by Webmaster | 07/03/2023 | Internashonal
E lider di Nort Korea Kim Jong-un tin sigur tres yu, di kua esun mayor ta yu hòmber. Asina servisionan di inteligensha na Sur Korea a informá nan parlamentu di akuerdo ku e agensia di prensa Surkoreano Yonhap.
Tin masha tiki informashon disponibel riba e bida privá di Kim Jong-un. Loke si tabata konosí ta e echo ku e tin por lo ménos 1 yu muhé yamá Kim Ju-ae ku aña pasá a aparesé den publisidat na mas ku 1 okashon. Esei a lanta spekulashon ku ta e yu muhé, su di dos yu pues, lo bira susesor di Kim Jong-un.
A resultá awor ku tantu e lider Nort Koreano su yu mayor komo esun mas yòn ta yu hòmber. Medionan na Sur Korea ta estimá ku e yunan lo mester a nase entre 2010 i 2017, pero fecha no ta konosí.
E famia di Kim Jong-un ta liderá Nort Korea for di añanan 40. Jong-un a yega na poder despues ku su tata Jong-il a fayesé despues di a sigui e promé Kim na kabes di Nort Korea Kim Il-sung. Den último añanan e pais tabata hopi den publisidat pa e provokashonnan ku tèst nuklear di Kim Jong-un.
by Webmaster | 03/03/2023 | Internashonal
Tin preparashonnan tumando lugá pa un tour mundial di ABBA Voyage, un konsierto ku imágennan virtual di e miembronan di e banda ABBA. Distribuidor Universal Music Group, kende a konfirmá esaki na e revista Variety, ta presentando e show aworakí na Londen, pero awor tin plan pa trese e show den otro pais tambe.
Segun e presidente di Universal e plannan ta den fase di desaroyo ainda. E show ta rekerí adaptashon spesial di salanan di konsierto. Representantenan di ABBA i Universal no a duna mas informashon. ABBA Voyage ta un éksito enorme na Lònden aworakí. Mas di 1 mion hende a bai wak e show kaba.
E show start den presensia di e integrantenan Anni-Frid, Benny, Björn i Agnetha, ku e públiko a mira despues den forma di hologram riba e podio. Tabata pa promé biaha den 36 aña ku a mira nan kuater huntu den públiko.
by Webmaster | 03/03/2023 | Internashonal
Gobièrnu di Canada a duna e kompania bio sientífiko Sunshine Earth Labs pèrmit pa produsí i bende kokaina. E pèrmit ta un konsekuensha di un kambio di maneho di e departamentu di salubridat pa baha e kantidat di persona ku ta muri di sobredosis den e provinsia British Columbia. Den e provinsia aki lo tin un promedio haltu di konsumidónan di droga.
Den un deklarashon e kompania a indiká ku e tin pèrmit tambe pa bende morfina, MDMA (esta e supstansia aktivo den xtc) i tambe heroina. Luna pasá un otro kompania, Adastra Labs, a haña un lisensia komparabel pa produsí i bende ekstraktonan di kanabis i mushrooms halusinante tambe.
Ku e maneho aki gobièrnu di Canada kier kita e stigma ku ta biba rondó di usuarionan pa asina stimulá hende di buska yudansa ku adikshon. E proyekto ta bai kana pa tres aña pa asina evaluá despues si e maneho nobo aki ta efektivo.
by Webmaster | 03/03/2023 | Internashonal
E ganadó di premio Nobel di pas 2022, e Belaruso Ales Bialiatski, a haña un kastigu di prison di 10 aña pa labamentu di plaka i finansiamentu di aktividatnan pa stimulá desorden públiko. Asina su organisashon pa derechinan humano Viasna a publiká. E organisashon di Bialiatski tabata duna sosten hurídiko i finansiero na otro Belaruso ku a partisipá na e protestanan masivo kontra gobièrnu di Belarus den 2020.
Presidente di Belarus Alexander Lukashenko, den Oropa konosí notoriamente komo e último diktador di e kontinente, a gana elekshon na e okashon ei, pero tantu oposishon di e pais komo opservadónan internashonal a deskartá e resultado komo froude. E protestanan kontra e resultado por a konta ku hopi represhon di parti di e gobièrnu di Lukashenko ku a yega na poder 30 aña pasá den e pais.
Segun kálkulonan lo tin mas o ménos 1500 persona será den prison pa motibunan polítiko. Ales Bialiatski a gana premio Nobel di pas aña pasá pa e trabou ku el a hasi pa purba restourá demokrasia na Belarus i pa yuda e presunan polítiko.
by Webmaster | 02/03/2023 | Internashonal
Na Iran a lanta preokupashon despues ku un kantidat grandi di mucha muhé a bira malu dor di venenamentu. For di fin di novèmber a konta sigur 900 kaso di venenamentu na sigur 30 skol pa mucha muhé.
No ta trata di algu mortal, pero esei no ta kita ku e hóbennan tin problema ku halamentu di rosea, biramentu di kabes i kansansio. Hopi di nan a kaba den hospital pa haña tratamentu.
No ta klaro ainda ta kiko ta pasando, pero e insidensia a lanta sospecho di mala fé pa asina tin un preteksto pa sera skolnan pa mucha muhé. Entretantu siudadanonan a kuminsá èksigí kontesta di outoridatnan.
by Webmaster | 02/03/2023 | Internashonal
Un choke frontal entre dos trein na Gresia a resultá den 57 morto i por lo ménos 66 persona heridá. Posiblemente e kantidat di mortonan ta bai subi mirando e estado krítiko di vários víktima den hospital i un kantidat deskonosí ainda di persona disparsé òf no identifiká. Ta asina ku dor di e choke algun kompartimentu a pega kandela butando ku ainda mester hasi outopsia pa identifiká vários kurpa.
Entretantu outoridatnan a investigá kiko a okashoná e aksidente lamentabel aki i awor Griegonan ta rabiá despues ku a resultá ku e tragedia ta okashoná dor di multiple posponementu di mantenshon na e spornan na e sitio. Segun medionan den e pais e sistema di siguridat na e sitio tin 9 aña kaba sin funshoná outomátikamente i tabata rekerí maneho humano. E minister di transporte di Gresia a tuma retiru siguiendo e aksidente.
by Webmaster | 01/03/2023 | Internashonal
Segun e direktor di FBI Christopher Wray e vírus di corona probablemente tabata kreá den un laboratorio Chines. Asina Wray a bisa den un entrevista ku Fox News, despues ku e korant The Wall Street Journal tambe a publiká e mesun ponensia e siman aki.
E pandemia lo a lanta kabes dor ku e vírus a skapa for di un laboratorio na e siudat Wuhan. E direktor di FBI a agregá ku e investigashon ta andando ainda i no a duna mas detaye. Segun The Wall Street Journal lo tin un dokumento sekreto na e ministerio Merikano di Energia ku ta suprayá e ponensia, pero na mes momentu e mesun rapòrt ta indiká ku no tin sufisiente prueba pa e ponensia.
Otro servisionan di inteligensha i instanshanan sientífiko no ta kompartí e opservashonnan di e direktor di FBI. Te ainda mayoria servisio di inteligensha i sientífiko ta kombensí ku e vírus tin un orígen natural, esta un kontagio di animal pa humano. Asina CIA te ainda no a tuma un posishon pa ku e orígen di e vírus.
WHO tambe a konkluí den mart 2021 ku e pandemia tin un orígen natural. E investigashon di WHO a para dor ku China no a kolaborá ku nan investigashon. Asina e pais no a duna pèrmit pa investigá e marshe kaminda e promé kontagio lo a tuma lugá.
by Webmaster | 01/03/2023 | Internashonal
Polis na Perú a detené un hòmber ku tabata transportá un momia den un tas pa mustra su amigunan. E agentenan a hasi e deskubrimentu ora nan a listra e hòmber, mirando su komportashon straño na un sitio kaminda trabounan arkeológiko ta tumando lugá na e siudat Puno.
Segun e hòmber e momia ta su amiga spiritual ku yama Juanita. E tabata warda e momia den un kaha banda di su televishon. Segun e hòmber e momia ta pèrtenesé na su tata, pero e no por a bisa kon su tata a yega na e kurpa.
Ta trata di un momia di mas o ménos 600 pa 800 aña. Segun eksaminashon di e momia ta trata di un hòmber ku a fayesé ku mas o ménos 45 aña. E momia tabata fásil pa warda dor ku e tabata prepará segun tradishon den posishon di hùrk.
E kurpa a keda konfiská i entregá na e ministerio di kultura. E hòmber ta den kustodia di outoridatnan miéntras investigashonnan ta kana.
by Webmaster | 28/02/2023 | Internashonal
Un kantidat deskonosí ainda di bruinvis a muri, keda heridá, bira surdu òf haña problema di reprodukshon. Asina un grupo di investigadó na Dinamarka, Alemania i Polonia a konkluí den un rapòrt konhunto. Bruinsvis ta un tipo di bayena Oropeo ku tamaño i aparensia di dòlfein.
E mamíferonan aki ta víktima di un serie di eksploshon den sèptèmber aña pasá na e asina yamá Nord Stream, un konekshon di pipa di gas bou di awa den parti nort di Oropa. Segun e investigadónan e eksploshonnan a lòs hopi polushon ku tabata pegá den e fondo di laman. Lo ta trata di 250 mion kilo di suspstansha kímiko.
E bruinvisnan ta biba entre otro den e region kaminda e eksploshonnan a tuma lugá. Tabata nèt den e temporada ku e animalnan ta topa ku otro pa reprodukshon. E populashon di mas o ménos 500 bruinvis den e region kaminda e desaster a tuma lugá no ta e úniko grupo di animal ku a sufri dor di e desaster ekológiko aki. E laman parti nort ta e habitat tambe pa foka i bakiou ku a sea muri òf bira surdu dor di e eksploshonnan.
Pa hopi aña kaba e teritorio marítimo parti nort ost di Oropa ta motibu pa preokupashon. Den pasado a dùmp hopi barí ku sushi kímiko den e region ei. E kousa di e eksploshon ta bou di investigashon ainda. Tin sospecho ku ta trata di sabotahe.
Kiko ta Nord Stream?
Nord Stream 1 i 2 ta un sistema di pipa pa transportá gas bou di awa for di Rusia pa Alemania. E Nord Stream 2 nuka no a bira operashonal pa motibu di e konflikto na Ukrania. Tambe Rusia a sera Nord Stream 1 den sèptèmber te próksimo aviso. Pues no tabatin suministro di gas na momentu di e eksploshon, pero ainda tabatin sufisiente gas ainda den e pipanan pa kousa e eksploshon.
by Webmaster | 27/02/2023 | Internashonal
Un di tres temblor a asotá e parti sùit-ost di Turkia riba djaluna. E sismo di 5.2 pa 5.6 riba skala di Richter a okashoná por lo ménos 1 morto i 69 persona heridá. Ta trata di e mesun region ku a keda afektá den simannan tras di lomba pa sigur dos temblor fuerte, okashonando mas di 50 mil morto na Turkia i Siria.
For di dia di e temblornan fuerte di dia 6 di febrüari tabatin míles di aftershock. Siman pasá por a sinti unu fuerte di 6.4 riba skala di Richter. Mester menshoná ku outoridatnan a hasi algun detenshon tambe relashoná ku e temblornan. Ta trata di persona ku lo ta responsabel pa e mal estado di edifisionan ku a kai den otro. World Bank ta kalkulá e daño total na Turkia na mas di 35 mil mion dòler.
by Webmaster | 24/02/2023 | Internashonal
Boeing a para entrega di su 787 Dreamliner despues ku a deskubrí un problema ku e fuselage, esta e kurpa, di e modelo aki. Asina e outoridat di aviashon Merikano Federal Aviation Administration (abreviá FAA) a konfirmá. Ta e tantísimo okashon ku e kompania Merikano mester para entrega di Dreamliner. FAA ta investigando si tin ku hasi meskos ku otro Dreamliner entregá resien.
Segun Boeing e seguridat di Dreamliners ku ta den uso aworakí no ta na peliger. Den último añanan tabatin vários okashon kaminda a konstatá problema na e modelo Dreamliner. Pa e motibu ei Boeing no a produsí Dreamliner den último dos aña pèrdiendo asina míles di mion dòler. Boeing lo kontinuá ku e produkshon i ta trahando riba un solushon. Entrega lo reanudá una bes ku FAA ta kombensí ku e problema ta kompletamente resolvé.
by Webmaster | 23/02/2023 | Internashonal
R. Kelly tin ku sinta 1 aña èkstra riba e 30 aña ku e tin ku sinta pa abusu seksual i trafikashon di hende muhé. Wes a bai di akuerdo ku e demanda di 20 aña èkstra kontra R. Kelly, pero e tin mag di kumpli ku e kastigu aki pareu ku su kondena di 30 aña. Manera kos ta mustra lo e por bandoná prison ku 80 aña.
by Webmaster | 22/02/2023 | Internashonal
Gobièrnu Hulandes mester stòp di warda datonan di pasaheronan di avion masalmente. Asina e Autoriteit Persoonsgegevens (AP) a publiká. E forma ku e ministerio di Hustisia Hulandes ta hasi esaki aktualmente ta un violashon serio di privasidat. E datonan aki ta wardá den un database pa 5 aña i esaki no ta pèrmití di akuerdo ku e outoridat.
Gobièrnu lo ta warda aparte di nòmber otro dato manera maleta, forma di pago i kiko bo a kome na bordo di e avion. Gobièrnu lo ta warda e datonan aki pa por sigui movementu di kriminal i terorista, pero e mayor parti di e datonan aki ta di hende ku no ta embolbí den nada ilísito. Segun e outoridat e datonan aki no ta relevante pa gobièrnu i pa e motibu ei mester limitá e rekohementu di informashon na esnan ku ta sospechá di algu na promé lugá.
by Webmaster | 22/02/2023 | Internashonal
Un tenshon kresiente a lanta entre e ehérsito mersenario Wagner Group i Rusia. Rusia tin sosten di e mersenarionan pa algun luna kaba den e parti ost di Ukrania. Segun e komandante di e ehérsito mersenario Rusia lo ta sabotiando su tropanan.
Rusia lo a keda sin suministrá munishon resultando den hopi pèrdida bou di e tropanan di Wagner Group. Awe e komandante a publiká un potrèt ku un kantidat grandi di mersenario ku a pèrdè nan bida kompañá pa un mensahe ku Rusia lo ta destruyendo e ehérsito dor di deliberadamente keda sin suministrá arma, munishon i otro material.
Rusia ta desmentí e ponensianan di e ehérsito mersenario. Segun e ministerio di defensa di Rusia lo ta trata di un intento pa krea divishon na benefisio di enemigu. E relashon entre Rusia lo a daña despues ku a prohibí e grupo di kontratá sòldat Ruso.
Ofisialmente no tin un relashon entre e grupo i Rusia, pero na vários okashon Wagner a operá na fabor di e pais.
by Webmaster | 21/02/2023 | Internashonal
Un temblor nobo i vários aftershock a tuma lugá djaluna den parti sùit di Turkia den e provinsia Hatay. Ta trata di dos sismo, un di 6.4 i un otro di 5.8 riba e skala di Richter.
E insidente ta sigui e dos temblornan di dia 6 di febrüari, pero tabata ménos fuerte. E temblornan di 6 di febrüari tabatin un forsa di respektivamente 7.8 i 7.5. Sifranan definitivo no ta konosí pero ta kalkulá ku ta trata di algun desena di morto i un kantidat mas grandi ainda di persona heridá.
E tragedia no por a tuma lugá na un pió momentu. Hopi hende ya a pèrdè nan hogar i e trabounan di reparashon andando mester a para, ya ku hopi servisio manera koriente i suministro di awa a kai afó atrobe.
