by Webmaster | 06/11/2023 | Siensia
Djaka tin e mesun kapasidat di imaginashon manera hende. Asina investigadónan na Janelia Research Campus a konkluí. Atraves di virtual reality e sientífikonan a midi e aktividat serebral di djaka di laboratorio.
E aktividat opservá lo ta komparabel na esun di sernan humano. Meskos ku serka hende e asina yamá hippocampus, e parti ku ta yuda nos kòrda espasio, tambe ta bira aktivo serka e animalnan di prueba. E kapasidat aki ta krusial pa determiná susesonan di pasado i futuro.
by Webmaster | 02/11/2023 | Siensia
Sientífikonan a haña un kantidat grandi di e gas helium-3 na Canada. E hayazgo ta un indikashon ku tin un eskape den e núkleo di nos planeta, pasobra helium-3 ta lokalisá na un dinstansha hopi profundo. E gas sinembargo no ta dañino i te asta útil. E deskubrimentu ta publiká den e revista Nature.
E sientífikonan a investigá piedra volkániko na e isla Baffin den parti nort di Canada kaminda nan a haña mineral di 62 mion aña ku ta kontené helium-3. Anteriormente a haña kantidatnan komparabel na Islandia kaminda tambe tin hopi aktividat volkániko. Esei lo ta komprobá ku tin un eskape un kaminda den núkleo di nos planeta.
E gas ku ta skapa helium-3 ta un gas ku no ta dañino pa ser humano i ku tin uso den investigashon pa fushon nuklear, e teknologia kontrali di fishon nuklear. E diferensha entre e dos formanan di energia nuklear ta ku fushon nuklear no ta radioaktivo, mientras fishon si ta okashoná radioaktividat. Ku e helium-3 por investigá pues mihó kon implementá fushon nuklear pa energia duradero.
by Webmaster | 24/10/2023 | Siensia
Nos luna aparentemente ta 40 mion aña mas bièu ku anteriormente tabata asumí pa siensia. E estudio ta publiká den e revista sientífiko Geochemical Perspectives Letters.
Te ku aworakí tabata kalkulá ku mas di 4 mil mion aña pasá un opheto enorme tabatin un choke ku nos planeta loke despues a resultá den formashon di nos luna. E momentu eksakto sinembargo no tabata konosí.
Pa e kálkulo nobo aki a studia kristalnan ku astronouta a trese for di luna den 1972. Pero despues di un estudio amplio di e kristalnan investigadónan a konkluí ku e luna mester tin alrededor di 4460 mil aña.
Kristal ta forma dor di un proseso ku ta tuma masha hopi aña. Una bes ku a determiná e edat di e kristalnan a resultá ku esakinan tabata mas bieu ku e edat original di nos luna.
Hopi hende ta puntra kiko ta e balor di tur e estudionan aki. E kontesta ta simpel: ta generalmente konosí ku presensia di luna tin un influensha riba bida riba nos planeta i riba e nivel di laman. Tambe luna ta stabilisá e rotashon di nos planeta, pero mas importante ainda, luna i solo a yuda humanidat kalkulá orario. Simplemente bisá, luna ta forma parti di bida.
by Webmaster | 23/10/2023 | Siensia
Investigadónan posiblemente a deskubrí un tratamentu ku por prolongá bida di hòmbernan ku kanser di prostat ku ta bin bèk. Sientífikonan Merikano ta papia di un terapia hopi prometedor. Danki na e tratamentu pashèntnan lo por biba mas largu sin ku e malesa ta empeorá.
E resultadonan di e estudio korespondiente ta publiká den e revista sientífiko New England Journal of Medicine.
Hòmber ku kanser di prostat agresivo ta tratá ku un operashon òf terapia di radiashon. Pero, pa den mas o ménos un di kada tres kaso e kanser ta bin bèk den un plaso di 10 aña.
Pa e forma di kanser ku ta bin bèk ya ta èksistí e sina yamá terapia di deprivashon di androgen (abreviá ADT). Ta un terapia ku hormon pa redusí produkshon di testosteron pa evitá ku e prostat ta krese i plama e malesa. Den e estudio nobo aki, a kombiná ADT ku enzalutamide, un substansia ku ta blòkia e efektonan di testosteron. E tratamentu nobo yama por lo pronto ADT+.
Mas di mil pashènt for di 17 pais a partisipá na e investigashon. A separá e pashèntnan den tres grupo kru tres diferente tratamentu. Den e grupo ku a sigui e terapia nobo ADT+ e riezgo ku e malesa lo a bin bèk a baha ku 58%.
Ta bon pa menshoná ku e tratamentu nobo mester haña aprobashon ainda di Food and Drug Administration na Merka. 5W Press ke rekomendá en todo kaso pa semper konsultá un spesialista riba tratamentunan nobo.
by Webmaster | 09/10/2023 | Siensia
E Premio Nobel di Ekonomia a bai e aña aki pa Claudia Goldin pa su investigashon rondó di desigualdat entre hòmber i muhé riba merkado laboral. E ta di tres muhé den historia ku ta risibí e premio aki.
Claudia Goldin a investigá e tema di diferensha di salario entre géneronan pa mas di trinta aña. Asina el a investigá kon avanse médiko, manera e pildora antikonseptivo, a duna muhénan mas kòntròl riba nan bida i e impakto positivo ku esaki tabatin riba nan posishon laboral.
Goldin su trabou ta kubri un periodo di kasi 2 siglo splikando kon bini ainda nos ta mira diferensha den salario i e influensia di ser mama riba e fenómeno aki.
Meskos ku otro ganadó den otro kategoria Goldin ta risibí un suma di 950 mil euro ku lo wordu entrega riba 10 di desèmber na Stòkhòlm huntu ku un medaya i un diploma di e komishon di nominashon.
by Webmaster | 06/10/2023 | Siensia
E Premio Nobel di Pas a bai e aña aki pa un dama, e aktivista Iraní Narges Mohammadi. E ta risibí e premio pa su lucha kontra opreshon di hende muhé i pa nan derechinan.
Na total outoridatnan na Iran a arestá e dama aki 13 biaha, sentensi’é na 5 okashon. E ta sinta un akstigu awor di 31 aña inkluyendo 154 sla ku swip. Organisashonnan pa derechinan humano ta yama atenshon regularmente pa èksigí su libertat.
Tin un suma di 950 mil euro reservá p’e, inkluyendo un medaya i diploma di e komishon di premiashon. Djaluna lo anunsiá e último ganadó kua ta e ganadó di e premio pa Ekonomia.
by Webmaster | 05/10/2023 | Siensia
E premio Nobel di literatura a bai e aña aki pa Jon Fosse di Norwega. Fosse ta risibí e preis pa e obranan di teater i poesianan ku el a skirbi den transkurso di añanan. E premio nobel pa literatura ta otorgá for di 1901.
E ganadó ta risibí un premio di sèn na balor di 950 mil euro. Tambe e ganadó ta risibí un medaya i diploma di e komishon di selekshon. Djabièrnè lo sigui e anunsio di e ganadó di e premio pa Pas i djaluna finalmente e ganadó di e premio pa Ekonomia.
by Webmaster | 04/10/2023 | Siensia
E Premio Nobel pa Kímika ta bai e aña aki pa 3 sientífiko. Ta trata di e Merikano nasé na Tunesia Moungi Bawendi, e Merikano Louis Brus i e Ruso Alexey Ekimov. Nan a investigá asina yamá partíkula kwantum. Esakinan ta partíkulanan asina chikitu ku nan ta usá den teknologia nano.
Di momentu e partíkulanan aki ta usá den televishon i lus moderno. Ekimov i Brus a deskubrí e partíkulanan aki den añanan 80. Bawendi a guia un grupo ku tabata investigá aplikashon di partíkula kwamtum.
Djaweps lo anunsiá e ganadó di Literatura, djabièrnè e premio pa Pas i djaluna próksimo e premio pa Ekonomia. E ganadónan no solamente ta haña rekonosementu, pero tambe un montante di 950 mil euro pa kompartí ku otro, un medaya i un diploma di e komishon.
by Webmaster | 03/10/2023 | Siensia
E premio Nobel pa físika a bai e aña aki pa tres investigadó ku a investigá fletsnan di lus ku un velosidat ekstremo. Ta trata di e Fransesnan Pierre Agostini i Anne L’Huillier i e Oustriako-Húngaro Ferenc Krausz.
Básikamente nan a deskubrí un método nodo pa studia elektron den átomo i molékula. Di e forma ei por studia tur loke ta materia te na su núkleo mas básiko, esta e átomonan. E sientífikonan ta risibí konhuntamente un montante di 950 mil euro.
Segun tradishon lo sigui anunsiá e sobrá disiplinanan den dianan benidero. Djarason lo sigui e anunsio pa e premio pa Kímika, djaweps esun di Literatura, esun di Pas riba djabièrnè i esun di Ekonomia djaluna próksimo.
by Webmaster | 02/10/2023 | Siensia
E Premio Nobel 2023 pa Medisina a bai pa e dos investigadónan ku a desaroyá e bakuna di mRNA kontra e vírus di corona. Ku esaki nan no solamente ta risibí rekonosementu pa nan trabou, sino tambe nan ta risibí un suma di plaka di 950 mil euro ku nan por kompartí ku otro.
Ta trata di e sientífikonan Katalin Karikó i Drew Weissman. E organisashon tras di e premio a splika ku nan a yuda di un forma lihé i sin presedente ku desaroyo di e bakuna pa kombatí Covid-19, un di e menasanan mas grandi pa salú públiko den historia moderno.
E ganadónan ta risibí manera indiká 950 mil euro, un medaya i un diploma. Entrega di e premionan lo tuma luga riba 10 di desèmber, e fecha di morto di e Sueko Alfred Nobel, inisiadó di e premionan.
E Premio Nobel pa Medisina ta tradishonalmente e promé kategoria ku ta keda anunsiá. Den próksimo dianan lo anunsiá tambe e Premio Nobel pa Físika (djamars), Kímika (djarason), Literatura (djaweps), Pas (diabièrnè) i Ekonomia (próksimo siman djaluna).
by Webmaster | 21/09/2023 | Siensia
Investigadónan a haña loke ta parse e konstrukshon di palu mas bieu den historia. Nan a haña e konstrukshon na Zambia i a kalkulá ku e tin por lo ménos 476 mil aña. E investigashon a keda publiká den e revista di siensia Nature.
E konstrukshon ta konsistí di dos pida palu ku ta pas den otro via un konekshon di piedra. E konstrukshon tin karakterístikanan di un sosten pa un brùg òf plataforma. E deskubrimentu a tuma lugá den e region fronteriso entre Zambia i Tanzania. Pegá ku e konstrukshon a haña tambe algun pida hèrmènt.
Te asina leu kasi tur e deskubrimentunan mas bieu ku nos konosé ta di e Edat di Piedra 300 mil aña pasá. E konstrukshon hañá na Zambia lo ta bai bèk pues 476 mil aña i ta sugerí ku nos ansestronan tabata traha konstrukshon relativamente sofistiká ku palu pa basta tempu promé ku nan a pasa pa konstrukshonnan mas robusto ku piedra.
by Webmaster | 18/09/2023 | Siensia
Tin airu den atmósfera di Mars ku hende por hala aden sin problema. Asina NASA ta konkluí a base di un eksperimento riba e planeta kòrá. Opviamente e atmósfera di Mars ta yen di gas ku ta dañino pa ser humano, pero NASA a deskubrí ku tin oksígeno i hidrógeno tambe i esei si no ta forma un problema pa ser humano si tin sufisiente den e atmósfera.
NASA a logra hasi e eksperimento ku e Mars Rover Perseverance ku a kolektá e partíkulanan i manda e análisis di esakinan. Si tin un manera pa generá airu riba e planeta lo bira un poko mas interesante pa manda mishonnan tripulá. Pero esei por dura hopi aña ainda.
by Webmaster | 12/09/2023 | Siensia
Ian Wilmut, e sientífiko Britániko ku a krea e karné di klon Dolly, a fayesé na 79 aña. Asina e instituo di siensia Eskoses Roslin Institute a anunsiá. Wilmut tabata sufri di Parkinson. El a bira mundialmente konosí huntu ku su kolega Keith Campbell ora nan a krea Dolly na 1996 for di un sélula di un karné adulto.
Dolly a biba mas o ménos 6,5 aña i a fayesé dor di un infekshon na pulmon. E téknika usá tabata un revolushon ku alabes a lanta diskushonnan étiko fuerte.
Por sierto ku Dolly no tabata e promé animal di klon. For di 1958 ya a klon un sapu. Despues di Dolly a klon vários otro animal manera lamnchi i raton. Dolly a keda prepará i ta eksponé na e Museo Nashonal di Eskosia na Edinburgh.
by Webmaster | 11/09/2023 | Siensia
Sientífikonan a logra krea un èmbrio kompleto sin sélula humano. Segun esnan embolbé den e estudio aki no ta trata di un èmbrio humano, sino unu ku eksaktamente mesun karakterístika.
E èmbrio ta proveniente for di sélula tronkal, na Hulandes ‘stamcel’. Esaki ta sélula ku ainda por transformá den diferente tipo di sélula den kurpa humano. Pa e estudio aki e sientífikonan a agregá supstansia na e sélulanan tronkal ku despues a transformá den e promé sélulanan ku normalmente ta presente den un èmbrio humano.
Despues a reuní e sélulanan ku konhuntamente a transformá den e èmbrio aki ku e mesun karakterístikanan ku esnan humano. Segun e sientífikonan e investigashonnan aki ta importante pa komprondé mihó e desaroyo di ser humano. Ainda tin poko informashon disponibel riba e promé dos simannan di desaroyo di bida humano, siendo ku ta trata di un periodo hopi deliká.
E sientífikonan ta suprayá ku no ta étiko i asta ilegal pa krea un èmbrio i pasa esaki pa un matris humano ku despues por krese i bira un ser humano. Pa e motibu ei a finalisá e eksperimento den 14 dia. Den vários pais ta pèrmití eksperimento ku èmbrio humano te na 14 dia, pero ta awor numa un eksperimento lo a tuma e kantidat máksimo di dia pèrmití.
E estudio a tuma lugá na e instituto di siensia Weizmann na Israèl i ta publiká den e revista Nature.
by Webmaster | 07/09/2023 | Siensia
Hapon a lansa un rakèt ku un teleskop Hulandes na bordo ku mester bai investigá orígen di universo. E instituto espasial Hulandes SRON a kontribuí na e proyekto. Tambe, Hapon kier laga un lander aterisá riba luna.
E rakèt a despegá den mardugá di djarason pa djaweps na e sentro espasial Tanegashima. Mas o ménos 30 minüt despues di lansamentu a deskonektá e teleskop Hulandes pa esaki drenta órbita di nos planeta.
Aki tres pa kuater luna e lander mester yega luna kaminda e lo keda den órbita tres te ku kuater luna mas. Despues lo aterisá e lander riba superfisie di luna. Si Hapon logra, e pais lo bira e di sinku pais den historia ku a logra bai luna.
