by Webmaster | 07/12/2023 | IT, Apps & Social Media
Segun e informashon ku a bin dilanti durante lansamentu di e trailer di Grand Theft Auto VI di e distribuidor di video games Rockstar e próksimo edishon di e game lo sali den 2025. E fecha eksakto sinembargo no ta konosí.
E setting di GTA VI manera tabata antisipá ta Vice City, esta Miami. Asina por dedusí for di e trailer. GTA VI ta konta e aventura di un pareha kriminal, ku un personahe femenino na kabes. E game lo sali promé riba PlayStation 5 i Xbox.
Fanátikonan di e serie GTA tin 10 aña wardando GTA VI. GTA V a sali den 2013. E promé vershon di Grand Theft Auto a sali den 1997 i a sigui krese pa bira un di e títulonan mas popular den mundu di video games.
by Webmaster | 04/12/2023 | IT, Apps & Social Media
Produktor di videogames Rockstar riba 5 di desèmber lo publiká e promé imágennan di e próksimo edishon di Grand Theft Auto. Asina e kompania a anunsiá riba su website. E imágennan lo ta disponibel rònt di 9or di mainta orario di Kòrsou riba e social media di e kompania Rockstar.
E trailer aki ta hopi antisipá konsiderando ku e último edishon di Grand Theft Auto a sali mas o ménos 10 aña pasá. Espektativanan ta hopi haltu tambe konsiderando ku e último edishon ei, Part V, ta un di e videogames mas bendé den historia. Mundialmente a bende mas di 150 mion kopia.
Lo tin un kambio grandi e wega. Pa promé biaha e protagonista di e wega lo ta un personahe femenino. Tambe e setting di e wega ta bai bèk na Grand Theft Auto: Vice City ku ta tuma lugá na Miami. Sobrá detaye lo bira konosí djamars mainta.
by Webmaster | 04/12/2023 | IT, Apps & Social Media
OpenAI, e kompania tras di e programa di inteligensha artifisial ChatGPT, a posponé lansamentu di GPT Store te próksimo aña. GPT Store mester a bira un webshop ku chatbots adaptá dor di usuarionan.
OpenAI a partisipá den novèmber ku lo el a fasilitá akseso na sierto usuario pa traha vershonnan adaptá di ChatGPT i ku lo a habri un webshop kaminda por bende e vershonnan aki.
Esaki mester a duna e kompania un bentaha riba kompetensha den mundu di inteligensha artifisial, pero e kompania a pasa dor di un periodo turbulento resien ku retiru i regreso di direktor Sam Altman.
E lansamentu di e webshop lo tuma lugá na kuminsamentu di próksimo aña.
by Webmaster | 01/12/2023 | IT, Apps & Social Media
Un wes federal na Merka a anulá un prohibishon di TikTok na e estado Merikano Montana. E prohibishon mester a drenta na vigor riba promé di yanüari, pero segun e wes estado Montana ta bai muchu leu ku e medida aki. Un prohibishon total ta bai kontra Merka su libertat di ekspreshon.
Ya tin vários estado kaminda ámtenar no ta pèrmití pa instalá TikTok riba nan telefòn di trabou. Montana tabata bai sinembargo un paso mas leu ku un but di kasi 10 mil dòler pa esnan ku buta e app disponibel pa download. Usuarionan por sierto lo no a keda afektá pa e medida ei.
Gobernador di Montana Greg Gianforte a bisa ku e plan tabata diseñá pa evitá ku datonan personal di usuarionan den e estado lo a kai den man di gobièrnu di China. Tambe China lo ta probechá di e app pa plama propaganda.
Na total 5 kreadó di kontenido riba TikTok ku ta biba den e estado i ku ta dependé di entradanan for di e app a entamá e kaso. TikTok por sierto tambe. Pero ainda e kaso no ta finalisá. Ainda tin un fase den e tratamentu di e kaso kaminda ámbos partido por trese informashon nobo dilanti.
by Webmaster | 30/11/2023 | IT, Apps & Social Media
Propietario di X, ántes Twitter, Elon Musk ta rabiá riba kompanianan ku a kita nan avisonan komersial riba su plataforma. Hopi kompania lo a hala atras pa su supuesto sosten pa sintimentunan antisemita, esta kontra hudiu.
Musk lo a aprobá un mensahe kaminda ta bisa ku hudiunan lo ta okashoná odio. Durante un seminario na New York Musk a reakshoná hopi iritá ku palabra basta mahos den direkshon di e kompanianan ku a hala atras.
E boycot por resultá den kaida di su kompania ku pa un tempu kaba no ta kana manera el a antisipá. Tambe Musk a bisa ku su reakshon riba e mensahe no tabata masha bon elaborá.
Kompanianan grandi manera Disney, IBM i Apple a para nan kampañanan di propaganda riba X pa e motibu ei. E siman aki por sierto Musk tabata di bishita na Israèl kaminda el a topa ku promé minister Benjamin Netanyahu.
by Webmaster | 29/11/2023 | IT, Apps & Social Media
Google ta bai eliminá tur account ku no tabata aktivo den último 2 aña. Segun CNN esaki lo tuma lugá djabièrnè awor.
Lo ta trata di un medida di seguridat. Segun Google hopi di e accountnan aki no ta konfigurá pa dòbel verifikashon. E accountnan aki ta bira sensibel pa hacking, phishing i spam.
Usuarionan di accounts ku no ta usá regularmente mester a risibí atvertensha entretantu di Google ku e account posiblemente ta bai disparsé.
E promé buèlta lo ta accounts ku usuarionan a krea, pero despues a keda sin usa. Ta bon pa tuma nota ku den tal kaso apps manera Gmail, Docs i Drive lo no ta disponibel. Pues kualke mensahe òf otro file bieu manera potrèt lo disparsé.
E úniko accounts ku lo no disparsé mesora lo ta esnan mará na kanalnan aktivo riba YouTube, òf accounts usá pa kumpra e-books òf film.
by Webmaster | 27/11/2023 | IT, Apps & Social Media
Sigur 33 estado na Merka ta akusá e kompania propietario di Facebook i Instagram Meta di a rekohé datonan personal di mucha menor di 13 aña di forma ilegal riba Instagram. Luna pasá ya a entamá un kaso kontra e kompania pa e daño sikológiko ku e plataformanan lo ta okashoná serka mucha i hóben.
E wikènt aki e korant The New York Times a publiká a base di un dokumento nobo ku e estadonan ta bai demandá e kompania tambe pa violashon di privacy.
Ofisialmente muchanan bou di 13 aña no ta pèrmití riba Instagram. Pero segun e estadonan ku ke hiba e kompania dilanti atrobe Meta ta disponé di i tambe ta mantené datonan personal di miónes di mucha bou di 13 aña.
Instagram lo no ta kontrolá sufisiente si usuarionan nobo ta kumpli ku e rekerimentu aki. For di e-mails i mensahenan di chat interseptá e kompania lo a asta atraé usuarionan ku ta muchu yòn pa e plataforma. Tambe e kompania lo a ignorá atevertensha ku tin usuariona muchu yòn ta registrá.
by Webmaster | 24/11/2023 | IT, Apps & Social Media
OpenAI, e kompania ku tabata hala hopi atenshon último dianan den mundu di inteligensha artifisial, lo tabata trahando riba un modelo asina avansá ku esaki a spanta vários trahadó. Pa ta mas eksakto nan a denominá e modelo aki komo un peliger pa humanidat.
Asina agensia di prensa Reuters a informá a base di fuentenan na e kompania. No tin klaridat sinembargo si ta trata di e model Q* (pronunsiá Q Star) i si ta esei tabata motibu pa retiru di Sam Altman siman pasá.
E modelo Q* lo ta asina potente ku investigadónan ta bati alarma. E programa lo a desaroyá su mes muchu lihé. Segun e revista online di teknologia The Information e sistema lo a siña kalkulá masha lihé mes sin konosementu previo di kon hasi sierto kálkulo.
Na momentu ku un sistema por siña kalkulá su so básikamente e por funshoná independiente kaba.
Manera indiká, no tin klaridat si e retiru inesperá di Sam Altman komo direktor di e kompania ta relashoná ku e desaroyo aki. Un dia promé ku a retir’é Aktman a bisa ku tabatin un fase nobo den desaroyo di inteligensha artifisial. Na e okashon ei Altman tampoko a menshoná Q*.
OpenAI, ku ta produsí tambe ChatGPT, no kier a reakshoná riba preguntanan di e korant The Guardian.
by Webmaster | 22/11/2023 | IT, Apps & Social Media
E drama rondó di retiru di èks direktor di e kompania di inteligensha artifisial OpenAI ta kontinuá. Siguiendo e òntslag di Sam Altman komo direktor di e kompania djabièrnè siman pasá i anunsio ku el a haña un trabou nobo na Microsoft, entretantu Altman ta bèk na OpenAI.
Despues di hopi preshon di invershonistanan riba gerensha di OpenAI, esaki a mir’é fòrsá di pidi Altman bini bèk. A resultá tambe ku lo remplasá algun miembro di e direktiva di e kompania ku a èksigí retiru di Altman anteriormente. E miembronan aki no tabatin konfiansa den Altman.
Djaluna a resultá ku Sam Altman lo a haña un trabou nobo na Microsoft kaminda lo el a bai guia un team nobo dediká na inteligensha artifisial. Microsoft ta alabes un di e invershonistanan mas grandi di OpenAI ku no tabata kontentu ku e desishon pa retirá Altman.
Direktor di Microsoft Satya Nadella a duna di konosé djarason mainta ku e reinstalashon di Altman komo direktor mester stabilisá e kompania. Tambe mester instalá un gerensha nopbo ku ta mihó informá riba funshonamentu di e direktor.
E preshon riba e gerensha di OpenAI tabata bini di tur banda inkluso di den e kompania mes. Hopi trahadó a indiká di lo retirá si Altman no bini bèk.
Despues di tur e preshon parti di e gerensha lo retirá. Pero te asina leu no tin klaridat ainda dikon sierto miembro kier a mira Sam Altman retirá.
by Webmaster | 21/11/2023 | IT, Apps & Social Media
Sam Altman, for di djabièrnè èks direktor di OpenAI, a haña un posishon na Microsoft kaminda lo e guia un team ku lo traha riba inteligensha artifisial. Direktor di Microsoft Satya Nadella a partisipá e notisia personalmente. No solamente Altman, pero tambe ko-fundadó di OpenAI Greg Brockman tambe a bandoná e kompania pa bai traha na Microsoft.
Djabièrnè último e notisia di retiru fòrsá di Sam Altman for di OpenAI, e kompania ku ta produsí ChatGPT, a lanta hopi stòf den mundu di IT. Direktiva di e kompania no tabatin konfiansa mas den Altman. Poko despues di e òntslag di Altman, ko-fundadó Brockman tambe a bandoná e kompania.
Microsoft ta un di e invershonistanan mas importante pa OpenAI. E gigante a finansiá mayor parti di e start-up di OpenAI. E kambionan na OpenAI no a kambia Microsoft su disposishon pa sigui traha ku e kompania.
by Webmaster | 20/11/2023 | IT, Apps & Social Media
Invershonistanan ku a hinka kapital den OpenAI, e kompania tras di e konosido programa di inteligensha artifisial ChatGPT, ta butando hopi preshon riba gerensha pa drai bèk e desishon pa retirá Sam Altman komo direktor. Asina agensia di prensa Bloomberg a publiká despues di e òntslag di Altman djabièrnè último. E notisia inesperá a lanta basta stòf.
Invershonistanan no a keda kontentu ku e desishon di gerensha di OpenAI. Altman lo ta dispuesto na bai bèk. Di momentu e direktor tékniko di OpenAI ta okupando e funshon temporalmente.
E gerensha di OpenAI a bisa djabièrnè ku su retiru ta relashoná ku un investigashon ku a mustra ku e no a komuniká semper habrí ku e gerensha i ku esei tabata stroba su bon funshonamentu.
Microsoft, un di e invershonistanan mas grandi di OpenAI lo ta pará tras di e direktor retirá. Den e kompania tambe lo tin vários stèm a lanta siguiendo e retiru. Asina e ko-fundadó di OpenAI Greg Brockman lo a retirá komo forma di protesta i asina lo tin vários trahadó klave ku ta pensa di sigui su ehèmpel. Nan lo ke uni Altman den lantamentu di un otro kompania di inteligensha artifisial di akuerdo ku fuentenan ku a papia ku agensia di prensa Reuters.
Segun agensia di prensa Bloomberg tin un diferensha di vishon entre Altman i gerensha di e kompania relashoná ku siguridat di inteligensha artifisial, e rapides di e desaroyonan i e aspketo komersial ku ta hasiendo su entrada den e mundu di inteligensha artifisial.
by Webmaster | 17/11/2023 | IT, Apps & Social Media
E korant The Guardian a kita un karta di Osama Bin Laden for di su website. Den e karta Bin Laden ta splika ku e atake riba Merka riba 11 di sèptèmber 2001 ta entre otro pa motibu di e pais su sosten pa Israèl. Den último dianan e karta a bira viral riba TikTok.
E karta a keda publiká 21 aña pasá riba 24 di novèmber di 2002. E korant no a kita e página kompleto sino solamente e karta. Riba e página original tin un mensahe kaminda The Guardian ta motivá su desishon.
Ta trata di videonan kaminda hóbennan ta reakshoná riba e kontenido di Bin Laden su karta. Un di e videonan aki a haña mas di 1 mion di views despues ku e usuario a yama otronan pa bai lesa e karta.
Despues a sigui vários otro video di usuarionan ku sea ta lesa e karta kompleto na bos haltu òf partinan di e karta. Otronan ta bisa ku nan ta den shòk pasobra nan ta pa un gran parti di akuerdo ku Bin Laden ku ta referí na inhustisianan kontra di Palestino.
No ta masha komun ku korantnan ta kita artíkulonan bieu for di nan website. Pero den e kaso aki, asina The Guardian a splika e website 404 Media, e usuarionan di TikTok a kompartí e karta sin menshoná su konteksto original.
Ta asina ku no ta 100% sigur ku e karta ta di Bin Laden mes. E karta original ta bin di un website kaminda Al Qaida tabata kompartí mensahe 21 aña pasá. Te asina leu tabata asumí ku e karta por ta di Bin Laden, pero esaki nunka a keda konfirmá.
by Webmaster | 16/11/2023 | IT, Apps & Social Media
Facebook a kometé un eror remarkabel djarason ku anunsio di dia di elekshon pa parlamentu na Hulanda. Sinembargo elekshon na Hulanda ta próksimo siman.
Djarason mainta Hulandesnan de pronto a mira e mensahe “Vandaag zijn de verkiezingen. Krijg officiële informatie om vandaag, 22 november, te gaan stemmen voor de Tweede Kamerverkiezingen van 2023.”
E link ku tabata kompañá e mensahe tabata dirigí usuarionan pa e website Rijksoverheid. No tin masha klaridat ta kiko a bai robes i kuantu usuario di Facebook a mira e mensahe. Entretantu e eror ta resolvé. E mensahe ta bisa awor “Bereid je voor om te gaan stemmen” kompañá pa un link pa mas informashon riba e elekshon.
Facebook no a reakshoná den prensa Hulandes ainda riba e insidente. Dor di reorganisashon Facebook no tin un team pa atendé ku prensa mas den Benelux for di komienso di e luna aki.
Ta pa motibu di insidentenan asin’akí mes ku retnan sosial i inteligensha artifisial ta un tema di interes durante e kampaña aki na Hulanda. Opservadónan ta vigilá e plataforma ku wowo di falki relashoná ku posibel fake news ku ta sirkulá den periodo di elekshon òf intentonan pa influenshá esaki.
Mas o ménos 9 mion Hulandes, o sea un poko mas ku mitar di e poblashon di Hulanda, ta hasi uso di Facebook.
by Webmaster | 15/11/2023 | IT, Apps & Social Media
TikTok i YouTube mester splika Komishon Oropeo kiko nan ta hasi pa protegé mucha di kontenido ku no ta adekuá pa nan. Relashoná ku esaki e komishon a start un investigashon.
For di ougùstùs e kompanianan mester kumpli ku reglanan mas severo ku ta konta den hinter Union Oropeo. Asina e kompanianan mester vigilá e bienestar sikológiko i físiko di usuarionan.
Ta asina ku a someté ámbos plataforma na un asina yamá ‘stress test’ pa kontrolá si e plataformanan ta ‘safe’ pa mucha, pero nan no a pasa e tèst. Den próksimo 2 siman e kompanianan lo mester duna kuenta i rason. Si e kompanianan no kumpli nan mester tene kuenta ku un but na un suma hopi haltu.
Partikularmente TikTok a haña pregunta adishonal riba plamamentu di fake news, glorifikashon di terorismo i mensahenan di odio. No ta promé biaha ku Union Oropeo ta hala e kompania su atenshon pa ku e partikularidat aki.
Otro plataformanan manera X (ántes Twitter) i Facebook tambe mester kumpli ku e reglanan.
by Webmaster | 15/11/2023 | IT, Apps & Social Media
TikTok pronto lo implementá e funshon Add to Music App. Ku e funshon nobo aki usuarionan por warda kansionnan ku nan haña via TikTok riba nan servisio di streaming di preferensha pa musik. E funshon nobo lo sali promé na Merka i Reino Uní i despues lo sigui un lansamentu mundial.
E funshon Add to Music App lo ta integrá ku entre otro Amazon Music i Spotify. Segun Music Business World e funshon lo ta disponibel tambe pa usuarionan di Apple Music.
