Un kantidat signifikante di computer ta funshonando atrobe despues di e storing masivo ku tabatin na kabamentu di siman pasá riba sistemanan ku ta drai riba Windows 10. Asina e kompania propietario di e software en kuestion CrowdStrike a partisipá riba X, ántes Twitter. No opstante esaki por dura algun siman promé ku tur problema ta solushoná.
Manera ta konosí, siman pasá un problema den un update di CrowdStrike a buta hopi computer rònt mundu pega i keda sin start. Esaki a okashoná hopi káos na aeropuertonan, vários hospital, banko, kompanianan di telecom i media. CrowdStrike lo a haña un solushon pa korto plaso, pero ainda no a implementá esaki.
Segun kálkulonan di Microsoft mas o ménos 8.5 mion computer a keda afektá dor di e eror den e update. CrowdStrike ta bisa di a solushoná un kantidat signifikante, pero no a duna mas detaye òf un sifra eksakto.
E situashon a hiba por sierto na vários riezgo pa e kompanianan i mashinnan afektá. E software tin akseso amplio na e sistemanan kaminda e ta instalá i ta rekerí asistensha profeshonal pa solushoná e problema.
Direktor di CrowdStrike George Kurtz a atvertí den e revista Bleeping Computer ku terseronan ku mal intenshon ta presentá nan mes komo trahadónan di CrowdStrike i ta ofresé solushonnan falsu pa asina instalá malware i otro tiponan di software maligno. Pa e motibu ei ta konsehá pa tuma kontakto direktamente ku Crowdsrtike si bo computer ta afektá.
Miónes di usuario di computer ku Windows 10 no por a start nan laptop djabièrnè. Tur a haña un pantaya blou. For di vários parti di mundu bankonan, kompania i media a mèldu problema ku nan sistemanan ku ta drai riba Windows 10. Asina for di Oustralia tin informe ta bin ku kahanan ku self-scan no ta funshonando.
Partikularmente e sektor di aviashon lo ta eksperensiá hopi molester relashoná ku loke a resultá un storing mundial. Hopi konsumidó ku a eksperensiá e problema a haña un eror ora nan computer a start. E mensahe ta indiká ku mester restart e computer, pero despues esaki ta pega.
E problema tin su orígen den un update di e kompania di cybersecurity Crowdstrike. E kompania a splika ku ta trata di nan asina yamá Falcon sensor ku ta rekohé datonan di siguridat riba computernan pa negoshi. E software ta protegé kontra di atakenan sibernétiko i pa e motibu ei tin konekshonnan intensivo.
Crowdstrike a konfirmá e problema i a revertí e update, pero ainda esei no a resolvé tur problema. Te ainda e solushon ta rekerí un akshon tékniko pa resolve e problema kompletamente.
Manera indiká, partikularmente e sektor di aviashon a haña problema grandi dor di e storing. Asina Schiphol i e aeropuertonan di Berlin, Sydney i Mumbai tambe a konfirmá problema ku nan sistemanan. Vários buelo no por sali i aterisahenan no ta registrá. Biaheronan mester tene kuenta ku hopi retraso òf asta anulashon. Kompanianan manera KLM, Transavia, American Airlines, Delta Airlines i Turkish Airlines ta pidi nan klientenan pa tuma kontakto.
Curaçao International Airport ta monitoriando e situashon i ta pidi biaheronan pa konsultá e aerolineanan ku nan ta bula ku n’e pa mas informashon.
Meta, propietario di Facebook i Instagram, ta bai duna èks presidente di Merka Donald Trump akseso atrobe na su accounts. E kompania ta bai kita tur restrikshon ku tin di momentu riba su kuentanan di akuerdo ku e Plataforma Axios.
Ku e paso aki Meta kier duna Trump e mesun chèns ku su kontrinkante Joe Biden. Ta asina ku a restringí Donald Trump su kuentanan di Facebook i Instagram den 2021, siguiendo e invashon di Capitol. Na e okashon ei simpatisantenan di Trump a invadí e edifisio gubernamental despues di yamadanan di Trump via su plataformanan di social media pa lanta kontra di e resultado di elekshon ku el a pèrdè di Joe Biden.
X, ántes Twitter, tambe a prohibí Trump usa su kuenta pero a lanta e prohibishon despues ku Elon Musk a kumpra e kompania. Trump sinembargo no a usa su kuenta di X mas.
Na komienso di aña pasá a habri su kuentanan atrobe, pero e kòntròl riba su kuentanan tabata hopi severo. Tambe a tuma medida kontra dje ku ta bai mas leu ku otro suarionan di Facebook i Instagram. Siguiendo e restrikshonnan di Meta i otro plataformanan social Trump a disidí lanta su propio plataforma: Truth Social.
Mester deshasí di smartphones na skolnan. Asina ta sugerí den e buki resien publiká The Anxious Generation di e sikólogo sosial Jonathan Haidt. Segun un di e investigadónan den e buki, Zach Rausch, mester buska un manera pronto pa redusí e impaktonan negativo di social media riba hóbennan.
Pa The Anxious Generation a konsultá vários estudio hasí riba e forma ku social media a drenta nos bida despues di 2010 i riba e impakto negativo di esakinan riba hóben. Partikularmente e ansiedat i depreshon ku social media por tin riba hende. Despues di 2010 por nota ku e kantidat di hóbennan ku ansiedat ta hopi mas haltu.
Pa e konklushonnan a wak por ehèmpel e medidanan tumá na Hulanda pa kombatí e problema. Ta asina ku na Hulanda ya smartphones no ta pèrmití mas na skol i e reakshonnan te asina leu ta basta positivo. E ambiente durante pausanan lo ta mihó, alumnonan ta papia ku otro atrobe i tambe lo tin ménos bullying tumando lugá.
Pero ta mas prudente pa evaluá e adelanto den prestashon i komportashon despues di 1 òf 2 aña pa sa si e efekto ta duradero. Mester kòrda ku pronto alumnonan lo tin fakansi i akseso konstante atrobe na nan telefòn.
The Anxious Generation ta duna hopi ehèmpel i prueba di e efektonan di social media i smartphones riba ser humano. E pió efekto riba hende ta e echo ku sernan humano ta haña ménos eksperensha ku situashonnan sin un pantaya nan dilanti i laga nèt eseinan ta e eksperenshanan ku nos mester pa por krese komo ser humano.
The Anxious Generation di Jonathan Haidt ta disponible riba tur webstore ku ta bende buki online.
E adrèsnan di e-mail di kasi 60 mil persona ku un debe na DUO a bin kaba riba kaya dor di un eror di software. Un eror ku por resultá den abusu dor di kriminalnan. Asina e emisora BNR a informá.
Dienst Uitvoering Onderwijs a manda un enkuesta pa 60 mil persona ku ta pagando nan debe di estudio. Ta danki na un hacker étiko, ku a deskubrí e fayo, ku DUO a haña sa. A resultá ku DUO a usa software di análisis di e kompania Suiso Survalyzer ku no ta perfektamente sigurá.
E hacker por a mira pues ken tur a haña un invitashon pa yena e enkuesta i a informá DUO inmediatamente. Despues a resolvé e lèk den e sistema. Tantu DUO komo Survalyzer ta investigando e insidente. Te asina leu ku nan por a nota niun hende aparte di e hacker no a deskubrí e eror.
Si e informashon a kai den man di criminal esakinan por usa e datonan pa aktonan manera phishing. Esaki ta trikinan pa hala ussuarionan pa bishitá website falsu.
E asistente virtual di Apple Siri tambe ta programá awor ku inteligensha artifisial. Asina e kompania ta partisipá.
Mayoria hende mester a ripará ku den ultimo 2 aña AI a hasi un entrada notabel den mundu di teknologia. Partikularmente ChatGPT di OpenAI a lanta hopi interes bou di invershonistanan manera Google i Microsoft. Apple sinembargo no ke papia di Artificial Intelligence, sino “Apple Intelligence”.
E kompania te asina leu no tabata promové su funshonalidatnan asina intensivo manera Google i Microsoft. Poko poko pero sigur Apple tambe ta introdusiendo su funshonalidatnan di Inteligensha Artifisial. E mayor kambionan lo ta notabel den e kompania su asistente virtual Siri ku ta riba merkado for di 2011.
Segun direktor di Apple Tim Cook e asistente virtual ta bai haña un aspekto mas humano i ta bai konektá tur app i funshonalidat di Apple di un forma mas efisiente. Siri pronto ta bai por traha resúmen den e-mail, yuda skirbi teksto i genera imágen artifisial. E ta bai forma parti tambe di Apple su browser di internet Safari.
E kompania ta enfatisá ku privacy di usuarionan lo keda garantisá. Asina e diseño nobo ta limitá kualke pregunta den promé instansha na funshonalidatnan den bo device privá. Ta ora ku esaki no por generá un kontesta, ku e ta konektá ku servers di Apple.
Apple no ta rekonosé lo siguiente na bos haltu, pero de echo e kompania ta usa e mesun teknologia ChatGPT di OpenAI ku Microsoft tambe ta usando den su aplikashonnan. E diferensha ta den e kondishonnan di servisio i garantia di privacy. Riba aparatonan di Apple e usuario mes mester duna aprobashon na e funshonalidat di AI.
No ta straño ku awor numa Apple ta introdusí AI den su servisionan. Den pasado tambe e kompania semper a sigui desaroyonan serka otro kompania promé pa despues introdusí su propio vershon. Ta di e forma aki e kompania a keda distinguí su mes for di su konkurentenan.
No ta kasualidat ku Apple lo kier a opservá e merkado promé. Asina anteriormente e aña aki Google a lanta hopi kontroversia ku su sistema di AI ku tabata produsí imágennan ku histórikamente no ta kuadra.
Por lo pronto e sistema nobo di Apple lo ta disponibel solamente na Ingles.
5WPress ta dediká na promové siensia i teknologia ku artíkulonan oudiovisual konfiabel ku kontenido edukativo. Riba nos plataforma NO tin espasio pa teorianan pseudosientífiko.
WhatsApp ku ta tarda pa manda un simpel mensahe, Facebook òf Instagram ta pega ora bo ta scroll, un video riba YouTube ta tarda pa play òf ta tuma un página di internet ku ta dura largu pa karga. Niun hende gusta mobile internet, òf manera den boka di pueblo bisá “internèt via data”, ku ta traha slow.
E mayor motibu pa e problema di mobile internet slow ta e kantidat di data rekerí pa hasi uso di sierto plataforma ku efektonan visual ku ta dia pa dia mas spektakular, pero ku ta chupa basta MB di e memoria di bo aparato i ta baha speed di bo internet konsiderablemente tambe.
Provedornan di internet ta hasi nan best pa kumpli ku e rekerimentunan di plataformanan moderno, pero no ta semper e desaroyo di internet speed i strukturanan di apps efisiente ta kana man na man ku otro. Programmers tin akseso na un speed di internet haltu ora nan ta diseñá nan apps, pero usuarionan riba kaya nò.
Ta bai tin otro momentu ku realístikamente bo no por konta ku mobile internèt ku sufisiente speed manera den kaso di interferensha, muchu usuario pareu riba un ret òf un distansha muchu grandi entre bo aparato i un hotspot òf antena. Pero afortunadamente tin algun manera pa evitá e problema di slow mobile internet dor di ahustá un ke otro den bo telefòn.
Sigui algun di (òf tur) e tipnan aki i lo bo ripará un diferensha mesora!
1. Clear bo Cache
Dor di limpia (na Ingles “clear”) e caching di bo telefòn no solamente bo ta aselerá bo speed di internet, pero tambe e funshonamentu d bo aparato su kapasidat interno. Buska e funshon pa limpia, esta “clear”, bo caching si bo no a hasi esaki pa basta tempu kaba pa wak si bo ta nota un diferensha.
2. Sera tur Apps
Ounke mayoria aparato tin sufisiente potensia interno pa prosesá vários app pareu, esaki no ta konta pa bo speed di mobile internet. Ademas, mas app bo tin ta drai pareu miéntras bo ta konektá via bo mobile provider, mas bo aparato lo gasta data inesesariamente. Sea sera algun di e appnan aki òf si bo no mester di nan, sera tur i lo bo nota un mehorashon di bo speed di mobile internet.
3. Paga e Auto Update di bo Apps
Updates pa bo apps no solamente ta baha bo speed di internet. Pió ainda: nan ta gasta bo data! Mayoria update ta tuma lugá den background i kisas lo bo no tuma nota di nan te ora ku bo tin ku usa bo internet. Yen biaha nos ta asumí ku ta e konekshon, pero den background por tin un app ku nèt na e momentu ei ta download un update sin ku bo ta mira esaki. Pa resolvé e problema ei, chèk e settings di bo apps i ahustá esakinan pa update solamente ora bo ta konektá ku WiFi. Bo por opta tambe pa paga e download outomátiko kompletamente i hasi updates promé ku bo bai drumi, pa bo lanta siguiente dia ku un telefòn aktualisá.
4. Usa un browser diferente òf usa Lite Apps
Un browser diferente por resultá den un mehorashon di bo speed di internet tambe. Algun browser ta traha mihó riba sierto aparato i vise vèrsa. De echo algun browser ta spesialmente diseñá pa sierto aparato. Purba vários pa wak si bo ta nota un diferensha. Meskos ku e browser di bo laptop, kòrda semper pa limpia cookies i bo history tambe! Otro kos ku bo por hasi ta chèk si apps ku bo ta usa regularmente pa, por ehèmpel, trabou riba kaya tin un vershon lite ku opshonnan básiko. Hopi di nan ta bin awendia den vershon lite tambe.
5. Reset bo Network Settings
E network settings di bo telefòn tin ora por okashoná un problema pa bo uso di mobile internet. Tin ora esakinan ta butá riba “automatic”, loke por influenshá bo speed di internet konsiderablemente. Bo por stabilisá esaki notablemente dor di reset bo Network Setting i despues paga e funshon outomátiko. Buska bo network provider manualmente, selekshoná e LTE Network di bo provider, safe e i kaba start bo telefòn di nobo.
Den un próksimo item nos ta para ketu riba kon mehorá bo konekshon di internet pa bo telefòn via WiFi.
Gobièrnu demishonario di Hulanda ta konsiderando bandoná Facebook. Si e kompania no por duna klaridat riba siguridat di e datonan di usuarionan promé ku reseso, gobièrnu di Hulanda lo sera su accountnan riba e plataforma. E ultimatum ta vense pues riba 5 di yüli próksimo.
Asina sekretario di estado Alexandra van Huffelen di Digitalisering a skirbi den un karta pa Tweede Kamer. Segun van Huffelen gobièrnu di Hulanda ke garantisá siguridat di datonan i derechinan di su siudadanonan. Pa e meta ei a instalá un tim ku ta den palabrashon por sierto tambe ku Google i Microsoft.
For di un investigashon na kabamentu di 2022 a resultá ku Facebook no ta transparente ora ta trata di datonan di siudadanonan riba su plataformanan. Tampoko no tin klaridat riba e visibilidat di mensahenan importante.
Gobièrnu di Hulanda tin mas o ménos 91 mil siguidó riba Facebook. Esei ta tiki si bo kompará gobièrnu di Kòrsou ku tin 64 mil siguidó riba Facebook. Segun e website Fingerspitz 10.1 mion siudadano na Hulanda tin un account di Facebook. Hulanda ta konta mas o ménos 17.7 mion habitante.
Facebook i Instagram ta bai introdusí pronto un ‘label’ spesial pa usuarionan por identifiká imágen i sonido produsí ku Inteligensha Artifisial (AI). E kompania propietario Meta a partisipá alabés ku ta bai delete ménos imágen produsí ku AI. E label nobo mester drenta na vigor den mei.
Meta a disidí tuma e paso aki despues di rekomendashonnan di un konseho ku ta supervisá e maneho di moderashon riba Facebook i Instagram. E konseho a indiká den su konklushon ku Meta tabata konsentrá muchu riba deepfakes, esta video manipulá ku AI kaminda ta mira hende papia i / òf hasi kos ku nunka nan a bisa òf hasi den realidat. Pa e motibu ei hopi fragmento di audio i foto manipulá no a haña atenshon.
E ‘label’ ku Meta ta bai introdusí mester ta sufisiente pa usuarionan por distinguí imágennan berdadero for di imágennan artifisial. E label ta konsistí di un watermark ku e servisionan mas grandi di AI lo agregá na e kreashonnan di nan usuarionan. Asina lo bin un alerta apart pa imágen, video i sonido manipulá ku riezgo haltu riba desinformashon.
Consumentenbond i Data Privacy Stichting (DPS) na Hulanda a lanta un kaso enorme kontra Facebook i Instagram na nòmber di 250 mil siudadano. Pa kada usuario e instanshanan ta pidi un kompensashon máksimo na rason di 1.250 euro.
E demanda di Consumentenbond i DPS ta konsistí di un kompensashon pa daño i perhuisio na balor di 750 euro pa kolekshon i uso di datonan privá i 500 euro pa kompartí esaki ku Merka.
Aña pasá kaba korte na Hulanda a dikta ku Facebook a rekohé muchu hopi informashon di usuario sin nan outorisashon. E informashon ei a sirbi despues pa bende espasio pa avisonan komersial. Korte no a bisa nada sinembargo di un eventual kompensashon.
Consumentenbond i DPS a purba negoshá un kompensashon ku propietario di Facebook Meta. Pero despues ku e palabrashonnan aki a frakasá e instanshanan a disidí entamá e kaso.
E demanda ta basta amplio i no ta solamente na nòmber di usuarionan di Facebook, pero tambe di Instagram. Si korte dikta na fabor di Consumentenbond i DPS, Meta mester paga kasi 12 mil mion euro (12.000.000.000) na kompensashon.
Un grupo di hacker sostené pa Rusia a logra penetrá e sistemanan di Microsoft. Asina nan a logra haña akseso na e accounts di e-mail di miembronan di gerensha i algun otro kolaboradó. Asina Microsoft a konfirmá den un deklarasahon.
E hackernan a logra apoderá di vários e-mail i dokumento importante. Segun Microsoft e kulpabelnan ta e movementu Midnight Blizzard. E grupo aki lo tin sosten aktivo di Rusia i ta responsabel tambe pa otro atakenan riba Microsoft.
Microsoft ta adaptando su sistemanan despues di a deskubrí e hack siman pasá. Ainda tin vários kolaboradó ku mester haña un notifikashon ainda si nan account ta safe pa uso atrobe.
Klientenan di Microsoft i e sistema di inteligensha artifisisal lo no ta afektá pa e atake.
E grupo ku segun Microsoft ta responsabel pa e atake aki, esta Midnight Blizzard, lo ta responsabel tambe pa e asina yamá SolarWinds hack den 2020. Na e okashon ei no solamente Microsoft, pero tambe un agensia den sektor di armanan nuklear a haña un atake di e grupo aki.
Konsumidornan mester tene koutela ora nan hasi kompra via di Facebook Marketplace. Asina e banko Ingles TSB ta atvertí. Tin hopi estafa ta tuma lugá via e plataforma.
73% di tur e kasonan di froude ku e banko a trata ta relashoná ku deals será via Facebook Marketplace. Segun e ekspertonan di TSB sigur 1 den kada 3 aviso komersial riba e plataforma ta bini di estafador.
Ta trata di ofèrta pa iPhones òf airfryers na preisnan redusí. E investigadónan a sigui e asina yamá ‘money trail’ i a bin kaba riba website di estafador.
Segun Meta, e kompania propietario di Facebook, e problema ta konosí. E plataforma ta pidi usuarionan pa mèldu ora tin sospecho di estafa pa inventarisá estafadornan notorio.
OpenAI, e kompania tras di e programa ChatGPT, a tuma un serie di medida relashoná ku elekshon presidensial e aña aki na Merka. Medidanan ku mester evitá mal uso di e sistema durante e kampañanan.
Siguiendo e insidentenan di 2016, ora a akusá kompanianan teknológiko di no a hasi sufisiente pa kombatí desinformashon, tin hopi preshon riba OpenAI pa tuma medidanan di prekoushon.
E kompania ta bai monitoriá partikularmente kreashon di deepfakes, esta video kreá òf manipulá ku AI, i kampañanan na eskala grandi ku intenshon di influenshá persepshon. Generalmente ta prohibí pa usa ChatGPT pa hiba kampaña.
Asina e programa lo no kumpli ku petishonnan pa prosesá imágen di kandidatonan presidensial. E kreashon di chatbots ku ta manda supesto mensahe privá di e kandidatonan tambe ta prohibí.
Tambe ChatGPT lo wòrdu adaptá pa rekonosé imágennan produsí ku otro programanan di AI i deepfake manera DALL-E.
Tin videonan deepfake di Donald Trump ta sirkulá kaba bou di votadónan. Asina tin imágennan falsu di Trump ku ta keda detené na New York. E kalidat di e imágen ta asina bon ku ta difísil distinguí falsu for di original.
E subida di inteligensha artifisial lo afektá 4 den kada 10 kupo di trabou. Asina direktor di e Fondo Monetario Internashonal (IMF) Kristalina Georgieva a duna di konosé.
Segun Georgieva e paisnan mas riku lo benefisiá di e posibilidatnan teknológiko nobo, pero e ta nifiká alabes ménos nesesidat di forsa humano tambe na boka di trabou i un preshon riba salarionan.
Mas aleu e direktor di IMF ta premirá mas inigualdat ku e yegada di AI. Esnan ku por afòrt esaki opviamente ta benefisiá hopi mas ku esnan ku lo pèrdè entrada dor di e subida di AI.
Paisnan pober tambe tin un reto nan dilanti pa keda den e race pa inovashon. Hopi pais no tin e infrastruktura nesesario pa maksimalisá e benefisionan di inteligensha artifisial.
Finalmente e direktor di IMF a duna di konosé ku gobièrnunan rònt mundu tin un tarea pa antisipá riba e konsekuenshanan di AI ku enseñansa i atraves di programanan pa kambio di profeshon di e funshonnan afektá.
