Despues di 70 aña ku a deklará cheetah ekstinto na India, resien a deskubrí un nèshi ku kuater yu den un reserva pa naturalesa. Segun BBC e supespesienan di leopardo aki a nase na Kuno National Park. E mama ta proveniente di Namibia i a keda trasladá aña pasá pa India huntu ku 7 otro ehemplar.
Pa basta aña kaba e pais ta purba restourá su populashon di cheetah despues ku esaki a keda deklará estinkto den 1952. Di momentu e pais ta traha riba un programa pa kua a importá 8 cheetah aña pasá i 12 otro ehemplar luna pasá a yega for di Suráfrika. Te asina leu e populashon ta biba bon den e ambiente nobo.
E animalnan a ekstinguí dor di yagmentu masal riba nan i dor ku su habitat a disparsé den transkurso di añanan. Di momentu e populashon mundial ta kalkulá na 7 mil ehemplar, di kua mayoria na Áfrika. Na Asia si e populashon ta kore peliger. Segun kálkulonan ta 50 só a sobra den naturalesa na Iran.
Na Oropa a emití un atvertensha pa kontagio ku salmonela okashoná pa kebab di karni’ galiña kontaminá. Mayoria di e kasonan aki ta ligá na negoshinan ku ta bende karni prepará di e forma aki. For di 2017 a registrá sigur 210 kaso di e tipo ‘Salmonella Virchow ST16’ den por lo ménos 5 pais Oropeo, Reino Uní i Merka. No tabatin kasonan mortal, pero hopi di esnan kontagiá a kaba den hospital.
Departamentunan di salubridat ta sospechá ku tin mas kaso i ku mas por sigui. Mayoria kaso a keda registrá na Fransia ku 111 kaso i Hulanda ku 34 kaso di e tipo ‘Salmonella Virchow ST16′. Mester menshoná aserka si ku e orígen di e kontagionan na Hulanda no ta konosí. Di otro banda a deskubrí e bakteria durante sigur 5 kòntròl entre 2018 i 2022. Na dos okashon esaki tabata den un karniseria i na tres okashon tabata trata di karga di karni’ galiña for di Brasil.
Mas di mil persona prominente den sektor di teknologia a ekspresá nan preokupashon pa ku e desaroyo rápido di inteligensha artifisial. Den un karta habrí (bo tambe por firma) entre otro propietario di Tesla Elon Musk i ko-fundadó di Apple Steve Wozniak ta hasi un yamada pa tuma un pousa ku e desaroyo aki temporalmente.
Inteligensha artifisial ta asina potente aworakí ku e por tuma trabou di hende over i esei no ta bai ta sin konsekuenshanan sosial, di akuerdo ku e firmantenan dje karta. Aparte di esei tin e riesgo tambe ku e tipo di programa aki por plama propaganda polítiko i desinformashon efisientemente.
E prominentenan ta boga pa 6 luna largu no traha programa nobo ku ta mas potente ku GPT-4, kua ta e vershon mas resien di e programam di inteligensha artifisial di e kompania OpenAI. E modelo aki ya ta kapas di krea teksto kompleto, krea imágen riba su mes i te asta skribi piesa di musik.
Den e karta tambe ta boga pa traha akuerdo durante e pousa aki riba e aspektonan di siguridat di inteligensha artifisial. Lo mester bin un supervishon riba e desaroyonan aki. E karta ta inkluí preguntanan manera “Mester outomatisá tur kupo di trabou?”, “Mester produsí mente no-humano ku por superá esun di ser humano?”, “Mester risga pèrdè sivilisashon manera nos konosé?” Segun e prominentenan ku a skirbi e karta no por laga e preguntanan aki den man di hende ku no ta elegí.
Nan ta splika ku nan petishon no ta pa para e desaroyonan aki permanentemente, pero mester pèrkurá si ku e desaroyonan aki no ta resultá den modelonan di inteligensha artifisial ku un kapasidat asina fuerte ku no por antisipá mas riba e resultado.
Audrey Hale di 28 aña, e persona responsabel pa e tiroteo na un skol na Nashville ku a resultá den 6 víktima mortal, tabatin un plan detayá. Polis a bin haña e plan kompañá pa un mapa di e skol i un manifesto den kas di e sospechoso. E sospechoso ta un èks alumno di e skol. Polis tin un teoria over di e motivashon di Hale, pero por lo pronto ta sigui investigá.
E tiroteo a tuma lugá djaluna mainta na un skol Kristian na Nashville, estado Tennessee. 6 persona inkluyendo tres mucha di 9 aña a pèrdè nan bida. Agentenan ku a akudí na e sitio di e tiroteo a eliminá e sospechoso. Hale tabata armá ku dos rifel di kombate i un pistol. Di 2 arma ta konfirmá ku e tabatin pèrmit.
Den e manifesto di Hale lo tin deskripshon di mas lokalidat ku e tabata ke ataká. E mapa di e skol ku outoridatnan a haña tabatin informashon detayá riba e sistema di seguridat di e skol. Presidente Biden den un reakshon a hasi un apelashon na Congress pa trata e tema di arma di kandela.
Papa Francisco a intensifiká e reglanan den Iglesia Katóliko pa kombatí abusu seksual. E lei original a drenta na vigor den 2019 pero tabatin un karákter temporal. E intensifikashon di e reglanan ta permanente i mas amplio.
Asina promé no tabata spesifiká ku esnan ku no por ekspresá nan mes no por defendé nan mes kontra intimidat no deseá. Tambe tin protekshon pa klokkenluider ku mèldu abusu. E lei nobo ta konta awor tambe pa kolaboradó i lidernan no spiritual. Papa Francisco a enfatisá ku e lei ta konta pa tur edat, pues pa tantu adulto komo mucha.
Tin basta sosten pa e paso aki den Iglesia Katóliko dor ku a introdusí un sistema kaminda por mèldu kasonan di abusu. Pero tin krítika tambe riba e echo ku obispunan ta obligá na mèldu kasonan na Vatikano, pero no na polis.
Outoridatnan na Italia a para i buta beslag djasabra riba un boto Aleman di reskate pa migrantenan. Esei despues ku djabièrnè tambe a buta beslag riba un boto di Médikonan sin Frontera.
E beslag ta forma parti di e maneho di e gabinete di promé minister Giorgia Meloni pa baha e kantidat di buskadónan di asilo ku ta buska refugio na Italia. E maneho ta inkluí medidanan manera pèrmit pa un akshon di reskate so pa dia pa despues nabegá pa un haf apuntá dor di outoridatnan.
E beslag a tuma lugá despues ku e boto a ninga un atvertensha pa para despues di un operashon den teritorio marítimo di Libia. Despues di e reskate ey e boto lo a sigui pa reskatá tres otro boto.
Segun Italia e operashonnan di reskate ta motivá hende pa sigui purba krusa Mediteraneo. Segun e organisashonnan di reskate di otro banda ta un grupo chikitu di e total so ta rekohé for di laman.
Propietario di TikTok Shou Zi Chew a paresé den e Kas di Representantenan, e parlamentu di Merka. E direktor di un di e retnan sosial mas popular na mundu mester a bin duna kuenta i rason relashoná ku preokupashonnan ku ta biba rondó di e app. Shou Zi Chew a haña vários pregunta riba e relashon entre TikTok i gobièrnu di China i riezgonan pa cyber security na Merka.
Gobièrnu di Merka ta básikamente èksigí di e kompania Chines propietario di TikTok ByteDance pa bende e ret ku un otro entidat si TikTok ke sigui den uso na Merka. Den liñanan general Shou Zi Chew a splika e parlamentu Merikano ku TikTok ta operá for di Merka i Singapore i ku no tin lasonan ku gobièrnu sentral di China. El a splika mas aleu ku na China mes niun hende ta usa TikTok sino su kontrapartida Chines Douyin. E último app ey por sierto tambe ta propiedat di ByteDance.
E direktor di TikTok sinemabrgo no a logra kombensé e komishon parlamentario ku a interog’é. E tabatin problema pa duna kontesta direkto i tambe e tabata desviá for di preguntanan riba bendementu di datonan di usuarionan. E no a kontestá tampoko ken a yud’é prepará pa e interogashon.
Ta di warda awor kua ta e konklushonnan ku e komishon di e Kas di Representantenan ta bai saka a base di e kontestanan ku Shou Zi Chew a duna:
Djaweps tabata un dia di wèlga nashonal na Fransia kontra di plannan di gobièrnu pa reformá e sistema di penshun di e pais. Mas ku 1 den 5 dosente a buta trabou abou i hopi skol a disidí sera pa nan no keda blòkiá manera sierto skol ku a disidí keda habrí. Meskos ta konta pa trahadónan na aeropuerto.
Mester a anulá alrededor di 30% di buelonan di akuerdo ku e korant Le Parisien. Un otro konosido korant, Le Monde, ta skirbi ku e manifestantenan a blòkia un sala di salida na aeropuerto Charles de Gaulle.
E protestanan tin un impakto grandi riba bida diário. Tráfiko aereo i públiko ta plat, kareteranan ta blòkiá i sushi no ta wòrdu rekohé. Tin te asta bario kaminda no tin suministro di koriente.
E protestanan ta dirigí kontra plannan di gobièrnu pa subi e edat di penshun di 62 pa 64 aña. E kantidat di penshonadonan na Fransia ta oumentando hopi lihé i e medida mester frena esaki pa e sistema no kai den otro. No opstante vários opheshon gobièrnu a implementá e plan via un lei separá den konstitushon di Fransia. Den transkurso di e aña aki e plannan mester konkretisá.
Outoridatnan Franses a limitá e kuotanan pa piska despues ku den poko tempu laman a trese sentenáres di dolfein morto kosta. Un korte haltu na Fransia a duna òrdu (nota di redakshon: artíkulo original tin imágen gráfiko!) pa prohibí piskamentu den partinan Franses di Atlántiko. Gobièrnu tin 6 luna di tempu pa indiká e áreanan kaminda por piska ainda i kuminsá supervisá e sektor di piskadó pa evitá ku nan ta fangu dolfein inintenshonalmente.
For di fin di aña pasá sigur 910 kadaver di dolfein a bin kaba riba kosta wèst di Fransia. Hopi kadaver tabatin nèt, hèrmènt di piska pegá na nan òf herida di propèler di boto.
Dor di falta di populashon di piská mas chikitu ta inevitabel ku e animalnan i piskadó ta haña nan konfrontá ku otro. Te ku aworakí gobièrnu no tabata kier a tuma medida severo, pero ku e òrdu di wes Fransia mester tuma pasonan mas drástiko pa protehá e animalnan aki kontra ekstinshon.
E populashon di orka na parti wèst di Merka ta kore peliger dor di endogamia. Asina e revista Nature, Ecology & Evolution ta informá. E populashon ta asina chikitu ku e ehemplarnan ta kaba ta par ku famia di serka. Konsekuentemente e orkanan ta fayesé hopi yòn i e populashon no ta haña chèns pa rekuperá. E orkanan femenino ta mas fértil rònt di 20 aña, pero hopi di nan no ta ni alkansá e edat ey mas.
E problema sinembargo no ta solamente e endogamia. Tin tres grupo grandi ku ta move na parti wèst di Canada i Merka pero e gruponan aki no a krusa i topa ku otro sufisiente den e último 30 generashonnan. Esaki ta okashoná pa e impakto di aktividat humano den siglo 20, ku ta inkluí kaptividat pa rekreo, polushon i piskamentu pa konsumo humano, lagando ménos pa e animalnan atras.
Segun sientífikonan e úniko manera pa salba e espesie di ekstinshon ta dor di limitá aktividatnan humano den e áreanan aki via e vários programanan di konservashon rònt mundu.
UNESCO ta pidi yagdónan di tesoro pa stòp di koba riba terenonan kaminda batayanan di promé guera mundial a tuma lugá. Partikularmente e parti Hulandes di Bèlgika Vlaanderen mester purba kumpli ku e petishon urgente aki. Einan tin hopi afisionado ku ta eksplorá e asina yamá ‘Flanders Fields‘ ku nan detektornan di metal ku ta stroba e trabou di historiadó i arkeólogonan.
E aktividatnan di e afisionadonan aki ta okashoná pèrdida permanente di informashon históriko. Wesu i otro ophetonan ta konta historianan ku mester wòrdu studiá kuidadosamente pa determiná kiko a pasa kaminda a haña nan. Afisionado no ta hasi e trabounan aki di akuerdo ku UNESCO i ta warda e ophetonan ku nan ta haña na kas.
Vlaanderen ta un di e lugánan kaminda algun di e batayanan mas intensivo di promé guera mundial a tuma lugá entre 1914 i 1918. Te dia di awe arkeólogonan ta deskubrí artefakto di e tempu ey den e área aki.
Un kaso di tiroteo den e siudat Aleman Hamburg a resultá den por lo ménos 8 morto, inkluyendo e sospechoso. Entre e víktimanan tabatin un dama na estado tambe. E tiroteo a tuma lugá durante un enkuentro di testigunan di Yehova.
Agentenan ku a akudí na e sitio a drenta e edifisio. Na e momentu ei nan a tende e último tiru. Na yegada den e kamber kaminda a tende e tiru polis a bin haña e sospechoso ku a usa su arma riba su mes. E sospechoso a usa un pistol outomátiko ku el a kumpra di forma legal den desèmber.
Tabatin alrededor di 50 persona presente na momentu di e tiroteo. Investigashon te asina leu ta mustra ku e sospechoso ta un hòmber Aleman ku tambe tabata testigu di Yehova, pero no ta konosí ta kiko a motiv’é.
Aparte di e kantidat grandi di munishon den su bibienda no a haña nada ku ta indiká ku e tabata forma parti di un organisashon. E hòmber no tin un pasado kriminal, pero si ta konosí ku e tabatin problemanan mental.
Fiskal di estado Virginia no ta bai pèrsiguí e mucha hòmber di 6 aña ku den yanüari a tira dirigí ku pistol riba su yùfrou di skol. Na NBC News e fiskal a indiká di tin problema pa pèrsiguí un mucha di 6. Remarkabel mirando ku for di investigashon di polis a resultá ku no ta trata di un aksidente.
Un dia promé ku e insidente e mucha a haña straf despues ku el a kibra e telefòn di su dosente. Esaki tabata motibu pa e mucha kue e arma di su mama bai skol ku n’e i tira dirigí riba su yùfrou. E dosente a keda heridá na man i kurpa. E mucha mester a keda den un instituto durante e investigashon.
Loke si a tuma lugá entretantu ta ku e presidente di e asosiashon bou di kua e skol ta kai i un conrector di e skol a haña òntslag. Dosentenan ta bati bèl pa basta tempu kaba riba komportashon di e alumnonan. Kolaboradónn ku tabata sospechá ku e mucha tabata harmá a mèldu esaki, pero no a haña oido.
Loke si e fiskal ta bai investigá ta si por pèrsiguí e mama di e mucha ku a tira…
Na Hapon a lanta konsternashon despues ku 3 persona a keda detené pa komportashon ahigiéniko den restorant di sushi. E personanan aki tabata entre otro lembe tayó i bestèk i buta nan bèk. Pa algun tempu kaba imágennan ta sirkulá riba retnan sosial. Despues ku outoridatnan a tuma nota, nan a drenta den akshon pa gara e trio aki.
Asina luna pasá un grabashon di un hòmber lembendo un bòter di sous di soya a bai viral. Tambe bo por mir’é skupi riba kuminda ku ta pasa riba e transport belts ku tin den restorantnan di sushi. Dado momentu hopi hende a kuminsá kopia e komportashon aki pa graba nan mes pa buta riba social media. E fenómeno a haña te asta e hashtag ‘sushi terror’.
Restorantnan dado momentu mester a tuma personal pa hiba e pedido di klientenan direktamente di kushina pa mesa, kibrando asina e tradishon di restorantnan di sushi. Outoridatnan no ta amused ku e weganan aki mirando e daño na e imágen di e restorantnan aki.
Hustisia ta aplikando un lei eksistente ku ta prohibí siudadano stroba kompania di hasi negoshi pa kombatí e fenómeno.
Na Gresia a lanta un ola di protesta siguiendo e choke entre dos trein siman pasá. Griegonan ta rabiá despues ku investigashon a mustra ku e choke entre e treinnan tabata resultado di mal maneho i falta di mantenshon. En partikular na e kapital Athena i den e siudatnan mas grandi tin vários manifestashon tumando lugá kaminda a registrá basta daño tambe na e edifisio di parlamentu i warda di polis. E manifestashonnan tin sosten di sindikatonan di transporte públiko, dosente i trahadónan den kuido.
Djarason e protestanan a bin resultá den konfrontashonnan fuerte ku polis. Outoridatnan a usa gas lakrimógeno despues ku algun manifestante a kuminsá manda molotovcocktails riba agentenan.
E protestanan a okashoná hopi káos den e infrastruktura di e pais. Gresia ta konsistí di vários isla ku ta konektá ku otro ku fèri, pero ku awor no ta den funshon. Konsekuentemente hopi hende no por bai trabou.
Pa loke ta e choke di trein ku a lanta e protestanan aki mester bisa ku investigashon a mustra riba falta di invershon i pues mantenshon. Konsekuentemente e sistema outomatisá di schakel no tabata funshoná pa kasi un dékada, rekiriendo asina maneho humano. Un fout humano finalmente a resultá den e choke entre e dos treinnan okashonando sigur 57 morto.
Un situashon komparabel ta tumando lugá na Fransia pa algun siman kaba
Un poko mas di 1 mion Franses a protestá kontra plannan pa reformá e sistema di pènshun den nan pais. E protestanan a lanta despues ku presidente Macron a anunsiá plannan pa subi edat di pènshun di 62 pa 64 aña. Den vários siudat kaminda manifestantenan a bai den kaya a registrá disturbio i konfrontashon ku polis.
Segun kálkulonan di gobièrnu di Fransia alrededor di 1.28 mion persona den hinter pais a partisipá den e protestanan. Sindikatonan ta bisa di otro banda ku lo ta trata di 3.5 mion Franses. Ma kapital di Fransia, Paris, a hasi vários desena di detenshon. Infrastruktura di e pais tabata un desòrdu total e siman aki. No tin transporte públiko, skolnan ta será i suministro di kombustibel tambe ta afektá.
Djarason e situashon a normalisá, pero pa djasabra awor ta antisipá riba mas protesta.
