Benta di smartphone a baha rònt mundu ku kasi 20% den último kuartal di 2022. Asina International Data Corporation a kalkulá a base di sifranan preliminario di benta. Segun nan análisis esaki ta debí na miedu pa un reseshon, loke ta buta ku konsumidónan no ta saka sèn dje lihé ei mas. Den último tres luna di 2022 a bende alrededor di 300 mion unidat. Esei ta 18 porshento ménos ku den e mesun periodo den 2021.
E bahada aki ta esun mas fuerte midí te asina leu. E periodo di fin di aña ta hopi indikativo pa estado di ekonomia: ta e temporada ku hende ta kumpra artíkulonan pa regalá nan sernan kerí. Finalmente bendedónan mester a duna deskuentonan hopi fuerte pa asina tòg por stimulá benta. E kompanianan en kuestion dimes ta sinti e klap. Tantu Samsung komo Apple a mira nan benta baha hopi fuerte den e último tres luna di 2022.
E fabrikante di outo limpi Lightyear a pèrdè su supsidiario Atlas Technologies, kua tabata produsí e modelo Lightyear 0. Asina a keda konfirmá djaweps. E bankarota di Atlas Technologies ta nifiká ku sentenáres di trahadó mester buska trabou nobo. Poko prome ku pidi bankarota ya e kompania propietario Lightyear a disidí para produkshon di e modelo Lightyear 0 permanentemente.
Lightyear ta bai konsentrá riba e modelo Lightyear 2, kua ta mas barata ku e modelo 0. Atlas Technologies ta keda na Helmond na Hulanda. Alrededor di 620 di e 650 trahadónan a pèrdè nan trabou. Un curator ta investigando si ta posibel reaktivá e kompania. Tin hopi interes pa outonan eléktriko, pero te asina leu e preis ta un opstákulo pa hopi konsumidor.
Un team di investigadó di e universidat Hapones Tohoku a desaroyá un tela spesial ku por midi nos estado di salú a base di sodó di kurpa. Ta trata di un tela mikro-elektróniko ku por midi salu i metabolit (esta supstansianan kímiko den nos kurpa manera suku). E ta midi diferente señal ku ta duna un indikashon di e estado físiko i mental di e usuario di e tela.
No ta trata di un invenshon kompletamente nobo, pasobra ya tin bestuario inteligente kaba. Pero eseinan ta ekipá ku vários parti sólido i pues no ta masha konfortabel. E adaptashon aki ta nifiká un adelanto. E team di sientífikonan ta spera ku nan adaptashonnan lo kondusí na uso frekuente den kuido.
Den 2025 e kompania Apple ke ta e promé kompania pa introdusí un chip ku ta kombiná antène, wifi i bluetooth den un. Asina agensia di prensa Bloomberg ta informá. Di momentu Apple su aparatonan ta usa diferente chip, pero esei ta hasi e kompania dependiente di otro kompania ku ta produsí e chipnan pa nan.
Pa algun tempu tabata konosí kaba ku Apple ke stòp su kolaborashon ku e kompania Qualcomm. Si integrá wifi i bluetooth den e mesun chip, Apple por para su kolaborashon ku Broadcom tambe. Pa ámbos kompania Apple ta nifiká 20% di nan entrada.
E produktor di iPhone ke mas kòntròl riba su liña di produkshon, pero e plan ta parse prinsipalmente un forma di baha gastu i tampoko no ta konosí kiko esaki por nifiká pa e kalidat di e produktonan di Apple.
E fábrika Chines ku ta produsí iPhone, esta Foxconn, ta bai aliviá medidanan pa kombatí propagashon di Covid-19. Asina agensia di prensa Bloomberg a partisipá djaweps. Kolaboradónan por move un poko mas liber i tambe a habri e fasilidatnan di alimento riba e tereno. E fábrika tabata un tópiko kayente durante e protestanan resien na China. E fábrika mester a sera regularmente dor di medidanan di gobièrnu.
Ta parse ku e apelashonnan di e fundadó di Foxconn, Terry Gou kende a atvertí pa e impakto ekonómiko di e medida, a haña oído di gobièrnu di China. E fábrika, kua a keda na Zhengzhou ta konosí tambe komo ‘iPhone City’. Hopi trahadó ta keda drumi na e planta, pero nan no tabata dispuesto mas pa kompartí espasio ku hende infektá. Tambe nan a kuminsá buta trabou abou ora ku e preshon di trabou a oumentá dor di ousensia di koleganan infektá. Aparte di esei tabatin problema ku distribushon di alimento pa e trahadónan.
E seramentu regular di e fábrika a lanta preokupashon tambe pafó di China. Alrededor di 70% di tur iPhone rònt mundu ta keda produsí na Foxconn. Mayoria iPhone 14 Pro i Pro Max ta produsí einan.
Hulanda i Hapon ta bai adaptá eksportashon di mashin pa traha chips pa computer na China. Ku e paso aki e dos paisnan a adoptá e reglanan Merikano imponé riba China. Asina e revista Bloomberg a informá djaluna. Merka, Hulanda i Hapon ta e eksportadónan mas grandi di mashin pa traha chip na mundu. Di e forma aki en partikular Merka ke influenshá e desaroyo di chips avansá na China. Segun Merka por usa esakinan pa finnan militar tambe.
Hulanda partikularmente a disidí ku e kompania na Veldhoven, esta ASML, lo no entregá su mashinnan mas avansá mas na China, esaki apesar di Merka su deseo pa para tur eksportashon di tur mashin pa traha chips. ASML ta e mayor produktor di chips na mundu, siguí pa Canon, Nikon i Tokio Electron. ASML no ta antisipá pèrdida ya ku e trend den nos parti di mundu ta mustra un subida den e demanda pa computer chips.
E último avion Boeing 747-superjumbo a bandoná e liña di produkshon di e fábrika na e lugá Merikano Everett. Asina e kompania a anunsiá riba su site. E avion ta bai pa e kompania Atlas Air, ku lo risibí esaki den 2023 ora ku e pasa e tèst ku resultado positivo. Konstruí na aña 1967 e Boeing 747 tabata e promé avion na mundu ku dos gang.
Na total Boeing a produsí 1.574 avion di e tipo aki. E vershon 747-8 ta ketu bai esun mas largu den uso komersial ku su largura di 76,2 meter. E último ehemplar aki ku a bandoná e fábrika lo keda usá partikularmente pa transportá karga.
E kompania di biahe espasial SpaceX a lanta un departamentu nobo yamá Starshield, un ret di satélite pa gobièrnu di Merka. Ainda no ta konosí di kuantu satélite ta trata. E satélitenan ta bai traha a base di komunikashon ku laser, kua ta difísil di spia sin ku esaki ta keda notá pa e usuario di e satélite. Di e forma ei por aktua na momentu ku terseronan purba skucha e satélitenan su komunikashon.
SpaceX no ta solamente bai produsí e satélitenan, pero tambe e korespondiente telefònnan ku lo traha via Starshield. E sistema nobo aki lo inkluí tambe luna artifisial ku sensor, ekipamentu pa midi i pa opservashon. SpaceX ya ta usando e ret Starlink, ku ta inkluí alrededor di 3500 satélite. Danki na e ret ei tropanan na Ukrania ainda por komuniká apesar ku komunikashon na Ukrania ta destruí.
E kompania aéreo EasyJet i e divishon aeronoutiko di Rolls-Royce a tene un tèst eksitoso ku un diseño nobo pa motor di avion ku ta usa hidrógeno komo kombustibel. Asina e kompanianan mes a duna di konosé den un komunikado. E hidrógeno ta produsí for di fuentenan renobabel manera energia di bientu i di marea.
EasyJet a duna di konosé for di sèptèmber ku e tabata bai invertí den desaroyo di téknikanan pa redusí emishon di karbodiókseno, kua ta malu pa nos medioambiente. E siguiente paso ta pa tèst e motornan aki den práktika. Ounke e espektativanan ta duna motibu pa optimismo, mester bisa ku e tèst a tuma lugá den laboratorio.
Boeing, kompania konkurente di EasyJet, ta investigando di su banda desaroyo di motornan pa un kombustibel nobo konosí komo SAF. Esaki lo ta 75% mas efisiente ku jet fuel. KLM ya lo ta agregando e kombustibel aki na su jet fuel.
E kompania Apple ta pronostiká ku ta bai tin ménos iPhone 14 disponibel riba merkado dor di produkshon redusí. Segun agensia di prensa Bloomberg esaki ta okashoná pa un parti pa e demanda redusí di iPhone 14. Pero aparte di esei un fábrika grandi na China ta será dor di propagashon di Covid-19. Esaki tin un impakto grandi riba produkshon di e aparatonan i retraso den disponibilidat.
Apple tabata konta ku produkshon di alrededor di 90 mion iPhone 14, pero esaki a keda adaptá na 87 mion. Aparentemente konsumidornan ta wak pa alternativanan mas barata.
Pa loke ta trata e produkshon mester konsiderá e vários lockdown na e siudat Zhengzhou. Esei ta afektá e sentro di produkshon mas grandi di Apple. Einan ta produsí alrededor di 80% di e modelonan di e iPhone 14. E fábrika no ta drai na su kapasidat máksimo na e momentu aki.
E Augmented Reality (AR) Headset desaroyá pa Apple lo bini ekipá ku un Iris Scan. Asina e website The Information a publiká a base di fuentenan ku ta traha na e kompania. E Iris Scan ta bai sirbi pa usuarionan por entre otro login riba nan Apple account i hasi pagonan através di Apple Pay.
Segun e fuentenan Apple ta hasiendo uso di teknologia di SensoMotoric Instruments, un kompania di orígen Aleman ku Apple a atkirí den 2017.
Usuarionan di Apple lo por usa e Iris Scan di e AR pa identifiká nan mes. Nos kada un tin un íris úniko, pues e por funshoná perfektamente komo fingerprint. Esaki por sirbi por ehèmpel pa usuarionan di Apple login riba nan Apple account.
E Iris Scan por sirbi tambe pa aprobá pago digital. Di momentu Apple ta usando Touch ID (pa fingerprint) i Face ID (pa rekonosementu di kara) pa usuarionan por login di forma personalisá i p’esei mes ímposibel pa hack. Si e plannan aki kristalisá e Iris Scan lo bira e di tres método di siguridat biométriko di Apple.
Segun e fuentenan na Apple, e gadget ta adekuá pa tantu AR komo VR (Virtual Reality). Ku augmented reality por agregá imágen adishonal na imágen di realidat eksistente. VR sinembargo ta buta e usuarionan den un realidat virtual. E diseño di e AR Headset aparentemente ta paresí na e Quest 2, un VR Headset di e kompania tras di Facebook.
No tin klaridat riba ki dia Apple lo presentá e AR Headset. Gerensha di Apple ya lo a haña un bista kaba riba algun prototipo i lo duna mas informashon promé ku fin di e aña aki.
