Na e siudat Merikano Chicago a pidi 25 aña mas kontra R. Kelly. E kastigu ei tin ku bin riba e 30 aña ku e kantante tin ku sinta na New York. Aña pasá un hurado a hañ’é kulpabel di vários akto di inmoralidat, entre nan produkshon di material pornográfiko ku ta inkluí menor di edat.
Segun e fiskal R. Kelly ketu bai ta forma un peliger pa sosiedat. R. Kelly ta será for di 2019 i ta sintando un kastigu pues di 30 aña na New York. Sentensia ta sigui djaweps próksimo.
Segun un kálkulo nobo Hapon no ta konsistí di kasi 7 mil sino mas di 14 mil isla. E pais a usa un teknologia digital nobo ku a lokalisá mas di 7 mil isla nobo. Na total Hapon ta konsistí awor di 14.125 isla.
Te ku aworakí no tabata fásil hasi un kálkulo eksakto, pasobra e zona kompleto ta konsistí di 370 mil kilometer kuadrá. Ademas tabatin formashon i desaparishon di algun isla dor di aktividat volkániko.
E diferensha grandi entre e kantidat ku tabata asumí promé ta debí na e echo ku e wardakosta Hapones a usa mapa di papel pa konta e islanan. Durante e konteo ei den 1987 a disidí ku solamente e pidanan riba awa ku un sirkunferensha (omtrek) di 100 meter òf mas ta konta komo isla, resultando pues den un total ofisial pero inkorekto di 6.852 isla.
Pa e konteo nobo a usa un sistema digitalisá kombiná ku potrèt di ariba. E kantidat mas haltu di isla por sierto no ta nifiká ku e pais a amplia su teritorio marítimo. E kantidat mas haltu ta registrá den e teritorio ya establesé.
Un kompania fantasma na Israèl lo ta tras di vários kampaña di desinformashon i manipulashon di elekshon. Asina un team di mas di 100 periodista for di vários pais a konkluí despues di un investigashon grandi guiá pa entre otro e korant Britániko The Guardian i e emisora públiko di Alemania ZDF.
Tres periodista, di kua 2 Israelí i un Franses, a bai undercover na e kompania ku por sierto no ta registrá niun kaminda. Nan a fingi di ta traha pa un komersiante ku supuestamente kier a manipulá un elekshon na Áfrika.
E doño di e kompania Tal Hanan (potrèt) a bisa nan ku di 33 intento, 27 kampaña tabatin éksito. E investigadónan no a logra konfirmá si esaki berdaderamente ta asina, pero en todo kaso si a logra konfirmá ku e kompania aki tabatin influensha riba elekshon presidensial na Nigeria den 2015 kaminda e ya konosido kompania Merikano Cambridge Analytica tambe tabata embolbé.
E kompania tin un software ku por krea te 33 mil profil falsu riba social media pa manda mensahenan negativo dirigí na sierto grupo riba Twitter, LinkedIn, Facebook, Telegram i Instagram.
E identidat di esnan ku a hasi uso di e servisionan di e kompania fantasma aki no ta konosí, pero si por dedusí ku ta trata di hende ku influensha den kompania, partidonan polítiko i servisionan di inteligensha. E doño Tal Hanan en todo kaso a bisa e periodistanan ku e no ta haña ku e ta hasi algu robes.
World Health Organisation a para e investigashon pa e orígen di e vírus di corona den silensio. Asina e revista sientífiko Nature a publiká. Segun investigadónan ku a papia ku e revista e investigashon a keda pegá despues ku tantu e gobièrnu Merikano komo China a kuminsá kulpa otro. Mas aleu nan a bisa e revista ku rònt mundu polítika a stroba e investigashon dor di buta preshon riba e investigadónan pa saka sierto konklushon.
Te asina leu a investigá 4 senario di kua, asina nan a konkluí, esun mas probabel pa nan ta ku e vírus tin su orígen serka vlermùis ku a pas’é pa hende, kisas via otro animal. Klek akinan pa e rapòrt.
Esei tabata e promé fase. E problemanan a kuminsá dos aña despues na kuminsamentu di e di dos fase di e investigashon. E investigadónan ta splika ku ta bèrdat ku China no tabata transparente riba kiko tabata pasando na kuminsamentu di e pandemia den e pais. Pero World Health Organisation mes no a hasi sufisiente pa mitigá intervenshon polítiko.
Básikamente fase dos di e investigashon nunka a tuma lugá. Durante e fase ei mester a investigá kon e vírus lo a plama, pero China no ke koperá ku akseso pa e investigadónan. E pais ke hiba su propio investigashon.
E kantidat di mortonan siguiendo e temblornan na Turkia i Siria ta sigui oumentá. Entretantu a konfirmá mas di 40 mil morto, di kua mas ku 35 mil a kai na Turkia. Einan tin mas di 13 mil persona hospitalisá. Ku e kantidatnan por papia di e pió temblor den último 100 aña pa Turkia. Na Siria a raportá mas di 6 mil morto.
De bes en kuando ta logra reskatá hende ku a keda protehá bou di e ruinanan, pero e kasonan aki a bira skars. E trabounan di reskate entretantu a drenta fase di perkurá pa kuminda, refugio i kuido. Na total 26 mion hende ta den nesesidat agúdo aworakí. E temporada friu, falta di material sanitario i higiéniko i e riesgo di plamamentu di malesa ta hasi e trabounan mas difísil ainda.
Djaluna anochi Merka a indiká ku nan no tin indikashon ku e ophetonan ku nan a basha abou tin un orígen ekstraterestre, esta di pafó di nos planeta. Tur esaki despues ku e Merikanonan a basha un balòn di orígen Chines abou. Pero awor China ta kulpando Merka di a laga balòn Merikano drenta nan teritorio aereo sigur 10 biaha aña pasá. Algu ku e Merikanonan manera ta di spera ta desmentí. Pero te ainda no tin klaridat ta kiko e Merikanonan a basha abou.
Den wikènt tras di lomba ehérsito di Merka a basha por lo ménos 3 opheto abou ku tabata sirkulá den e teritorio aereo di e pais. Djabièrnè na Alaska, djasabra pegá ku frontera ku Canada i djadumingu riba e lago Huron. Kada un di e ophetonan aki tabatin un forma diferente segun e informashonnan ku Merka ta dunando. E suseso ta sigui despues ku un siman promé e flota aereo a basha un balòn Chines abou. Di esei nos tin konfirmashon for di China mes, nada straño einan. Pero ta ken ta tras di e ophetonan di den wikènt tras di lomba? Kiko ta pasando? Ta algu nobo òf ta algu ku awor numa ta deskubrí?
Echo ta ku Kas Blanku ta papia abiertamente di e fenómeno di den wikènt despues di e insidente ku e balòn Chines òf ta mas dispuesto pa papia riba esaki. Segun un funshonario ku a papia ku The New York Times sea China òf un otro pais kier wak si Merka ta pagando tinu.
Loke si ta echo ta ku e Merikanonan a hasi nan instalashonnan di radar mas sensibel, loke ta fasilitá visibilidat di ophetonan ku anteriormente no tabata visibel riba radar. Lógikamente ta interseptando mas opheto na alturanan haltu. Ta asina ku e radarnan ta adaptá awor tambe pa interseptá ophetonan ku ta move na un velosidat mas abou ku avion. Sowieso tur hende ta mas alerta aworakí.
Awor di mes e fenómeno a lanta e pregunta tambe si nos tin di haber aki ku algu ekstraterestre, esta algu for di pafó di nos planeta. Pasobra te asina leu un pregunta no ta kontestá ainda: ta kiko eksaktamente nan a basha abou i di nan unda e tres ophetonan ta bini? Di siman pasá China mes a konfirmá mesora ku e balòn tabata Chines. Di esei tin imágen ku no ta laga espasio pa duda. E hefe di NORAD, e organisashon militar ku ta vigilá e teritorio aereo di Canada i Merka, mes a indiká ofisialmente ku no ta ekskluí ku e tres ophetonan di den wikènt tin un orígen ekstraterestre.
Tuma bon nota pues ku uso di e palabra UFO en todo kaso ta na su lugá ora bo tend’é òf les’é den notisia te ora ku e orígen di e ophetonan ta konosí. E abreviashon ta para pa Unidentified Flying Opbject, pues un opheto buladó ku no ta identifiká. Esei ta nifiká pues algu diferente for di ekstraterestre, kua ta nifiká proveniente di pafó di nos planeta / atmósfera.
E investigashon tras di loke a pasa ku buelo MH17 den 2014 a para temporalmente. Famianan di e víktimanan ta desapuntá ku no tin mas a sali for di e investigashon. Mayor problema den e investigashon a resultá ku tabata difísil yega na pruebanan direkto di ken tabata operá e sistema di rakèt ku a basha e avion abou. Te ainda no a indetifiká e personanan ku tabata operá e sistema.
E Joint Investigation Team (JIT), ku ta guia e investigashon, nunka no a logra konfirmá e punto importante aki i pa e motibu ei no ta konosí ken mester pèrsiguí. Úniko indikashon te asina leu ta ku presidente di Rusia Vladimir Putin a duna un òrdu e tempu ei pa usa sistemanan di defensa pisá, inkluyendo pues e sistema BUK for di kaminda a lansa e rakètnan. Aparte di esei, komo hefe di estado Putin por konta ku imunidat.
Tin otro kasonan individual andando den korte internashonal, pero pa loke ta trata e investigashon di e Joint Investigation Team, esaki por lo pronto a para. Promé minister di Hulanda Mark Rutte ta desapuntá i ta spera ku e kulpabelnan responsabel pa e tragedia keda pèrsiguí lo mas pronto posibel.
Na Alemania tin entretantu 55 persona detené pa preparashon di un gòlpi di estado. For di fin di aña pasá e divishon di kombatimentu di terorismo na Alemania a señalá un organisashon ekstremoderechista yamá Reichsbürger. E miembronan di e organisashon no ta rekonosé e repúblika di Alemania den su forma aktual i ke restourá e imperio Aleman ku segun nan a èksistí entre 1871 i 1945 i te ainda lo ta èksistí klandestinamente.
Den desèmber outoridatnan a detené sigur 25 persona ku tabatin plan pa kometé un serie di atake terorista riba parlamentu pa asina tuma poder na Alemania. For di e momentu ei regularmente polis a haña pista pa detené otro miembronan di e grupo. Di e 55 sospechosonan detené 54 ta di Alemania i unu ta kedando na Italia. 24 di esnan na Alemania ta será te ora ku nan kaso keda tratá.
E organisashon internashonal pa individuonan superdotá Mensa a inskribí nan miembro mas yòn den historia. Ta trata di Teddy, un hobensito di 4 aña ku a haña su miembresia ya ku tres aña. Pero ta awor numa e organisashon a publiká riba esaki. Teddy por konta te shen den 6 idioma, entre nan Chines Mandarin, i por lesa kaba. Pa bo por bira miembro di Mensa bo mester ta pèrtenesé na e 2% mas sabí bou di hende.
Segun e mama Teddy a kuminsá lesa ku 26 luna dor di simplemente wak televishon i kopia sonido di lèter. Poko despues el a nota ku e por a lesa karta via pòst sin problema. Úniko problema ku nan tin ku Teddy ta ku e ta siña solamente loke ta interes’é. Tambe nan a ripará kaba ku e mucha ta realisá ku e ta diferente, pero tòg nan ke dun’é un bida mas normal posibel.
E asina yamá Doomsday Clock ta pará na 11or, 58 minüt i 30 sekònde, kua ta nifiká ku e orario simbóliko aki ta pará 10 sekònde mas serka di 12or kompará ku e biaha anterior ku a kambia e orario. Nos ta pará pues 90 sekònde apartá for di 12or, kua ta nifiká ku nunka ántes nos tabata asina serka di fin di humanidat manera nos konos’é aworakí.
E Doomsday Clock ta un sistema simbóliko desaroyá 76 aña pasá pa sientífikonan i polítikonan ku ta manehá esaki via e organisashon Bulletin of Atomic Scientists na Chicago.
E mayor motibu pa e kambio di orario aki, e di 26 okashon, ta e situashon na Ukrania. Segun e organisashon e invashon di parti di Rusia ta bai kontra vários akuerdo ku a hasi siguiendo e di dos guera mundial. E ta lanta e pregunta profundo kon paisnan lo atendé ku otro den futuro di akuerdo ku e organisashon. Ta bin aserka ku e deklarashonnan ku Rusia a hasi relashoná ku krítika for di eksterior ta buta kòrda riba e mesun lenguage ku a hera di resultá den un konflikto nuklear den pasado den tempu di e asina yamá krísis di Cuba na 1962.
Mas aleu e sientífikonan ta opservá ku humanidat ta menasá tambe pa kambio di klima, e pandemia ku nos a kaba di pasa dor di dje, teknologia divisivo i plamamentu di informashon falsu. Tur e aspektonan aki ta kontribuí na deterioro di humanidat.
E Doomsday Clock a originá den 1947 i tabata pará e tempu ei na 7 minüt pa 12, ora ku un guera nuklear mundial tabata menasá nos planeta. Delaster biaha ku e orario a kambia tabata na 2019 ora ku el a bai 11or, 58 minüt i 20 sekònde. Delaster biaha ku e Doomsday Clock tabata mas alehá for di 12or tabata den 1991, na final di guera friu, ora ku e oloshi a bai para na 17 minüt pa 12or.
Mester warda tur app i otro mensahenan di chat ku ta relashoná ku trabou di ministernan, sekretarionan di estado i alto funshonarionan di gobièrnu. Asina Adviescollege Openbaarheid en Informatiehuishouding a informá minister Bruins Slot di Binnenlandse Zaken na Hulanda.
Tur hende mester haña akseso na e deliberashonnan ku gobièrnu ta hasi ora di tuma desishon. Mas aleu e akseso ta di importansha vital pa por skirbi historia. Asina e kolegio di konseho ta argumentá. Di e forma ei demokrasia por funshoná mihó. Esaki ta e promé konseho na gobièrnu despues ku a lanta e órgano aña pasá.
E kolegio a lanta despues ku a sali afó ku promé minister Mark Rutte tabata delete su mensahenan di sms riba su telefòn di trabou regularmente. Manera Inspectie Overheidsinformatie en Erfgoed a konkluí òktober último, esaki no ta pèrmití. Te asina leu ta e usuario di e telefòn ta responsabel pa warda tur informashon riba un server sentral.
Segun e konseho nobo esaki mester tuma lugá di awor i dilanti di forma outomatisá i kubri tur mensahe ku ta regardá maneho di gobièrnu. Si ta pa e Adviescollege Openbaarheid en Informatiehuishouding e medida aki mester keda implementá pa mas tardá próksimo aña.
Lucile Randon, nasé den 1904 i pues e persona mas na edat na mundu, a fayesé na 118 aña di edat. Sùr André, manera nan tabata yam’e, a fayesé den su soño na un kas di kuido na Toulon, den parti sùit di Fransia. Randon tabata siegu i tabata den ròlstul.
El a tuma e nòmber Sùr André ora ku el a bira miembro di e orden katóliko di Fransia. Dos aña pasá e tabata den notisia rònt mundu despues di a sobrebibí un infekshon ku Covid-19.
Sùr André a bira e persona mas na edat na mundu despues ku e Hapones Kane Tanaka a fayesé aña pasá na 119 aña di edat. Ainda investigadónan ta buskando e persona mas na edat na mundu na e momentu aki despues di fayesimentu di Sùr André.
E dama Oustraliano Erchana Murray-Bartlett a registrá un rèkòrt mundial koriendo un marathon 150 dia siguí. Na total el a kore un distansia di 6300 kilometer krusando Oustralia di e parti mas nort na Cape York (Queensland) te e siudat portuario den sùit Melbourne. Ku e logro aki Murray-Bartlett a gana un lugá den e Guinness Book of Records.
Ofisialmente e por yama su mes e dama ku a kore mas dia siguí den historia. E rèkòrt anterior ta riba nòmber di e dama Britániko Kate Jayden, ku a alkansá 106 dia siguí. Ku e kareda aki Murray-Bartlett a rekohé 100 mil dòler Oustraliano ku lo bai pa Wilderness Society, un organisashon ku ta lucha pa protekshon di animalnan na Oustralia. Den dianan benidero Erchana ta bai rekuperá di e kareda largu aki.
Gobièrnu sentral di Reino Uní na Lònden a blòkia un proposishon di lei ku Eskosia a trata den desèmber ku ta pèrmití hende kambia di sekso mas fásil. E ministernan ta preokupá si e proposishon no ta bai kontra di e igualdat di derechi. E gobièrnu Britániko ta mustra riba siguridat di hende muhé ku e argumento ku hende hòmber ku kambia di sekso pa motibunan kuestionabel por haña akseso mas fásil na fasilidatnan i espasionan eksklusivamente reservá pa hende muhé, manera baño i kamber pa kambia paña.
E paso aki ta promé biaha ku e gobièrnu Britániko ta intervení ku un veto riba un proposishon di lei Eskoses. Promé minister di Eskosia Nicola Sturgeon a reakshoná furioso riba e paso di e gobièrnu di Reino Uní i ta pensa di tuma su propio pasonan kontra e desishon di Lònden.
E proposishon di lei di Eskosia tabata inkluí entre otro un bahada di e edat mínimo pa kambia di sekso di 18 pa 16 aña. Tambe a kita e rekerimentu di un diagnóstiko médiko pa hustifiká e kambio di sekso. Otro paisnan manera Irlanda, Dinamarka i Argentina ya a adoptá leinan komparabel.
