Outoridatnan ta para konsiertonan Taylor Swift relashoná ku plan di atentado
Un organisadó di konsierto na Oustria a para tres show di e kantante Taylor Swift. Esaki despues ku djarason a detené dos hòmber ku lo tabata plania un atentado durante su konsierto. E organisadó Barracuda Music a konfirmá e notisia via Instagram. Swift lo a duna tres konsierto djaweps, dabièrnè i djasabra. Tur esnan ku a kumpra karchi lo haña nan sèn di ticket bèk denter di 10 dia.
Polis a tene un operashon ekstenso ku a dura basta un par di ora na e lugá Ternitz kaminda a tene vários entrada hudisial. A asta evkuá algun kas di akuerdo ku medionan Oustriako. Durante e entradanan polis a bin topa ku supstansianan kímiko ku por usa pa traha eksplosivo pa un atentado.
Na e lugá menshoná a detené un hòmber di 19 aña di nashonalidat Oustriako. Despues a detené un otro na e kapital Viena. Resien e hòmber di 19 a hura su lealtat na e movementu terorista Estado Islámiko. Lo ta trata di hòmbernan ku a radikalisá via internet.
E duo lo tabatin mas ku un blanku pa nan atentado, pero nan blanku principal tabata un di e konsiertonan di Taylor Swift na Viena. E peliger mas grandi ya ta atendé ku n’e kaba di akuerdo ku polis. Di momentu ta investigando si tin mas persona embolbé den e plannan pa e atentado.
