Tin algun kambio importante na kaminda pa usuarionan di WhatsApp. E app ta bai haña un opshon di siguridat mas fleksibel i e look pa Android ta bai kambia.
Finger Scan pa mensahe individual
Pronto usuarionan di WhatsApp por sigurá sierto kòmbersashon ku un fingerscan. E funshon nobo a sali riba algun vershon preliminar di e app pa Android di akuerdo ku WABetaInfo. Bo por sigurá sierto chat pues dor di tek riba e respektivo kontakto i usa e opshon pa lòk e kòmbersashon. E kòmbersashon ta pasa pa un pantaya separá for di otro kòmbersashonnan.
WhatsApp tabatin un protekshon general kaba ku password, finger print i face scan. E funshon ta hasi su trabou bon, pero e ta nifiká si ku kada bes ku habri WhatsApp, mester hasi e kòntròl di nobo. E opshon nobo pues ta limitá e èkstra molèster ey na e kòmbersashonnan kaminda e ta nesesario. Te asina leu e redakshon di WABetaInfo no a deskubrí nada pa iPhone, pero esei ta kuestion di tempu.
Kòrda por sierto ku for di promé di yanüari di e aña aki WhatsApp NO ta funshoná mas òf a bira instabil riba sierto modèl di smartphone. Pa un lista di e modèlnan bishitá e artíkulo aki.
WhatsApp riba Android ta haña mesun “look” ku iPhone
E vershon Android di WhatsApp ta bai haña un interface nobo basá riba esun di iPhone. E diseño nobo no ta ofisial ainda, pero riba algun vershon beta e redakshon di WABetaInfo a logra spòt algun vershon preliminar.
Lo ta trata di un vershon kaminda mester eliminá algun asina yamá bugs pa despues por lans’é pa usuarionan di Android. Manera ta konosí WhatsApp tin un look diferente riba Android i iPhone.
E nabegashon riba Android lo bai awor via un balki parti abou den pantaya di bo aparato. E pantayanan ta bai bira idéntiko pues, ounke a nota tambe ku e símbolo di ahuste, e asina yamá “Settings”, riba Android a keda igual.
Outoridatnan na California a sera Silicon Valley Bank (SVB), lantando asina un ola di preokupashon den e mundu di merkadonan finansiero ku tin un otro “domino effect” na kaminda. SVB ta un banko relativamente yòn i a finansiá vários start-up. Esei probablemente no ta bai ta sin konsekuensha.
Kiko ta pasando na SVB?
Djabièrnè último outoridatnan na California a sera e banko. Nan no a logra rekohé sèn ku emishon di akshonnan nobo. Pa e motibu ey e banko no por a kumpli ku su debernan i a bai fayit. E outoridat federal FDIC a keda apuntá komo bewindvoerder. Na kabamentu di aña pasá SVB tabata manehá alrededor di 175 mil mion dòler, butando e banko na di 16 lugá na Merka.
Kiko a bai robes?
SVB a sera hopi fiansa ora ku interes tabata abou, pero despues di e oumentonan fuerte di interes, SVB tabatin mas i mas problema pa kumpli ku pago i refinasiamentu di nan fiansanan. Ora ku klientenan a lanta nan plaka masivamente, e outoridat supervisor FDIC na California a disidí sera e banko. FDIC a habri algun kantor djaluna pa klientenan haña akseso na te ku 250 mil dòler di nan plaka.
Ken tur tin kuenta habrí na SVB?
Silicon Valley Bank tabatin hopi kompania di teknologia komo kliente, entre nan en partikular hopi start-ups. E kompania a haña vários gòlpi finansiero den último simannan dor ku e mester a bende obligashonnan ku hopi pèrdida.
Klientenan tin akseso na nan kuenta awor ku SVB ta fayit?
Gobièrnu a tuma enkargo di e banko, pues klientenan tin akseso na nan kuenta.
Kiko ta e konsekuenshanan pa esnan ku a spar na SVB?
Esei no ta konosí ainda. Esei ta dependé si e kaida di SVB ta kontagiá otro instansha finansiero i kompania. En todo kaso no ta un un banko di spar.
E problemanan na SVB ta komparabel ku e krísis bankario di 2007 / 2008?
Nò, esei lo ta un poko eksagerá. E krísis bankario di 2007 / 2008 tabatin rais den e merkado di vastgoed, ku tin basta peso den e sistemanan finansiero i ekonómiko den mayoria pais. E problemanan na SVB ta mas e konsekuensha di mal maneho di balansa na un filial spesífiko.
Pues finalmente: tin un krísis bankario na kaminda atrobe?
Lo mester sali afó den dianan benidero si e kaida di SVB ta “kontagiá” otro instansha finansiero i kompania. E ta dependé tambe di e impakto sikológiko riba esnan ku ta spar i / òf invertí, manera a pasa durante e krísis okashoná pa e kaida di Lehman Brothers. A base di e eksperensha ey ta parse ku gobièrnu di Merka ta antisipá riba mas problema. Pero bankonan ta traha ku buffernan finansiero hopi mas amplio kompará ku ántes ku por akapará un eventual klap.
Den wikènt tras di lomba ehérsito di Merka a basha por lo ménos 3 opheto abou ku tabata sirkulá den e teritorio aereo di e pais. Djabièrnè na Alaska, djasabra pegá ku frontera ku Canada i djadumingu riba e lago Huron. Kada un di e ophetonan aki tabatin un forma diferente segun e informashonnan ku Merka ta dunando. E suseso ta sigui despues ku un siman promé e flota aereo a basha un balòn Chines abou. Di esei nos tin konfirmashon for di China mes, nada straño einan. Pero ta ken ta tras di e ophetonan di den wikènt tras di lomba? Kiko ta pasando? Ta algu nobo òf ta algu ku awor numa ta deskubrí?
Echo ta ku Kas Blanku ta papia abiertamente di e fenómeno di den wikènt despues di e insidente ku e balòn Chines òf ta mas dispuesto pa papia riba esaki. Segun un funshonario ku a papia ku The New York Times sea China òf un otro pais kier wak si Merka ta pagando tinu.
Loke si ta echo ta ku e Merikanonan a hasi nan instalashonnan di radar mas sensibel, loke ta fasilitá visibilidat di ophetonan ku anteriormente no tabata visibel riba radar. Lógikamente ta interseptando mas opheto na alturanan haltu. Ta asina ku e radarnan ta adaptá awor tambe pa interseptá ophetonan ku ta move na un velosidat mas abou ku avion. Sowieso tur hende ta mas alerta aworakí.
Awor di mes e fenómeno a lanta e pregunta tambe si nos tin di haber aki ku algu ekstraterestre, esta algu for di pafó di nos planeta. Pasobra te asina leu un pregunta no ta kontestá ainda: ta kiko eksaktamente nan a basha abou i di nan unda e tres ophetonan ta bini? Di siman pasá China mes a konfirmá mesora ku e balòn tabata Chines. Di esei tin imágen ku no ta laga espasio pa duda. E hefe di NORAD, e organisashon militar ku ta vigilá e teritorio aereo di Canada i Merka, mes a indiká ofisialmente ku no ta ekskluí ku e tres ophetonan di den wikènt tin un orígen ekstraterestre.
Tuma bon nota pues ku uso di e palabra UFO en todo kaso ta na su lugá ora bo tend’é òf les’é den notisia te ora ku e orígen di e ophetonan ta konosí. E abreviashon ta para pa Unidentified Flying Opbject, pues un opheto buladó ku no ta identifiká. Esei ta nifiká pues algu diferente for di ekstraterestre, kua ta nifiká proveniente di pafó di nos planeta / atmósfera.
Un temblor fuerte di 7.9 riba skala di Richter na Turkia i parti di Siria a okashoná bastante daño, sentenáres di morto i míles di persona heridá. Djaluna e temblor tabata tópiko di e sekshonnan internashonal rònt mundu.
En partikular Turkia sa haña temblor frekuentemente, debí na e lokalidat di e pais. Na Siria tin hopi ménos temblor ta tuma lugá. For di aña 1900 a midi un total di 16 temblor di kua esun di djaluna ta esun di dos mas fuerte midí. Na Siria a midi un magnitut di 5.6 riba skala di Richter.
Turkia sinembargo ta lokalisá riba un parti kaminda plachinan ku ta forma e superfísie di nos planeta ta topa i krusa otro, e asina yamá plachinan tektóniko.
E plachinan ta move algun sèntimeter pa aña i ta okashoná frikshon ku nos ta eksperensiá komo temblor. Dependiendo di e direkshon ku e plachinan ta move, nan ta sea dal den otro òf skùif riba otro. Un par di sèntimeter ta sufisiente pa okashoná bastante destrukshon. E temblornan mas fuerte ta tuma lugá pues na e rant di e plachinan aki.
Kòrsou ta skor hopi abou segun e asina yamá Fragile States Index (FSI). E FSI ta un rapòrt publiká tur aña dor di e think tank Merikano Fund for Peace. E meta ta pa evaluá e vulnerabilidat di paisnan miembro di Nashonnan Uní pa konflikto òf frakaso. E eksaktitut di e evaluashon di un pais ta dependé di e disponibilidat di sufisiente informashon riba e pais en kuestion.
E evaluashon ta tuma lugá a base di 4 kategoria prinsipal:
Koheshon
Polítika
Ekonomia
Sosial
No ta tur kriterio di e FSI ofisial ta aplikabel pa Kòrsou, pues mester a formulá e indikadornan pa Kòrsou di e siguiente forma:
Koheshon Sosial
Polítika
Ekonomia
Demografia
Kapasidat di Estado
Konhuntamente e indikadornan aki ta inklui 12 otro indikador sekundario:
Seguridat
Fakshonnan elitario
Sensibilidatnan den komunidat
Desaroyo ekonómiko i pobresa
Inigualdat ekonómiko
Movementu di persona i Brain Drain
Legitimidat di estado
Akseso na servisionan públiko
Derechinan humano i derechi di estado
Preshonnan demográfiko
Refugiadonan i personanan deslokalisá
Intervenshon eksterno
Kada un di e 12 indikadornan aki ta haña un skor entre 0 i 10, kaminda 0 ta e nivel di tenshon mas abou i 10 ta representá e nivel di tenshon mas haltu òf grado di instabilidat. Esaki despues ta reflehá den un skor entre 0 (sustenibel) i 120 (instabil):
Kòrsou no ta inkluí riba e lista di paisnan ku ta evaluá den e FSI mundial, pues mester apliká e método a base di datonan atkirí dor di profeshonalnan lokal di e “think tank” lokal Think To Do Institute. A base di e datonan suministrá dor di e grupo di ekspertonan Kòrsou lo a skor 92 riba e eskala di 120. Den e mapa aki riba Kòrsou lo tabata un zona kòrá.
Si nos wak e posishon di Kòrsou den e skor hierárkiko di resiliensha (ku 179 mihó skor i 1 e pió skor), Kòrsou ta skor 24:
Kòrsou ta na e mesun posishon ku e Repúblika Demokrátiko di Congo ku un skor di 24. Kòrsou ta skor 11 punto riba Haiti, pero 4 punto mas abou ku Venezuela ku a haña un skor di 28.
