Jacob Zuma i ANC ta separá for di otro

Jacob Zuma i ANC ta separá for di otro

Èks presidente di Sur Áfrika Jacob Zuma no ta forma parti por lo pronto mas di partido ANC, e partido anteriormente liderá pa Nelson Mandela. Zuma i e partido pa algun tempu ta den konflikto ku otro. Esaki a kulminá ora ku Zuma a indiká di lo vota pa otro partido na e próksimo elekshon na Sur Áfrika.

Jacob Zuma tabata presidente di e pais na nòmber di ANC entre 2009 i 2018. Zuma a retirá relashoná ku akusashonnan di korupshon i a bai asta será despues di a ninga koperá ku e investigashon.

Zuma a indiká di lo sostené uMkhonto We Sizwe (MK), ku a nase di e divishon harmá di ANC durante e periodo di Apartheid. ANC sinembargo no ta rekonosé MK komo partido i ta èksigí e nòmber bèk.

Investigadónan ta deskubrí ref di koral di oseano mas grandi den historia

Investigadónan ta deskubrí ref di koral di oseano mas grandi den historia

Den fondo di Atlántiko a deskubrí e ref di koral di oseano mas grandi den historia. Ku teknologia avansá investigadónan a logra midi un region di 26 mil kilometer kuadrá den fondo di oseano ku te asina leu no tabata butá riba mapa. For di 1960 ta konosí ku tin koral den e region ei, pero e tamaño eksakto no tabata konosí.

Blake Plateau, manera e region yama, ta keda den parti wèst di Atlántiko na altura di estado Florida na Merka na un profundidat ku ta vária di 500 pa 1000 meter.

Mas o ménos 75% di fondo di oséano te ainda ta tereno deskonosí pa siensia. Pa motibu di e tamañonan enorme di e regionnan den fondo di laman a tuma kasi 10 aña pa determiná e midínan di e region aki. E investigashon a tuma 23 ekspedishon ku supmarino ekipá ku sonar.

Durante e eksplorashon den fondo di oseano a identifiká mas di 84 mil seru di koral. E tipo di koral aki ta blanku dor ku e no ta kome alga sino mikro-organismo ku ta biba den fondo profundo di oseano. E área ta habitá pa vários espesie ku ta biba den fondo di oseano leu for di superfisie.

E resultadonan di e investigashon ta publiká riba e website di Multidisciplinary Digital Publishing Institute.

Hòmber detené despues di habri porta di emergensha di avion pa kana riba ala

Hòmber detené despues di habri porta di emergensha di avion pa kana riba ala

Un hòmber na Mexico City a keda detené despues ku el a habri e porta di emergensha di un avion di Aeromexico pa e kana sali riba e ala. E hòmber lo a pèrdè pasenshi despues ku e avion a keda tres ora na tera ku retraso. E kompania di aviashon no a fasilitá èrko i awa pa e pasaheronan.

E hòmber no a hasi daño partikular na e avion i otro pasaheronan a aploudó su inisiativa. Siguiendo e insidente e pasaheronan a formulá un komunikado konhunto kaminda nan a sostené su akshon. Den e deklarashon tambe nan ta mustra riba e deterioro di e kalidat di airu den e avion.

E avion lo tabatin algun problema di mantenshon i no por a sali ainda. Siguiendo e akshon e pasaheronan mester a abordá otro avion. No tin klaridat kua sanshon lo imponé riba e hòmber ku a habri e porta. Den transkurso di djaluna lo sigui mas informashon.

Èks kasá Jeff Bezos a bende mas di 10 mil mion dòler riba merkado di balor

Èks kasá Jeff Bezos a bende mas di 10 mil mion dòler riba merkado di balor

MacKenzie Scott, èks kasá di fundadó di Amazon Jeff Bezos, a bende aña pasá 65,3 mion akshon den e kompania. Riba djabièrnè e akshonnan ei tabatin un balor di 10.3 mil mion dòler ora ku merkadonan di balor a sera. E akshonnan ku Scott a bende aña pasá ta representá mas o ménos 1 kuart di su interes den Amazon.

Despues di nan divorsio den 2019 Scott a risibí 4% di e akshonnan den Amazon, loke a but’é den 1 tiru den e tòp di muhénan ku mas kapital na mundu. Na e okashon ei el a indiká ku lo e duna mitar di su fortuna na karidat. Entretantu el a duna mas di 15 mil mion dòler na karidat. Asina lo el a yuda organisashonnan di karidat ku mas di 3500 mion dòler durante e pandemia di Covid-19 den 2020.

Scott su èks kasá Jeff Bezos tambe lo ta hasi donashonnan kuantioso na proyektonan di karidat, partikularmente organisashonnan okupá ku kambio di klima.

Disputa na India: ken a inventá butter chicken?

Disputa na India: ken a inventá butter chicken?

Un korte na India mester bai determiná ken ta e inventor di murgh makhani, mihó konosí den mundu kulinario komo butter chicken. Dos famia ku un kadena di restorant grandi den e pais ta bisa kada un di ta e inventor original di e plato aki. Asina vários medio na India a informá.

Butter chicken ta un manera pa mariná filèt di galiña i kombiná esaki ku un sous trahá a base di manteka. E plato ta inkluí puré di tomati i krema i ta un di e delisianan original di India mas popular den restorantnan rònt mundu ku konosé e reseta.

E doñonan di e kadena Moti Mahal ta bisa ku nan a inventá e plato den añanan 30 despues ku un miembro di famia a deskubrí un kombinashon di speserei na Pakistan. E konkurente Daryaganj ta bisa sinembargo ku e plato ta un idea ku a surgi den 1947 ora ku e fundadónan di ámbos kadena tabata hasi negoshi ku otro.

E konflikto ta hañando bastante atenshon den medionan na India. Asina kanalnan di televishon ta pasando vários programa riba e plato aki. Riba retnan sosial tambe por nota ku e disputa a krea dos kampo ku ta diskutí fuerte ku otro riba e tema.

Speransa pa sobrebibensha di rinoseronte blanku di nort

Speransa pa sobrebibensha di rinoseronte blanku di nort

Sientífikonan posiblemente a haña un manera pa salba e rinoseronte blanku di nort for di ekstinshon. Un asina yamá tratamentu in vitro ta duna speransa. Ta dos ehemplar so a sobra ku ta kedando aworaki bou di vigilansha severo na Kenia.

E tratamentu a tuma lugá riba un otro tipo di rinoseronte ku tin similaridat fuerte. Ta asina ku tin dos tipo di rinoseronte blanku: e tipo di nort i e tipo di sùit. Despues di 13 intento nan a logra embarasá un ehemplar femenino.

Den laboratorio sientífikonan a logra fertilisá un webu i koloká esaki bèk den kurpa di e animal, ku a aseptá esaki. E eksperimento lamentablemente a haña un interupshon inesperá ora ku e animal a keda infektá ku un bakteria ku a resultá fatal.

No opstante e kontratempu aki e resultado ta duna speransa pa salba e rinoseronte blanku di nort di ekstinshon. Histórikamente tabatin hopi ehemplar ta biba den Sentral Áfrika, pero e sorto a kasi disparsé por kompleto dor di yagmentu ilegal.

Awor e sientífikonan ke purba e mesun eksperimento riba e dos ehemplarnan ku ta kedando na Kenia. Ta trata por sierto dos ehemplar femenino: Najin i su yu muhé Fatu.

Sientífikonan tin 30 èmbrio wardá ku ta trahá ku webu di Fatu i simia di dos machu ku sientífikonan a warda nèt promé ku nan a muri. Dor ku Najin i Fatu ta muchu bieu pa fertilisá, lo mester implantá e embryo serka un ehemplar di sùit. Si esaki resultá eksitoso, tin speransa pa sobrebibensha di e sorto.

Netflix ta sigui krese despues di kuartal eksitoso

Netflix ta sigui krese despues di kuartal eksitoso

E kantidat di persona aboná riba Netflix a subi aña pasá ku 13% te 260 mion. E subida aki a sigui despues ku Netflix a para e opshon pa kompartí account grátis ku otro hende ku no ta aboná. Outomátikamente hopi hende mester a aboná pa por hasi uso di e servisio.

Asina den e último kuartal di 2023 Netflix a haña 13,1 mion abonado aserka. Pa hasi un komparashon: den hinter 2022 e servisio a haña 9 mion abonado.

E subida fuerte aki ta nifiká outomátikamente hopi entrada tambe. Den último kuartal di 2023 Netflix a generá 8.8 mil mion dòler, esta 12,5% mas ku e mesun periodo un aña promé.

E resultado aki ta buta Netflix na kabes den e kompetensha entre servisionan di streaming. Pa e promé kuartal aki Netflix ta premirá un subida ménos fuerte, pero tòg mas haltu ku aña pasá den e mesun periodo aki.

Por sierto ku e kompania ta hasiendo invershonnan kuantioso pa introdusí videogames i transmishonnan live di wrestling den futuro.

Oppenheimer, Barbie i Poor Things nominá pa Oscar pa mihó film

Oppenheimer, Barbie i Poor Things nominá pa Oscar pa mihó film

Oppenheimer, Barbie i Poor Things ta nominá pa e Oscar pa mihó pelíkula. Ku 13 nominashon partikularmente Oppenheimer di direktor Christopher Nolan tin potensial di saka mas premio. Resien e pelíkula a bai kas ku mayoria premio na otorgashon di Golden Globes.

E títulonan American Fiction, Anatomy of a Fall, The Holdovers, Killers of the Flower Moon, Maestro, Past Lives i The Zone of Interest tambe ta den kontienda pa mihó pelíkula.

Oppenheimer ta menshoná den mayoria kategoria, entre otro mihó aktor, mihó direktor, mihó ko-protagonista maskulino i femenino i mihó trabou di kámara. E pelíkula Barbie ta e di tres pelíkula ku mas nominashon, 8 na total. E comedy Poor Things ta den kontienda pa 10 kategoria, butando e film na e di dos lugá pa risibí posiblemente mas premio.

Killers of the Flower Moon di Martin Scorsese, ku por sierto a haña basta atenshon riba retnan sosial na Kòrsou, ta nominá pa e premio pa mihó aktris. E protagonista Lily Gladstone ta e promé Merikano original den historia ku ta nominá pa e premio aki.

E seremonia di otrogashon ta tuma lugá e aña aki riba 10 di mart i lo keda presentá pa Jimmy Kimmel. E lista kompleto di nominadonan ta disponibel aki.

Trump ta gana buèlta preliminar atrobe na New Hampshire

Trump ta gana buèlta preliminar atrobe na New Hampshire

E kandidato Republikano Donald Trump a gana e elekshon preliminar di e partido den estado New Hampshire. E èks presidente Merikano a gana di su kontrinkante Nikki Haley ku 55,6% di voto kontra 42,8%.

E èks embahador pa Nashonnan Uní sinembargo ainda no ke bandoná e kareda pa e kandidatura. Asina el a enfatisá despues di e resultado. Pa e motibu ei Trump no por konta ainda ku nominashon pa representá e partido den novèmber.

Siman pasá tambe Trump a gana na estado Iowa. Riba 6 di febrüari i 8 di febrüari e siguiente buèlta di elekshon di e partido Republikano lo tuma lugá na Nevada i Virgin Islands respektivamente, pero esakinan no ta estadonan signifikante.

E enkuentro mas importante lo ta riba 24 di febrüari ora Haley i Trump enfrentá otro na South Carolina. Haley tabata gobernador di e estado di 2011 te 2017. Si Haley no gana aki e chèns ta grandi ku e lo anulá su kandidatura.

Bitcoin a baha te na punto mas abou for di 4 di desèmber

Bitcoin a baha te na punto mas abou for di 4 di desèmber

E balor di bitcoin a baha djamars te na su punto mas abou for di 4 di desèmber. Pa promé biaha den último 7 siman e balor di e kriptomoneda tabata bal ménos di 40 mil dòler. E balor a baha ku 4% te na 39.061 dòler mainta pa sera na kabamentu di dia na mas o ménos 38.900 dòler. E preis di ethereum (e di 2 kriptomoneda mas popular na mundu) a baha asta ku 6%.

Analistanan ku a papia ku agensia di prensa Reuters ta menshoná vários kousa. Asina akshonnan tradishonal ta bai basta bon riba merkado di bolsa na Merka. Konsekuentemente ménos hende ta opta pa kriptomoneda.

Anteriormente tabatin optimismo pa ku e desaroyo di balor di bitcoin. Partikularmente ora e outoridatnan konserní a aprobá medidanan pa invershonistanan benefisiá for di subida di kriptomoneda sin kumpra esakinan. Apesar di invershonnan kuantioso den komienso e interes di akshonistanan a kambia lihé atrobe pa otro formanan di traha sèn riba merkado di bolsa.

No opstante e kontratempu pa bitcoin, mester bisa ku e situashon ta mihó ku aña pasá ora ku e balor pa basta tempu tabata bou di 30 mil dòler.

Ehérsito Ecuador ta interseptá 22 tòn di kokaina

Ehérsito Ecuador ta interseptá 22 tòn di kokaina

Ehérsito di Ecuador a logra interseptá sigur 22.000 kilo di kokaina durante un operashon militar. Esaki ta un di e botinnan mas grandi den historia di e pais, en todo kaso esun di mas grandi di último 5 aña.

Outoridatnan lo tin e produkshon di e droga na bista kasi 6 luna kaba. Probablemente e karga tabata destiná pa otro partinan di mundu manera Asia, Oropa i Nort i Sentral Amerika.

Manera ta konosí Ecuador ta pasando di momentu dor di un ola di violensha dor di e influensha di narkotráfiko. Anteriormente e luna aki presidente Noboa di Ecuador a deklará guera na e organisashonnan aki.

E insidentenan den último dianan por sierto ta kontinuashon di un trènt negativo ku ta pèrsistí pa algun aña kaba dor di e influensha di narkotráfiko. Kombatimentu di krímen a resultá un reto grandi pa outoridatnan den práktika.

Atakenan riba outoridatnan ta tuma lugá regularmente. Asina aña pasá a asesiná un kandidato presidensial durante un enkuentro di kampaña. Promé ku su kandidatura e tabata investigá i publiká riba e aktividatnan di organisashonnan kriminal na Ecuador.

Grupo di hacker sostené pa Rusia a penetrá sistemanan di Microsoft

Grupo di hacker sostené pa Rusia a penetrá sistemanan di Microsoft

Un grupo di hacker sostené pa Rusia a logra penetrá e sistemanan di Microsoft. Asina nan a logra haña akseso na e accounts di e-mail di miembronan di gerensha i algun otro kolaboradó. Asina Microsoft a konfirmá den un deklarasahon.

E hackernan a logra apoderá di vários e-mail i dokumento importante. Segun Microsoft e kulpabelnan ta e movementu Midnight Blizzard. E grupo aki lo tin sosten aktivo di Rusia i ta responsabel tambe pa otro atakenan riba Microsoft.

Microsoft ta adaptando su sistemanan despues di a deskubrí e hack siman pasá. Ainda tin vários kolaboradó ku mester haña un notifikashon ainda si nan account ta safe pa uso atrobe.

Klientenan di Microsoft i e sistema di inteligensha artifisisal lo no ta afektá pa e atake.

E grupo ku segun Microsoft ta responsabel pa e atake aki, esta Midnight Blizzard, lo ta responsabel tambe pa e asina yamá SolarWinds hack den 2020. Na e okashon ei no solamente Microsoft, pero tambe un agensia den sektor di armanan nuklear a haña un atake di e grupo aki.

Búskeda despues di tiroteo na Illinois ta kaba te na Texas

Búskeda despues di tiroteo na Illinois ta kaba te na Texas

Polis di e estado Merikano Illinois a haña 7 kurpa durante entrada na 2 bibienda. Tur víktima tabatin herida di bala. Polis a haña 5 di e kurpanan den un kas i 2 otro den un otro bibienda den e mesun kaya.

Despues di un búskeda i pèrsiguishon intensivo a lokalisá e sospechoso na Texas, kaminda aparentemente el a buta un fin na su bida durante un konfrontashon harmá ku polis. E sospechoso lo ta un konosí di e víktimanan, pero e motif pa e tiroteo no ta konosí.

E hòmber, di kua su identidat a resultá Romeo Nance di 23 aña di edat, ta sospechá tambe di un otro asesinato na e sitio kaminda el a hòrta e outo ku el a usa pa su huida.

Ron DeSantis ta anulá kandidatura pa representá partido Republikano

Ron DeSantis ta anulá kandidatura pa representá partido Republikano

Gobernador di Florida Ron DeSantis a anulá su kandidatura pa representá partido Republikano durante e próksimo elekshon presidensial na Merka. Entrenate awor e ta sostené e kandidato i èks presidente di e pais Donald Trump.

Ku e paso aki e ta sigui Vivek Ramaswamy i Asa Hutchinson ku ámbos a retirá for di e kampaña siguiendo e elekshon preliminar na Iowa siman pasá. Einan Trump a gana ku 51% di votonan pa representá e partido republikano.

Promé ku su kandidatura ofisial DeSantis por a konta ku bastante sosten bou di simpatisantenan di e partido. Un dado momentu enkuestanan tabata sugerí ku lo e por gana Trump. Pero una bes ku el a disidí partisipá e senario tabata tòg ketu bai na fabor di su kontrinkante.

Ku retiru di DeSantis Trump tin un kontrinkante ainda, esta èks embahador di Nashonnan Uní Nikki Haley, kende por sierto a ehersé e funshon ei durante presidensia di Donald Trump.

Demanda nobo di homisidio kontra Alec Baldwin

Demanda nobo di homisidio kontra Alec Baldwin

Ta bin tòg un kaso kontra aktor Alec Baldwin relashoná ku un insidente kaminda kamarógrafo Halyna Hutchins a pèrdè su bida. Segun un hurado na New Mexico tin echonan nobo di e kaso a bin na kla den òktober.

E aktor di 65 aña tabata praktikando ku un revolver durante grabashon di e pelíkula Rust den 2021. E revolver no mester tabatin bala aden, pero esaki a resultá tòg e kaso. E bala a alkansá e kamarógrafo fatalmente i tambe direktor Joel Souza a keda heridá. E aktor a bisa te asina leu ku e no a hala e trèker dje arma.

E kaso den aprel aña pasá a keda seponé, pero siguiendo investigashon forénsiko riba e arma lo tin echonan nobo a bin na kla. Segun fiskal ta imposibel ku e arma a dispará su so.

Den e demanda nobo sea Baldwin tabata indiferente òf el a neglishá siguridat di esnan presente. Baldwin lo por keda kondená a base di un di e dos senarionan aki. Den tal kaso lo e mester bai será 1,5 aña pa homisidio.

E aktor ta konfrontá tambe ku vários demanda di e famia di e víktima di e insidente. E partidonan ya tabatin un areglo, pero despues e famianan a lanta otro kaso ku finalmente a keda seponé relashoná ku e echonan nobo.

Aña pasá e kompania di produkshon a finalisá e pelíkula, pero no ta konosí si esaki lo sali den teaternan di sine.