by Webmaster | 26/07/2024 | Naturalesa
E kantidat di atake di wòlf riba karné na Hulanda ta subiendo duru. Den promé tres luna di e aña aki a registrá tres biaha e kantidat di atake registrá den e mesun periodo di 2023. Den e gran mayoria di kaso ta trata di falta di medida. Den tur kaso ta 100% sigur ku ta trata di atake di wòlf. Atake di kachó tambe ta konosí pero skars.
Den promé tres luna di e aña aki a registrá 267 atake, kompará ku 77 aña pasá di akuerdo ku ANP a base di datonan di BIJ12, un organisashon ku ta registrá insidente ku wòlf pa e provinsianan kaminda e animalnan ta biba.
Mayoria atake a tuma lugá na Ooststellingwerf, un lugá na Friesland pegá ku frontera ku Drenthe. Ei a registrá 39 atake. Generalmente e atakenan a tuma lugá den e konosido region Veluwe. Na Ede a registrá 27 insidente i na Elburg 22.
Na Gelderland a nota un subida konsiderabel den promé tres luna di e aña aki kompará ku hinter 2023. No ta straño ku mayoria atake ta tuma lugá aki pasobra einan mayoria wòlf na Hulanda ta biba.
Ya tin vários famia registrá kaba. Asina na Veluwe tin 7 famia registrá, Drenthe tin 2 i tambe a nota un famia mas na Heuvelrug den e provinsia Utrecht. Einan a sera e ária kaminda e wòlfnan ta move te ku 15 di ougùstùs próksimo despues di algun insidente ku a lanta hopi konsternashon.
E kousa di e subida ta ópviamente dor di e subida di e kantidat di ehemplar. Na total Hulanda tin 51 wòlf bibando den naturalesa. 18 luna pasá ainda tabatin 29 ehemplar só.
E subida di e inisdentenan ta relashoná tambe ku e falta di medida di prekoushon. Den 90% di e atakenan ta trata di kuránan ku no ta protegé kontra wòlf.
Den tur e provinsianan afektá tin supsidio disponibel pa kubri e gastunan. Ku e fondonan por kumpra kuránan special i retnan ku oriente riba dje, pero te asina leu tabatin poko petishon pa e supsidio aki.
by Webmaster | 26/07/2024 | Naturalesa
Sientífikonan a deskubrí kokaina den tribonnan ku ta habitá kosta di Brasil. E nivel di e droga den nan spir i higra ta 100 biaha e kantidat hañá den otro espesienan di laman.
E investigashon tabata bou di kargo di Oswaldo Cruz Foundation ku a fangu i studia 13 ehemplar di e rasa “cazón de playa” (scherpsnuithaai), un tipo di tribon ku ta habitá parti west di Atlántiko.
E sientífikonan ta sospechá ku e kokaina a drenta kurpa dje tribonnan via konsumo di residuo di e laboratorionan kaminda ta produsí e droga. Otro posibel kousa ta ku e animalnan a konsumí e droga ku usuario òf trafikantenan a sea dùmp òf pèrdè riba laman.
E kokaina ópviamente no ta bon pa salú dje animalnan i ta daña nan DNA i kapasidat pa prosesá vèt. E efekto riba nan komportashon ainda no ta konosí. Ta asumí a base di kasonan anteriormente konosí ku e efekto lo ta igual na esun riba sernan humano.
E deskubrimentu no ta solamente di atenshon pa e animalnan, pero pa hende tambe. Sòpi di tribon ta un plato popular den vários parti di mundu.
by Webmaster | 25/06/2024 | Naturalesa
Resien a bolbe deskubrí un kaso di partenogenesis. Esaki ta un fenómeno natural pero hopi skars kaminda un ser bibiente ta reprodusí sin kontakto seksual ku otro ehemplar. Ta trata aki di un boa na un instituto ku a haña 14 bebi sin ku e animal tabatin kontakto ku otro boa den ultimo 9 aña.
Pa kolmo semper tabata asumí ku e animal ta un machu i p’esei e yama Ronaldo. E parto a lanta dimes hopi pregunta di akuerdo ku City of Portsmouth College ku a investigá e kaso.
E skol a indiká ku partenogenesis no ta algu deskonosí i ku ta un forma natural di reprodusí pa sierto espesie riba nos planeta. Ta un fenómeno opservá den vários mata i animal. Ta di tres biaha tambe ku a opservá e fenómeno aki serka boanan di e mesun sorto den terarium pa algun aña kaba.
by Webmaster | 04/03/2024 | Naturalesa
Elefante Asiátiko ta tene entiero pa nan kompañeronan meskos ku hende. Sientífikonan na India a opservá na vários okashon elefantenan ta reuní pa dera un miembro di nan grupo. E enkuentronan aki ta bai kompañá pa sonidonan di lamento tambe.
Na total e sientífikonan a opservá 5 entiero entre 2022 i 2023. Den mayoria kaso tabata trata di ehemplarnan ku a muri hopi yòn. E estudio kompleto ta publiká den e revista Journal of Threatened Taxa.
E entieronan a tuma lugá den parti ost di India den e region Bengalen. Na kada entiero lo tabatin entre 15 pa 20 ehemplar. A nota tambe ku e animalnan no ta parse di skonde pa hende. Un di entieronan a tuma lugá na mas o ménos 200 meter for di un pueblo habitá.
E elefantenan a karga un yu morto huntu pa un sitio kaminda nan ta pone e kurpa den un parti profundo di tera lòs pa despues kubri esaki ku tera. Tambe a registrá e sonidonan di lamento di e animalnan.
Den promedio e seremonianan tabata tuma mas o ménos 40 minüt. Despues e animalnan no ta bai bèk e graf.
Entieronan den reino animal ta hopi skars. Aparte di esun di elefante tambe a nota ritualnan komparabel serka chimpansé i vruminga. Serka elefante e seremonia ta dura sinembargo mas largu.
by Webmaster | 29/01/2024 | Naturalesa
Den fondo di Atlántiko a deskubrí e ref di koral di oseano mas grandi den historia. Ku teknologia avansá investigadónan a logra midi un region di 26 mil kilometer kuadrá den fondo di oseano ku te asina leu no tabata butá riba mapa. For di 1960 ta konosí ku tin koral den e region ei, pero e tamaño eksakto no tabata konosí.
Blake Plateau, manera e region yama, ta keda den parti wèst di Atlántiko na altura di estado Florida na Merka na un profundidat ku ta vária di 500 pa 1000 meter.
Mas o ménos 75% di fondo di oséano te ainda ta tereno deskonosí pa siensia. Pa motibu di e tamañonan enorme di e regionnan den fondo di laman a tuma kasi 10 aña pa determiná e midínan di e region aki. E investigashon a tuma 23 ekspedishon ku supmarino ekipá ku sonar.
Durante e eksplorashon den fondo di oseano a identifiká mas di 84 mil seru di koral. E tipo di koral aki ta blanku dor ku e no ta kome alga sino mikro-organismo ku ta biba den fondo profundo di oseano. E área ta habitá pa vários espesie ku ta biba den fondo di oseano leu for di superfisie.
E resultadonan di e investigashon ta publiká riba e website di Multidisciplinary Digital Publishing Institute.
by Webmaster | 25/01/2024 | Naturalesa
Sientífikonan posiblemente a haña un manera pa salba e rinoseronte blanku di nort for di ekstinshon. Un asina yamá tratamentu in vitro ta duna speransa. Ta dos ehemplar so a sobra ku ta kedando aworaki bou di vigilansha severo na Kenia.
E tratamentu a tuma lugá riba un otro tipo di rinoseronte ku tin similaridat fuerte. Ta asina ku tin dos tipo di rinoseronte blanku: e tipo di nort i e tipo di sùit. Despues di 13 intento nan a logra embarasá un ehemplar femenino.
Den laboratorio sientífikonan a logra fertilisá un webu i koloká esaki bèk den kurpa di e animal, ku a aseptá esaki. E eksperimento lamentablemente a haña un interupshon inesperá ora ku e animal a keda infektá ku un bakteria ku a resultá fatal.
No opstante e kontratempu aki e resultado ta duna speransa pa salba e rinoseronte blanku di nort di ekstinshon. Histórikamente tabatin hopi ehemplar ta biba den Sentral Áfrika, pero e sorto a kasi disparsé por kompleto dor di yagmentu ilegal.
Awor e sientífikonan ke purba e mesun eksperimento riba e dos ehemplarnan ku ta kedando na Kenia. Ta trata por sierto dos ehemplar femenino: Najin i su yu muhé Fatu.
Sientífikonan tin 30 èmbrio wardá ku ta trahá ku webu di Fatu i simia di dos machu ku sientífikonan a warda nèt promé ku nan a muri. Dor ku Najin i Fatu ta muchu bieu pa fertilisá, lo mester implantá e embryo serka un ehemplar di sùit. Si esaki resultá eksitoso, tin speransa pa sobrebibensha di e sorto.
by Webmaster | 15/01/2024 | Naturalesa
Islandia ta registrá mas aktividat volkániko. Djadumingu mainta un volkan pegá ku e kapital Reykjavik a drenta erupshon. E lava ku a sigui e eksploshon ta saliendo for di un apertura den tera di kasi un kilometer i a pega vários kas na kandela na e pueblo Grindavík.
Habitantenan ta siguiendo e desaroyonan na nan hogarnan via kámaranan ku nan a instalá sin por hasi nada. Ya lo tin daño na e provishonnan di koriente i kalor.
Tabatin mas o ménos 200 persona na e sitio na momentu di e eksploshon. Mayoria di e 3000 habitantenan di Grindavík ya a evakuá algun siman pasá despues di otro erupshon den desèmber. Finalmente e riu di lava a kue otro rumbo, pero na e okashon aki si el a bai mas den direkshon di área habitá.
by Webmaster | 09/01/2024 | Naturalesa
E isla sùit di Nova Zelandia a yama bon biní na un kantidat grandi di foka ku ta okupando kada bes mas espasio riba e isla. Dor di un ola di parto bou di e animalnan tin hopi mas ehemplar ku normal. Ta normal ku durante desèmber i yanüari e animalnan ta haña beibi aserka, pero e aña aki si nan ta parse hopi mas.
Segun e korant The Guardian e animalnan ta paresé den kurá di hende, riba vèltnan di gòlf, bich i kantu di kaminda. Nan no ta parse di tin ku nes ku hende i ta basta fresku, pero problema òf peliger te asina leu nan no ta okashoná.
Habitantenan ta purba adaptá mas tantu posibel na e situashon. Asina nan ta evitá konfrontashon ku kachó dor di tene esakinan paden òf kore outo ku mas koutela. Hende generalmente ta kombibí ku e animalnan pasífikamente for di añanan 90 ora e populashon a rekuperá despues di un ousensia di vários dékada. Esaki danki na un programa intensivo pa konservá e animalnan.
by Webmaster | 20/12/2023 | Naturalesa
E kapital di Islandia Reykjavik ta riba e ruta di un nubia di polushon siguiendo e erupshon volkániko di djaluna. E polushon ta konsistí di gasnan ku a skapa for di tera despues di erupshon. Asina outoridatnan den e pais a informá.
Reykjavik ta keda na mas o ménos 30 kilometer for di e península Reykjanes, kaminda e erupshon a tuma lugá bou di tera. E temblornan a okashoná aperturanan kaminda e lava ta spùit sali.
Dor ku habitantenan di e region tabata tene kuenta ku e erupshon nan a evakuá algun siman pasá kaba. Afortunadamente no ta parse ku e lava ta kore den direkshon di nan kasnan. E mal kalidat di airu por lo pronto lo keda un problema i pa e motibu ei nan no por bai bèk nan kas ainda.
No ta konosí ainda kon largu e situashon lo persistí. E situashon por vária di algun dia te na algun luna. Outoridatnan te ainda no ta premirá problemanan grandi pa pasahe di avion ya ku e kantidat di shinishi te asina leu ta hopi abou.
by Webmaster | 19/12/2023 | Naturalesa
Habitantenan tabata antisipá pa algun siman kaba ora ku djaluna un volkan bou di tera na Islandia a drenta erupshon. E mas o ménos 4 mil habitantenan di e region a evakuá algun siman pasá kaba ora e aktividat tabata okashoná temblor.
E lava ta saliendo pues for di tera. Riba medionan internashonal tin bastante imágen di e fenómeno natural aki. Te asina leu no a raportá persona heridá.
E aktividat volkániko ta tumando lugá partikularmente na e península Reykjanes, ku di momentu ta será dor di outoridatnan te próksimo aviso. Tambe e spa Islandes mundialmente konosí Blue Lagoon por lo pronto lo keda será.
Normalmente e aktividat volkániko ta tuma lugá leu di lugánan habitá. Pero na e okashon aki el a yega muchu serka. Luna pasá Islandia a proklamá estado di emergensha den e region.
E situashon na e sitio ta naturalmente hopi peligroso, pero e fònteinnan di lava ku ta típiko na e region ta keda un espektákulo impreshonante.
by Webmaster | 12/12/2023 | Naturalesa
Na Brasil un kantidat enorme di foka a muri den último par di luna dor di kontagio ku grip di para. E malesa a lanta kabes den mei di e aña aki. E grip posiblemente no ta afektá solamente foka, pero tambe pinguino i tortuga. Na Rio Grande do Sul a haña vários karkas.
For di sèptèmber ya tabatin indikashon ku algu tabata pasando ku e populashon. For di outopsia riba 942 foka morto a determiná ku ta trata en bèrdat di grip di para. Kriadónan di galiña ta preokupá. E sektor Brasilero ta esun mas grandi na mundu i tin basta miedu pa ku un prohibishon di eksportashon atrobe.
Posiblemente e malesa a surgi na Perú, pa despues sigui plama tambe pa Chile, Argentina i Uruguay.
by Webmaster | 01/12/2023 | Naturalesa
Un dama di 70 aña na Uganda a duna lus na un oochi. Ku esei el a bira e mama mas na edat di Áfrika. Mester a yuda e señora si ku un operashon, pero tantu e mama komo e dos yunan ta den bon estado di salú.
No tin klaridat kon e embaraso por a tuma lugá. Mayoria hende muhé ta pasa dor di menopouse entre nan 40 i 60 aña i despues nan no ta fértil mas. Ta por sierto di 2 biaha den poko tempu ku e ta duna lus. Tres aña pasá kaba el a haña un yu muhé.
Den Uganda Daily Monitor el a splika ku e tabata ke yu na e edat ei pasó el a kansa di komentario di hende rondó di dje riba e echo ku nunka el a haña yu.
by Webmaster | 24/11/2023 | Naturalesa
E estadonan Merikano Minnesota, North Dakota i Montana a tuma medida pa kombatí un invashon di asina yamá ‘super pigs’ for di Canada. Lo ta trata di porkonan di mondi Canades krusá ku porkonan di mondi Oropeo ku ta krese bira basta grandi i ta sobrebibí hopi bon.
Pero ta trata di un populashon super invasivo ku ta hasi hopi daño na naturalesa i na kosecha. Dor di nan tamaño nan tin hamber konstantemente okashonando asina basta daño na e teritorionan ku nan drenta.
Aparte di esei e animalnan ta reprodusí masha lihé mes. Asta ku yagmentu ta difísil kontrolá e populashon. Segun kálkulonan asta si tira 65% di nan mata e populashon lo sigui krese.
Na Minnesota a nota algun ehemplar na un distansha di 28 kilometer for di frontera ku Canada, pues ya nan ta basta leu riba teritorio Merikano kaba.
by Webmaster | 22/11/2023 | Naturalesa
Sigur 3 persona a pèrdè nan bida siguiendo un movementu di tera na Alaska. Ainda tin 3 otro persona pèrdí. Djaluna anochi un parti di un seru kaminda tabatin hopi palu ta krese a derumbá dor di su propio peso.
Tin mas o ménos 2000 persona ta biba den e área di e insidente. Ta trata di un lugá pegá ku kosta kaminda partikularmente piskadó i kapdó di palu ta biba i traha.
Trabounan di reskate ta kana poko poko relashoná ku e peliger di instabilidat di tera. Anteriormente áwaseru a okashoná bastante peso èkstra riba e área ku a derumbá bin abou. E influensha di e forsa di awa tambe a kontribuí na e derumbe.
by Webmaster | 13/11/2023 | Naturalesa
Na Italia a kapturá un leon despues ku esaki a hui for di un sirko djasabra último. Ku un sedante por a kalma e animal un poko pa despues por fang’e. Segun e gerensha di e sirko a haña spor di sabotahe na e kouchi di e animal.
E insidente a tuma lugá na e lugá Ladispoli, un lugá ku mas o ménos 40 mil habitante ku mester a keda paden pa evitá enkuentro ku e animal.
E insidente a hala bastante atenshon riba retnan sosial, pasobra kontrali na otro notisianan paresí na e okashon aki no tabata trata di un rumor. Tin vários grabashon ku ta konfirmá ku e leon tabata kana lòs den e siudat.
Outoridatnan ta bai investigá si en bèrdat ta trata di sabotahe. Lo tabatin bastante hende kontra e bishita di e sirko.
