Segun World Wildlife Fund, e fondo internashonal pa flora i founa, a deskubrí sigur 380 espesie nobo di mata i animal den parti sùit ost di Asia entre 2021 i 2022. Entre nan un piská ku ta kambia di koló, un tipo di raton di anochi i un kolbera venenoso te ku resien ainda tabata deskonosí. E animalnan ta biba den e region di riu Mekong. Ta trata di 290 espesie di mata i flor deskonosí, 19 sorto di piská, 24 amfibio (o sea, ainmalnan ku ta biba den awa i tera), 46 reptil i 1 mamífero.
E deskubrimentu ta resultado di un trabou konhunto di sientífikonan di vários universidat, organisashon di protekshon di naturalesa i institutonan di investigashon rònt mundu. E region rondó di riu Mekong ta kubri Tailandia, Myanmar, Vietnam, Cambodja i Laos.
Algun animal tabata konosí kaba na nivel lokal, pero no na nivel mundial. E hayasgo ta remarkabel. E animalnan i matanan a sobrebibí vários evento manera kapmentu di palu, konstrukshon di kaya, desaparishon di riunan i asta komèrsio ku animal eksótiko di e region aki.
World Wildlife Fund ta operá pa algun tempu kaba den e region rondó di e riu Mekong pa protehá otro espesienan mas grandi konosí manera olefante Asiátiko, dolfein Irrawaddy i tambe tiger. E árianan aki ta kontribuí nan rikesa natural na e vários proyektonan pa protehá e region.
-
BUNGARUS SUZHENAE - Un kolebra ekstremadamente venenoso ku ta biba den e region Mekong na Myanmar.
-
CALOTES GOETZI - Un lagadishi basta agresivo ku ta kambia di koló pa protekshon.
-
CYRTODACTYLUS RUKHADEVA - Un pegapega ku ta karga nòmber di un spiritu di mondi den kuentanan lokal.
-
TYLOTOTRITON THAIORUM - Konosí tambe pa lokalnan komo krokodel Tailandes pa e habitantenan étniko di e lokalidat kaminda e ta biba.
-
THELODERMA KHOII - Un sapu na Vietnam ku por kamuflá prefektamente ku e kolónan rondó di dje.
