Peruanonan ta bai urna den 2024 i no den 2026. Asina e parlementu di e pais a disidí ku 2/3 parti pa adaptá e konstitushon di tal forma ku e elekshon por tuma lugá mas promé. Próksimo aña e lei lo keda adoptá pa konsolidá e desishon. E intenshon ta pa aliviá e krísis polítiko na Perú despues ku parlamentu a manda èks presidente Pedro Castillo kas pa entre otro korupshon. Korte Supremo a disidí ku Castillo mester keda detené pa sigur 18 luna.
Hende muhé no ta pèrmití mas na universidatnan di Afganistan. Asina e ministerio di enseñansa di e régimen di Taliban a disidí te próksimo aviso. E prohibishon ta konta pa tantu universidatnan públiko komo esnan privá. E paso aki ta sigui otro medidanan ku e gobièrnu nobo di Afganistan a tuma relashoná ku posishon di hende muhé den e pais, ku a mira mayoria di nan libertatnan bai atras bou di e régimen Islámiko di Taliban.
Tambe resien e régimen a duna òrdu na wesnan pa reintrodusí e sekshonnan mas severo di sharia, e lei Islámiko ku ta pèrmití ehekushonnan públiko i kastigu di morto ku piedra. Taliban a yega bèk na poder aña pasá despues di dos dékada di okupashon Merikano.
E kantidat di mortonan dor di kontagio ku Covid-19 na China ta oumentando rápidamente. E subida di repente aki ta sigui despues ku gobièrnu a disidí suavisá medidanan pa kombatí plamamentu di e malesa. E mayor kantidat di kontagio ta registrá na Shanghai i Beijing.
Outoridatnan a mira nan obligá di suavisá medida despues di un kantidat grandi di protesta den vários parti di e pais den simannan tras di lomba. Segun koresponsalnan di vários agensia di prensa internashonal trahando na China e krematorionan di e pais ta drai konstantemente pa prosesá e kantidat di mortonan. No por otro pasobra frizernan di mortuarionan ta kompletamente yen, miéntras normalmente ta tuma 5 dia promé ku un kremashon òf entiero.
Segun estudionan riba e situashon na China, e medidanan ekstremo di gobièrnu a buta ku hopi Chines no a yega di haña e malesa i pa e motibu ei te ku aworakí masha poko Chines tin resistensha natural kontra Covid.
Siguiendo e informe anteriormente e siman aki riba korupshon den parlamentu di Union Oropeo, entretantu un di e sospechosonan a konfesá di ta kulpabel. Ta trata di e Italiano Francesco Giorgi, kasá di Eva Kaili, visepresidente di Parlamentu Oropeo ku entretantu a keda saká for di funshon. Giorgi a rekonosé ku el a partisipá den pagonan for di Qatar i Marokko.
Presidente di Komishon Oropeo Ursula von der Leyen a anunsiá djaluna ku lo lanta un komishon di étika ku mester kontrolá tur instansha ku ta kai bou di Union Oropeo. Siman pasá a detené sigur kuater persona pa labamentu di plaka risibí for di Qatar i Marokko. Durante entrada polisial a bin topa ku sentenáres di míles di euro ku lo ta proveniente di embahador di Marokko na Polonia, ku posiblemente tambe ta embolbé.
Sospechoso prinsipal den e kaso aki ta keda e polítiko Griego Eva Kaili (riba potrèt), un di e 14 visepresidentenan di parlamentu Oropeo. E pagonan lo ta pa influenshá parlamentu Oropeo na fabor di Qatar i Marokko.
Na Turkia a arestá un periodista pa distribushon di informashon inkorekto riba un kaso di abusu seksual. Segun e korte ku a trata e kaso e notisia a okashoná pániko bou di poblashon. Ta trata akinan di e promé kaso penal kontra un periodista despues di un lei kontroversial ku gobièrnu di Turkia a adoptá resien.
E periodista en kuestion, Sinan Aygül, a publiká un artíkulo kaminda el a bisa ku un grupo di hòmber adulto a abusá seksualmente di un mucha di 14 aña, entre nan agentenan polisial i militar. Aygül a retirá e artíkulo i un mensahe riba Twitter riba e kaso despues, pero el a keda detené finalmente tòg.
Ta asina ku parlamentu di Turkia dos luna pasá a aprobá un lei ku ta fasilitá detenshon di periodistanan ku ta plama desinformashon. Segun presidente Recep Tayyip Erdogan e lei ta nesesário pa defendé siudadanonan. E kastigu por keda imponé pa mas tantu tres aña. Tin krítika ku por usa e lei pa atendé ku disidentenan bou di preteksto falsu.
Perú a implementá un estado di emergensha di un luna. Tambe mester tene kuenta ku un posibel toke de keda. Tin bastante tenshon dor di manifestashonnan den e pais despues ku parlamentu a vota pa retirá èks presidente Pedro Castillo siman pasá. Su siguidónan ta èksigí su libertat i un elekshon nobo aworakí mes.
Gobièrnu di Perú di su parti a duna di konosé via e ministerio di defensa ku e estado di emergensha mester buta un fin na vandalismo, violensha i blokeo. En partikular pafó di e kapital di e pais e protestanan ta basta fuerte. Por lo ménos 7 persona a pèrdè nan bida i vários otro a keda heridá durante e protestanan.
Castillo a keda detené despues di su òntslag pa rebeldia dor ku el a purba para e votashon dor di hasi un intento pa disolvé parlamentu pa evitá ku nan lo a bah’é. Su susesor ta èks visepresidente Dina Boluarte kende a hala e fecha pa elekshon dilanti ku dos aña. Pero e simpatisantenan di Castillo no ke esaki.
Restorantnan na Hulanda no ta tuma reservashon mas pa Pasku. Asina Koninklijke Horeca Nederland a duna di konosé den medionan Hulandes. E aña aki ta pa promé biaha despues di pandemia ku restorantnan por habri kompletamente riba sea dia 25 òf 26. Sinembargo e restorantnan te ainda ta konfrontá ku falta di personal i gastunan haltu.
Pa e motibu ei algun restorant a opta pa no habri Pasku, pero konsekuentemente tur kliente ta buska alternativa dor di kome otro kaminda ku ta haña nan konfrontá ku un demanda muchu haltu pa akapará. Un alternativa segun Koninklijke Horeca Nederland ta pa bestèl kuminda, pero e sektor ei tambe por hañ’e konfrontá ku un demanda muchu haltu durante Pasku.
Pa promé biaha den kasi 40 aña Dinamarka ta bai haña un gobièrnu sentrista ku ta sobresaltá tantu e partidonan iskierdista komo esnan derechista. Esei ta konklushon di analistanan polítiko awor ku e sosial demókrata Mette Frederiksen ta na turno pa forma un gobièrnu ku partidonan liberal i polítikonan moderá.
Segun Frederiksen, un dama di 45 aña, insiguridat internashonal ta rekerí un gobièrnu ku por buta preferensha polítiko un banda i traha riba unidat nashonal. E bloke iskierdista a haña un mayoria minimal ku 90 asiento den un parlamentu ku ta konta 179 asiento. Esaki no ta sufisiente pa un gobièrnu iskierdista stabil i pa e motibu ei mes Frederiksen a opta pa kolaborá ku e partido derechista di èks promé minister Lars Rasmussen pa forma un gobièrnu di unidat nashonal.
Djaweps awor ta presentá e gobièrnu nobo i kiko lo bira e komposishon di minister.
Presidente di komishon Oropeo Ursula von der Leyen a lanta un komishon étiko ku tin ku vigilá instanshannan Oropeo riba korupshon. E desishon ta sigui despues ku djaluna a lanta basta pregunta relashoná ku detenshon di vários miembro di Parlamentu Oropeo den wikènt. Ya lo tin 20 entrada hudisial ehekutá.
E konfiansa den Union Oropeo ta bou di basta preshon. Asina tin detenshonnan a tuma lugá relashoná ku pagonan risibí di Qatar pa influenshá e parlamentu. Te asina leu Qatar ta kontradesí e aksusashonnan.
Asina tin vários otro miembro di e parlamentu ku ta embolbí den kasonan di entre otro labamentu di plaka. Te asta visepresidente di parlamentu Oropeo, e sosial demókrata Griego Eva Kaili, lo ta embolbé den e práktikanan aki. Lo ta trata segun BBC di un di e mayor eskándalonan den historia di Union Oropeo.
E presidente nobo di Perú Dina Boluarte ta bai aselerá elekshonnan presidensial ku dos aña. Asina e presidente a anunsiá na televishon. Di e forma aki Boluarte ke baha tenshon den e pais despues di a retirá èks presidente Pedro Castillo den un votashon parlamentario. Parlamentu a retirá Castillo i laga deten’e pa “inkapasidat moral” i “rebeldia” despues ku el a purba disolvé parlamentu pa para un votashon kontra su posishon.
E desishon a lanta konsternashon bou di e siguidónan di Castillo ku a bai manifestá den kaya pa èksigí su libertat. Esaki a bin resultá den bastante konfrontashon físiko ku polis, kondusiendo entre otro den wikènt den morto di sigur dos manifestante na e siudat Andahuaylas. Einan manifestantenan a pega un airport na kandela i tene agente polisial i kolaboradó di aeropuerto rehen.
E konosido kantante Celine Dion a kanselá tur su konsiertonan pa kuminsamentu di próksimo aña. E artista a anunsiá riba su kuenta di Instagram ku e ta sufri di stiff-person-syndroom, un malesa ku no ta paresé dje frekuente ei. Segun estimashonnan 1 den kada mion persona ta haña e malesa neurológiko aki ku ta afektá e sistema di imunidat tambe.
E malesa lo a afektá Celine su kapasidat pa kana i kanta. E artista a bisa den un mensahe konmovedor na su fanátikonan ku e ta sinti nan falta i ku e ta spera di por kontinuá su konsiertonan pronto atrobe. Celine Dion no a hasi konsierto mas for di kuminsamentu di e pandemia di Covid-19.
A partir di próksimo aña Sur Koreanonan por selebrá nan kumplimentu di aña segun e kalènder ku nos ta usa den nos parti di mundu. Ta asina ku parlamentu di e pais ta bai abolí e forma tradishonal di kalkulá dianan di kalènder i adoptá e kalènder oksidental. Esei ta nifiká ku nan edat lo keda kalkulá meskos ku nos, esta den dia, luna i aña a partir di e fecha di nasementu.
Den e sistema aktual Sur Koreanonan tin un aña kaba a partir di e fecha di nasementu. Riba promé di yanüari tur hende ta hasi aña pareu. Ku otro palabra, un baby nasé riba 31 di desèmber ya por tin 2 aña di edat despues di tiru den e sistema aktual. E kambio lo drenta na vigor a partir di yüni próksimo aña.
Na Perú un mayoria den parlamentu a vota pa retiru di, entretantu èks, presidente Pedro Castillo. Poko promé ku esei Castillo a purba disolvé parlamentu pa evitá su retiru. Poko despues el a keda detené dor di polis pa rebeldia. Den transkurso di djarason Castillo a anunsiá na televishon ku e kier a disolvé parlamentu pa forma un gobièrnu di emergensha. Tambe el a anunsiá un toke de keda.
E anunsio a lanta basta konsternashon i a bai kompañá pa retiru di vários minister. Castillo ta akusá di un intento di gòlpi di estado. E èks dosente a gana elekshon presidensial inesperá aña pasá, pero for di momentu ku el a instalá tin basta krítika riba su maneho. Segun parlamentu, ku a vota ku gran mayoria pa su retiru, Castillo ta “moralmente inadekuá” pa manehá e pais dor di tur e kambionan den su gabinete i investigashonnan di korupshon.
The Trump Organization ta kulpabel di froude fiskal. Asina un hurado a disidí den un kaso entamá na New York. For di un investigashon ku a dura sigur tres aña a resultá ku e kompania di èks presidente Donald Trump a yuda funshonarionan haltu evadí impuesto.
Trump Organization kua ta manehá vários hotels, kampo di gòlf i otro imobilarionan rònt mundu mester tene kuenta ku un multa di 1.6 mion dòler. En prinsipio e montante ei no ta masha haltu pa un kompania manera Trump organisation, pero di otro banda e daño finansiero por akumulá na momentu ku invershonistanan disidí hala atras for di un kompania ku tin un kondena registrá.
Hopi prueba a bin dilati dor di konfeshonnan di e direktor di e kompania Allen Weisselberg, kende a duna informashon balioso a kambio di redukshon di kastigu. Weisselberg ta bai será pa 5 luna. Trump Organization a bisa den un reakshon di lo apelá e kaso.
E frakshon demokrátiko na Merka a logra reforsá su mayoria den Senado Merikano ku un viktoria den di dos buèlta na estado Georgia. Akinan e demókrata Raphael Warnock a gana di e republikano Herschel Walker. Durante e elekshon luna pasá ningun di nan a logra un mayoria apsoluto, i p’esei mester a tene un di dos buèlta.
E demókratanan no tabatin mester di e asiento aki por sierto ya ku nan tabatin un mínimo di 50 asiento kaba, plùs e asiento desisivo di visepresidente Kamala Harris. E viktoria di Warnock sigur ta kumbiní e demókratanan akaso un miembro disidí vota diferente. aparte di esei un mayoria den senado ta garantisá influensha riba posibel kandidatonan pa Korte Supremo. Tambe Senado por para un eventual proseso di impeachment di un presidente.
