by Webmaster | 18/01/2024 | Teknologia
Samsung a anunsiá su Galaxy S24 smartphone. Pa fin di yanüari e promé unidatnan mester ta na benta kaba. Galaxy S24 lo bin den tres vershon: S24, S24+ i S24 Ultra.
E kompania ta bai focus ku e modelo nobo aki mas riba inteligensha artifisial, siguiendo asina e mesun liña ku kada bes mas kompania ta siguiendo for di aña pasá. E subida di programanan manera ChatGPT a kana asina lihé i eksitoso ku sobrá kompanianan di teknologia no por hasi otro sino sigui e trènt.
Pa e motibu ei Samsung ta bai inkorporá e asina yamá Galaxy AI. Tur produkto ku e kompania saka den futuro ku ta etiketá ku un símbolo ku 4 strea lo ta ekipá ku AI. Generalmente e opshon aki lo sirbi pa tradusí, organisá reunion ku ‘Note Assist’ ku un opshon pa notulá (disponibel solamente den sierto idioma), ‘Chat Assist’, photo editing i algun ekstenshon pa Google.
by Webmaster | 18/01/2024 | Teknologia
E kompania Apple mester para benta di un liña nobo di smartwatch na Merka entrante djaweps. Asina un korte Merikano a dikta den apelashon djarason.
E oloshinan ta ekipá ku un teknologia ku por midi e nivel di oksígeno den sanger di e usuario, un teknologia di kua e patènt ta kai bou di e kompania Masimo i ku Apple lo a usa sin pèrmit. E kompania Masimo ta argumentá ku Apple lo a atkirí konosementu di e teknologia atraves di un èks trahadó.
Segun e komishon di arbitrahe International Trade Commission (ITC) Masimo tin rason den e kaso aki i pa e motibu ei ya a prohibí benta di e tiponan Series 9 i Ultra 2 di Apple for di desèmber. Algun dia despues un otro korte a anulá e desishon temporalmente, pero awor Apple no tin otro alternativa sino di para benta di e tipo ekipá ku e sistema pa midi oksígeno.
Poko despues di e desishon Apple a anunsiá ku e oloshinan lo sali na benta sin e funshon pa midi oksígeno. Esakinan lo ta disponibel via e website di Apple mes.
by Webmaster | 09/01/2024 | Teknologia
E kompania Merikano di aviashon United Airlines tin vários modelo Boeing den su flota kaminda a konstatá skruf lòs i otro problemanan di instalashon. Asina e kompania a konfirmá den un komunikado na prensa. Siguiendo e notisia Boeing a pèrdè 8% na balor riba merkado di bolsa.
E kompania a laga inspekshoná algun avion di e tipo 737 Max 9 despues ku den wikènt tras di lomba un avion di Alaska Airlines a pèrdè un pida di su ròmpi durante un buelo. Afortunadamente no tabatin hende ku a keda heridá. Siguiendo e insidente e supervisor di aviashon FAA a prohibí buelonan ku e tipo aki inmediatamente.
Alaska Airlines tin 64 avion di e tipo 737 Max 9 den su flota i United 79. Nan ta e úniko dos kompanianan Merikano ku ta usa e avionnan aki. No ta konosí ainda na kuantu avion eksaktamente a konstatá problema.
Di momentu tin mas kòntròl tumando lugá despues ku inspektornan a konstatá ku skrufnan a lòs na un parti usá pa tapa un parti di e ròmpi kaminda por instalá un salida di emergensha adishonal. Dor di e kantidat limitá di stul den e avionnan no ta usa e salida adishonal, pero e piesa aparentemente no ta pega perfektamente.
Esei kasi a resultá den un tragedia durante un buelo di Portland pa Ontario ora e piesa a lòs mei ora despues ku e avion a despegá. Alaska ya pa algun luna kaba a anulá buelonan pa Hawaii, despues ku e sistema di e avion a indiká problema ku preshon di airu den kabina durante e buelo.
No ta promé biaha ku tin problema ku Boeing 737 Max. Den 2019 a registrá sigur 2 aksidente ku e tipo aki siguí pa un prohibishon rònt mundu ku a dura kasi un aña i mei.
by Webmaster | 14/12/2023 | Teknologia
E fabrikante di vehíkulo elektróniko Tesla mester ‘recall’ mas di 2 mion outo. Ta trata di un limitashon di e software di e modelonan S, X, 3 i Y ku Tesla a introdusí for di òktober 2012.
E supervisor Merikano NHTSA a yega na konklushon ku e sistema di asistensha Autopilot no ta sufisiente sigur. E sistema lo no ta stimulá e shofùr pa keda paga tinu.
E supervisor a investigá tur aksidente ku a tuma lugá durante dos aña kaminda e outo a kore riba Autopilot. NHTSA a nota un riezgo di aksidente elevá ora e sistema ta operashonal. Hopi konduktor ta keda sin paga tinu despues ku nan aktivá esaki.
Ounke ta papia di un asina yamá ‘recall’, esta ku e outonan mester bai bèk fábrika, Tesla por aktualisá e sistema riba distansha. E kompania ta bai adaptá e sostware di Autopilot ku un update pa esaki duna mas alerta na e shofùr di e vehíkulo.
by Webmaster | 06/10/2023 | Teknologia
Amazon a lansa e promé 2 satélite di Project Kuiper. E kompania ke krea un network grandi di satélite pa ofresé servisionan di internet rònt mundu. Ku esaki Amazon ta start kompetensha ku SpaceX di Elon Musk.
E dos satélitenan ku a keda lansá djabièrnè ta dos prototipo KuiperSat-1 i KuiperSat-2. Ku esakinan ta bai tèst señalnan broadband. E ret di satélite di Amazon mester bai konsistí di 3300 satélite.
Pero no ta Amazon so ta inisiando proyektonan asin’akí. Na Oropa Eutelsat Oneweb ya ta kompetí ku Amazon i SpaceX. Na China tambe tin plannan ambisioso den mesun direkshon ku un ret di 13 mil satélite. Canada i Alemania tambe ta trahando riba nan propio ret di satélite.
by Webmaster | 04/10/2023 | Teknologia
E kompania Google a presentá su telefònnan mas resien: e Pixel 8 i e Pixel 8 Pro. E aparatonan tin kámara mehorá, vários funshon di inteligensha artifisial i updates te ku 2030. E diseño no ta masha diferente for di e Pixel 7.
Loke ta distinguí e telefònnan aki ta tòg e kámaranan. Esakinan tin un lèns standart di 50 megapixel i un sensor ku ta detektá skuridat i lus hopi mihó. E Pixel 8 ta bai haña un lèns èkstra di 12 megapixel pa saka potrèt macro. Tambe e aparatonan nobo ta ekipá ku un sistema di inteligensha artifisial.
Mas aleu e Pixel 8 i e Pixel 8 Pro ta bin ekipá ku un sensor di temperatura. Esaki ta sirbi por ehèmpel pa midi temperatura di lechi pa bo bebi òf bo propio temperatura.
E Pixel 8 ta bai kosta alrededor di 700 dòler, e vershon Pro lo sali ku un preis di 1000 dòler pa unidat.
by Webmaster | 04/07/2023 | Teknologia
Entrante 1 yanüari 2024 alumnonan na Hulanda mester tin un motibu bálido si nan ke tin nan telefòn den klas. Asina entre otro NOS ta informá. Ministerio di Enseñansa ta bai presentá un konseho urgente pa esaki di akuerdo ku un karta di minister Robbert Dijkgraaf. Despues di e temporada di fakansi aki dosentenan, alumnonan i nan mayornan mester yega na un sistema pa kada skol.
E prohibishon di telefòn den klas ta un tópiko di diskushon pa basta tempu kaba na Hulanda. E ministerio di enseñansa Hulandes ke tuma e paso aki pa asina mehorá resultadonan na skol i pa tin ménos distrakshon den lès.
E medida no ta konta pa telefòn so. Tablets i smartwatches no ta wèlkòm mas den klas tampoko. Telefòn ta pèrmití solamente ora ku e lès ta rekerí uso di telefòn òf si tin un motibu médiko. Na kabamentu di próksimo aña eskolar mester evaluá kon esaki a bai i kiko ta e efektonan.
by Webmaster | 04/04/2023 | Teknologia
Si bo ta biba na Hulanda i tabatin problema ku bo Nintendo Switch Joy Con Controllers, awor bo por laga drecha esaki grátis. Nintendo i Komishon Oropeo a yega na un akuerdo pa hasi reparashon grátis di e controller aki, asta ora e ta kai pafó di su garantia. Esaki despues di vários mil keho i preshon di Komishon Oropeo.
For di su lansamentu den 2017 tin keho riba e instabilidat di e Nintendo Switch, ku tabata afektá e gameplay di usuarionan. E problema a keda pèrsistí despues di lansamentu di Nintendo Switch Lite. Te ku awor e prosedimentu di reparashon tabata basta kompliká, asta den e plaso di garantia. Pero awor Nintendo ta komprometé na hasi e reparashonnan grátis, no opstante e kousa.
Pa nos hendenan bibando na Hulanda e notisia por ta interesante. Pa algun tempu kaba tin diskushon riba nivel Oropeo pa kompanianan ofresé reparashon grátis di produkto. Ademas tin muchu produkto ku ta bentá afó dor ku nan durabilidat hopi biaha ta limitá.
by Webmaster | 31/03/2023 | Teknologia
E nòmber kisas no ta bisa bo mashá, pero nos tur ta kana rònt ku e resultado di su invenshon den nos man. Martin Cooper, di 94 aña i alabes inventor di telefòn selular, a bisa den un entrevista ku agensia di prensa AFP ku hende ta pasa muchu tempu riba nan telefòn. Cooper a bisa den e entrevista ku e fenómeno ta asombr’é ora ku e ta den kaya.
Komo inventor original di e aparato opviamente e no tin nada kontra. Es mas: ketu bai e ta mira e potensial di e aparatonan ku por yuda te asta monitoriá nos salú via sierto app.
Cooper tabata na kabes di e team ku a desaroyá e promé aparato di Motorola, kaminda a traha e promé telefòn selular den 1973. E modelo ey tabata pisa kasi un kilo i no tabata traha pa mas ku 25 minüt promé ku bateria baha. E tabata bal un par di mil dòler tambe, ku tabata hopi sèn den añanan 70.
Personalmente Martin Cooper ta sigui tur desaroyo di serka i ketu bai e ta impreshoná pa tur e posibilidatnan di nos smartphones awe. Pero di otro banda e ta spera ku hende ta kòrda ku tin otro kos mas importante ku wak den telefòn so.
by Webmaster | 26/03/2023 | Teknologia
Gordon Moore, konfundadó di e fabrikante di computer chips Intel, a fayesé na 94 aña di edat. E Merikano aki ta partikularmente konosí pa e asina yamá ‘lei di Moore’. E ‘lei di Moore’ básikamente ta un predikshon ku el a hasi den 1965 riba e potensial di kálkulo di computer chips.
Na e okashon ey Moore a premirá ku tur aña e kantidat di transistor riba computer chips lo oumentá ku 100% òf mas, o sea tur aña e kantidat di transistor riba un chip tin dòbel e potensia di un aña promé. Den práktika e periodo a resultá no 1 sino 2 aña, pero e predikshon a motivá kompanianan manera Intel mes pa dòbel e potensia di computer chips kada 2 aña. Te ainda e lei aki ta konta komo direktiva den mundu di teknologia. Segun ekspertonan e lei di Moore sinembargo no ta eterno.
Durante su karera Gordon Moore a akumulá un kapital balorá na 7.2 mil mion dòler. E último añanan di su bida el a dediká na filantropia via e fundashon di dje i su kasá Gordon and Betty Moore Foundation. E fundashon ta invertí entre otro den siensia, konservashon di naturalesa i kuido.
by Webmaster | 22/02/2023 | Teknologia
E promé iPhone ku a sali fábrika den historia a bai pa 63.356 dòler na un findishi Merikano. E maestronan di findishi tabata antisipá ku e promé muestra aki, ku por sierto nunka a wòrdu usá for di 2007, lo a bai pa mas o ménos 50.000 dòler.
Ta trata di e iPhone original di 8 gigabyte ku tabata bal 599 dòler na su lansamentu. E smartphone ta den su pakete original, pues por papia di un asina yamá collectible pa kua hende ta dispuesto na paga hopi sèn.
E promé iPhone a sali den yanüari 2007 i a keda introdusí personalmente pa fundadó di Apple Steve Jobs. For di yüni 2007 e tabata disponibel pa konsumidornan. E aparato tabata un berdadero revolushon dor di e touchscreen ku ta kubri hinter e aparato. E smartphones di BlackBerry, Motorola i Palm tabatin un teklado físiko ainda òf tabata rekerí un stylus.
Direktor di Microsoft Steve Ballmer a hasi bofon di e aparato na e okashon ei, pero no a premirá e revolushon ku iPhone a lanta despues di su lansamentu. Tantu e otro markanan menshoná komo otronan ku a subi e merkado di smartphone despues a adoptá e diseño di e promé iPhone.
by Webmaster | 16/02/2023 | Teknologia
E kompania Apple a bolbe posponé lansamentu di su brel pa Virtual i Augmented Reality. Asina agensia di prensa Bloomberg ta informá. E lansamentu tabata planiá pa mart próksimo, pero esaki ta planiá awor pa yüni. Segun Bloomberg Apple lo ta wardando pa hasi esaki durante e siguiente World Wide Developers Conference (WWDC). Esei ta un kongreso ku Apple mes ta organisá tur aña den mei òf yüni. Lo no ta promé biaha en todo kaso ku e kompania ta lansa un produkto nobo durante e konferensha ei.
E brel pa Virtual i Augmented Reality ta antisipá for di 2017. Den kaso di Virtual Reality e usuario ta sinti’é den un ambiente virtual. Ku augmented reality e brel ta agregá imágen na realidat. Esnan ku ta interesá mester kuminsá spar for di awor. E brel probablemente ta bai kosta alrededor di 3 mil dòler.
by Webmaster | 31/01/2023 | Teknologia
Sony ta bai produsí ménos brel pa virtual reality pa PlayStation 5. Esaki debí na un kantidat desepshonante di pre-order. Asina agensia di prensa Bloomberg a publiká djamars. Anteriormente e kompania tabata bai produsí alrededor di 2 mion unidat pa e lansamentu próksimo aña, pero awor e kantidat ta fihá na 1,5 mion unidat. Fuentenan na Sony a duna di konosé si ku si e demanda di pre-order subi ku e kantidat lo adaptá.
E fábrika ku ta trahando e pantayanan pa e brel virtual pa Playstation 5 mester tene kuenta ku Sony ta bai adaptá nan pedido. E lansamentu di e brel virtual pa Playstation 5 ta planiá pa próksimo aña mart / aprel. E preis ta kalkulá te asina leu na mas o ménos 650 dòler pa kada brel.
by Webmaster | 27/01/2023 | Teknologia
Benta di smartphone a baha rònt mundu ku kasi 20% den último kuartal di 2022. Asina International Data Corporation a kalkulá a base di sifranan preliminario di benta. Segun nan análisis esaki ta debí na miedu pa un reseshon, loke ta buta ku konsumidónan no ta saka sèn dje lihé ei mas. Den último tres luna di 2022 a bende alrededor di 300 mion unidat. Esei ta 18 porshento ménos ku den e mesun periodo den 2021.
E bahada aki ta esun mas fuerte midí te asina leu. E periodo di fin di aña ta hopi indikativo pa estado di ekonomia: ta e temporada ku hende ta kumpra artíkulonan pa regalá nan sernan kerí. Finalmente bendedónan mester a duna deskuentonan hopi fuerte pa asina tòg por stimulá benta. E kompanianan en kuestion dimes ta sinti e klap. Tantu Samsung komo Apple a mira nan benta baha hopi fuerte den e último tres luna di 2022.
by Webmaster | 26/01/2023 | Business & Economy, Teknologia
E fabrikante di outo limpi Lightyear a pèrdè su supsidiario Atlas Technologies, kua tabata produsí e modelo Lightyear 0. Asina a keda konfirmá djaweps. E bankarota di Atlas Technologies ta nifiká ku sentenáres di trahadó mester buska trabou nobo. Poko prome ku pidi bankarota ya e kompania propietario Lightyear a disidí para produkshon di e modelo Lightyear 0 permanentemente.
Lightyear ta bai konsentrá riba e modelo Lightyear 2, kua ta mas barata ku e modelo 0. Atlas Technologies ta keda na Helmond na Hulanda. Alrededor di 620 di e 650 trahadónan a pèrdè nan trabou. Un curator ta investigando si ta posibel reaktivá e kompania. Tin hopi interes pa outonan eléktriko, pero te asina leu e preis ta un opstákulo pa hopi konsumidor.
