Lucile Randon, nasé den 1904 i pues e persona mas na edat na mundu, a fayesé na 118 aña di edat. Sùr André, manera nan tabata yam’e, a fayesé den su soño na un kas di kuido na Toulon, den parti sùit di Fransia. Randon tabata siegu i tabata den ròlstul.
El a tuma e nòmber Sùr André ora ku el a bira miembro di e orden katóliko di Fransia. Dos aña pasá e tabata den notisia rònt mundu despues di a sobrebibí un infekshon ku Covid-19.
Sùr André a bira e persona mas na edat na mundu despues ku e Hapones Kane Tanaka a fayesé aña pasá na 119 aña di edat. Ainda investigadónan ta buskando e persona mas na edat na mundu na e momentu aki despues di fayesimentu di Sùr André.
