by Webmaster | 10/01/2024 | Internashonal
E sekuestro di un presentadó di notisia i personal di un planta di televishon na Ecuador a yega na un fin. Un grupo di hòmber ku kara tapá i harmá ku arma di kandela i eksplosivo a invadí e studio djamars durante un transmishon live. E sekuestro a yega na un fin despues ku unidatnan spesial di polis a yega i drenta e studio.
E suseso a tuma lugá na Guayaquil, den parti sùit wèst di Ecuador. Aparte di e atake riba e planta aki tambe a sekuestrá 7 agente polisial na diferente lugá. Tambe a registrá eksploshon na e kapital Quito.
E suseso ta sigui despues ku djaluna presidente di e pais a yama estado di emergensha siguiendo huida di e kriminal notorio Fito for di prison.
Presidente Daniel Noboa ta papia di un guera sivil i a duna òrdu na ehérsito pa intervení kontra e violensha di e gangnan kriminal. E pais bisiña Perú a posishoná tropa na e frontera ku Ecuador relashoná ku e eskalashon di violensha.
by Webmaster | 21/12/2023 | Internashonal
Èks presidente di Surnam Desi Bouterse a keda kondená den apelashon na 20 aña di prison relashoná ku e asina yamá Decembermoorden ku a tuma lugá riba 8 di desèmber 1982. Ku e sentensia aki despues di 41 aña famianan di e víktimanan por fin a haña klaridat. Bouterse no tabata presente den korte.
E Korte di Hustisia a konsolidá e dos sentensianan anterior diktá pa Krijgsraad. Tampoko no tin un òrdu ainda pa detené Bouterse inmediatamente. Esaki no ta reglá ainda den lei di Surnam apesar di un petishon di Ministerio Públiko.
No opstante esei ku e sentensia aki si Bouterse mester bai será. En prinsipio por deten’é, pero no ta konosí na unda e ta. Ainda pa lei Bouterse por pidi presidente Chan Santhoki pa apsolv’é di e kastigu, pero chèns ta kasi nihil ku e presidente lo hasi esaki.
Den e mardugá di 7 pa 8 di desèmber 1982 e régimen di Bouterse a detené vários periodista, abogado, dosente, komersiante, militar i lidernan sindikal pa despues torturá i kaba ehekutá nan. Di e 16 personanan aki 15 a pèrdè nan bida di akuerdo ku fiskal. Su konklushonnan ta basá riba vários testimonio i investigashon forénsiko di e kurpanan.
by Webmaster | 20/12/2023 | Internashonal
Un wes na Merka a disidí ku mester publiká nòmber di 180 persona ku tabatin lasonan ku Jeffrey Epstein. E korant Miami Herald a pidi wes pa publiká e nòmbernan. Epstein ta e finansiadó Merikano ku a buta un fin na su bida den 2019 despues ku a deten’é pa un kaso grandi di abusu seksual di menornan.
Ta trata di nòmbernan di víktimanan, kolaboradónan i otro posibel sospechosonan di aktonan inmoral. E nòmbernan di e víktimanan menor di edat si mester keda konfidensial. Ya tin algun sospechoso konosí, manera Alan Dershowitz, dosente na Harvard.
E nòmbernan ya ta den e dokumentonan ku korte ta disponé di dje relashoná ku un otro kaso sivil ku ya a finalisá. Den e kaso ei a resultá ku e èks di Epstein Ghislaine Maxwell lo a yuda fasilitá e abusu di Virginia Giuffre. Epstein i Maxwell tabatin un relashon den añanan 90 i a sigui kolaborá 30 aña ku otro despues.
Maxwell a bai será den 2021 pa 20 aña pa su ròl. Epstein su kaso a yega na un fin dor di su morto den 2019.
by Webmaster | 18/12/2023 | Internashonal
Nort Korea a lansa un rakèt den direkshon di Mar Hapones. Asina ehersito di Sùit Korea a konfirmá entre otro na agensia di prensa Yonhap. E rakèt a sali for di e region di Pyongyang i a alkansá un distansha di mil kilometer promé ku el a kai den laman.
Ya ta di 5 okashon kaba e aña aki despues ku den febrüari, mart, aprel i yüli e pais a tene lansamentu di rakèt pa distanshanan largu. E lansamentu aki ta sigui un atvertensha di Sur Korea i Merka pa e menasa di un atake nuklear di parti di Nort Korea.
Na kabamentu di siman pasá Merka i Sur Korea a reuní ku otro pa papia riba e situashon riba e península Koreano ku e paisnan ta kompartí ku otro.
by Webmaster | 15/12/2023 | Internashonal
Guyana i Venezuela lo yega na un solushon pasífiko pa e konflikto di frontera entre e paisnan. Asina presidente di Guyana Irfaan Ali a bisa despues di un enkuentro ku su kolega Venezolano Nicolas Maduro.
E presidentenan a reuní ku otro na Saint Vincent i Grenadines riba invitashon di e promé minister di e pais. E presidentenan a akordá ku otro ku nan lo sigui nan palabrashonnan na Brasil. E último pais ei tambe ta urgiendo na e paisnan pa resolvé nan diferenshanan. Brasil ta kompartí frontera ku ámbos pais.
E region den disputa, Essequibo, ta tópiko di diskushon for di siglo 18. Ta un region ku 100 mil habitante ku tantu Venezuela komo Guyana ta claim komo teritorio. Den 1899 un komishon internashonal di arbitrahe a konsedé e region na Guyana, pero Venezuela nunka a rekonosé e desishon ei.
Riba 3 di desèmber Venezuela a tene un referèndem kaminda votadónan a aprobá aneksashon di e region. Despues di preshon internashonal presidente Nicolas Maduro a bai di akuerdo pa sinta na mesa ku su kolega Guaynes.
by Webmaster | 11/12/2023 | Internashonal
E presidentenan di Venezuela i Guyana lo reuní ku otro djaweps próksimo pa papia riba e disputa rondó di e region Essequibo, un region ku ámbos pais ta èksigí. Di momentu e region ta rekonosé internashonalmente komo teritorio di Guyana.
E reunion ta bai tuma lugá riba inisiativa di promé minister di Saint Vincent i Grenadines, kaminda nan lo topa ku otro tambe. Di momentu Saint Vincent i Grenadines ta presedé e inisiativa di kolaborashon CELAC.
Tantu Venezuela komo Guyana a solisitá presensia di presidente di Brasil Lula na mesa. Ámbos pais ta kompartí un frontera ku Brasil ku resien a mobilisá militar den e region. Presidente Lula a urgi su koleganan pa trata na de-eskalá.
Di momentu e Korte Internashonal di Hustisia ta tratando e asuntu, pero te asina leu no tin un desishon a kai. Pa e motibu ei mes e Korte a pidi Venezuela pa respetá e fronteranan manera nan ta aworakí.
Segun un konsulta popular tené na Venezuela siman pasá 95% di Venezolanonan lo ta na fabor di aneksashon di e region den disputa. No tin masha klaridat ta kiko presidente Maduro ke logra ku e referèndem.
Djabièrnè último riba petishon di Guyana tin reunion riba nivel diplomátiko tras di porta será a tuma lugá den e Konseho di Siguridat di Nashonnan Uní. No ta konosí kiko a sali for di e reunion ei.
by Webmaster | 08/12/2023 | Internashonal
Parlamentu di Dinamarka a bai di akuerdo ku un lei ku ta prohibí kimamentu di koran, e buki sagrado di Islam. E lei ta kontroversial dor di su implikashonnan pa libertat di ekspreshon.
Den e parlamentu 94 miembro tabata na fabor kontra 77 miembro ku no ta di akuerdo ku e lei. E lei lo ta enserá un kastigu di prison di 2 aña na momentu ku esaki wòrdu violá.
E proposishon pa e lei a bin dilanti despues di protestanan na Dinamarka kaminda tabatin kimamentu di e buki. Esei a kondusí na protestanan den paisnan mòslem ku a kondená e kimamentu di buki. Na Dinamarka esei a lanta preokupashon pa ku posibel atentado komo represaya si e akshonnan ei kontinuá. E pais ke yega na un balanse di libertat di un banda, inkluso esun di religion versus siguridat nashonal.
Segun proponentenan e lei no ta afektá libertat di ekspreshon. Lo tin otro formanan pa kritiká un religion sin mester di kima e buki sagrado di e religion.
by Webmaster | 08/12/2023 | Internashonal
Konseho di Siguridat di Nashonnan Uní ta reuní djabièrnè pa papia riba eskalashon di e disputa entre Venezuela i Guyana. E paisnan ta den konflikto riba soberania riba e region Essequibo ku ta aktualmente bou di maneho di Guyana.
Djadumingu Venezuela a tene un referèndem riba e status di Essequibo. Segun e enkuesta popular 95% di e pais lo ta ofisialmente di akuerdo pa aneksá e region ku ta den disputa. Siguiendo e referèndem Korte Internashonal di Hustisia a atvertí Venezuela pa no tuma akshon adishonal.
Djaweps Merka i Guyana a tene ehersisionan militar konhunto. Lo ta trata di ehersisionan di rutina, pero no ta sekreto tampoko ku Merka ta desaprobá Venezuela su akshonnan.
Na Brasil presidente Luiz Inácio Lula da Silva a deklará ku un konflikto harmá no ta benefisiá e kontinente. E pais a posishoná militar na su frontera ku Venezuela komo prekoushon i tene e konflikto pafó di fronteranan di Brasil. Alabes e presidente a hasi un apelashon na organisashonnan regional pa intermediá pa yega na un solushon pasífiko.
by Webmaster | 07/12/2023 | Internashonal
Èks presidente di Perú Alberto Fujimori ta den libertat atrobe pa motibunan humanitario. Fujimori tin problema di salú pa algun tempu kaba. Imágennan ku a keda publiká riba retnan sosial ta konfirmá esaki.
E èks presidente tabata sintando un kastigu di 25 aña pa su embolbimentu den asesinato di 25 Peruano den añan 90. El a haña e kastigu den 2009.
E asesinatonan pa kua e tabata den prison a tuma lugá na dos diferente okashon den 1991. Esnan responsabel lo a haña un pago di e gobièrnu di Fujimori, ku na e momentu ei tabata den konflikto ku iskierdistanan den e pais.
Fujimori tabata presidente di Perú di 1990 te 2000 i tabata basta popular pa e forma ku el a yuda ekonomia di e pais drecha. Pero siguiendo un kaso di korupshon den aña 2000 el a hui pa e pais di su mayornan, Hapon. Einan el a tuma retiru via fax.
5 aña despues ora el a bai Chile pa prepará pa su regreso na Perú, el a keda detené i ekstraditá pa Perú.
by Webmaster | 05/12/2023 | Internashonal
Un avioneta mester a hasi un aterisahe di emergensha den un bario suburbano di Paris. E tres pasaheronan a keda heridá i trasladá pa hospital. Riba potrètnan di e sitio por dedusí ku tin basta daño na e avion, ku a bin para por sierto nèt patras di un edifisio ku apartamentu.
Segun outoridatnan lo tabatin un fayo den e motor. Na bordo tabatin un instruktor di mas di 80 aña i dos hóben adulto den nan 20 i piku aña. Segun e último informenan e pasaheronan no ta gravemente heridá.
E avion a sali for di e lugá Rouen, un siudat na mas o ménos 128 kilometer for di e sitio kaminda el a kai i tabata bayendo den direkshon di Versailles. Outoridatnan ta investigando e suseso.
by Webmaster | 04/12/2023 | Internashonal
Na Venezuela un referèndem riba aneksashon di e region Essequibo na Guyana a resultá den un viktoria pa esnan na fabor. Segun e resultado partisipá pa e konseho elektoral di e pais 95% di esnan ku a vota ta na fabor di aneksashon di e region.
Essequibo ta tópiko di diskushon for di siglo 18. Ta un region ku 100 mil habitante ku tantu Venezuela komo Guyana ta claim komo teritorio. Den 1899 un komishon internashonal di arbitrahe a konsedé e region na Guyana, pero Venezuela nunka a rekonosé e desishon ei.
Djabièrnè último e Korte Internashonal di Hustisia a manda un atvertensha por eskrito pa Venezuela pa no tuma pasonan pa kambia e situashon aktual. Pa hopi tempu e konflikto no tabata biba asina fuerte. Te na momentu ku den 2015 a deskubrí kantidatnan grandi di reserva di petroli den e region.
For di e momentu ei presidente Nicolás Maduro a mustra interes pa e region kai bou di Venezuela. Ku e referèmdem Maduro lo ke buta preshon riba Guyana pa e pais entregá e region.
No ta konosí kua ta e pasonan ku e presidente Venezolano ke tuma ku e resultado aki. Na Guyana en todo kaso tin basta preokupashon pa ku e pasonan di e gobièrnu di Venezuela.
CARICOM a hasi un yamada na Venezuela pa tuma desishonnan ku koutela, pero e pais a rechasá e krítika.
by Webmaster | 01/12/2023 | Internashonal
Èks lider militar i èks presidente di Surnam Desi Bouterse lo tende riba 20 di desèmber si e ta keda kondená pa e asina yamá Decembermoorden di 1982. Asina Ministerio Públiko na Surnam a partisipá djaweps. Riba e mesun dia lo dikta sentensia tambe kontra e èks militarnan Benny Brondenstein, Iwan Dijksteel, Stephanus Dendoe i Ernst Geffery. Kontra kada unu tin un demanda di 20 aña di prison. E akusadonan ta keda para ariba ku nan ta inosente.
Den mardugá di 7 di desèmber 1982 a detené vários periodista, abogado, dosente, komersiante, militar i lidernan sindikal pa despues torturá i kaba ehekutá nan. Di e 16 personanan aki 15 a pèrdè nan bida di akuerdo ku fiskal. Su konklushonnan ta basá riba vários testimonio i investigashon forénsiko di e kurpanan.
Durante tratamentu di e kaso nunka Bouterse a paresé den korte. Ta ora el a keda kondená den 2019 na 20 aña di prison el a presentá pa firma pa apelashon di e sentensia. Bouterse ta tene Hulanda responsabel pa e asesinatonan. Segun e èks presidente e suseso mester a evitá un invashon di Hulanda den e luna ku e asesinatonan a tuma lugá.
by Webmaster | 30/11/2023 | Internashonal
Polis na Alemania a detené dos hóben pa sospecho di preparashon di un atentado na e siudat Kolonia. Nan lo tabatin kontakto ku otro riba retnan sosial pa plania esaki. E atentado lo mester a tuma lugá dia 1 di desèmber.
E atentado lo a konsistí di atakenan ku bòm sea na un snoa òf e konosido merkado di Pasku. Lo ta trata di un hóben desendiente di Afganistan i un otro for di Rusia di 15 i 16 aña ku ya tabata opservá pa servisionan di inteligensha.
Di momentu ta investigando kuantu tempu nan tabatin kontakto kaba i kon leu nan tabata ku preparashonnan.
by Webmaster | 30/11/2023 | Internashonal
E konosido Merikano Henry Kissinger a fayesé na 100 aña di edat na su kas na Connecticut. Kissinger tabata minister di Asuntunan di Eksterior pa Merka i konsehero di siguridat nashonal bou di respektivamente Richard Nixon i Gerald Ford. Aparte di su karera polítiko Kissinger tabata un diplomat.
Den aña 70 e tabata un di e aktornan den vários akontesimentu. Asina el a yuda prepará e akuerdonan ku mester a trese un fin na e guera na Vietnam.
Tambe el a yuda restourá kontakto entre Merka i China, fungi komo mediadó entre Merka i Rusia i inisiá diálogo entre Israèl i paisnan den region Árabe.
Kissinger ta konsiderá un di e arkitektonan prinsipal di Merka su polítika di eksterior te ora ku el a retirá relashoná ku Watergate huntu ku Richard Nixon. Despues di e époka ei el a traha prinsipalmente den mishonnan diplomátiko.
by Webmaster | 27/11/2023 | Internashonal
Habitantenan di e isla Eskoses Lismore a uni forsa pa salba e úniko negoshi riba e isla dor di kumpra esaki. Asina BBC a informá djadumingu.
Lismore tin mas o ménos 160 habitante aparte di e vários weekendhuis riba e isla. E tienda ku ta sirbi tantu komo toko komo pòstkantor tabata kore peliger di disparsé despues ku e doño a disidí reanudá su trabou komo dosente di skol.
E habitantenan a disidí pa uni forsa i rekohé fondo pa salba e establesimentu. E habitantenan lo manehá e tienda konhuntamente. Si e tienda a disparsé esaki lo a nifiká ku e habitantenan di e isla mester biaha 3 ora ku fèri si nan ke kumpra kos na supermarket òf den toko.
Si e tienda a disparsé esaki probablemente lo nifiká ku tempran òf lat e isla lo no ta habitá mas.
