Un palu di Pasku artifisial masha simpel mes a bai na findishi den Reino Uní pa 3400 pound. Ta trata di un “kerstboom” konstruí 100 aña pasá ku tabatin un balor di 6 pence den 1920.
E diseño di e palu di Pasku aki ta un obra di man ku un altura di 79cm, 25 taki i 6 klèm pa bela. E palu tabata propiedat di Dorothy Grant, un dama ku a fayesé den 2014 na edat di 101 aña i ku a keda usa esaki pa mayor parti di su bida durante temporada di Pasku.
E yu muhé di señora Grant a heredá e palu, pero a disidí bende esaki na findishi. El a keda asombrá ku e kumpradó tabata dispuesto na paga asina tantu sèn pa un diseño simpel asin’akí.
