vershonnan mas yòn di e aktornan.
Na Hollywood tin un sentido di alivio. Hopi produkshon tabata paralisá dor di e wèlga ku a kuminsá for di mei. Promé ku esei ya kaba script writers tabata den wèlga. Un wèlga ku por sierto a kaba den sèptèmber último.
by Webmaster | 30/10/2023 | Cinema News
Koleganan i amigunan ta den shòk despues di e notisia ku e aktor Merikano-Canades Matthew Perry a fayesé. Perry, partikularmente konosí pa su ròl komo Chandler den e serie Friends, a fayesé djasabra na 54 aña di edat. Segun Los Angeles Times e asistente di e aktor a hañ’é morto den su jacuzzi na kas.
Vários aktor ku a traha ku Perry i otro konosínan a subi retnan sosial pa kompartí nan tristesa. Asta promé minister di Canada Justin Trudeau a reakshoná riba e notisia. Su koleganan di Friends mes a keda remarkablemente ketu.
Te asina leu no tin sospecho di un krímen. Tampoko a haña supstansianan prohibí den e bibienda. Manera ta konosí e aktor tin un pasado di abusu di supstansianan pisá manera alkohòl, droga i remedi kontra doló. E kousa eksakto di morto ta bou di investigashon.
by Webmaster | 28/10/2023 | Cinema News
…dùs mi a kaba di wak South Park: Joining The Panderverse i mi tin ku bisa ku Matt Stone i Trey Parker a bolbe produsí un masterpiece! Mi a grita hari duru na vários okashon durante e special aki. Sigui lesa e review aki pasobra mi tin un sorpresa na kabamentu!
Ku nan mix tradishonal di burla, sátiro, sarkasmo i apsurdismo, Stone i Parker ta ridikulisá aktualidat i / òf tur loke nan por buta nan man riba dje. Na bon Papiamentu bisá: “Tur hende ta haña!” den Joining The Panderverse.
Nan “víktima prinsipal” na e okashon aki ta e kompania Disney, i partikularmente direktor di Lucas Films Kathleen Kennedy. E dama aki a bira blanku di bastante krítika e aña aki pa e kaida di kalidat di algun franchise basta popular manera Indiana Jones i Star Wars.
Otro krítika prominente di e kreadornan di South Park den e special aki di 48 minüt ta e uso ripití di e konsepto di multiverso den pelíkulanan moderno. Hinter e setup di Joinging The Panderverse ta un klòmpi enorme di krítika riba e uso abusivo di e konsepto ei.
Otro punto di krítika ku ta forma e sub plot di e special aki ta e estado aktual di ekonomia ku entrada di inteligensha artifisial, inkluyendo e efekto i konsekuensha ku esei ta trese ku n’e pa e merkado laboral di futuro.
Mi no ke keda sin menshoná e tremendo voice acting di e damanan ku a fia nan stèm pa e special aki. Un tremendo trabou ku partikularmente esnan ku ta sigui South Park pa dékadas kaba meskos ku mi lo sa di apresiá hopi. E aktrisnan di stèm aki a prepará nan mes hopi bon mes pa Joining The Panderverse i e delivery ta hopi credible. I mirando nan nòmbernan den credits… yes, they sound real because they are real!
E último aspekto ei a gewoon buta mitar punto riba e skor di 8,5 ku mi tabata bai duna Joining The Panderverse anteriormente…
9 out of 10!
Autor: Maurilhio Nobrega
I wat betreft e sorpresa… Yep! Bo por wak Joining The Panderverse online kaba! Aki un par di dia e lo ta disponibel riba e website ofisial di South Park, pero si bo join mi WhatsApp Channel bo por wak e grátis.
by Webmaster | 26/10/2023 | Cinema News
E tratamentu di e kaso di maltrato kontra aktor Jonathan Majors lo tuma lugá 29 di novèmber próksimo. E aktor lo ta presente den korte di akuerdo ku e website Vulture.com. A fiha e fecha djarason durante un ‘hoorzitting’ na New York. Majors mes no tabata presente, pero a asistí via video call.
Majors ta akusá pa su èks pareha Grace Jabbari di violensha doméstiko. Majors lo a maltrat’é ora nan a sali den outo. Segun fiskal na New York Jabbari lo a kibra un dede i keda ku sla na kurpa, un kòrtá tras di su orea i un bulto riba su kabes. Tambe e fiskal ke inkluí un insidente na Londen den sèptèmber aña pasá kaminda Jabbari lo tabatin mester di kuido médiko.
Majors di otro banda ta bisa ku ta su èks a atak’é. Asina The Hollywood Reporter a skirbi ku a detené Jabbari den pasado pa aktonan di violensha. Durante e hoorzitting di djarason Majors a hasi un referensha na e insidente ei.
by Webmaster | 25/10/2023 | Cinema News
E konosido aktor Richard Roundtree a fayesé djamars na 81 aña di edat. Asina su management a konfirmá na e revista Deadline. Roundtree ta partikularmente konosí pa su ròl den e pelíkula Shaft di 1971.
Despues di Shaft Roundtree a traha ku Charlton Heston i Ava Gardner den e eksitoso Earthquake (1974). Den 1984 por mir’é tambe huntu ku Clint Eastwood i Burt Reynolds den City Heat. Tambe e tabatin un ròl importante den e konosido Se7en (1995) ku Brad Pitt i Morgan Freeman.
Tambe Roundtree a hunga den vários serie manera Generations (1990) i Desperate Housewives (2004).
Aktornan popular manera Richard Roundtree i tambe Pam Grier a bira konosí durante añanan 70 den un temporada ku despues a haña e nòmber blaxploitation. Den e époka ei a lansa un kantidat enorme di pelíkulanan ku protagonista Afro-Merikano. Hopi pelíkula klásiko ta bai bèk na e temporada aki.
Pero dor di e popularidat di algun título manera Shaft mes, produktornan tabata lansa un pelíkula tras di otro ku e meta pa traha hopi ganashi. Esaki a resultá sinembargo den vários produkto inferior i tambe abusu di aktornan deskonosí ku a kondusí na kaida di e genre.
by Webmaster | 23/10/2023 | Cinema News
Por tuma hopi tempu promé ku nos mira un pelíkula nobo di James Bond den salanan di sine. Produktor Barbara Broccoli a bisa The Guardian ku e personahe mester pasa un proseso di modernisashon promé.
Broccoli ta splika ku kada biaha ku skohe un aktor nobo mester hasi un eskoho bon deliberá. Meskos ku a hasi ku Daniel Craig ku a kaba ta hunga e ròl di 2006 te 2021. “No Time To Die” tabata su último pelíkula di Bond.
Segun Broccoli e siguiente pelíkula mester reflehá kon mundo a kambia den e 20 aña ku Craig a hunga e famoso agente 007. Ku Craig den e papel prinsipal, e kreadónan tabata kere den un “héroe di siglo 21 ku a laga nos mira e bida emoshonal di e personahe.”
Ainda no ta kla pues ken lo sigui despues di Craig den e papel di James Bond. Por lo pronto Broccoli mes ta okupá ku produkshon di e serie riba Prime Video “007: Road to a Million”. Den e programa ei parehanan ta biaha rònt mundu i biba aventuranan inspirá pa e pelíkulanan di Bond.
by Webmaster | 05/10/2023 | Cinema News
E aktris Julia Ormond a lanta un kaso kontra no solamente Harvey Weinstein, pero tambe su èks agente Disney. Asina entre otro The Hollywood Reporter ta informá.
E aktris ta tene Weinstein i e kompania responsabel pa komportashon seksual no deseá i pa falta di intervenshon ora ku el a indiká esaki. E abusu lo a tuma lugá den 1995.
Julia Ormond ta konosí pa su ròl den entre otro Legends of the Fall i Sabrina. Den su óptika Disney mester a tuma medida kontra Weinstein ora ku esaki a mal komportá.
by Webmaster | 03/10/2023 | Cinema News
E sindikato di aktornan na Hollywood ta kontinuá palabrashonnan ku e studionan grandi i servisionan di streaming djarason próksimo. Asina nan a bisa na final di e palabrashonnan djaluna anochi.
Anteriormente e eskritornan a logra yega na un akuerdo i despues di aprobashon di direktiva i miembronan esakinan a reanudá trabou. Ku e aktornan sinembargo ainda no tin un akuerdo.
Pa motibu di e wèlga aki ku ya a pasa 150 dia hopi produkshon a para. Shows di televishon manera talkshows por kontinuá, pero serie i pelíkula si ta pará ketu te ora ku tin un akuerdo pa ku implementashon di inteligensha artifisial den serie i pelíkula.
