by Webmaster | 07/11/2022 | Internashonal
Sigur 38 persona a keda heridá dor di un kandela na e siudat New York riba e isla Manhattan. E kandela a tuma lugá den un edifisio kaminda e bateria di un basikel eléktriko a kue vlam i sigui plama. Segun e hefe di bomberonan ya tin kasi 200 kandela okashoná pa baterianan ióniko ku ta konsistí di entre otro litium.
E korant The New York Times a skribi ku tabatin sigur 5 baiskel eléktriko presente riba e di 20 piso kaminda ta prohibí subi ku baiskel.
by Webmaster | 07/11/2022 | Internashonal
Habitantenan di Reino Uní ta bai haña 1 dia liber èkstra próksimo aña riba 6 di mei. Esaki relashoná ku koronamentu di prens Charles III. Djaluna 8 di mei ta bira un dia di fiesta. Charles su mama Elizabeth a fayesé riba 8 di sèptèmber último. Charles ta fungiendo di momentu komo rei, pero e berdadero koronamentu ta un proseso ku ta tuma tempu.
Asina a koroná Elizabeth riba 2 di yüni 1953, miéntras su kasá George VI a fayesé den febrüari di 1952. Na e okashon ei tambe tur siudadano a haña un dia liber èkstra. E intenshon di e dia liber ta pa siudadanonan por organisá nan propio festividatnan lokal rondó di koronamentu.
by Webmaster | 07/11/2022 | Internashonal
Na Alemania outoridatnan enkargá ku protekshon di mucha a reskatá un mucha muhé di 8 aña ku tabata será den kas di su abuelonan kasi hinter su bida. E deskubrimentu a tuma lugá na e pueblo Aleman Attendorn. Outoridatnan a mobilisá despues di a haña un tep anónimo.
Segun agensia WDR na Alemania e mucha lo a sali bai pafó pa último biaha ora e tabatin un aña i mei. E mucha por lesa i skirbi, pero su mama lo no tabata ke pa e tin kontakto ku otro mucha. Mas aleu e mucha no tabata mustrá señal di maltrato físiko òf falta di nutrishon.
No ta konosí ta kiko a motivá e mama. E último aki i e abuelonan a keda ketu for di moment ku outoridatnan a aparesé. Nan tur tres ta sospechá di robo di libertat di e kriatura. E mama a logra tene e situashon sekreto tur e añanan aki dor di informá outoridatnan ku el a muda pa Italia. Ora e pais a desmentí ku e dama i e yu ta biba einan, outoridatnan a start un investigashon. Lo ta trata di un kaso kaminda e mayornan tabata den korte pa supervishon di e mucha.
by Webmaster | 07/11/2022 | Internashonal
Na Tanzania 19 persona a pèrdè nan bida dor di un aterisahe di emergensha di un avion den Victoria Lake. Asina agensia di prensa Reuters ta informá. Ta trata di un avion di e kompania Precission Air, e kompania privá di aviashon mas grandi na Tanzania.
E aksidente ta okashoná pa mal tempu. E pilot di e avion lo a purba aterisá riba pista di un aeropuerto pegá ku e lago. Na total tabatin 39 persona i 4 tripulante riba e buelo. Sobrá pasahero a keda reskatá dor di piskadónan i timnan di reskate ku a yega na e sitio despues.
by Webmaster | 04/11/2022 | Internashonal
E presidente saliente di Brasil Jair Bolsonaro a hasi un apelashon na su siguidónan pa para ku blokeonan di karetera. Siguiendo e resultado di elekshon djadumingu último simpatisantenan di Bolsonaro a subi kaya i lanta blokeo di kaya komo protesta kontra e viktoria di Luiz Inacio Lula da Silva. Segun Bolsonaro e tipo di akshonnan aki no ta legítimo. Un dado momento tabatin 200 karetera blokiá den hinter e pais. Algun simpatisante di e presidente lo ta haña ku ehérsito mester intervení.
by Webmaster | 04/11/2022 | Internashonal
Na Fransia a lanta hopi konsternashon despues ku un miembro di parlamentu a hasi un ekspreshon diskriminatorio. Esaki a pasa durante un diskurso di Carlos Martens Bilongo riba e tema di migrashon ora e miembro Grégoire de Fournas di Rassemblement National a grita e palabranan meimei di un diskurso: “Manda nan bèk Áfrika!” Ora ku e emoshonnan a lanta, a skòrs e debate. De Fournas mes mester tene kuenta ku e komishon di étika por disidí skòrs e tambe.
by Webmaster | 04/11/2022 | Internashonal
E kantidat di ekspreshonnan di odio kontra hudiu riba internet a oumentá fuerte despues ku Rusia a invadí, okupá i aneksá algun parti di Ukrania. Esaki segun un publikashon di Fundamental Rights Association di Union Oropeo. Notisia falsu i desinformashon ta alimentando sintimentunan kontra hudiu.
Asina Rusia lo ta hustifiká e agreshon kontra Ukrania dor di abusá di palabranan manera “nazi” i “genosidio”. E minister di Asuntunan di Eksterior di Rusia Sergei Lavrov a mustra na un okashon riba e frekuensha ku presidente di Ukrania Volodimir Zelenski ta reiterá ku e ta hudiu. Esei segun Lavrov no ta nifiká ku Zelenski no ta simpatisá ku nazismo.
by Webmaster | 04/11/2022 | Internashonal
Na Pakistan un atentado riba èks promé minister Imran Khan a frakasá. E hòmber responsabel a keda eliminá dor di servisionan di siguridat. Imran Khan a haña bala na pia i su situashon ta stabil. E atentado a tuma lugá durante un diskurso di e èks promé minister ku a manehá e pais di 2018 te ku aprel di e aña aki ora ku parlamentu a vota pa su retiru. No opstante esaki Khan por konta ku hopi sosten ainda serka hopi siudadano.
Khan ta meimei di un tour dor di e pais pa kore kampaña. Algun luna pasá a lanta un kaso kontra dje pa intimidashon di polis is e poder hurídiko di e ‘trias politica’ di e pais.
by Webmaster | 03/11/2022 | Internashonal
Nikolas Cruz, e hòmber ku den 2018 a asesiná 17 persona den un kaso di tiroteo na un skol na Florida, ta bai será pa bida largu. Asina korte na Florida a disidí. E kastigu ta ekskluí e oportunidat pa redukshon di kastigu. Ministerio Públiko a pidi kastigu di morto, pero hurado a konsiderá un kastigu di sèl pa restu di su bida sufisiente.
E tiroteo a tuma lugá den febrüari di 2018 na Stoneman Douglas High School na Parkland. Nikolas Cruz tabata di skòrs for di e skol ora el a kometé su krímen.
by Webmaster | 03/11/2022 | Internashonal
E kriminal di guera Liberiano Kunti Kamara a keda sentensiá djarason na Fransia pa bida largu. Segun korte Kamara a kometé krímen kontra di humanidat i aktonan di tortura na Liberia. E kondenado a biba anteriormente 12 aña di forma klandestino na Hulanda kaminda el a haña asilo den 2004. Den 2016 el a bai biba na Bèlgika i dos aña despues na Fransia kaminda el a keda detené.
Dos luna promé ku su detenshon e organisashon Civitas Maxima a hasi un petishon pa su detenshon. Tur e tempu ku el a biba na Hulanda e hòmber a usa un nòmber falsu. Na 2012 el a atkirí nashonalidat Hulandes. Segun NOS, Hulanda lo a haña atvertensha riba e hòmber, pero no tin klaridat kua ta e pasonan ku e pais a tuma.
Promé ku el a hui pa Oropa Kamara tabata un lider rebelde di e organisashon armá United Liberation Movement for Democracy (ULIMO) na Liberia kaminda den 1993 i 1994 el a kometé krímennan kontra humanidat.
by Webmaster | 03/11/2022 | Internashonal
Nort Korea a bolbe lansa un serie di rakèt. E biaha aki ta na Hapon mester a yama estado di emergensha relashoná ku e lansamentunan. Poko despues outoridatnan den e pais a anulá esaki ora a resultá ku e proyektilnan a disparsé for di radar. Segun un bosero di gobièrnu Hapones e proyektil a alkansá un altura di 2000 kilometer i un distansha di 750 kilometer. E pais a kere ku tabata trata di rakèt interkontinental.
Sur Korea tambe lo a detektá e lansamentunan indikando ku esakinan a frakasá. Nort Korea a kuminsá ku lansamentu di rakèt despues di a atvertí kontra presensia di militarnan Merikano den e region. E Merikanonan ta hasiendo ehersisionan militar huntu ku Sur Korea.
by Webmaster | 02/11/2022 | Internashonal
Minister di Asuntunan di Eksterior Hulandes Wopke Hoekstra a duna òrdu pa sera tur warda di polis Chines inmediatamente. Riba papel e wardanan tabata parse ofisina ku ta regla asuntunan atiministrativo, manera prolongashon di reibeweis i dokumentonan komparabel.
Pero tin indikashonnan hopi fuerte tambe ku e ofisinanan aki ta sirbi komo warda pa vigilá siudadanonan Chines kedando na Hulanda. Den algun kaso e ofisinanan lo ta sirbi pa buta preshon riba hende. E echonan a bin dilanti den un investigashon di RTL Nieuws i Follow The Money.
by Webmaster | 02/11/2022 | Internashonal
Presidente di Brasil Jair Bolsonaro a kibra silensio i disidí aseptá su derota. Asina e presidente saliente a partisipá den un deklarashon kòrtiku kaminda el indiká mas aleu ku e ta respetá konstitushon di e pais.
Ta promé biaha ku nos ta tende di Bolsonaro despues di e elekshon presidensial djadumingu último na Brasil. Anteriormente tabata antisipá ku lo el a apelá e resultado. Durante e aparensha kòrtiku, Bolsonaro no a bisa nada di su kontrinkante Luiz Inacio Lula da Silva.
by Webmaster | 02/11/2022 | Internashonal
Israelitanan a bai urna awe pa di 5 biaha den apénas 4 aña pa skohe un parlamentu nobo. Èks promé minister Benjamin Netanyahu ta spera di hasi un comeback polítiko despues di un aña den oposishon i ta hole viktoria.
Den enkuestanan su partido Likud ta parse di hala mayoria voto. Anteriormente e aña aki e koalishon aktual a pèrdè su mayoria pèrtá den parlamentu loke a resultá den un elekshon nobo. E pais ta pasando dor di un impase polítiko ku ta opstakulisando stabilidat polítiko.
by Webmaster | 02/11/2022 | Internashonal
Djarason mainta, orario Asiátiko, Nort Korea a lansa por lo ménos 10 tipo di rakèt. Asina ehérsito di Sur Korea a partisipá. Un di e rakètnan lo a aterisá 60 kilometer for di kosta di Sur Korea. Den un reakshon e pais a lansa tres rakèt den direkshon di frontera ku nan pais bisiña Nort Korea.
E lansamentunan a buta algun parti di Sur Korea den estado di alarma i siudadanonan mester a bai skonde den kèlder. Segun outoridatnan na Sur Korea lo ta promé biaha ku un rakèt a dal asina serka di nan kosta.
Nort Korea a indiká ku e lansamentu a keda provoká pa e ehersisionan militar masivo ku Merka i Sur Korea ta hibando pegá ku e península.
