Rakèt Israelí ta alkansá hospital na Gaza
A lanta basta konfushon rondó di e kantidat di víktima siguiendo loke ta parse un atake ku rakèt riba un hospital na Gaza. Segun Al Jazeera, por lo menos 500 persona a pèrdè nan bida. Asina e Ministerio di Salubridat di e gobièrnu di Hamas a bisa e agensia di prensa.
E korant Haaretz a skirbi sinembargo ku outoridatnan Palestino a raportá por lo menos 200 morto. Agensia di prensa Reuters ta hasi menshon di por lo ménos 300 víktima.
No tin klaridat pues riba e kantidat eksakto di víktima i tampoko no tin klaridat riba verasidat di e imágennan di e atake ku ta sirkulá riba internet aworakí.
E hospital en kuestion Al Ahli Arab ta situá den parti nort di Gaza. Den e hospital lo tabatin hende heridá i hende ku a buska refugio.
Te ku djamars atardi 3or – orario na Kòrsou – ainda Israèl no a reakshoná riba e informe. E pais a bisa ku ainda no por duna detaye riba e atake aki. Na momentu di e informe aki ainda e edifisio tabata na kandela.
Na Wèst Bank a lanta vários protesta públiko despues di e notisia riba e atake riba e hospital. Presidente Palestino Mahmoud Abbas a proklamá tres dia di luto.
E Forsanan Militar di Israèl a bisa den un reakshon ku ainda nan no tin detaye tokante e atake. Anteriormente un fuente di e servisio di seguridat na Israèl a bisa Reuters ku kada atake riba Gaza mester haña aprobashon na e nivel mas haltu.
Israèl a lansa míles di misil riba Gaza despues ku miembronan di Hamas a invadí Israèl fin di siman pasá. E pais a hasi un yamada anteriormente na tur hende den nort pa move direkshon sùit.
Djamars a resultá ku ainda tin hopi hende den e region nort di Gaza. Lo ta trata di mas o ménos 600 mil sivil. Asina un bosero miltar di Israèl a konfirmá. E yamada na habitantenan di Gaza pa bandoná e region ta pa e tropanan di Israèl por ataká instalashonnan militar di Hamas den un posibel invashon riba tera.
Ta bon pa suprayá ‘posibel’ pasó no tin klaridat si ta trata di un bombardeo agresivo tampoko. Ta asina ku for di 7 di òktober ku Israèl a lansa míles di rakèt riba loke e pais ta konsiderá blankunan militar.
Israèl a yama mas ku 300.000 reservista pa partisipá den e lucha kontra Hamas. Aparte di militar, tambe a manda tanki i otro material militar pa e frontera ku Gaza. Habitantenan di Gaza a risibí varios deadline pa bandoná sierto área ku Israèl ke ataká.
Te asina leu sifranan ta indiká ku tin mas di 3000 morto na banda di Palestinonan i mas di 1300 na banda di Israèl.
Pa loke ta un posibel habrimentu di frontera pa tuma refugiado Palestino te ku djamars atardi mitar di 4 – orario di Kòrsou – ainda Egipto no a duna klaridat si lo habri frontera.
