5W Press Infotainment

Infotainment (un kombinashon di e palabranan information i entertainment), ta konosí tambe den periodismo komo soft news. Soft news ta distinguí su mes for di periodismo tradishonal òf hard news dor di items aklaratorio i ménos urgente i su karákter “ménos kargá”, pero básikamente e meta ta keda:

Informá i alabes Entretené

Kompartí, aktualisá i stimulá interés pa konosementu di un forma kreativo

Produsí kontenido ku por sirbi komo punto di referensha pa tópikonan ni urgente, pero tòg interesante

Selekshon di kontenido internashonal

Soft news / infotainment ta generalmente fásil pa digerí pa tantu adulto komo mucha. Maroria infotainment ta bin den forma di programa edukativo òf programa di aktualidat. Esaki por ta na televishon òf online. E kalidat i tipo di kontenido por vária dependiendo di e oudiensia, e temanan tratá, e format, e plataforma, e forma di investigashon, e produkshon i, last but certainly not least, e nivel di konosementu di e produktor i / òf presentadó di e kontenido.

Algun video ku nos ta kompartí ta proveniente di fuentenan ku nos ta selekshoná a base di sierto kriterio. E siguiente video di e kanal di YouTube From Nothing ta duna un bon splikashon di e rekerimentunan pa produsí kontenido konfiabel riba tópikonan difísil di investigá:

Selekshon di fuente

Un gran parti di nos sekshon di infotainment ta proveniente di fuentenan manera From Nothing. Nos selekshon di kontenido ta dependé pues di e forma di investigashon ku ta forma e base di e item. Den e afán aki nos ta sigui e prinsipio di 5W’s.

Kontenido polítiko

Pa mantené nos neutralidat nos a ekskluí kontenido ku influensha polítiko for di nos sekshon di Infotainment. Hopi medio riba internet tin karakterístika polítiko ku terseronan lo no rekonosé inmediatamente. Kontenido polítiko no ta nesesáriamente inkorekto i por ta basta interesante i aklaratorio.

E mayor problema ku kontenido polítiko ta sinembargo ku frekuentemente ta ekskluí informashon klave ku lo a duna un bista mas kompleto riba kualkier tema. Ademas kontenido polítiko tin karakterístika propagandista ku no ta riba e mesun liña di e prinsipionan di 5W Press. Ehèmpelnan di kontenido polítiko ku presensia haltu riba internet ta Daily Wire (kontenido derechista) i Vox (kontenido iskierdista).