Israèl ta forma gabinete di unidat – Situashon na Gaza empeorando
Promé Minister di Israèl Benjamin Netanyahu i oposishon a logra yega na un akuerdo pa un gobièrnu di unidat nashonal. Asina e promé minister i èks minister di defensa a deklará den transkurso di djarason.
Un gabinete di unidat nashonal ta algu basta komun den situashonnan di krísis nashonal, pa asina por tuma desishon mas lihé. For di djasabra siguiendo e atake di Hamas riba Israèl tabatin yamada pa forma un gobièrnu asina, pero mester a negoshá kondishonnan promé.
E gobièrnu aktual mes a transformá den un gabinete di guera ku lo atendé solamente ku asuntunan relashoná ku e konflikto militar aktual i ku ta konsistí di Netanyahu, èks minister di defensa i rival polítiko Benny Gantz i e aktual minister di defensa Yoav Gallant. Aparte di nan tres a apuntá dos opservador.
Anteriormente a pidi e lider di oposishon Yair Lapid pa forma parti di e gabinete di guera. Pero segun The Times of Israel e no ke forma parti di un gabinete ku ta inkluí partidonan ekstremo derechista.
Di banda di Gaza mester bisa ku e situashon ta empeorando.
Einan entretantu tin falta di kombustibel, loke a bin resultá den baimentu di koriente práktikamente tur kaminda despues ku a sera e úniko planta di energia operashonal. Habitantenan ta dependé pues di uso di generator pareu ku un falta di kombustibel. Asta den e kompartimentunan di prison kaminda tin Palestino será a kita koriente.
Di momentu hospitalnan ta drai riba generator di emergensha, pero esaki ta yega pa apénas algun dia mas. Ta bin aserka ku for di djaluna tin blokeo kompleto tambe di parti di Israèl. Esei ta nifiká ku alimento i remedi no por yega e region.
Na Al Jazeera e direktor médiko di e hospital Al Wafa a deklará ku tin mas o ménos 100 baby resien nasé i pashènt di nir ku ta dependé di ekipamentu di e hospital.
Riba nivel internashonal tin un krítika kompartí ku seramentu di koriente i blokeo di alimento i yudansa ta medidanan ku no ta den liña ku tratadonan i lei internashonal. Asina Union Oropeo a indiká ku Israèl tin derechi di defendé su mes, pero esaki mester tuma lugá konforme tratadonan internashonal. Den Nashonnan Uní tin sonidonan komparabel.
E leinan aki ta èksistí pa un bon motibu. Kitamentu di koriente ta nifiká lógikamente ku dado momentu kontakto den i ku Gaza lo bira difísil ora no por rekargá ekipamentu di komunikashon mas. Siudadanonan lo no por risibí update di outoridatnan Palestino mas i for di eksterior un dado momentu no ta bai tin masha kontakto ku esnan den e region.
Tambe lo bira difísil pa kore skonde den shèlter durante bombardeonan den oranan di mardugá si no tin koriente.
